Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 83

Jesu o Fepa Lešaba la Batho

Jesu o Fepa Lešaba la Batho

Ka ngwaga wa bo-32, pele go fihla monyanya wa Paseka, baapostola ba Jesu ba ile ba boela go yena ba etšwa go ruta batho ka Mmušo wa Modimo. Ba be ba lapile. Ka gona Jesu o ile a sepela le bona ka sekepe gomme ba ya motseng wa Betsaida gore ba yo khutša. Eupša ge sekepe se fihla kgauswi le lebopo, Jesu o ile a bona lešaba la batho le mo emetše moo. Le ge Jesu a be a nyaka go khutša le baapostola ba gagwe, o ile a amogela batho bao ka lerato. O ile a fodiša balwetši ba bona gomme a ba ruta ka Mmušo wa Modimo go fihlela letšatši le sobela. Ge go eba bošego, baapostola ba gagwe ba tla go yena ba re: ‘Batho ba ba kwa tlala. Ba botše gore ba yo ithekela dijo.’

Ke moka Jesu a re go baapostola ba gagwe: ‘Aowa, lena ba neeng sa go ja.’ Baapostola ba mmotšiša ba re: ‘Re yo ba rekela dijo?’ Filipi, e lego yo mongwe wa baapostola ba Jesu, a re: ‘Le ge nkabe re na le tšhelete e ntši, dijo tšeo re bego re ka ba rekela tšona di be di ka se ba lekane.’

Jesu a ba botšiša a re: ‘Re na le dijo tše kaakaang?’ Andrea a re: ‘Re na le dinkgwa tše hlano le dihlapi tše pedi tše dinyenyane. Eupša batho ba ke ba bantši, di ka se ba lekane.’ Jesu a re: ‘Di tlišeng mo go nna.’ Ke moka a botša batho bao gore ba dule bjanyeng ka dihlopha tša batho ba 50 le tša ba 100. Jesu a tšea dinkgwa tšeo le dihlapi, a lebelela legodimong, gomme a rapela. Ke moka a nea baapostola ba gagwe dijo tšeo gomme bona ba di nea lešaba leo la batho. Banna ba 5 000 gotee le basadi le bana ba ja, gomme ba khora. Ka morago ga moo,  baapostola ba topelela marathana ao a šetšego, gore ba se ke ba senya dijo. Marathana ao a ile a tlatša diroto tše 12. Se e be e le mohlolo, na ga go bjalo?

Batho bao ba ile ba makala kudu moo ba ilego ba nyaka gore Jesu e be kgoši ya bona. Eupša Jesu o be a tseba gore e be e sešo ya ba nako ya gore Jehofa a mo dire kgoši. Ka gona a botša lešaba leo gore le ye gae gomme a botša baapostola ba gagwe gore ba tshele Lewatle la Galilea ka sekepe. Ba ile ba namela sekepe, gomme Jesu a rotogela thabeng a nnoši. O be a yo dirang? O be a nyaka go ba nnoši gore a rapele Tatagwe. Le ge Jesu a be a na le mešomo e mentši, ka mehla o be a ipha nako ya go rapela.

“Le se ke la šomela dijo tše di senyegago, eupša le šomele dijo tše di dulago go iša bophelong bjo bo sa felego, tšeo Morwa wa motho a tlago go le nea tšona.”​—Johane 6:27