Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 75

Diabolo o Leka Jesu

Diabolo o Leka Jesu

Ka morago ga gore Jesu a kolobetšwe, moya o mokgethwa o ile wa mo iša lešokeng. O ile a fetša matšatši a 40 a sa je selo, gomme a swarwa ke tlala e kgolo. Ke moka Sathane Diabolo a tla a mo leka, gomme a re go yena: “Ge e ba o le Morwa wa Modimo, gona botša maswika a gore e be dinkgwa.” Eupša Jesu o ile a šomiša Mangwalo go araba Sathane. O ile a re: ‘Go ngwadilwe gore motho ga a phele ka dijo feela, eupša gape o swanetše go dira dilo ka moka tšeo Jehofa a di nyakago.’

Diabolo a leka Jesu gape a re: ‘Ge e ba o le Morwa wa Modimo, itahlele fase o le mo godimo ga tempele. Akere go ngwadilwe gore Modimo o tla romela barongwa ba gagwe gore ba go kame [goba ba go kabe.]’ Eupša Jesu a šomiša Mangwalo gape a re: ‘Go ngwadilwe gore o se ke wa leka Jehofa Modimo wa gago.’

Ka morago, Sathane o ile a bontšha Jesu mebušo ka moka ya lefase le mahumo a yona, ke moka a re go Jesu: ‘Ke tla go nea mebušo ye ka moka le mahumo a yona ge o ka nthapela gatee feela.’ Eupša Jesu a re: ‘Tloga Sathane! Gobane go ngwadilwe gore ke Jehofa Modimo wa gago a nnoši yo o swanetšego go mo rapela.’

Ka morago ga moo, Diabolo a tlogela Jesu gomme barongwa ba tla ba nea Jesu dijo. Go tloga ka yona nako yeo, Jesu o ile a thoma go botša batho ditaba tše dibotse tša Mmušo wa Modimo. Wo ke mošomo woo Jehofa a bego a mo rometše gore a tlo o dira mo lefaseng. Batho ba be ba rata seo Jesu a bego a ba ruta sona, e bile ba be ba mo latela kae le kae mo a bego a eya gona.

“Ge [Diabolo] a bolela maaka o bolela seo yena a lego sona gobane ke moaketši le tatago maaka.”​—Johane 8:44