Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Batamela Kgaufsi le Jehofa

 KGAOLO 3

“Mokxêthwa, Mokxêthwa, Mokxêthwa, ké Morêna”

“Mokxêthwa, Mokxêthwa, Mokxêthwa, ké Morêna”

1, 2. Ke pono efe yeo moporofeta Jesaya a ilego a e amogela, gomme e re ruta’ng ka Jehofa?

JESAYA o ile a welwa ke poifo e kgolo ge a be a bona pono ka pele ga gagwe—pono e tšwago go Modimo. E be e bonagala e tloga e le ya kgonthe! Jesaya ka morago o ile a ngwala gore gabotse-botse o ile a “bôna Morêna” a dutše sedulong sa Gagwe sa bogoši se se phagamego. Seaparo sa Jehofa se se ikadilego se ile sa tlala tempele e kgolo ya Jerusalema.—Jesaya 6:1, 2.

2 Jesaya gape o ile a tšhošwa ke seo a ilego a se kwa—moopelo o matla kudu moo e lego gore o ile wa šišinya tempele go fihla metheong ya yona. Kopelo e be e opelwa ke barongwa-batuki, dibopiwa tša moya tša maemo a godimo kudu. Go opela ga bona ka go dumelelana go be go kwagala ka mantšu a hlabošago a rego: “Mokxêthwa, Mokxêthwa, Mokxêthwa, ké Morêna wa mašaba. Naxa tšohle di tletše letaxô la xaxwe!” (Jesaya 6:3, 4) Go opela lentšu “mokxêthwa” gararo go ile gwa le gatelela ka mo go kgethegilego, e bile e le mo go swanetšego ka gobane Jehofa ke yo mokgethwa ka tekanyo e phagamego. (Kutollo 4:8) Bokgethwa bja Jehofa bo gatelelwa ka Beibeleng ka moka. Ditemana tše makgolo di tswalanya mantšu “mokgethwa” le “bokgethwa.”

3. Dipono tše di fošagetšego ka bokgethwa bja Jehofa di tutuetša bjang ba bangwe gore ba furalele Modimo go e na le go batamela kgaufsi le yena?

3 Ka gona, go molaleng gore se sengwe sa dilo tše dikgolo tšeo Jehofa a nyakago gore re se kwešiše mabapi le yena ke gore ke yo mokgethwa. Lega go le bjalo, ba bantši lehono ba gana kgopolo yeo. Ba bangwe ka phošo ba tswalanya bokgethwa le go itira moloki goba borapedi bjo bo fošagetšego. Batho bao ba lwantšhanago le go ba le pono e fošagetšego ka bona ka noši ba ka hwetša gore bokgethwa bja Modimo bo a ba tšhoša go e na le go ba gogela. Ba ka boifa gore ba ka no se tsoge ba swanelegile go batamela kgaufsi le Modimo yo yo mokgethwa. Ka gona, ba bantši ba furalela Modimo ka baka la bokgethwa bja gagwe. Seo ke se se nyamišago ka gobane bokgethwa bja Modimo e tloga e le lebaka  le le gapeletšago la go batamela kgaufsi le yena. Ka baka la’ng? Pele re ka araba potšišo yeo, anke re ahla-ahleng seo bokgethwa bja kgonthe e lego sona.

Bokgethwa ke Eng?

4, 5. (a) Bokgethwa bo bolela’ng, gomme ga bo bolele’ng? (b) Ke ka ditsela dife tše pedi tše bohlokwa Jehofa e lego yo a “arogilego”?

