Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 THUTO 94

Barutiwa ba Jesu ba Amogela Moya o Mokgethwa

Barutiwa ba Jesu ba Amogela Moya o Mokgethwa

Matšatši a lesome ka morago ga gore Jesu a boele legodimong, barutiwa ba gagwe ba ile ba amogela moya o mokgethwa. Ba o amogetše ka ngwaga wa bo-33 ge batho bao ba tšwago dinageng tše dintši ba be ba tlile Jerusalema go tlo keteka monyanya wa Pentekoste. Ka nako yeo, barutiwa ba Jesu ba e ka bago ba 120 ba be ba kgobokane ka phapošing ya ka godimo ntlong e nngwe gona moo Jerusalema. Gateetee gwa direga mohlolo. Morutiwa yo mongwe le yo mongwe o ile a dulwa hlogong ke selo seo okarego ke kgabo ya mollo, gomme ba thoma go bolela ka maleme a fapafapanego. Ke moka ka ntlong yeo gwa ba le modumo wo okarego ke wa phefo e kgolokgolo.

Batho bao ba bego ba tlile Jerusalema ba etšwa dinageng tše dingwe ba ile ba kwa modumo woo, gomme ba kitimela ntlong yeo gore ba yo bona seo se diregago. Ba ile ba makala kudu ge ba ekwa barutiwa ba Jesu ba bolela maleme a mantši. Ke moka ba re: ‘Batho ba ke Bagalilea, bjale go tla bjang gore ba kgone go bolela maleme a gabo rena?’

Ke moka Petro le baapostola ba bangwe ba ema ka pele ga lešaba leo.  Petro a le botša kamoo Jesu a bolailwego ka gona le gore Jehofa o mo tsošitše bahung. A re: ‘Gona bjale Jesu o legodimong ka letsogong le letona la Modimo, gomme o re neile moya o mokgethwa. Ke ka baka leo le bonego mehlolo ye le go kwa ka yona.’

Batho bao ba ile ba kwešiša seo Petro a se boletšego, gomme ba botšiša ba re: ‘Bjale re dire eng?’ Petro a re go bona: ‘Tlogelang go dira dilo tše mpe gomme le kolobetšwe leineng la Jesu. Le gona Modimo o tla le nea moya o mokgethwa.’ Letšatšing leo, batho ba e ka bago ba 3 000 ba ile ba kolobetšwa. Go tloga letšatšing leo, barutiwa ba Jesu kua Jerusalema ba ile ba thoma go oketšega ka lebelo. Moya o mokgethwa o ile wa thuša baapostola go thoma diphuthego tše dintši. Diphuthegong tšeo, ba be ba ruta barutiwa ba Jesu dilo ka moka tšeo Jesu a ba boditšego tšona.

“Ge e ba o bolela phatlalatša ‘lentšu leo le lego molomong wa gago,’ gore Jesu ke Morena, le gona o dumela pelong ya gago gore Modimo o mo tsošitše bahung, gona o tla phološwa.”​—Baroma 10:9