Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Batamela Kgaufsi le Jehofa

 KGAOLO 8

Matla a Tsošološo—Jehofa o ‘Dira Dilo ka Moka tše Mpsha’

Matla a Tsošološo—Jehofa o ‘Dira Dilo ka Moka tše Mpsha’

1, 2. Ke ditahlegelo dife tšeo di tlaišago lapa la batho lehono, gomme tše di re kgoma bjang?

NGWANA o timetša goba o roba sebapadišwa sa gagwe sa mmamoratwa gomme o kgitla sello. Sello se tsena pelong! Lega go le bjalo, na o kile wa bona kamoo sefahlego sa ngwana se elago ka gona ge motswadi a mo nea seo se bego se lahlegile? Go motswadi, go hwetša sebapadišwa goba go se lokiša e ka ba e le taba e bonolo. Eupša ngwana o myemyela kudu gomme o tlala ka makalo. Seo se bego se bonagala se etše ruri se boile!

2 Jehofa, Motswadi yo mogolo-golo, o na le matla a go tsošološa seo bana ba gagwe ba lefaseng ba ka bago ba se lebelela e le seo se lahlegetšego sa ruri. Go ba gona, ga re bolele ka selo seo e fogo ba sebapadišwa. ‘Dinakong tše tšeo go lego thata go lebeletšana le tšona,’ re swanelwa ke go lebeletšana le go lahlegelwa ke dilo tše dikgolo kudu. (2 Timotheo 3:1-5, bapiša le NW.) Dilo tše dintši tšeo batho ba di lebelelago e le tša bohlokwa kudu di bonagala di le kotsing e kgolo—legae, dithoto, mošomo gaešita le bophelo bjo bobotse bja mmele. Re ka ba ra ikwa re nyama ge re nagana ka go senywa ga tikologo le tahlegelo yeo e bakwago ke seo, ka go hwelela ga mehuta e mentši ya diphedi. Lega go le bjalo, ga go na selo seo se re kwešago bohloko kudu go feta lehu la motho yo re mo ratago. Maikwelo a tahlegelo le a go hloka matla e ka ba a nolago moko.—2 Samuele 18:33.

3. Ke tebelelo efe e kgothatšago yeo e hlaloswago go Ditiro 3:21, gomme Jehofa o tla diriša eng go e phethagatša?

3 Ka gona, ke mo go homotšago gakaakang go ithuta ka matla a Jehofa a tsošološago! Ka ge re tla bona, go na le mehuta-huta e makatšago ya dilo tšeo Modimo a ka kgonago go di tsošološa e bile a tlago go di tsošološa bakeng sa bana ba gagwe ba lefaseng. Ge e le gabotse, Beibele e bontšha gore Jehofa o rera “xo tsoša tšohle.” (Ditiro 3:21, mongwalo o sekamego ke wa rena.) Bakeng sa go phetha se, Jehofa o tla diriša Mmušo wa Mesia, woo o bušago ke Morwa wa gagwe, Jesu Kriste. Bohlatse bo bontšha gore  Mmušo wo o thomile go buša legodimong ka 1914. * (Mateo 24:3-14) Ke eng seo se tlago go tsošološwa? Anke re hlahlobeng tše dingwe tša ditiro tše dikgolo tša Jehofa tša tsošološo. E nngwe ya tšona re šetše re ka kgona go e bona le go e thabela. Tše dingwe di tla tšwelela ka tekanyo e kgolo nakong e tlago.

Go Tsošološwa ga Borapedi bjo bo Sekilego

4, 5. Ke eng seo se ilego sa diragalela batho ba Modimo ka 607 B.C.E., gomme ke kholofelo efe yeo Jehofa a ilego a ba nea yona?