4 Taba ya gore Modimo ke yo mokgethwa ga e bolele gore o a ipona, o a ikgantšha goba go tšeela ba bangwe fase. Ka mo go fapanego, o hloile dika tše bjalo. (Diema 16:5; Jakobo 4:6) Ka gona, lentšu “kgethwa” le bolela’ng? Sehebereng sa Beibele, lentšu le le tšerwe go tšwa lentšung le le bolelago “arogilego.” Borapeding, lentšu “kgethwa” le šoma go seo se arogilego tseleng yeo le tlwaetšwego le dirišwa ka yona, goba seo se lebelelwago e le se sekgethwa. Bokgethwa gape bo fetiša ka tsela e matla kgopolo ya go hlweka goba go seka. Lentšu le le šoma bjang go Jehofa? Na le bolela gore ke yo a “arogilego” bathong ba sa phethagalago, le yo a lego kgole kudu le rena?

5 Ga go bjalo le gatee. Ka ge e le “Mokxêthwa wa Isiraele,” Jehofa o itlhalositše e le yo a dulago “gare” (PK) ga batho ba gagwe, gaešita le ge ba be ba e-na le sebe. (Jesaya 12:6; Hosea 11:9) Ka gona bokgethwa bja gagwe ga bo mo dire gore a be kgole. Gona ge, ke bjang e lego yo a “arogilego”? Ka ditsela tše pedi tša bohlokwa. Ya pele, ke yo a arogilego go dibopiwa ka moka ka kgopolo ya gore ke yena a nnoši e lego Yo Godimo-dimo. Go seka ga gagwe le go hlweka ga gagwe ke mo go feletšego le ga ka mo go sa felego. (Psalme 40:5; 83:18) Ya bobedi, Jehofa ke yo a arogilego ka mo go feletšego bobeng ka moka, gomme seo ke kgopolo e homotšago. Ka baka la’ng?

6. Ke ka baka la’ng re ka hwetša khomotšo go beng ga Jehofa yo a arogilego ka mo go feletšego sebeng?

6 Re phela lefaseng leo go lona bokgethwa bja kgonthe e lego selo se se hwetšwago ka sewelo. Selo se sengwe le se sengwe se se lego mabapi le lekoko la batho leo le arogilego go Modimo se šilafaditšwe ka tsela e itšego, se šilafaditšwe ke sebe le go se phethagale. Ka moka ga rena re swanetše go lwantšhana le sebe seo se lego ka gare ga rena. Le gona ka moka ga rena re kotsing ya go ka fenywa ke sebe ge e ba re kgaotša go itiša. (Ba-Roma 7:15-25;  1 Ba-Korinthe 10:12) Jehofa ga a kotsing e bjalo. Ka ge a le kgole ka mo go feletšego le bobe, le ka mohla a ka se ke a šilafatšwa le ke sebe se senyenyane kudu. Se se tiišetša tumelo ya rena ya go lebelela Jehofa e le Tate wa kgonthe, ka gobane se se bolela gore ke yo a ka botwago ka mo go feletšego. Ka go se swane le bo-tate ba bantši bao e lego batho ba nago le sebe, Jehofa le ka mohla a ka se ke a fetoga yo a sa botegego, yo a sa kgonego go itshwara goba yo a gobošago. Bokgethwa bja gagwe bo dira gore selo le ge e le sefe se bjalo e be seo se sa kgonegego. Lebakeng le lengwe Jehofa o ile a ba a dira dikeno ka bokgethwa bja gagwe ka noši, ka gobane go be go se na seo se ka botwago go feta dikeno tšeo. (Amosi 4:2) Na seo ga se se se kgothatšago?

7. Ke ka baka la’ng go ka thwe bokgethwa ke karolo ya motheo ya semelo sa Jehofa?

7 Bokgethwa ke karolo ya motheo ya semelo sa Jehofa. Seo se bolela’ng? Ka mohlala: Ela hloko mantšu “motho” le “go se phethagale.” O ka se ke wa hlalosa lentšu la pele ka ntle le gore o nagane ka leo le boletšwego mafelelong. Go se phethagale go re aparetše gomme go kgoma dilo tšohle tšeo re di dirago. Bjale ela hloko mantšu a mabedi ao a fapanego ka mo go feletšego—“Jehofa” le “kgethwa.” Jehofa o apareditšwe ke bokgethwa. Selo se sengwe le se sengwe se se lego mabapi le yena ke se se hlwekilego, se se sekilego le se se lokilego. Re ka se ke ra tseba Jehofa ka seo a tlogago a le sona ka ntle le gore re kwešiše lentšu le le tseneletšego—“kgethwa.”

