Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 60

Mmušo wo o Tlago go Buša ka mo go sa Felego

Mmušo wo o Tlago go Buša ka mo go sa Felego

Bošegong bjo bongwe, Kgoši Nebukadinetsara o ile a lora toro ya go makatša. Toro yeo e ile ya mo tshwenya kudu moo a ilego a felelwa ke boroko. O ile a bitša baloi ba gagwe ka moka gomme a re go bona: ‘Ntlhalosetšeng toro yeo ke e lorilego.’ Bona ba re: ‘Hle kgoši, wena re botše seo o se lorilego.’ Eupša Nebukadinetsara a re go bona: ‘Aowa! Lena mpotšeng gore ke lorile eng, go sego bjalo ke a le bolaya.’ Ba bušeletša ba re: ‘Re botše seo o se lorilego, ke moka rena re tla go botša gore toro yeo e ra go reng.’ Nebukadinetsara a re: ‘Le bapala ka nna akere. Mpotšeng toro yeo!’ Baloi bao ba botša kgoši Nebukadinetsara ba re: ‘Ga go na motho yo a ka tsebago seo o se lorilego. Selo seo o se kgopelago go rena ga se kgonege.’

Nebukadinetsara o ile a galefa kudu gomme a laela gore batho ka moka ba bohlale nageng ya gagwe ba bolawe. Seo se be se bolela gore Daniele, Shaderaka, Meshaka le Abedinego le bona ba bolawe. Daniele o ile a kgopela kgoši gore e mo nee nako ya go hlalosa toro yeo. Ke moka yena le bagwera ba gagwe ba ya ba rapela Jehofa gomme ba mo kgopela gore a ba thuše. Jehofa o ile a dira eng?

Jehofa o ile a diriša pono go bontšha Daniele toro yeo Nebukadinetsara a e lorilego le seo e se bolelago. Letšatšing le le latelago, Daniele o ile a ya go mohlankedi wa kgoši Nebukadinetsara gomme a re: ‘O se ke wa bolaya batho ba bohlale ba Babilona. Nkiše go kgoši ke yo e hlalosetša toro ya yona.’ Mohlankedi yoo a iša Daniele go kgoši Nebukadinetsara. Daniele a fihla a re go kgoši: ‘Modimo o go utolletše seo se tlago go direga nakong e tlago. Toro yeo o e lorilego še: O bone seswantšho se segolo kudu. Sona seswantšho seo, se be se na le hlogo ya gauta, sehuba le matsogo a sona e be e le tša silifera, mpa le dirope tša sona e le tša koporo, maoto a sona e le a tšhipi, karolo ya dinao tša sona e le tšhipi gomme e nngwe e le letsopa. Ke moka gwa theoga leswika thabeng, gomme la wela dinaong tša sona. Seswantšho seo sa pšhatlagana sa fetoga lerole gomme lerole leo la tšewa ke phefo. Leswika leo la fetoga thaba e kgolo, la tlala lefase ka moka.’

 Ke moka Daniele a re: ‘Seo toro ya gago e se bolelago ke se: Hlogo ya gauta e swantšhetša mmušo wa gago. Silifera e swantšhetša mmušo wo o tlago go buša ka morago ga gago. Ka morago go tla ba le mmušo wa go swana le koporo, woo o tlago go buša lefase ka moka. Mmušo wo o tlago go latela woo, o tlo tia go swana le tšhipi. Mafelelong, go tla ba le mmušo wo o aroganego, woo dikarolo tše dingwe tša wona di tlago go tia go swana le tšhipi gomme tše dingwe tša fokola go swana le letsopa. Leswika leo le fetogago thaba e kgolo ke Mmušo wa Modimo. Mmušo woo o tla pšhatlaganya mebušo ye ka moka gomme wona wa buša ka mo go sa felego.’

Ke moka Nebukadinetsara a khunamela Daniele gomme a re: ‘Modimo wa gago ke yena a go boditšego toro ye. Ka nnete ga go na Modimo yo a swanago le yena.’ Go e na le gore Nebukadinetsara a bolaye Daniele, o ile a mo dira molaodi wa batho ka moka ba bohlale le mmuši tikologong yeo e bego e bušwa ke Babilona. Na o bona kamoo Jehofa a arabilego thapelo ya Daniele?

“Tša di kgobokeletša lefelong le le bitšwago Haramagedone ka Seheberu.”​—Kutollo 16:16