Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 65

Esitere o Phološa Setšhaba sa Gabo

Esitere o Phološa Setšhaba sa Gabo

Esitere e be e le ngwanenyana wa Mojuda yoo a bego a dula motseng wa Shushani kua Peresia. O dutše le lapa la gabo Jerusalema mengwaga e mentši pele Nebukadinetsara a ba tloša nageng yeo. O ile a godišwa ke motswala wa gagwe e lego Morodekai, yoo e bego e le mohlanka wa Ahasiwerosi Kgoši ya Peresia.

Kgoši Ahasiwerosi o be a nyaka go nyala mosadi yo mongwe. Ka gona bahlanka ba gagwe ba mo tlišetša basadi ba babotse kudu ba nageng yeo, ba tliša le Esitere. Gare ga basadi bao ka moka, Kgoši Ahasiwerosi o ile a kgetha Esitere gore e be mosadi wa gagwe. Morodekai o ile a botša Esitere gore a se botše motho gore ke yena Mojuda.

Monna yo a bitšwago Hamani yo a bego a ikgantšha o be a laola dikgošana ka moka tša nageng yeo. O be a nyaka gore batho ka moka ba mo khunamele. Morodekai o ile a gana go mo khunamela, gomme Hamani a kwata kudu, gomme a nyaka ditsela tša go mmolaya. Ge Hamani a hwetša gore Morodekai ke Mojuda, o ile a tla ka polane ya gore a bolaye Bajuda ka moka nageng yeo. O ile a botša kgoši Ahasiwerosi a re: ‘Bajuda ba kotsi; o swanetše go ba bolaya.’ Kgoši Ahasiwerosi a re go yena: ‘Dira seo o se nyakago ka bona,’ gomme a mo dumelela gore a ngwale molao wa gore Bajuda ba bolawe. Hamani o ile a ngwala molao wa gore Baperesia ba bolaye Bajuda ka moka ka di-13 tša kgwedi ya Adara. Jehofa o be a lebeletše dilo tše ka moka.

Esitere o be a sa tsebe ka molao wo. Ka gona Morodekai a mo romela kopi ya lengwalo leo gomme a re go yena: ‘Sepela o yo bolela le kgoši ka taba ye.’ Esitere a re: ‘Go na le molao wa gore ge motho a ka ya go kgoši a se a bitšwa, a bolawe. Ke na le matšatši a 30 kgoši e sa mpitše! Eupša ke tla ya. Ge kgoši e ka ntšhupa ka molamo wa yona, gona nka se bolawe, eupša ge e ka se ntšhupe ka wona, ke tlo bolawa.’

Esitere o ile a ya ka lapeng la kgoši. Ge kgoši Ahasiwerosi a mmona, a mo šupa ka molamo wa gagwe. Esitere a ya go yena, gomme kgoši Ahasiwerosi a mmotšiša a re: ‘O nyaka ke go direla eng Esitere?’ Esitere a  re: ‘Ke nyaka go mema wena le Hamani monyanyeng bošegong bjo.’ Ge ba le monyanyeng woo, Esitere a ba mema monyanyeng o mongwe gape. Ge ba le monyanyeng woo wa bobedi, kgoši e ile ya mmotšiša gape ya re: ‘O nyaka ke go direla eng?’ Esitere a re: ‘Go na le motho yo a nyakago go bolaya nna le setšhaba sa gešo. Hle re phološe.’ Kgoši ya mmotšiša ya re: ‘Ke mang yo a nyakago go le bolaya?’ Esitere a re: ‘Ke monna yo wa pelo e mpe e lego Hamani.’ Ahasiwerosi o ile a kwata kudu moo a ilego a laela gore Hamani a bolawe ka yona nako yeo.

Eupša go be go sa kgonege gore molao wola Hamani a o ngwadilego o fetošwe. Gaešita le kgoši Ahasiwerosi o be a ka se kgone go o fetoša. Ka gona kgoši Ahasiwerosi o ile a kgetha Morodekai gore e be molaodi wa dikgošana ka moka gomme a mo nea matla a gore a ngwale molao o moswa. Morodekai o ile a ngwala molao wa gore Bajuda ba itwele ge ba hlaselwa. Ka di-13 tša kgwedi ya Adara, Bajuda ba ile ba fenya manaba a bona. Go tloga letšatšing leo go ya pele, ba be ba dira monyanya ngwaga o mongwe le o mongwe go gopola letšatši le.

“Le tla gogelwa pele ga babuši le dikgoši ka baka la ka, gore e be bohlatse go bona le go ditšhaba.”​—Mateo 10:18