“Bokgethwa ke bja Jehofa”

8, 9. Ke eng se se bontšhago gore Jehofa o thuša batho ba sa phethagalago go ba ba bakgethwa ka kgopolo e lekaneditšwego?

8 Ka ge Jehofa a emela seka sa bokgethwa, go ka bolelwa ka tshwanelo gore ke mothopo wa bokgethwa ka moka. Ga a ute ka boithati seka se sa bohlokwa; o se nea ba bangwe gomme o dira bjalo ka seatla se se bulegilego. Ke ka lebaka leo ge Modimo a be a boledišana le Moše ka morongwa sethokgweng sa meetlwa se se fsago, gaešita le naga e dikologilego e ile ya ba e kgethwa ka baka la go kgokagana ga yona le Jehofa!—Ekisodo 3:5.

9 Na batho ba sa phethagalago e ka ba ba bakgethwa ka thušo ya Jehofa? Ee, ba ka ba bjalo ka kgopolo e lekaneditšwego. Modimo  o ile a nea setšhaba sa gagwe sa Isiraele tebelelo ya go fetoga “sethšaba se sekxêthwa.” (Ekisodo 19:6) O ile a šegofatša setšhaba seo ka thulaganyo ya borapedi bjo e bego e le bjo bokgethwa, bjo bo hlwekilego le bjo bo sekilego. Ka gona bokgethwa ke taba ye e tšwelelago leboelela Molaong wa Moše. Ge e le gabotse, moperisita yo mogolo o be a rwala lematšana la gauta le le kgomareditšwego ka pele kefeng ya gagwe, moo bohle ba bego ba kgona go le bona le phadima seetšeng. Go lona go be go kgwarilwe mantšu a rego: “Bokgethwa ke bja Jehofa.” (Ekisodo 28:36, NW) Ka gona tekanyetšo e phagamego ya bohlweki le tshekego e be e swanetše go hlaola borapedi bja bona le tsela ya bona ya bophelo e le ka kgonthe. Jehofa o ile a ba botša gore: “Bang ba bakxêthwa, xobane Nna Morêna Modimo wa lena ke E Mokxêthwa.” (Lefitiko 19:2) Ge feela ba-Isiraele ba be ba phela ka keletšo ya Modimo go fihla bokgoleng bjoo bo ka kgonegago bakeng sa batho ba sa phethagalago, e be e le ba bakgethwa ka kgopolo e lekaneditšwego.

10. Ge go tliwa tabeng ya bokgethwa, ke phapano efe yeo e bego e le gona magareng ga Isiraele ya bogologolo le ditšhaba tše di bego di e dikologile?

10 Tsela ye ya go gatelela bokgethwa e be e fapane kudu le borapedi bja ditšhaba tšeo di bego di dikologile Isiraele. Ditšhaba tšeo tša baheitene di be di rapela medimo yeo go ba gona ga yona e bego e le ga maaka le mo go lešago dihlong, medimo yeo e bego e bontšhwa e le e šoro, ya megabaru le ya boitshwaro bjo bo gobogilego. E be e se e mekgethwa ka kgopolo e nngwe le e nngwe e kgonegago. Go rapela medimo e bjalo go be go dira gore batho e se ke ya ba ba bakgethwa. Ka baka leo, Jehofa o ile a lemoša bahlanka ba gagwe gore ba ikarole barapeding ba medimo ya baheitene le mekgwa ya bona e šilafetšego ya bodumedi.—Lefitiko 18:24-28; 1 Dikxoši 11:1, 2.

