Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Batamela Kgaufsi le Jehofa

 KGAOLO 9

‘Kriste yo e Lego Matla a Modimo’

‘Kriste yo e Lego Matla a Modimo’

1-3. (a) Ke phihlelo efe e tšhošago yeo barutiwa ba bilego le yona Lewatleng la Galilea, gomme ke eng seo Jesu a ilego a se dira? (b) Ke ka baka la’ng e le mo go swanetšego gore Jesu a bitšwe ‘Kriste yo e lego matla a Modimo’?

BARUTIWA ba be ba tšhogile. Ba be ba sesa go selaganya lewatle la Galilea ge ba be ba hlaselwa ke ledimo ka mo go sa letelwago. Ga go pelaelo gore ba be ba kile ba bona madimo letsheng le pele—go feta moo, ba bangwe ba banna bao e be e le barei ba dihlapi ba nago le phihlelo. * (Mateo 4:18, 19) Eupša le e be e le “ledimo le letona,” gomme le ile la akgofela go hlafiša lewatle. Banna ba ile ba šoma ka matla go sepediša sekepe ka go se hudua, eupša ledimo le ile la ba fekeetša ka matla. “Le-sela-watlê la ribêxêlwa” ke maphoto a hlatlogago, moo le ilego la thoma go tlala meetse. Go sa šetšwe tlhaka-tlhakano, Jesu o be a ile ka boroko kua morago ga sekepe, a lapile ka morago ga go fetša letšatši a ruta mašaba. Ka baka la go tšhogela maphelo a bona, barutiwa ba ile ba mo tsoša, ba lopa ka gore: “Morêna, [re phološe, PK]; re a lahlêxa!”—Mareka 4:35-38; Mateo 8:23-25.

2 Jesu o be a se a tšhoga. Ka kgodišego e feletšego, o ile a kgalemela moya le lewatle a re: “Homola O re ‘tuu’!” Kapejana moya le lewatle di ile tša mo kwa—ledimo la kgaotša, maphoto a hwelela ke moka “xwa ruthêla ruri.” Bjale barutiwa ba ile ba welwa ke poifo e sa tlwaelegago. Ba ile ba botšišana ka go duma-duma gore: “Byale motho yó ké mang?” Ka kgonthe, ke motho mang yo a bego a ka kgalemela moya le lewatle bjalo ka ge eka o retolla ngwana yo a sa laolegego?—Mareka 4:39-41; Mateo 8:26, 27.

 3 Eupša Jesu e be e se motho yo a tlwaelegilego. Matla a Jehofa a ile a bontšhwa go yena le ka yena ka ditsela tše di sa tlwaelegago. Moapostola Paulo yo a buduletšwego o be a ka bolela ka mo go swanetšego ka yena e le ‘Kriste yo e lego matla a Modimo.’ (1 Ba-Korinthe 1:24, PK) Matla a Modimo a bonagatšwa ka Jesu ka ditsela dife? Le gona ke tutuetšo efe yeo go diriša ga Jesu matla go ka bago le yona bophelong bja rena?

Matla a Morwa yo a Tswetšwego a Nnoši wa Modimo

4, 5. (a) Jehofa o ile a nea Morwa wa gagwe yo a tswetšwego a nnoši matla afe le taolo? (b) Morwa yo o be a hlamilwe bjang gore a phethagatše merero ya Tatagwe ya go bopa?

4 Nagana ka matla ao Jesu a bego a e-na le wona nakong ya go ba gona ga gagwe pele a e-ba motho. Jehofa o dirišitše ‘matla a gagwe a neng le neng’ ge a be a bopa Morwa wa gagwe yo a tswetšwego a nnoši, yo a ilego a tla a tsebja e le Jesu Kriste. (Ba-Roma 1:20; Ba-Kolose 1:15) Ka morago ga moo, Jehofa o ile a abela Morwa yo matla a magolo le taolo, a mo nea kabelo ya gore a phethagatše merero ya Gagwe ya go bopa. Beibele ge e bolela ka Morwa, e re: “Tšohle di dirilwe ke Yêna; ’me xo tše di dirilwexo xa xo se se sa kaxo sa dirwa ke Yêna.”—Johane 1:3.

