Jesu o ile a kopana le balatedi ba gagwe kua Galilea, gomme a ba nea taelo ya bohlokwa kudu yeo e rego: ‘Eyang le rute batho ba dinageng ka moka ka Mmušo wa Modimo. Le ba rute go dira dilo tše ke le rutilego tšona, gomme le ba kolobetše.’ Ka morago ga moo, a ba tshepiša a re: ‘Tsebang gore ke tla ba le lena ka mehla.’

Ka morago ga matšatši a 40 a tsošitšwe bahung, Jesu o ile a tšwelela go barutiwa ba gagwe ba bantši kua Galilea le Jerusalema. O ile a ba ruta dithuto tše bohlokwa gomme a dira le mehlolo e mentši. Ka morago ga moo, Jesu o ile a kopana le baapostola ba gagwe la mafelelo Thabeng ya Mehlware. O ile a re go bona: ‘Le se ke la tloga Jerusalema. Le duleng moo gomme le letele seo Tate a le tshepišitšego sona.’

Baapostola ba gagwe ba be ba sa kwešiše gore o bolela ka eng. Ba ile ba mmotšiša ba re: ‘Na ga bjale o tlo ba Kgoši ya Isiraele?’ Jesu a re: ‘Nako ya gore Jehofa a ntire Kgoši ga se ya tšwa e fihla. Go se kgale le tla amogela moya o mokgethwa, gomme la ba dihlatse tša ka. Eyang le yo bolela ditaba tše dibotse tša Mmušo wa Modimo Jerusalema, Judea, Samaria le dinageng tša kgole.’

Ge Jesu a feditše go bolela le baapostola ba gagwe, o ile a rotošetšwa legodimong gomme a khupetšwa ke leru. Baapostola ba gagwe ba ile ba tšwela pele ba lebeletše godimo, le ge ba be ba se sa mmona.

Baapostola bao ba ile ba tloga Thabeng ya Mehlware gomme ba ya Jerusalema. Gona moo, ba be ba dula ba bokana gotee ka phaphošing ya ka godimo gomme ba rapela Modimo. Ka ge Jesu a be a boetše legodimong, ba be ba letetše gore a ba nee ditaelo tše dingwe.

“Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”​—Mateo 24:14