11. Bokgethwa bja mokgatlo wa Jehofa wa legodimong bo bonagala bjang go (a) barongwa? (b) barongwa-batuki? (c) Jesu?

11 Le ka tlase ga maemo a kaone-kaone, setšhaba sa Jehofa se se kgethilwego sa Isiraele ya bogologolo se be se kgona go bonagatša ganyenyane bokgethwa bja mokgatlo wa Modimo wa legodimong. Dibopiwa tša moya tše dimilione tšeo di hlankelago Modimo ka potego go bolelwa ka tšona e le “bakxêthwa ba dikete-kete.” (Doiteronomio 33:2; Juda 14) Ba bonagatša ka mo go phethagetšego bobotse bjo bo tagilego le bjo bo sekilego bja  bokgethwa bja Modimo. Le gona gopola barongwa-batuki bao Jesaya a ba bonego ponong ya gagwe. Seo koša ya bona e se bolelago se bontšha gore dibopiwa tše tše matla tša moya di bapala karolo e bohlokwa go tsebatšeng bokgethwa bja Jehofa legohleng ka moka. Lega go le bjalo, sephedi se sengwe sa moya se phagametše diphedi tše ka moka—ke Morwa yo a tswetšwego a nnoši wa Modimo. Jesu ke ponagatšo e phagamego kudu ya bokgethwa bja Jehofa. Ke ka tshwanelo ge a tsebja e le “Mokgethwa wa Modimo.”—Johane 6:68, 69, bapiša le NW.

Leina le Lekgethwa, Moya o Mokgethwa

12, 13. (a) Ke ka baka la’ng leina la Modimo le hlaloswa ka mo swanetšego e le le lekgethwa? (b) Ke ka baka la’ng leina la Modimo le swanetše go kgethagatšwa?

12 Go thwe’ng ka leina la Modimo ka noši? Ka ge re bone go Kgaolo 1, leina leo ga e fo ba sereto goba leswao feela. Le emela Jehofa Modimo gomme le akaretša dika tša gagwe ka moka. Ka gona, Beibele e re botša gore ke “Yo leina la gagwe e lego le lekgethwa.” (Jesaya 57:15, PK) Molao wa Moše o be o dirile gore go goboša leina la Modimo go fiwe kotlo ya lehu. (Lefitiko 24:16) Le gona ela hloko seo Jesu a ilego a se dira sa mathomo-thomo thapelong: “Tata-wešo wa maxodimong! Leina la xaxo a le kxêthwê.” (Mateo 6:9) Go kgethagatša selo se itšego go bolela go se hlaola e le se sekgethwa le go se hlompha, go se tšea e le se sekgethwa. Eupša ke ka baka la’ng selo seo ka bosona e lego se se sekilego go etša leina la Modimo se nyakago go kgethagatšwa?

13 Leina la Modimo le lekgethwa le ile la ganwa le go šilafatšwa ka maaka le go thomeletšwa. Kua Edene Sathane o ile a bolela maaka ka Jehofa gomme a bolela gore Ke Mmuši yo a sa lokago. (Genesi 3:1-5) Ga e sa le go tloga ka nako yeo, Sathane—mmuši wa lefase le leo e sego le lekgethwa—o ile a kgonthišetša gore maaka mabapi le Modimo a phatlalale. (Johane 8:44; 12:31; Kutollo 12:9) Madumedi a hlalositše Modimo e le nkgwete, yo a lego kgole goba yo sehlogo. A boletše gore a be a thekgwa ke yena dintweng tša ona tša go nyorelwa madi. Mediro e kgahlišago ya Modimo ya tlholo gantši go thwe e bile gona ka go itiragalela feela goba tlhagelelo. Ee, leina la Modimo le ile la pharwa ka maaka o šoro. Le swanetše go kgethagatšwa gomme letago la lona le le swanetšego  le swanetše go tsošološwa. Re hlologetše go bona leina la gagwe le kgethagatšwa le mmušo wa gagwe o godišwa, gomme re thabela go bapala karolo le ge e le efe morerong woo o mogolo.