5 Re kgona go kwešiša go se nene bogolo bja kabelo yeo. Akanya ka matla ao a nyakegago bakeng sa go tšweletša barongwa ba matla ba dimilione, legohle le le bonagalago le melalatladi ya lona ya dinaledi e dimilione tše dikete gotee le lefase leo le nago le diphedi tša mehuta-huta. Bakeng sa go phethagatša mediro yeo, Morwa yo a tswetšwego a nnoši o be a e-na le matla a magolo kudu legohleng—moya o mokgethwa wa Modimo. Morwa yo o be a thabela kudu go ba Mošomi yo a Nago le Bokgoni yoo Jehofa a ilego a mo diriša go bopa dilo tše dingwe ka moka.—Diema 8:22-31, bapiša le NW.

6. Ka morago ga lehu la gagwe lefaseng gotee le tsogo ya gagwe, ke matla afe le taolo tšeo Jesu a ilego a di newa?

6 Na Morwa yo a tswetšwego a nnoši o be a ka amogela matla le taolo tše oketšegilego? Ka morago ga lehu la Jesu lefaseng le tsogo ya gagwe, o itše: “Ke neilwe matla ka moka lexodimong  le lefaseng.” (Mateo 28:18) Ee, Jesu o neilwe bokgoni le tshwanelo tša go diriša matla legohleng. Ka ge e le “Kxoši ya maxoši, Morêna wa marêna,” o neilwe matla a go ‘fediša bobuši bjohle, le bogoši bjohle, le tše matla ka moka’—tše di bonagalago le tše di sa bonagalego—tšeo di lwantšhanago le Tatagwe. (Kutollo 19:16; 1 Ba-Korinthe 15:24-26) Modimo “ó beile tšohle ka tlase xa ’naô” tša Jesu—ke gore, ka ntle le Jehofa ka boyena.—Ba-Hebere 2:8; 1 Ba-Korinthe 15:27.

7. Ke ka baka la’ng re ka kgodišega gore Jesu le ka mohla a ka se ke a diriša gampe matla ao Jehofa a mo gafetšego wona?

7 Na re swanetše go tshwenyega ka gore Jesu mo gongwe a ka diriša matla a gagwe gampe? Le gatee-tee! Jesu o rata Tatagwe e le ka kgonthe gomme le ka mohla a ka se ke a dira selo le ge e le sefe seo se ka se mo kgahlišego. (Johane 8:29; 14:31) Jesu o tseba gabotse gore Jehofa le ka mohla ga a ke a diriša matla a gagwe a magolo gampe. Jesu o iponetše ka boyena gore Jehofa o tsoma dibaka tša “xore a bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) Ka kgonthe, Jesu o rata batho ka lerato le le swanago le la Tatagwe, ka gona re ka holofela gore Jesu o tla dula a diriša matla a gagwe ka tsela e holago. (Johane 13:1) Jesu o hlomile pego e sa solegego tabeng ye. Anke re hlahlobeng matla ao a bego a e-na le wona ge a be a le lefaseng le kamoo a bego a tutueletšega go a diriša ka gona.

“Yo Matla . . . Dipolelong”

8. Ka morago ga go tlotšwa ga gagwe, Jesu o ile a newa matla a go dira’ng, gomme o ile a diriša matla a gagwe bjang?

8 Go bonala Jesu a se a ka a dira mehlolo ge e be e sa le mošemane yo a sa golago kua Natsaretha. Eupša seo se ile sa fetoga ka morago ga gore a kolobetšwe ka 29 C.E., a e-na le nywaga e ka bago e 30. (Luka 3:21-23) Beibele e re botša gore: “Yo Modimo a mo tloditšexo ka Môya-mokxêthwa le ka matla, a tšama a [direla batho ka botho, PK], à fodiša bohle ba xo katakêlwa ke Diabolo.” (Ditiro 10:38) ‘Go direla batho ka botho’—na seo ga se bontšhe gore Jesu o be a diriša matla a gagwe ka tsela e swanetšego? Ka morago ga ge a tloditšwe, o ile a ba “moporofeta yo matla medirong le dipolelong.”—Luka 24:19.