4 Selo se sengwe seo Jehofa a šetšego a se tsošološitše ke borapedi bjo bo sekilego. Bakeng sa gore re kwešiše seo se bolelwago ke se, anke re hlahlobeng ka boripana histori ya mmušo wa Juda. Go dira bjalo go tla re nea temogo e kgahlišago ka matla a Jehofa a go tsošološa a šomago.—Ba-Roma 15:4.

5 Anke o akanye feela kamoo ba-Juda ba botegago ba ilego ba ikwa ka gona ka 607 B.C.E. ge Jerusalema e be e senywa. Motse wa bona o rategago o ile wa šwalalanywa, maboto a wona a phušolwa. Se sebe le go feta, tempele ya letago yeo Salomo a bego a e agile, yeo e bego e le lefelo le nnoši la borapedi bjo bo sekilego bja Jehofa lefaseng ka moka, e ile ya tlogelwa e le lešope. (Psalme 79:1) Baphologi ba ile ba išwa bothopša Babele, ba tlogela naga ya gabo bona e le bodulo bja lešope bja diphoofolo tša lešoka. (Jeremia 9:10) Go ya ka pono ya batho, go be go bonagala dilo tšohle di lahlegetše sa ruri. (Psalme 137:1) Eupša Jehofa yo e bego e le kgale a boletše e sa le pele ka tshenyego ye, o ile a nea kholofelo ya gore nako ya tsošološo e be e letše ka pele.

6-8. (a) Ke taba efe e tšwelelago leboelela yeo e hwetšwago mengwalong ya baporofeta ba ba-Hebere, gomme ke bjang diporofeto tšeo di ilego tša phethagala la mathomo? (b) Mehleng yeno, batho ba Modimo ba ile ba bona bjang phethagalo ya diporofeto tše dintši tša tsošološo?

6 Ge e le gabotse, tsošološo e be e le taba yeo e tšwelelago leboelela  mengwalong ya baporofeta ba ba-Hebere. * Ka bona, Jehofa o ile a holofetša naga e tsošološitšwego le yeo e dulwago gape, e nonnego le e šireleditšwego tlhaselong ya dibata tša lešoka le manaba. O ile a hlalosa naga ya bona e tsošološitšwego e le paradeise ya kgonthe! (Jesaya 65:25; Hesekiele 34:25; 36:35) Ka godimo ga tšohle, borapedi bjo bo sekilego bo be bo tla tsošološwa, gomme tempele e be e tla agwa lefsa. (Mika 4:1-5) Diporofeto tše di ile tša nea ba-Juda bao ba išitšwego bothopša kholofelo, tša ba thuša go kgotlelela nywaga e 70 ya bothopša kua Babele.

7 Mafelelong, nako ya tsošološo e ile ya fihla. Ge ba lokolotšwe Babele, ba-Juda ba ile ba boela Jerusalema gomme ba aga tempele ya Jehofa lefsa moo. (Esera 1:1, 2) Ge feela ba be ba kgomaretše borapedi bjo bo sekilego, Jehofa o be a ba šegofatša gomme a nontšha naga ya bona le go e atlegiša. O ile a ba šireletša manabeng le dibateng tša lešoka tšeo di bego di ipuša ka naga ya bona ka nywaga-some e mentši. Ba swanetše go ba ba ile ba thaba kudu gakaakang go bona matla a Jehofa a tsošološo! Eupša ditiragalo tšeo di be di emela feela phethagalo ya mathomong le e lekanyeditšwego ya diporofeto tša tsošološo. Phethagalo e kgolo e be e sa dutše e tla tla “bofelong bya mabaka,” e lego mehleng ya rena, nakong yeo ka yona Moja-bohwa wa Kgoši Dafida yo e lego kgale a holofeditšwe a bego a tla bewa sedulong sa bogoši.—Jesaya 2:2-4; 9:5, 6.

