Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 59

Bašemane ba Bane Bao ba Ilego ba kwa Jehofa

Bašemane ba Bane Bao ba Ilego ba kwa Jehofa

Ge Nebukadinetsara a be a iša dikgošana tša Juda nageng ya Babilona, o ile a botša mohlanka wa gagwe e lego Ashipenase gore a hlokomele dikgošana tšeo. O ile a mmotša gore a kgethe bašemane bao ba phetšego gabotse le ba bohlale gare ga dikgošana tšeo. Bašemane bao ba be ba tlo rutwa mešomo ya Babilona ka mengwaga e meraro. Thuto yeo e be e tlo ba thuša gore ba dire mešomo ya maemo kua Babilona. Bašemane bao ba be ba swanetše go ithuta go bala, go ngwala le go bolela leleme la Babilona e lego Seakadia. Le gona ba be ba swanetše go ja dijo tšeo di bego di jewa ke kgoši le bahlanka ba yona. Gare ga bašemane bao, go be go na le bašemane ba bane e lego Daniele, Hanania, Mishaele le Asaria. Ashipenase o ile a ba reela maina a maswa a Sebabilona. Daniele o ile a mo reela leina a  re ke Belteshatsara, Hanania a re ke Shaderaka, Mishaele a re ke Meshaka gomme Asaria a re ke Abedinego. Na seo ba bego ba tlo se rutwa mo Babilona se be se tla dira gore ba se sa rata Jehofa?

Bašemane ba ba bane ba be ba ekwa Jehofa ka dipelo tša bona ka moka. Ba be ba tseba gore ga se ba swanela go ja dijo tša kgoši ya Babilona, ka gobane Molao wa Jehofa o be o re tše dingwe tša tšona di šilafetše. Ka gona ba ile ba botša Ashipenase ba re: ‘Hle, o se ke wa re nea dijo tša kgoši.’ Ashipenase a re go bona: ‘Ge le ka se je dijo tše, gomme kgoši ya tla ya bona okare le a babja, e tla mpolaya!’

Daniele o ile a tla ka polane. O ile a bolela le mohlokomedi yoo wa bona a re: ‘Hle, re nee merogo feela le meetse ka matšatši a lesome. Ka morago ga moo, o bone gore magareng ga rena le bašemane bao ba jago dijo tša kgoši, ke bomang bao ba phalago ba bangwe.’ Ke moka mohlokomedi wa bona a dira seo.

Ka morago ga matšatši ao a lesome, mohlokomedi yoo o ile a hwetša gore Daniele le bagwera ba gagwe ba bararo ba kgahliša go phala bašemane ka moka. Jehofa o ile a thaba kudu gore ba be ba mo kwa. O ile a ba a nea Daniele bokgoni bja go kwešiša dipono le ditoro.

Mafelelong, Ashipenase o ile a iša bašemane bao ka moka go kgoši Nebukadinetsara. Nebukadinetsara o ile a bolela le bona gomme a bona gore Daniele, Hanania, Mishaele le Asaria ba bohlale kudu go phala bašemane ba bangwe ka moka. O ile a kgetha bona gore ba šome ka lapeng la gagwe. Gantši kgoši e be e kgopela keletšo go bona ditabeng tša bohlokwa. Jehofa o be a dirile gore Daniele, Hanania, Mishaele le Asaria ba be bohlale kudu go phala banna ka moka ba bohlale ba kgoši le baloi.

Gaešita le ge Daniele, Hanania, Mishaele le Asaria ba be ba dula nageng yeo ba sa e tsebego, ga se ba ka ba lebala gore Modimo wa bona ke Jehofa. Na le wena o tla dula o ekwa Jehofa, le ge batswadi ba gago ba se gona?

“Anke go se be le motho yo a nyatšago bofsa bja gago. Ka mo go fapanego, go ba botegago eba mohlala go boleleng, boitshwarong, leratong, tumelong le tshekegong.”​—1 Timotheo 4:12