Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Batamela Kgaufsi le Jehofa

 KGAOLO 16

“Dira Toka” ge o Sepela le Modimo

“Dira Toka” ge o Sepela le Modimo

1-3. (a) Ke ka baka la’ng re kolota Jehofa? (b) Ke eng seo Mohlakodiši wa rena yo lerato a se kgopelago go rena?

AKANYA o kgakgetšwe ka sekepeng seo se nwelelago. Motsotsong wa ge o nagana gore ga go sa na kholofelo, mohlakodiši o a fihla gomme o go gogela lefelong le le šireletšegilego. O ikwa o imologile gakaakang ge mohlakodiši wa gago a go ntšha kotsing gomme a re: “Bjale o šireletšegile”! Na o be o ka se ke wa ikwa o kolota motho yoo? Ge e le gabotse, o be o tla mo kolota bophelo bja gago.

2 Ka ditsela tše itšego, se se swantšhetša seo Jehofa a re diretšego sona. Ka kgonthe re a mo kolota. Go feta moo, o neile topollo yeo e dirilego gore re kgone go hlakodišwa ditlamong tša sebe le lehu. Re ikwa re šireletšegile ka go tseba gore ge feela re bontšha tumelo sehlabelong seo se bohlokwa, dibe tša rena di a lebalelwa gomme bokamoso bja rena bja ka mo go sa felego bo šireletšegile. (1 Johane 1:7; 4:9) Bjalo ka ge re bone go Kgaolo 14, topollo ke pontšho e phagamego ya lerato la Jehofa le toka ya gagwe. Re swanetše go arabela bjang?

3 Ke mo go swanetšego go naganišiša ka seo Mohlakodiši wa rena yo lerato a se kgopelago go rena. Jehofa o bolela ka moporofeta Mika gore: “Hee wene motho! O boditšwe se e lexo se se botse, le se Morêna a se nyakaxo xo wene: Ké xo dira tokô [“toka,” NW], ké xo rata botho; ké xo sepela le Modimo w’axo Ò n’e boipoetšô.” (Mika 6:8) Hlokomela gore se sengwe sa dilo tšeo Jehofa a di kgopelago go rena ke gore re ‘dire toka.’ Re ka dira bjalo bjang?

Go Phegelela “Toka ya Kgonthe”

4. Re tseba bjang gore Jehofa o letetše gore re phele ka go dumelelana le ditekanyetšo tša gagwe tša go loka?

4 Jehofa o letetše gore re phele ka ditekanyetšo tša gagwe tša  mabapi le se se lokilego le se se fošagetšego. Ka ge ditekanyetšo tša gagwe e le tša toka le tše di lokilego, re phegelela toka le go loka ge re phela ka go dumelelana le tšona. Jesaya 1:17, (NW) e re: “Ithuteng go dira tše dibotse; tsomang toka.” Lentšu la Modimo le re kgothaletša gore re ‘tsome go loka.’ (Tsefanya 2:3) Le bile le re kgothaletša gore re “aparê motho e mofsa, e a bopetšwexo xo etša Modimo xo lokeng le kxethexong ya makxonthe.” (Ba-Efeso 4:24) Go loka ga kgonthe—toka ya kgonthe—ga go akaretše bošoro, go se hlweke le boitshwaro bjo bo gobogilego, ka ge tše di le kgahlanong le seo e lego se sekgethwa.—Psalme 11:5; Ba-Efeso 5:3-5.

5, 6. (a) Ke ka baka la’ng go itumelelanya le ditekanyetšo tša Jehofa e se morwalo go rena? (b) Beibele e bontšha bjang gore go phegelela go loka ke mogato o tšwelago pele?

5 Na go itumelelanya le ditekanyetšo tša Jehofa tša go loka ke morwalo go rena? Aowa. Pelo yeo e gogelegago go Jehofa ga e befedišwe ke dinyakwa tša gagwe. Ka ge re rata Modimo wa rena le mohuta wa Modimo yoo a lego yena, re nyaka go phela ka tsela yeo e mo kgahlišago. (1 Johane 5:3) Gopola gore Jehofa “ó rata tša xo loka.” (Psalme 11:7) Ge e ba re tla ekiša e le ka kgonthe toka ya Modimo goba go loka ga gagwe, re swanetše go rata seo Jehofa a se ratago gomme re hloye seo a se hloilego.—Psalme 97:10.

