Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 77

Mosadi Sedibeng

Mosadi Sedibeng

Ka morago ga monyanya wa Paseka, Jesu le barutiwa ba gagwe ba ile ba feta Samaria ge ba boela Galilea. Jesu o ile a khutša lefelong leo le bitšwago gore ke Sediba sa Jakobo, kgauswi le motse wa Sikara. Ge a sa khuditše moo, barutiwa ba gagwe ba ile ba ya motseng go yo reka dijo.

Mosadi yo mongwe o ile a tla sedibeng seo go tlo ga meetse. Jesu a re go yena: “Mphe meetse ke nwe.” Mosadi yoo a re: ‘Ke ka baka la eng o mpolediša? Ke nna Mosamaria. Bajuda ga ba boledišane le Basamaria.’ Jesu a re: ‘Ge nkabe o tseba gore ke nna mang, o be o tla kgopela meetse go nna, gomme ke be ke tla go nea meetse ao a neago bophelo.’ Mosadi yoo a botšiša Jesu a re: ‘O ra go reng? Ga o na le pakete ya go ga meetse.’ Jesu a re go yena: “Mang le mang yo a nwago meetse ao ke tlago go mo nea ona a ka se ke a nyorwa le ka mohla.” Mosadi yoo a re: “Morena, mphe meetse ao.”

Ke moka Jesu a re: “Sepela o yo bitša monna wa gago le tle mo.” Mosadi yoo a re: “Ga ke na monna.” Jesu a re: ‘O a rereša. O bile le banna ba bahlano, gomme yo o dulago le yena gona bjale ga se wa gago.’ Mosadi yoo a re: ‘Ke a bona gore o moporofeta. Batho ba gešo ba dumela gore re swanetše go rapela Modimo thabeng ye, eupša Bajuda ba re re swanetše go mo rapela Jerusalema feela. Nna ke dumela gore ge Mesia a etla, o tla re ruta kamoo re swanetšego go rapela Modimo.’ Ke moka Jesu a botša mosadi yoo selo seo a sa kago a se botša motho. O ile a re: ‘Ke nna Mesia.’

Mosadi yoo o ile a kitimela motseng gomme a botša Basamaria a re: ‘Ke nagana gore  ke hweditše Mesia. O tseba se sengwe le se sengwe ka nna. Etlang le mmone!’ Basamaria ba ya le yena sedibeng gomme ba theetša ge Jesu a ruta ka Mmušo wa Modimo.

Basamaria ba ile ba kgopela Jesu gore a dule motseng wa bona. O ile a fetša matšatši a mabedi motseng wa bona a ba ruta ka Mmušo wa Modimo, gomme batho ba bantši ba dumela go yena. Ke moka ba botša mosadi wa Mosamaria ba re: ‘Ka morago ga gore re theetše monna yo, re kgona go bona gore ke yena a tlago go phološa batho.’

“‘Tlaa!’ Mang le mang yo a nyorilwego a a tle; mang le mang yo a ratago a tle a tšee meetse a bophelo ka ntle le tefo.”​—Kutollo 22:17