14. Ke ka baka la’ng moya wa Modimo o bitšwa o mokgethwa, gomme ke ka baka la’ng go rogaka moya o mokgethwa e le taba e kgolo gakaakaa?

14 Go na le selo se sengwe se se tswalanago kgaufsi kudu le Jehofa se se bitšwago se sekgethwa ka tsela e nyakilego e le e swanago—moya wa gagwe goba matla a šomago. (Genesi 1:2) Jehofa o diriša matla a a magolo kudu go phethagatša merero ya gagwe. Sohle seo Modimo a se dirago, o se dira ka tsela e kgethwa, e sekilego le e hlwekilego, ka baka leo matla a gagwe a šomago a bitšwa ka mo go swanetšego gore ke moya o mokgethwa goba moya wa bokgethwa. (Luka 11:13; Ba-Roma 1:4) Go rogaka moya o mokgethwa, e lego se se akaretšago go dira tše di fapanego le merero ya Jehofa ka boithatelo, ke sebe se se sa lebalelwego.—Mareka 3:29.

Lebaka Leo ka Lona Bokgethwa bja Jehofa bo re Gogelago go Yena

15. Ke ka baka la’ng go ba le poifo ya go boifa Modimo e le karabelo e swanetšego bokgethweng bja Jehofa, gomme poifo e bjalo e akaretša’ng?

15 Ka gona, ga go thata go bona lebaka leo ka lona Beibele e tswalanyago bokgethwa bja Modimo le poifo ya go boifa Modimo ka lehlakoreng la batho. Ka mohlala, Psalme 99:3 e balega ka gore: “A ba rêtê ’ina l’axo le lexolo le le šiišaxo, ka xobane è le le lekxêthwa.” Lega go le bjalo, poifo ye ga se poifo e nyamišago. Go e na le moo, ke maikwelo a tseneletšego a tlhompho ya borapedi, tlhompho e lego ka sebopego sa yona se se tagafatšago kudu. Ke mo go swanetšego go ikwa ka tsela yeo, ka ge bokgethwa bja Modimo bo re phagametše kudu. Ke bjo bo hwekilego wa go phadima le bjo bo tagafetšego. Lega go le bjalo, ga se ya swanela go re nyamiša. Ka mo go fapanego, go ba le pono e nepagetšego ka bokgethwa bja Modimo go tla re batametša kgaufsi le yena. Ka baka la’ng?

Go etša ge re gogelwa ke botse, le bokgethwa bo swanetše go re gogela

16. (a) Bokgethwa bo tswalanywa bjang le botse? Nea mohlala. (b) Ditlhaloso tše di bonwago ka leihlo la kgopolo tša Jehofa di gatelela bjang bohlweki, tshekego le seetša?

16 Gare ga dilo tše dingwe, Beibele e tswalanya bokgethwa le botse. Go Jesaya 63:15, (PK), legodimo le hlaloswa e le ‘boago bja Modimo bjo bokgethwa le bja letago [“botse,” NW].’ Botse bo a re gogela. Ka mohlala, lebelela seswantšho se se lego go  letlakala 33. Na ga o gogelwe tikologong yeo? Ke eng seo se dirago gore e be e ipiletšago gakaakaa? Ela hloko kamoo meetse a bonagalago e le a sekilego ka gona. Gaešita le moya o swanetše go ba o hlwekile, ka gobane leratadima ke le letala gomme seetša se bonala se phadima. Bjale ge tikologo yona yeo e be e ka fetošwa—dinokana tša tlala ditlakala, dihlare le mafsika tša senywa ka mengwalo-ngwalo, moya wa šilafatšwa ke muši—re be re ka se sa hlwa re gogelega go yona; re be re tla nyama. Ka tlhago re tswalanya botse le bohlweki, tshekego le seetša. Mantšu ona a a ka dirišetšwa go hlalosa bokgethwa bja Jehofa. Ga go makatše ge ditlhaloso tše di bonwago ka leihlo la kgopolo tša Jehofa di re thabiša! E le bjo bo tagilego, bjo bo phadimago bjalo ka magakabje, bo phadima go etša mollo goba ditšhipi tše bohlokwa tše sekilego seki-seki le tše phadimago kudu—bjoo ke botse bja Modimo wa rena yo mokgethwa.—Hesekiele 1:25-28; Kutollo 4:2, 3.