6 Ga go bonolo gore batho ba sa phethagalago ba phegelele go loka. Re swanetše go apola semelo sa kgale le mekgwa ya sona ya sebe gomme re apare se sefsa. Beibele e bolela gore semelo se sefsa ke ‘se se mpshafaditšwego’ ka tsebo e nepagetšego. (Ba-Kolose 3:9, 10, bapiša le NW.) Polelwana ‘go mpshafatšwa’ e bontšha gore go apara semelo se sefsa ke mogato o tšwelago pele, woo o nyakago boiteko bjo mafolofolo. Go sa šetšwe gore re leka ka thata gakaakang go dira se se nepagetšego, go na le dinako tšeo ka tšona tlhago ya rena ya sebe e re dirago gore re foše ka kgopolo, ka lentšu goba ka tiro.—Ba-Roma 7:14-20; Jakobo 3:2.

7. Re swanetše go lebelela bjang go palelwa boitekong bja rena bja go phegelela go loka?

7 Re swanetše go lebelela bjang go palelwa boitekong bja rena  bja go phegelela go loka? Go ba gona, re ka se ke ra nyaka go nyenyefatša bogolo bja sebe. Ka nako e swanago, ga se ra swanela go lapa, ra nagana gore diphošo tša rena di re dira gore re be bao ba sa swanelegelego go hlankela Jehofa. Modimo wa rena wa kgaugelo o dirile tokišetšo ya go tsošološetša bao ba itsholago e le ka kgonthe gore ba amogelwe ke yena. Ela hloko mantšu a kgothatšago a moapostola Johane a rego: “Ke Le ngwalêla ditaba tšé, xore Le se kê la dira dibe.” Eupša o ile a oketša ka mo go swanetšego gore: “Xe xo ka ba le e a diraxo dibe [ka baka la go se phethagale mo go abetšwego], xôna re na le Morapeledi xo Tata wešo, Jesu Kriste.” (1 Johane 2:1) Ee Jehofa o neile sehlabelo sa Jesu sa topollo e le gore re ka Mo hlankela ka mo go amogelegago go sa šetšwe tlhago ya rena ya sebe. Na seo ga se re tutueletše go dira sohle seo re ka se kgonago gore re kgahliše Jehofa?

Ditaba tše Dibotse le Toka ya Modimo

8, 9. Go goelelwa ga ditaba tše dibotse go bonagatša bjang toka ya Jehofa?

8 Re ka dira toka—ge e le gabotse, re ka ekiša toka ya Modimo—ka go ba le karolo ka mo go tletšego go botšeng ba bangwe ditaba tše dibotse tša Mmušo wa Modimo. Ke kgokagano efe e lego gona magareng ga toka ya Jehofa le ditaba tše dibotse?

9 Jehofa a ka se ke a tliša bofelo bja tshepedišo ye ntle le gore a thome ka go kwatša temošo. Boporofeteng bja gagwe bjo bo lego mabapi le seo se bego se tla direga nakong ya bofelo, Jesu o itše: “Xomme Ebangedi e swanetše xo kwatšwa pele dithšabeng ka moka.” (Mareka 13:10; Mateo 24:3) Go dirišwa ga lentšu “pele” go bontšha gore go na le ditiragalo tše di tla latelago modiro wa lefase ka bophara wa boboledi. Ditiragalo tšeo di akaretša masetlapelo a magolo ao a boletšwego e sa le pele, ao a tla bolelago go fedišwa ga ba kgopo gomme a kgorela lefase le lefsa la go loka tsela. (Mateo 24:14, 21, 22) Ka kgonthe, ga go le o tee yo a ka latofatšago Jehofa ka mo go swanetšego ka go ba yo a sa lokago malebana le ba babe. Ka go dira gore go kwatšwe temošo, o nea ba bjalo sebaka se se lekanego gore ba fetoše ditsela tša bona gomme ka go rialo ba efoge phedišo.—Jona 3:1-10.

