Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ithute ka Dilo tša ka Beibeleng

 THUTO 1

Modimo o Dirile Legodimo le Lefase

Modimo o Dirile Legodimo le Lefase

Mmopi wa rena ke Jehofa Modimo. O bopile dilo ka moka, tšeo re kgonago go di bona le tšeo re sa kgonego go di bona. Pele a bopa dilo tšeo re kgonago go di bona, o ile a bopa barongwa ba bantši. Na o a tseba gore barongwa ke eng? Barongwa ke dibopiwa tšeo di hlankelago Jehofa. Re ka se kgone go ba bona, go fo swana le ge re ka se kgone go bona Modimo. Morongwa wa mathomo yo Jehofa a mmopilego o ile a mo thuša go bopa dilo tše dingwe ka moka. O ile a thuša Jehofa go bopa dinaledi, dipolanete le dilo tše dingwe ka moka. E nngwe ya dipolanete tšeo ke lefase la rena le lebotse leo re dulago go lona.

Ka morago, Jehofa o ile a dira gore diphoofolo le batho ba tle ba kgone go phela mo lefaseng. O ile a dira gore mo lefaseng go be le seetša sa letšatši. O ile a dira dithaba, mawatle le dinoka.

Go ile gwa direga eng ka morago ga moo? Jehofa o ile a re: ‘Ke nyaka go mediša bjang, dimela le mehlare.’ Go ile gwa thoma go mela mehlare e mentši ya dienywa, merogo le matšoba. Ke moka Jehofa o ile a bopa diphoofolo tša go se swane—tša go fofa, tša ka meetseng, tša go sepela ganyenyane le tša go sepela ka dimpa. O ile a dira diphoofolo tše dinyenyane tša go swana le legotlo, le tše dikgolo tša go swana le ditlou. Wena o rata phoofolo efe?

Ke moka Jehofa o ile a bolela le morongwa yo a mmopilego mathomong a re: “A re dire motho.” Batho ba be ba ka se swane le diphoofolo. Ba be ba tlo kgona go itirela dilo. Ba be ba tlo bolela, ba  sega le go rapela Modimo. Ba be ba tlo hlokomela lefase le diphoofolo. Na o tseba leina la motho wa mathomo mo lefaseng? A re kwe gore ke mang.

“Mathomong Modimo o hlodile magodimo le lefase.”—Genesi 1:1