8 Kapejana ka morago ga ge Jesu a beilwe sedulong sa bogoši Mmušong wa legodimong ka 1914, o ile a lebiša tlhokomelo dinyakweng tša moya tša batho ba Modimo ba botegago lefaseng. Go fo etša ge mofenyi wa mo-Peresia Korese a ile a lopolla mašaledi a ba-Juda Babele ka 537 B.C.E., Jesu o ile a lopolla mašaledi a ba-Juda ba moya—balatedi ba mohlala wa gagwe—tutuetšong ya Babele ya mehleng yeno e lego mmušo wa lefase wa bodumedi bja maaka. (Ba-Roma 2:29; Kutollo 18:1-5) Go tloga ka 1919 go ya pele, borapedi bjo bo sekilego bo ile bja tsošološetšwa lefelong la bjona le le swanetšego maphelong a Bakriste ba kgonthe. (Maleaki 3:1-5) Ga e sa le go tloga ka nako yeo, batho ba Jehofa ba ile ba mo rapela ka tempeleng ya gagwe ya moya—thulaganyo ya Modimo ya borapedi bjo bo sekilego. Ke ka baka la’ng se e le sa bohlokwa go rena lehono?

 Tsošološo ya Moya—Lebaka Leo ka Lona e Lego ya Bohlokwa

9. Ka morago ga mehla ya baapostola, dikereke tša Bojakane di ile tša dira’ng ka borapedi bja Modimo, eupša ke eng seo Jehofa a se dirilego mehleng ya rena?

9 Ela hloko pono ya histori. Morago kua lekgolong la pele la nywaga Bakriste ba ile ba thabela ditšhegofatšo tše dintši tša moya. Eupša Jesu le baapostola ba ile ba bolela e sa le pele gore borapedi bja therešo bo be bo tla gobošwa le go hwelela. (Mateo 13:24-30; Ditiro 20:29, 30) Ka morago ga mehla ya baapostola, Bojakane bo ile bja tšwelela. Baruti ba bjona ba ile ba amogela dithuto le mekgwa ya boheitene. Ba ile ba ba ba dira gore go batamela Modimo e be mo go sa kgonegego, ba mo hlalosa e le Boraro botee bjo bo sa kwešišegego le go ruta batho gore ba ipobole go baperisita le go rapela Maria le “bakgethwa” ba fapa-fapanego go e na le go rapela Jehofa. Bjale, ke eng seo Jehofa a se dirilego ka morago ga nywaga-kgolo e mentši ya kgobogo e bjalo? Ka gare-gare ga lefase la lehono—lefase leo le apareditšwego ke maaka a bodumedi e bile le šilafaditšwe ke mekgwa ya go se boife Modimo—o tsene ditaba gare gomme a tsošološa borapedi bjo bo sekilego! Ka ntle le go feteletša ditaba, re ka bolela gore tsošološo ye ke e nngwe ya ditiragalo tše bohlokwa kudu mehleng yeno.

10, 11. (a) Ke dikarolo dife tše pedi tšeo paradeise ya moya e di akaretšago, gomme wena o kgomega bjang? (b) Ke mohuta ofe wa batho woo Jehofa a o kgobokeleditšego paradeiseng ya moya, gomme ke’ng seo ba tlago go ba le tokelo ya go se bona?

10 Ka gona, Bakriste ba therešo lehono ba thabela paradeise ya moya. Paradeise ye e akaretša’ng? Ge e le gabotse, e akaretša dikarolo tše pedi. Karolo ya pele ke borapedi bjo bo sekilego bja Modimo wa therešo, Jehofa. O re šegofaditše ka tsela ya borapedi yeo e se nago maaka le go kgopamišwa ga ditaba. O re šegofaditše ka dijo tša moya. Se se dira gore re kgone go ithuta ka Tatago rena wa legodimong, re mo kgahliše gomme re batamele kgaufsi le yena. (Johane 4:24) Karolo ya bobedi ya paradeise ya moya e akaretša batho. Go etša ge Jesaya a boletše e sa le pele, “bofelong bya mabaka” Jehofa o rutile barapedi ba gagwe ditsela tša khutšo. O fedišitše ntwa gare ga rena. Go sa šetšwe go se phethagale ga rena, o re thuša gore re apare “motho e mofsa.” O šegofatša maiteko  a rena ka moya wa gagwe o mokgethwa, woo o tšweletšago dienywa tše dibotse ka go rena. (Ba-Efeso 4:22-24; Ba-Galatia 5:22, 23) Ge o dira ka go dumelelana le moya wa Modimo, o karolo ya paradeise ya moya e le ka kgonthe.