Re bonagatša toka ya Modimo ge re abelana le ba bangwe ditaba tše dibotse ka go se bebe sefahlego

10, 11. Go tšea ga rena karolo go boleleng ditaba tše dibotse go bonagatša bjang toka ya Modimo?

 10 Go bolela ga rena ditaba tše dibotse go bonagatša bjang toka ya Modimo? Sa mathomo-thomo, ke selo se nnoši se se lokilego seo re se dirago seo ka sona re ka thušago ba bangwe go hwetša phološo. Ela hloko gape seswantšho sa go hlakodišwa sekepeng seo se nwelelago. O šireletšegile ka seketswaneng sa go phološa bophelo, ruri o be o tla nyaka go thuša ba bangwe bao ba sa dutšego ba sa le ka meetseng. Ka mo go swanago, re na le boikarabelo ka bao ba sa dutšego ba katana ka “meetseng” a lefaseng le le kgopo. Ke therešo gore ba bantši ba gana molaetša wa rena. Eupša ge feela Jehofa a sa dutše a bontšha go se fele pelo, re na le boikarabelo bja go ba nea sebaka sa go ka “fihlêla thsokoloxô” gomme ka go rialo ba phološwe.—2 Petro 3:9.

11 Ka go bolela ditaba tše dibotse go bohle bao re gahlanago le bona, re bontšha toka ka tsela e nngwe e bohlokwa: Re bontšha go se bebe sefahlego. Gopola gore “Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” (Ditiro 10:34, 35) Ge e ba re nyaka go ekiša toka ya Gagwe, ga se ra swanela go ahlola batho e sa le pele. Go e na le moo, re swanetše go abelana ditaba tše dibotse le ba bangwe go sa šetšwe morafo wa bona, maemo a bona a tša leago goba boemo bja tša ditšhelete. Ka go rialo re nea bohle bao ba tlago go theetša sebaka sa go kwa le go arabela ditabeng tše dibotse.—Ba-Roma 10:11-13.

Kamoo re Swarago ba Bangwe ka Gona

12, 13. (a) Ke ka baka la’ng re sa swanela go akgofela go dulela go ahlola ba bangwe? (b) Ke’ng seo se bolelwago ke keletšo ya Jesu e rego “Le se kê la ahlola” le e rego “Le se kê la lahla motho”? (Bona gape le mongwalo wa ka tlase.)

12 Gape re ka dira toka ka go swara ba bangwe ka tsela yeo Jehofa a re swarago ka gona. Go bonolo kudu go dulela go ahlola ba bangwe, go sola diphošo tša bona le go belaela maikemišetšo a bona. Eupša ke mang go rena yo a bego a ka nyaka gore Jehofa a lekodišiše maikemišetšo a rena le diphošo tša rena ka mokgwa wa go se bontšhe kgaugelo? Ga se tsela yeo Jehofa a dirišanago le rena ka yona. Mopsalme o itše: “Xe Wene Morêna Ò  latiša molato, xôna xo ka êma mang?” (Psalme 130:3) Na ga re leboge gore Modimo wa rena yo a nago le toka le yo a nago le kgaugelo ga a kgethe go dula a lebeletše diphošo tša rena? (Psalme 103:8-10) Ka gona, re swanetše go swara ba bangwe bjang?

13 Ge e ba re lemoga go ba le kgaugelo ga toka ya Modimo, re ka se ke ra akgofela go ahlola ba bangwe ditabeng tšeo di tlogago di sa re kgome goba ditabeng tše nyenyane. Thutong ya gagwe ya Thabeng, Jesu o ile a lemoša gore: “Le se kê la ahlola, xore le lena Le se tlo ahlolwa.” (Mateo 7:1) Go ya ka pego ya Luka, Jesu o ile a oketša ka gore: “Le se kê la lahla motho; ké mo Le sa tl’o xo lahlwa.” * (Luka 6:37) Jesu o ile a bontšha go lemoga ga gagwe gore batho ba sa phethagalago ba na le tshekamelo ya go ahlola. Batheetši le ge e le bafe ba gagwe bao ba bego ba e-na le mokgwa wa go ahlola ba bangwe o šoro ba be ba swanetše go o kgaotša.