9-11. (a) Jesu o be a direla kae karolo e kgolo ya boboledi bja gagwe, gomme ke tlhohlo efe yeo a ilego a lebana le yona? (b) Ke ka baka la’ng mašaba a be a tlabja ke tsela ya Jesu ya go ruta?

 9 Jesu e be e le yo matla bjang dipolelong? Gantši o be a ruta a le mafelong a bulegilego—mabopong a matsha le dithitong tša dithaba gotee le ditarateng le mebarakeng. (Mareka 6:53-56; Luka 5:1-3; 13:26) Batheetši ba gagwe ba be ba ka fo itshepelela ge e ba ba be ba sa kgahlwe ke mantšu a gagwe. Mehleng ya pele ga dipuku tše di gatišitšwego, batheetši bao ba nago le tebogo ba be ba swanelwa ke go boloka mantšu a gagwe menaganong le dipelong tša bona. Ka gona thuto ya Jesu e be e swanetše go ba yeo e tlogago e gapa kgahlego, e kwešišegago gabonolo le yeo e gopolegago gabonolo. Eupša Jesu o be a se na bothata ka tlhohlo ye. Ka mohlala, ela hloko Thuto ya gagwe ya Thabeng.

10 Mesong e mengwe mathomong a 31 C.E., lešaba le ile la bokana thitong ya thaba kgaufsi le Lewatle la Galilea. Ba bangwe ba be ba tlile ba e-tšwa Judea le Jerusalema, bokgole bja dikhilomithara tše 100 go ya go tše 110. Ba bangwe ba be ba tlile ba e-tšwa tikologong ya lebopo la Tiro le Sidone go ya ka leboa. Batho ba bantši ba babjago ba ile ba batamela kgaufsi le Jesu gore ba mo kgwathe, gomme o ile a ba fodiša ka moka ga bona. Ge go be go se sa na motho yoo a babjago kudu gare ga bona, o ile a thoma go ba ruta. (Luka 6:17-19) Ge a feditše go bolela lebakanyana le itšego ka morago, ba be ba makaditšwe ke seo ba bego ba se kwele. Ka baka la’ng?

11 Nywaga ka morago, yo mongwe yo a bego a kwele thuto yeo o ile a ngwala gore: “Mašaba a batho a tlabya ke thutô ya xaxwe, ka xobane à ba ruta bo-ka E a naxo le matla.” (Mateo 7:28, 29) Jesu o be a bolela ka matla ao ba bego ba ka kgona go a kwa. O be a bolela legatong la Modimo e bile a thekga thuto ya gagwe ka matla a Lentšu la Modimo. (Johane 7:16) Dipolelo tša Jesu di be di kwagala gabotse, dikeletšo tša gagwe di be di kgodiša gomme ditaba tša gagwe di be di sa ganetšege. Mantšu a gagwe a be a fihlelela mokong wa ditaba gotee le go fihlelela dipelo tša batheetši ba gagwe. O ile a ba ruta kamoo ba ka hwetšago lethabo, kamoo ba ka rapelago, kamoo ba ka tsomago Mmušo wa Modimo  le kamoo ba ka agago ka gona bokamoso bjo bo šireletšegilego. (Mateo 5:3–7:27) Dipolelo tša gagwe di be di tsoša dipelo tša bao ba swerwego ke tlala ya therešo le go loka. Batho ba bjalo ba be ba ikemišeditše go ‘ikgafa’ le go tlogela dilo tšohle e le gore ba mo latele. (Mateo 16:24; Luka 5:10, 11) A bohlatse bjo bogolo gakaakang bja matla a dipolelo tša Jesu!

“Yo Matla Medirong”

12, 13. Ke ka kgopolo efe Jesu e bego e le “yo matla medirong,” gomme mehlolo ya gagwe e be e fapa-fapana bjang?