11 Jehofa o kgobokeleditše paradeiseng ye ya moya mohuta wa batho bao a ba ratago—bao ba mo ratago, ba ba ratago khutšo le bao ba “lemogago dinyakwa tša bona tša moya.” (Mateo 5:3, NW) Ba ke batho bao ba tlago go ba le tokelo ya go bona tsošološo e kgolo kudu—ya go tsošološwa ga batho le lefase ka moka.

“Bonang, Dilo ka Moka ke di Dira tše Mpsha”

12, 13. (a) Ke ka baka la’ng diporofeto tša tsošološo di sa dutše di swanetše go phethagatšwa ka tsela e nngwe? (b) Morero wa Jehofa ka lefase ke ofe go etša ge o boletšwe kua Edene, gomme ke ka baka la’ng se se re nea kholofelo ka bokamoso?

12 Diporofeto tše dintši tša mabapi le tsošološo di bonala di bolela se se fetago tsošološo ya moya feela. Ka mohlala, Jesaya o ngwadile mabapi le nako ya ge balwetši, bao e lego digole, difofu le difoa ba tla be ba fodišitšwe gomme le lehu ka bolona le tla be le meditšwe sa ruri. (Jesaya 25:8; 35:1-7) Diporofeto tše bjalo ga se tša ba le phethagalo ya kgonthe Isiraeleng ya bogologolo. Le gona le ge re bone phethagalo ya moya ya dikholofetšo tše mehleng ya rena, go na le mabaka ohle a go dumela gore nakong e tlago go tla ba le phethagalo ya kgonthe e feletšego. Re tseba bjang seo?

13 Morago kua Edene, Jehofa o ile a hlalosa ka mo go kwalago morero wa gagwe ka lefase: Gore le be le swanetše go dulwa ke lapa la batho le le thabilego, le le phetšego gabotse mmeleng le le le kopanego. Monna le mosadi ba be ba swanetše go hlokomela lefase le dibopiwa ka moka tša lona, ba fetole polanete ka moka go ba paradeise. (Genesi 1:28) Seo se fapane kudu le boemo bja gona bjale bja dilo. Lega go le bjalo, kgodišega gore merero ya Jehofa le ka mohla ga e ke e folotša. (Jesaya 55:10, 11) Jesu, e le Kgoši ya Mesia yeo e kgethilwego ke Jehofa, o tla tliša Paradeise ye ya lefase ka bophara.—Luka 23:43.

14, 15. (a) Jehofa o tla dira bjang ‘dilo ka moka tše mpsha’? (b) Bophelo bo tla ba bjang Paradeiseng, gomme ke karolo efe yeo e ipiletšago kudu go wena?

14 Akanya o bona lefase ka moka le fetotšwe Paradeise! Jehofa o  bolela ka nako yeo gore: “Bonang dilo ka moka ke di dira tše mpsha.” (Kutollo 21:5, PK) Nagana ka seo se se tlago go se bolela. Ge Jehofa a feditše go kgatikanya matla a gagwe a senyago malebana le tshepedišo ye ya kgale e kgopo, go tla šala “maxodimo a mafsa le lefase le lefsa.” Se se bolela gore mmušo o mofsa o tla buša go tšwa legodimong, wa buša godimo ga lekoko le lefsa la lefaseng leo le bopšago ke bao ba ratago Jehofa le bao ba dirago thato ya gagwe. (2 Petro 3:13) Sathane gotee le batemona ba gagwe ba tla bewa boemong bja go se dire selo. (Kutollo 20:3) Ka lekga la mathomo ka morago ga nywaga e dikete, batho ba tla lokologa tutuetšong yeo e gobogilego, ya lehloyo le e senyago. Ga go pelaelo gore go tla aparela maikwelo a kimologo.