14. Ke ka baka la mabaka afe re swanetšego gore re ‘kgaotše go ahlola’ ba bangwe?

14 Ke ka baka la’ng re swanetše go ‘kgaotša go ahlola’ ba bangwe? Gare ga dilo tše dingwe, matla a rena a taolo a lekanyeditšwe. Morutiwa Jakobo o re gopotša gore: “Mmei wa Molaô ké o tee; Mosodi ké Yêna”—Jehofa. Ka gona Jakobo o botšiša ka go lebanya gore: “’Me O mang, wene O sôlaxo [wa geno, NW]?” (Jakobo 4:12; Ba-Roma 14:1-4) Go oketša moo, tlhago ya rena ya sebe e ka dira gabonolo gore dikahlolo tša rena e be tše di sa lokago. Dikgopolo tše dintši le maikemišetšo—go akaretša go beba sefahlego, boikgantšho bjo bo nyenyefaditšwego, lehufa le go itira moloki—di ka senya tsela yeo re lebelelago magagabo rena ka gona. Re na le mafokodi a mangwe, gomme go lebiša tlhokomelo go wona go swanetše go re thibela gore re se ke ra akgofela go bona ba bangwe diphošo. Re ka se kgone go bala dipelo; e bile re ka se kgone go tseba maemo ka moka a batho ba bangwe.  Ka gona, re bomang re ka latofatšago badumedi-gotee le rena ka maikemišetšo a fošagetšego goba go sola maiteko a bona tirelong ya Modimo? Go kaone gakaakang go ekiša Jehofa ka go tsoma botse go bana babo rena le dikgaetšedi go e na le go lebiša tlhokomelo mafokoding a bona!

15. Ke mantšu le tshwaro tša mohuta ofe tšeo di sa dumelelwago gare ga barapedi ba Modimo, gomme ka baka la’ng?

15 Go thwe’ng ka ditho tša malapa a rena? Ka manyami, lefaseng la lehono tše dingwe tša dikahlolo tše šoro go feta tšohle di dirwa go seo e bego e swanetše go ba e le lefelo la khutšo—legae. Ga se mo go sa tlwaelegago go kwa ka banna le basadi bao ba gobošago goba batswadi bao ba “tlaišago” ditho tša malapa a bona ka go dulela go ba goboša ka mantšu goba go ba tlaiša mmeleng. Eupša mantšu a boifišago, kodutlo e hlabago le tshwaro e sehlogo ga di a dumelelwa gare ga barapedi ba Modimo. (Ba-Efeso 4:29, 31; 5:33; 6:4) Keletšo ya Jesu ya gore “le se  ke la ahlola” le gore “le se ke la sola” ga e kgaotše go šoma ge re le ka gae. Gopola gore go dira toka go akaretša go swara ba bangwe ka tsela yeo Jehofa a re swarago ka gona. Le gona, Modimo wa rena le ka mohla ga a ke a re swara makgwakgwa goba ka sehlogo ge a dirišana le rena. Go e na le moo, “ké yo pelo-thlomoxi” go bao ba mo ratago. (Jakobo 5:11) A mohlala o mobotse gakaakang woo re ka o ekišago!

Bagolo Bao ba Hlankelago “ka Toka”

16, 17. (a) Ke’ng seo Jehofa a se letetšego go bagolo? (b) Ke’ng seo se swanetšego go dirwa ge modiradibe a palelwa ke go bontšha tshokologo ya kgonthe, gomme ka baka la’ng?

16 Ka moka ga rena re na le boikarabelo bja go dira toka, eupša bagolo ka phuthegong ya Bokriste ka mo go kgethegilego ba na le boikarabelo tabeng ye. Hlokomela tlhaloso ya boporofeta ya “bakxôma” goba bagolo, yeo e begilwego go Jesaya: “Tsebang! Xo tlo bewa kxoši ya xo buša ka xo loka, ya bakxôma ba moahlolêlô [wa toka, NW].” (Jesaya 32:1) Ee, Jehofa o lebeletše gore bagolo ba hlankele ka go dumelelana le toka. Ba ka dira bjang se?