12 Jesu gape e be e le “yo matla medirong.” (Luka 24:19) Diebangedi di bega mehlolo e itšego e 30 yeo e dirilwego ke yena—ka moka ka “matla a Modimo.” * (Luka 5:17) Mehlolo ya Jesu e ile ya kgoma maphelo a ba dikete. Mehlolo e mebedi feela—go fepša ga banna ba 5 000 gomme ka morago ya ba banna ba 4 000 “xò s’a balwa basadi le bana”—e be e akaretša mašaba ao mohlomongwe a fihlago go batho ba ka bago 20 000!—Mateo 14:13-21; 15:32-38.

“Ba bôna Jesu à sepela xodimo xa lewatlê”

13 Mehlolo ya Jesu e be e fapa-fapana kudu. O be a na le matla a fetago a batemona, gomme a ba leleka gabonolo. (Luka 9:37-43) O be a buša dilo tša tlhago, e bile a fetoša meetse gore e be beine. (Johane 2:1-11) Seo se ilego sa tlaba barutiwa ba gagwe ke ge a be a sepela godimo ga Lewatle la Galilea leo le bego le tšubutlwa ke phefo. (Johane 6:18, 19) O be a fenya bolwetši, a fodiša mafokodi a mmele, malwetši a šoro le malwetši a beago bophelo kotsing. (Mareka 3:1-5; Johane 4:46-54) O be a dira diphodišo tšeo ka ditsela tše di fapa-fapanego. O ile a fodiša ba bangwe ba le kgole kudu le yena, mola ba bangwe ba ile ba kwa ge Jesu a ba kgwatha ka noši. (Mateo 8:2, 3, 5-13) Ba bangwe ba ile ba fodišwa gatee-tee, ba bangwe ya ba ganyenyane-ganyenyane.—Mareka 8:22-25; Luka 8:43, 44.

14. Ke ka tlase ga maemo afe moo Jesu a ilego a bontšha gore o na le matla a go dirolla lehu?

14 Ka mo go lemogegago, Jesu o be a e-na le matla a go dirolla lehu. Mabakeng a mararo ao a begilwego, o ile a tsoša bahu, a  bušetša batswadi morwedi wa bona wa nywaga e 12, a bušetša ngwana a nnoši wa mma wa mohlologadi le go bušetša kgaetšedi yo a rategago go dikgaetšedi tša gagwe. (Luka 7:11-15; 8:49-56; Johane 11:38-44) Ga go boemo bjoo bo ilego bja bonala e le bjo bo thata ka kudu. O ile a tsoša ngwanenyana wa nywaga e 12 diphateng tša gagwe tša lehu kapejana ka morago ga gore a hwe. O ile a tsoša morwa wa mohlologadi leakong leo a bego a yo bolokwa ka lona, ga go na pelaelo gore e be e le letšatšing leo a hwilego ka lona. Le gona o ile a tsoša Latsaro lebitleng leo a bego a bolokilwe go lona ka morago ga matšatši a mane a hwile.

Tsela ya go Diriša Matla Yeo e Sego ya Boithati, ya Boikarabelo le ya go Naganela

15, 16. Ke bohlatse bofe bjo bo lego gona bja gore Jesu o be a se na boithati tseleng yeo a bego a diriša matla a gagwe ka gona?

15 Na o ka akanya ka kgonagalo ya tirišo e mpe ya matla ge nkabe matla a Jesu a be a ka bewa ka diatleng tša mmuši yo a sa phethagalago? Eupša Jesu o be a se na sebe. (1 Petro 2:22) O ile a gana go šilafatšwa ke boithati, go rata maemo le megabaru tšeo di tutueletšago batho ba sa phethagalago go diriša matla a bona bakeng sa go kweša ba bangwe bohloko.