15 Mafelelong, re tla kgona go hlokomela polanete ye e botse go etša ge re be re reretšwe go dira bjalo mathomong. Lefase le na le matla a tlhago a go tsošološa dilo. Matsha le dinoka tšeo di šilafaditšwego di ka kgona go itlhwekiša ge e ba mothopo wa tšhilafalo o fedišitšwe; mafelo ao a sentšwego ke ntwa a ka mpshafala ge e ba dintwa di kgaotša. E tla ba lethabo le legolo gakaakang go šoma ka go dumelelana le melao le ditshepedišo tša lefase, re thuša go le fetoša phaka e swanago le serapa, Edene ya lefase ka moka yeo e nago le diphedi tša mehuta-huta! Go e na le go fediša mehuta-huta ya diphoofolo le ya dimela ka boomo, motho o tla phedišana ka khutšo le tlholo ka moka mo lefaseng. Gaešita le bana ba ka se be le seo ba se boifago diphoofolong tša naga.—Jesaya 9:5, 6; 11:1-9.

16. Paradeiseng, ke tsošološo efe yeo e tlago go kgoma motho yo mongwe le yo mongwe yo a botegago?

16 Gape re tla bona mpshafatšo bathong. Ka morago ga Haramagedone, baphologi ba tla bona diphodišo tša mohlolo lefaseng ka moka. Go etša ge a ile a dira ge a be a le mo lefaseng, Jesu o tla diriša matla a gagwe ao a a neilwego ke Modimo go dira gore difofu di bone, difoa di kwe le go dira gore digole le ba babjago ba ikwe ba phetše gabotse mmeleng. (Mateo 15:30) Batšofadi ba tla thabela matla a mpshafaditšwego a bofsa, bophelo bjo bobotse bja mmele gotee le go ba mafolofolo. (Jobo 33:25) Mašošo nameng a tla hwelela, ditho di tla otlologa gomme mešifa e tla koba-kobega ka matla a mpshafaditšwego. Batho ka moka ba botegago ba tla kwa gore mafelelo a sebe le go se phethagale a  hwelela ganyenyane-ganyenyane gomme a a tloga. Re tla leboga Jehofa Modimo kudu gakaakang bakeng sa matla a gagwe a kgahlišago a tsošološo! Ga bjale anke re lebišeng tlhokomelo karolong e ruthetšago pelo kudu ya nako ye yeo e thabišago ya tsošološo.

Go Tsošološa Bophelo Bahung?

17, 18. (a) Ke ka baka la’ng Jesu a ile a kgalema Basadutsei? (b) Ke maemo afe ao a ilego a dira gore Eliya a kgopele Jehofa gore a tsoše motho?

17 Lekgolong la pele la nywaga C.E., baetapele ba bangwe ba bodumedi bao ba bego ba bitšwa Basadutsei, ba be ba sa dumele tsogong. Jesu o ile a ba kgalema ka mantšu a rego: “Le a timêla, ka xobane xa Le tsebe mangwalô; le matla a Modimo xa Le a tsebe.” (Mateo 22:29) Ee, Mangwalo a utolla gore Jehofa o na le matla a bjalo a tsošološo. Bjang?