17 Banna ba bao ba swanelegago moyeng ba tseba gabotse gore toka goba go loka, e nyaka gore phuthego e bolokwe e hlwekile. Ka dinako tše dingwe, bagolo ba gapeletšega go ahlola melato ya dibe tše dikgolo. Ge ba dira bjalo, ba gopola gore toka ya Modimo e nyaka gore ba bontšhe kgaugelo ge e ba go kgonega. Ka go rialo ba leka go hlahla modiradibe gore ba mo lebiše tshokologong. Eupša go thwe’ng ge e ba modiradibe a palelwa ke go bontšha tshokologo ya kgonthe go sa šetšwe maiteko ao a dirwago bakeng sa go mo thuša? Ka toka e feletšego, Lentšu la Jehofa le laela gore go gatwe mogato o tiilego: “Tlošang motho-mobe mo xare xa lena.” Seo se bolela go mo leleka ka phuthegong. (1 Ba-Korinthe 5:11-13; 2 Johane 9-11) Bagolo ba nyamišwa ke ge ba swanelwa ke go gata mogato o bjalo, eupša ba lemoga gore o a nyakega bakeng sa go šireletša bohlweki bja boitshwaro le bja moya bja phuthego. Lega go le bjalo, ba holofela gore ka letšatši le lengwe modiradibe o tla boelwa ke kgopolo gomme a boela phuthegong.—Luka 15:17, 18.

18. Ke’ng seo bagolo ba dulago ba se gopola ge ba nea ba bangwe keletšo e theilwego Beibeleng?

 18 Go hlankela ka go dumelelana le toka gape go akaretša go nea keletšo yeo e theilwego Beibeleng ge e nyakega. Go ba gona, bagolo ga ba leke go hwetša diphošo go ba bangwe. E bile ga ba leke go diriša sebaka se sengwe le se sengwe go nea phošollo. Eupša modumedi-gotee a ka “thšoxa à wetše molatong.” Go gopola gore toka ya Modimo ga se e sehlogo goba yeo e sa bontšhego maikwelo go tla tutueletša bagolo gore ba “mo tsošê ka môya o bonôlô.” (Ba-Galatia 6:1) Ka gona, bagolo ba ka se ke ba omanya mofoši goba ba diriša mantšu a bogale. Go e na le moo, keletšo yeo e newago ka lerato e kgothatša motho yo a e amogelago. Gaešita le ge ba nea kgalemelo e lebanyago—yeo e hlalosago ka go lebanya mafelelo a tsela e sego ya bohlale—bagolo ba dula ba gopola gore modumedi-gotee yo a fošitšego ke nku ya mohlape wa Jehofa. * (Luka 15:7) Ge keletšo goba tsholo e tutuetšwa ka mo go kwagalago ke lerato e bile e newa ka lerato, e tla phošolla motho yo a fošitšego.

19. Ke diphetho dife tšeo go nyakegago gore bagolo ba di dire, gomme ba swanetše go thea diphetho tše bjalo go eng?

19 Gantši bagolo ba swanelwa ke go dira diphetho tšeo di kgomago badumedi-gotee le bona. Ka mohlala, bagolo ba fela ba kopana nako le nako bakeng sa go bona ge e ba bana babo rena ba bangwe ka phuthegong ba swanelega go ka bolelelwa e le bagolo goba bahlanka ba bodiredi. Bagolo ba tseba bohlokwa bja go ba bao ba sa bebego sefahlego. Ba dumelela dilo tšeo Modimo a di nyakago bakeng sa go dira dikgetho tše bjalo di ba hlahla tabeng ya go dira diphetho, ba sa ithekge ka maikwelo feela a motho. Ka go rialo ba dira ‘ka ntle le go ahlola go sešo gwa sekwa, ba sa bebe motho.’—1 Timotheo 5:21.

20, 21. (a) Ke’ng seo bagolo ba katanelago go ba sona, gomme ka baka la’ng? (b) Ke’ng seo bagolo ba ka se dirago bakeng sa go thuša “ba dipelo tše di tapilexo”?