17, 18. (a) Mathomong Jesaya o ile a kgongwa bjang ke pono ya gagwe? (b) Jehofa o ile a diriša bjang morongwa-motuki go kgothatša Jesaya, gomme ke eng seo se bego se bolelwa ke tiro ya morongwa-motuki?

17 Lega go le bjalo, na bokgethwa bja Modimo bo swanetše go re dira gore re ikwe re le tlase kudu ge re bapišwa le yena? Ge e le gabotse karabo ke ee. Go ba gona, re ba tlasana go Jehofa—gomme seo ke polelo e bontšhago go ba ga rena ba tlasana ka tekanyo e kgolo kudu. Na go tseba seo go swanetše go re aroganya le yena? Ela hloko karabelo ya Jesaya ge a be a e-kwa barongwa-batuki ba tsebatša bokgethwa bja Jehofa. “Nna ka re: Joo nna! Ke a fêlêla, ka xe ke le motho wa melomo ya dithšila, kè dutše le sethšaba sa melomo ya dithšila, xomme mahlô a-ka a bone Kxoši Morêna wa mašaba!” (Jesaya 6:5) Ee, bokgethwa bja Jehofa bjo bo sa lekanywego bo ile bja gopotša Jesaya kamoo e bego e le wa sebe le yo a sa phethagalago ka gona. Mathomong, monna yoo wa potego o ile a felelwa ke matla. Eupša Jehofa ga se a ka a mo tlogela a le boemong bjoo.

18 Gatee-tee morongwa-motuki o ile a homotša moporofeta. Bjang? Sephedi se matla sa moya se ile sa fofela aletareng, sa topa legala moo, gomme sa kgoma Jesaya melomong ka legala. Seo se ka kwagala e le se bohloko kudu go e na le go ba se se homotšago. Lega go le bjalo, gopola gore se e be e le pono e humilego ka tlhaloso ya seswantšhetšo. Jesaya, mo-Juda yo a botegago, o be a  tseba gabotse gore dihlabelo di be di newa letšatši le letšatši aletareng ya tempeleng e le go dira poelano bakeng sa dibe. Le gona morongwa-motuki ka lerato o ile a gopotša moporofeta gore gaešita le ge a be a tloga a sa phethagala, a e-na le “melomo e sa hlwekago,” o be a sa dutše a ka kgona go ba le boemo bjo bo hlwekilego pele ga Modimo. * Jehofa o be a ikemišeditše go lebelela motho yo a sa phethagalago wa sebe e le yo mokgethwa—bonyenyane ka kgopolo e lekaneditšwego.—Jesaya 6:6, 7.