18 Akanya ka seo se ilego sa direga mehleng ya Eliya. Mohlologadi o be a kukile mmele o lepelelago wa ngwana a nnoši wa gagwe. Mošemane o be a hwile. Moporofeta Eliya, yo e bego e šetše e le lebakanyana e le moeng wa mohlologadi, o swanetše go ba a ile a tšhoga. Pejana, o be a ile a thuša ka go hlakodiša ngwana yo gore a se bolawe ke tlala. Mohlomongwe Eliya o be a rata mošemane yo. Mmagwe o be a kwele bohloko kudu. Mošemane yo e be e le kgopotšo e nnoši e phelago yeo e bego e mo gopotša monna wa gagwe yo a hwilego. A ka no ba a be a holofetše gore morwa wa gagwe o be a tla mo hlokomela botšofading bja gagwe. A fedile matla, mohlologadi o be a tšhoga gore o be a otlwa bakeng sa phošo e nngwe ya gagwe ya nakong e fetilego. Eliya ga se a kgona go kgotlelela go bogela masetla-pelo a a mpefalela pele ka tsela e bjalo. O ile a tšea ka bonolo setopo kgareng ya mmago sona, a se iša phapošing ya gagwe gomme a kgopela Jehofa Modimo gore a tsošološe bophelo bja ngwana yoo.—1 Dikxoši 17:8-21.

19, 20. (a) Aborahama o ile a bontšha bjang gore o be a e-na le tumelo matleng a Jehofa a tsošološo, gomme motheo wa tumelo e bjalo e be e le ofe? (b) Jehofa o ile a putsa bjang tumelo ya Eliya?

19 Eliya e be e se motho wa pele wa go dumela tsogong. Nywaga-kgolong pejana, Aborahama o ile a dumela gore Jehofa o na le matla a bjalo a tsošološo—le gona a e-na le lebaka le lebotse la go dumela seo. Ge Aborahama a be a e-na le nywaga e 100 gomme  Sara a e-na le e 90, Jehofa o ile a tsošološa matla a bona a pelego ao a bego a hwile, ka mohlolo a dira gore Sara a kgone go belega morwa. (Genesi 17:17; 21:2, 3) Ka morago ge mošemane a šetše a gotše go iphetša, Jehofa o ile a kgopela Aborahama gore a dire sehlabelo ka morwa wa gagwe. Aborahama o ile a bontšha tumelo, a dumela gore Jehofa a ka kgona go bušetša Isaka wa gagwe yo a ratwago bophelong. (Ba-Hebere 11:17-19) Tumelo e bjalo e tseneletšego e ka hlalosa lebaka leo ka lona Aborahama pele ga ge a ka rotogela thabeng go yo dira sehlabelo ka morwa wa gagwe, a ilego a kgonthišetša bahlanka ba gagwe gore yena le Isaka ba be ba tla boa gotee.—Genesi 22:5.

“O k’O bônê, ngwana wa xaxo ó a phêla!”

20 Jehofa o ile a šireletša Isaka, ka gona go be go sa nyakege gore go be le tsogo ka nako yeo. Lega go le bjalo, tabeng ya Eliya, morwa wa mohlologadi o be a šetše a hwile—eupša e sego ka nako e telele. Jehofa o ile a putsa tumelo ya moporofeta ka go tsoša ngwana! Ka morago Eliya o ile a iša mošemane go mmagwe ka mantšu a ao a sa lebalegego: “O k’O bônê, ngwana wa xaxo ó a phêla!”—1 Dikxoši 17:22-24.

21, 22. (a) Morero wa ditsogo tšeo di begilwego ka Mangwalong e be e le ofe? (b) Paradeiseng, tsogo e tla dirwa ka tekanyo e kaaka’ng, gomme e tla dirwa ke mang?

21 Ka gona ke lekga la pele pegong ya Beibele, re bona Jehofa a diriša matla a gagwe go tsošološa bophelo bja motho. Le gona, ka morago Jehofa o ile a nea Elisa, Jesu, Paulo le Petro matla a go tsošetša bahu bophelong. Go ba gona, bao ba ilego ba tsošwa ba ile ba hwa mafelelong. Lega go le bjalo, dipego tše bjalo tša Beibele di re nea sebaka sa go bonela pele mo go kgahlišago dilo tšeo di tlago.