16 Jesu o be a se na boithati tseleng ya go diriša ga gagwe matla, gomme le ka mohla o be a sa ke a a dirišetša go ikhola. Ge a be a swerwe ke tlala, o ile a gana go fetola mabje gore e be bogobe bakeng sa gagwe. (Mateo 4:1-4) Dithoto tša gagwe tša maemo a tlase e be e le bohlatse bja gore o be a sa boelwe ka dilo tše di bonagalago tseleng yeo a bego a diriša matla a gagwe ka gona. (Mateo 8:20) Go na le bohlatse bjo bongwe bja gore mediro ya gagwe e matla e be e dirwa ka maikemišetšo ao a se nago boithati. Ge a be a dira mehlolo, o be a dira bjalo ka boikgafo bjo bo itšego. Ge a be a fodiša balwetši, matla a be a e-tšwa mo go yena. O be a lemoga go tšwa mo ga matla, gaešita le ge e ba a be a ka fodiša motho o tee. (Mareka 5:25-34) Lega go le bjalo, o be a dumelela mašaba a batho a mo kgwatha gomme a be a fola. (Luka 6:19) A moya wa go hloka boithati gakaakang!

17. Jesu o ile a bontšha bjang gore o be a e-na le boikarabelo tseleng yeo a bego a diriša matla a gagwe ka gona?

17 Jesu o be a bontšha boikarabelo tseleng yeo a bego a diriša  matla a gagwe ka gona. Le ka mohla ga se a ka a dira mediro e matla feela bakeng sa mponeng goba dipontšho tše di se nago morero. (Mateo 4:5-7) O be a sa ikemišetša go dira dipontšho feela bakeng sa go kgotsofatša go rata go tseba ka maikemišetšo a fošagetšego ga Herode. (Luka 23:8, 9) Go e na le go kwalakwatša matla a gagwe, Jesu o be a fela a botša bao a bego a ba fodišitše gore ba se ke ba botša motho. (Mareka 5:43; 7:36) O be a sa nyake gore batho ba fihlelele diphetho tše itšego ka yena motheong wa dipego tše di tsošago phišego.—Mateo 12:15-19.

18-20. (a) Ke eng seo se bego se tutuetša tsela yeo Jesu a bego a diriša matla a gagwe ka gona? (b) O ikwa bjang ka tsela yeo Jesu a ilego a fodiša monna yo mongwe wa sefoa?

18 Monna yo yo matla e lego Jesu, o be a fapane kudu le babuši bao ba bego ba diriša matla ka go se šetše dinyakwa le tlaišego tša ba bangwe ka go hloka kwelobohloko. Jesu o be a hlokomela batho. Go fo bona batho bao ba tlaišegago go ile gwa mo kgoma ka mo go tseneletšego moo e lego gore o ile a tutueletšega gore a ba imolle tlaišegong ya bona. (Mateo 14:14) O be a naganela maikwelo le dinyakwa tša bona, gomme go tshwenyega mo go lerato go be go tutuetša tsela yeo a bego a diriša matla a gagwe ka gona. Mohlala o kgomago o hwetšwa go Mareka 7:31-37.

19 Lebakeng le, mašaba a magolo a ile a hwetša Jesu gomme a mo tlišetša ba bantši bao ba bego ba babja, gomme a ba fodiša ka moka ga bona. (Mateo 15:29, 30) Eupša Jesu o ile a hlaola monna yo mongwe bakeng sa go mo nea tlhokomelo e kgethegilego. Monna e be e le sefoa gomme a sa kgone go bolela. Jesu mo gongwe o ile a lemoga go tšhoga kudu goba go hlabja ke dihlong ga monna yo. Ka go mo naganela, Jesu o ile a iša monna yoo ka thokwana—kgole le lešaba—a mo iša moo ba lego noši. Ke moka Jesu o ile a dira ditšhupetšo tša diatla go bontšha monna yo seo a bego a tlo se dira. O ile “a bea menwana ya gagwe ka ditsebeng tša gagwe, a tshwela mare, gomme a swara leleme la gagwe.” *  (Mareka 7:33, PK) Ka morago ga moo, Jesu o ile a lebelela legodimong gomme a rapela ka go fegelwa. Ditiro tše di be di tla botša monna gore, ‘Seo ke tla tlogago ke go direla sona se dirwa ka matla a tšwago go Modimo.’ Mafelelong, Jesu o ile a re: “Thiboloxa!” (Mareka 7:34) Ge a rialo, monna o ile a buša a kwa gomme a kgona go bolela gabotse.