 20 Bagolo ba diriša toka ya Modimo le ka ditsela tše dingwe. Ka morago ga go bolela e sa le pele gore bagolo ba be ba tla hlankela “ka toka,” Jesaya o ile a tšwela pele ka gore: “Yo mongwe le yo mongwe o tlo ba bjalo ka tšhireletšo ge phefo e foka, le setšhabelo sa go tšhabela pula; o tlo ba bjalo ka noka ya metse nageng e omilego, le bjalo ka moriti wa lefsika le legolo nageng e nyorilwego.” (Jesaya 32:2, PK) Ka gona, bagolo ba katanela go ba methopo ya khomotšo le tapološo go barapedi-gotee le bona.

21 Lehono, ka baka la mathata ka moka ao a bonagalago a nyamiša, ba bantši ba nyaka kgothatšo. Bagolo, ke’ng seo le ka se dirago bakeng sa go thuša “ba dipelo tše di tapilexo”? (1 Ba-Thesalonika 5:14) Ba theetšeng ka go ba kwela bohloko. (Jakobo 1:19)  Mo gongwe ba ka be ba nyaka go abelana “manyami” a lego pelong ya bona le motho yo ba mmotago. (Diema 12:25, PK) Ba kgonthišetšeng gore ba a nyakwa, ke ba bohlokwa le gore ba a ratwa—ee, ba ratwa ke Jehofa le ke bana babo bona le dikgaetšedi. (1 Petro 1:22; 5:6, 7) Go oketša moo, le ka rapela le batho ba bjalo le go ba rapelela. Ge ba e-kwa mogolo a ba rapelela thapelo e tšwago pelong e ka ba mo go homotšago kudu go bona. (Jakobo 5:14, 15) Modimo wa toka a ka se ke a hlokomologa maiteko a gago a lerato a go thuša bao ba nyamilego.

Bagolo ba bonagatša toka ya Jehofa ge ba kgothatša bao ba nyamilego

22. Ke ditsela dife tšeo ka tšona re ka ekišago toka ya Jehofa, gomme ka mafelelo afe?

22 Ka kgonthe, re batamela kgaufsi kudu le Jehofa ka go ekiša toka ya gagwe! Ge re tšeela godimo ditekanyetšo tša gagwe tša go loka, ge re abelana le ba bangwe ditaba tše dibotse tše di phološago bophelo le ge re kgetha go lebiša tlhokomelo dikeng tše dibotse tša ba bangwe go e na le go tsoma diphošo tša bona, re bonagatša toka ya Modimo. Bagolo, ge le šireletša bohlweki bja phuthego, ge le nea keletšo e agago ya Mangwalo, ge le dira diphetho tša go se bebe sefahlego le ge le kgothatša bao ba nyamilego, le bonagatša toka ya Modimo. Jehofa o swanetše go ba a thaba gakaakang ge a lebelela fase a le legodimong gomme a bona batho ba gagwe ba leka sohle seo ba ka se kgonago bakeng sa go “dira toka” ge ba sepela le Modimo wa bona!

^ par. 13 Diphetolelo tše dingwe di re “o se ke wa ahlola” le gore “o se ke wa sola.” Diphetolelo tše bjalo di bolela gore “o se ke wa thoma go ahlola” le gore “o se ke wa thoma go sola.” Lega go le bjalo, bangwadi ba Beibele mo ba diriša ditaelo tše di ganetšago ka lebaka la bjale (le le tšwelago pele). Ka gona ditiro tšeo di hlaloswago di be di tšwela pele ka nako yeo eupša e le tšeo di swanetšego go kgaotšwa.

^ par. 18 Go 2 Timotheo 4:2, Beibele e bolela gore bagolo ka dinako tše dingwe ba swanetše go ‘kgalema, go eletša le go kgothatša.’ Lentšu la Segerika leo le fetoletšwego e le ‘kgothatša’ (pa·ra·ka·leʹo) le ka bolela “go matlafatša.” Lentšu la Segerika le le tswalanago le lona, pa·raʹkle·tos, le ka šupa go mmoleledi molatong wa molao. Ka go rialo, gaešita le ge bagolo ba nea tsholo e tiilego, ba swanetše gore e be bathuši ba bao ba nyakago thušo ya moya.