22 Paradeiseng, Jesu o tla phethagatša karolo ya gagwe e le “tsoxô le bophelô.” (Johane 11:25) O tla tsoša ba dimilione tše di sa balegego, a ba nea sebaka sa go phela ka mo go sa felego Paradeiseng mo lefaseng. (Johane 5:28, 29) Nagana ka go kopanywa gape le bagwera ba pelo-bohloko le ba leloko, bao e lego kgale ba arogantšwe ke lehu, ba gokarelana ba le boemong bja go thaba kudu! Batho ka moka ba tla tumiša Jehofa ka baka la matla a gagwe a tsošološo.

23. Ponagatšo e kgolo go di feta ka moka ya matla a Jehofa e bile efe, gomme ye e kgonthišetša bjang kholofelo ya rena ka bokamoso?

 23 Jehofa o neile kgonthišetšo e tiilego wa lwala ya gore dikholofelo tše bjalo ke tša kgonthe. Ponagatšong e kgolo go di feta ka moka ya matla a gagwe, o ile a tsoša Morwa wa gagwe, Jesu, e le sebopiwa se matla sa moya, a mo dira gore e be yena feela a hlatlamago Jehofa. Jesu yo a tsošitšwego o ile a tšwelela go dihlatse tše bonego ka mahlo tše makgolo. (1 Ba-Korinthe 15:5, 6) Bohlatse bjo bjalo e swanetše go ba bjo bo lekanego gaešita le go babelaedi. Jehofa o na le matla a go tsošološa bophelo.

24. Ke ka baka la’ng re ka kgodišega gore Jehofa o tla tsoša bahu, gomme ke kholofelo efe yeo yo mongwe le yo mongwe wa rena a ka e tšeelago godimo?

24 Ga se feela gore Jehofa o na le matla a go tsoša bahu eupša gape o na le kganyogo ya go dira bjalo. Monna yo a botegago Jobo o ile a budulelwa gore a bolele gore Jehofa ge e le gabotse o hlologetšwe go tsoša bahu. (Jobo 14:15) Na ga o gogelwe go Modimo wa rena, yo a fišegelago go diriša matla a gagwe a tsošološo ka tsela e bjalo e lerato? Lega go le bjalo, gopola gore tsogo e fo ba karolo e nngwe ya modiro o mogolo wa tsošološo wa Jehofa wo o letšego ka pele. Ge o dutše o batamela kgaufsi kudu le yena, ka mehla tšeela godimo kholofelo e kgahlišago ya gore o ka kgona gore o be gona moo go bona ge Jehofa a ‘dira dilo ka moka tše mpsha.’—Kutollo 21:5.

^ ser. 3 “Mabaka a xo tsoša tšohle” a thomile ge Mmušo wa Mesia o be o hlongwa gomme Kgoši Dafida yo a botegago e le moja-bohwa sedulong sa bogoši. Jehofa o be a holofeditše Dafida gore moja-bohwa wa gagwe o be a tla buša ka mo go sa felego. (Psalme 89:35-37) Eupša ka morago ga ge Babele e fedišitše Jerusalema ka 607 B.C.E, ga go na setlogolo sa Dafida sa motho seo se ilego sa dula sedulong sa bogoši sa Modimo. Jesu, yo a ilego a belegelwa lefaseng e le moja-bohwa wa Dafida, o ile a fetoga Kgoši yeo e bego e le kgale e holofeditšwe ge a be a bewa sedulong sa bogoši legodimong.

^ ser. 6 Ka mohlala, Moše, Jesaya, Jeremia, Hesekiele, Hosea, Joele, Amosi, Obadya, Mika le Tsefanya ka moka ga bona ba boletše ka taba ye.

Ithute ka mo go oketšegilego

Morero wa Modimo ka Lefase ke Ofe?

Na morero wa Modimo ka lefase o tla ka wa phethagala? Ge e ba go le bjalo o tla phethagala neng?