19. Go kgonega bjang gore re be ba bakgethwa ka kgopolo e lekanyeditšwego, le ge re le bao ba sa phethagalago?

19 Go bjalo le lehono. Dihlabelo ka moka tšeo di bego di neelwa aletareng kua Jerusalema e be e fo ba meriti ya selo se sengwe se segolo—sehlabelo se tee se se phethagetšego se se neetšwego ke Jesu Kriste ka 33 C.E. (Ba-Hebere 9:11-14) Ge e ba re itshola e le ka kgonthe dibeng tša rena, re lokiša tsela ya rena e fošagetšego gomme re bontšha tumelo sehlabelong seo, re a lebalelwa. (1 Johane 2:2) Le rena re ka thabela boemo bjo bo hlwekilego ka pele ga Modimo. Ka baka leo, moapostola Petro o re gopotša gore: “Xo ngwadilwe xwa thwe: Bang ba bakxêthwa, xobane Nna ke e Mokxêthwa.”  (1 Petro 1:16) Ela hloko gore Jehofa ga se a bolela gore re swanetše go ba bakgethwa go etša kamoo yena a lego ka gona. Ga a ke a letela dilo tše di sa kgonegego go rena. (Psalme 103:13, 14) Go e na le moo, Jehofa o re botša gore re be ba bakgethwa ka gobane ke yo mokgethwa. “Byalo ka bana ba ba ratêxaxo,” re nyaka go mo ekiša go fihla moo re ka kgonago gona bjalo ka batho ba sa phethagalago. (Ba-Efeso 5:1) Ka gona go fihlelela bokgethwa ke mogato o tšwelago pele. Ge re dutše re gola moyeng, re šomela gore re “phethê kxêthêxô” letšatši le letšatši.—2 Ba-Korinthe 7:1.

20. (a) Ke ka baka la’ng go le bohlokwa go kwešiša gore re ka ba ba hlwekilego mahlong a Modimo wa rena yo mokgethwa? (b) Jesaya o ile a kgomega bjang ge a be a lemoga gore dibe tša gagwe di diretšwe poelano?

20 Jehofa o rata se se lokilego le se se sekilego. O hloile sebe. (Habakuku 1:13) Eupša ga se a re hloya. Ge feela re lebelela sebe ka tsela yeo a se lebelelago ka yona—re hloya se sebe, re rata se se lokilego—gomme re katanela go latela mehlaleng e phethagetšego ya Kriste Jesu, Jehofa o re lebalela dibe tša rena. (Amosi 5:15; 1 Petro 2:21) Ge re kwešiša gore re ka ba ba hlwekilego mahlong a Modimo wa rena yo mokgethwa, mafelelo e ba a tseneletšego. Gopola gore mathomong bokgethwa bja Jehofa bo ile bja gopotša Jesaya ka go se hlweke ga gagwe ka noši. O ile a goeletša ka gore: “Joo nna!” Eupša ka morago ge a kwešišitše gore dibe tša gagwe di be di diretšwe poelano, pono ya gagwe e ile ya fetoga. Nakong ya ge Jehofa a be a kgopela moithapi yo a ka phethago kabelo, Jesaya o ile a arabela kapejana, gaešita le ge a be a sa tsebe le ganyenyane seo se bego se tla akaretšwa. O ile a re: “Ké nna é, nthomê!”—Jesaya 6:5-8.

21. Ke motheo ofe wo re nago le wona wa kgodišego ya gore re ka hlagolela seka sa bokgethwa?

21 Re bopilwe ka seswantšho sa Modimo yo mokgethwa, gomme re filwe dika tša boitshwaro le bokgoni bja go hlagolela boemo bja moya. (Genesi 1:26) Go na le kgonagalo ya gore re ka ba ba bakgethwa ka gare ga rena ka moka. Ge re dutše re tšwela pele go hlagolela bokgethwa, Jehofa o thabela go re thuša. Ge nako e dutše e tšwela pele, re tla batamela kgaufsi kudu le Modimo wa rena yo mokgethwa. Go feta moo, ge re dutše re ithuta dika tša Jehofa dikgaolong tše di sa tlago, re tla bona gore go na le mabaka a mantši a matla bakeng sa go batamela kgaufsi le yena!

^ ser. 18 Polelwana e rego “melomo e sa hlwekago” ke e swanetšego ka gobane melomo gantši e dirišwa ka Beibeleng ka tsela ya seswantšhetšo go emela polelo goba leleme. Bathong bohle ba sa phethagalago, karolo e kgolo ya dibe e ka bonala tseleng yeo re dirišago matla a polelo ka gona.—Diema 10:19; Jakobo 3:2, 6.