20 Ke mo go kgomago gakaakang go nagana gore gaešita le ge a be a diriša matla a gagwe ao a a neilwego ke Modimo bakeng sa go fodiša bao ba tlaišegago, Jesu o be a bontšha go naganela maikwelo a bona ka kwelobohloko! Na ga se mo go kgothatšago go tseba gore Jehofa o beile Mmušo wa Mesia ka diatleng tša Mmuši yo bjalo yo a kwelago bohloko le yo a naganelago?

Pontšho ya Boporofeta ya Dilo tše di Tlogo tla

21, 22. (a) Mehlolo ya Jesu e be e bontšha’ng? (b) Ka ge Jesu a kgona go laola matla a tlhago, ke eng seo re ka se letelago ka tlase ga pušo ya Mmušo wa gagwe?

21 Mediro e matla yeo Jesu a e dirilego lefaseng e be e fo ba yeo e bontšhago e sa le pele ditšhegofatšo tše dikgolo tšeo di tlago go tla ka tlase ga pušo ya gagwe e le kgoši. Lefaseng le lefsa la Modimo, Jesu o tla boela a dire mehlolo gape—eupša lefaseng ka moka! Ela hloko tše dingwe tša ditebelelo tše di thabišago tše di letšego ka pele.

22 Jesu o tla bušetša tswalano ya diphedi le tikologo ya tšona ya lefase teka-tekanong e phethagetšego. Gopola gore o ile a bontšha go laola matla a tlhago ka go homotša ledimo. Ka gona, ga go pelaelo gore ka tlase ga pušo ya Mmušo wa Kriste go ka se sa nyakega gore batho ba boife go gobatšwa ke madimo, ditšhišinyego tša lefase, dithaba-mollo goba dikotsi tše dingwe tša tlhago. Ka ge Jesu e le Mošomi yo a Nago le Bokgoni yoo Jehofa a mo dirišitšego go bopa lefase le diphedi ka moka tše di lego go lona, o kwešiša ka botlalo tsela yeo lefase le bopilwego ka yona. O tseba kamoo matlotlo a lona a ka dirišwago ka mo go swanetšego ka gona. Ka tlase ga pušo ya gagwe, lefase le ka moka le tla fetošwa Paradeise.—Luka 23:43.

23. E le Kgoši, Jesu o tla kgotsofatša bjang dinyakwa tša batho?

23 Go thwe’ng ka dinyakwa tša batho? Bokgoni bja Jesu bja go  kgona go fepa ba dikete ka boati a diriša feela dijo tše sego nene, bo re kgonthišetša gore pušo ya gagwe e tla tliša go imologa tlaleng. Ka kgonthe, mohora wa dijo wo o abjago ka tsela ya maleba o tla fedišetša tlala sa ruri. (Psalme 72:16) Go fenya ga gagwe bolwetši go re botša gore balwetši, difofu, difoa, ba gobetšego le batho ba golofetšego ba tla fodišwa—ka mo go feletšego le sa ruri. (Jesaya 33:24; 35:5, 6) Bokgoni bja gagwe bja go tsoša bahu bo nea kgonthišetšo ya gore matla a gagwe e le Kgoši ya legodimo a akaretša matla a go tsoša ba dimilione tše di sa balegego bao Tatagwe a ratago go ba gopola.—Johane 5:28, 29.

24. Ge re dutše re nagana ka matla a Jesu, ke eng seo re swanetšego go dula re se gopola, gomme ka baka la’ng?

24 Ge re dutše re nagana ka matla a Jesu, anke re gopoleng gore Morwa yo o ekiša Tatagwe ka mo go phethagetšego. (Johane 14:9) Ka gona go diriša ga Jesu matla go re bontšha gabotse kamoo Jehofa a dirišago matla ka gona. Ka mohlala, nagana ka tsela e lerato yeo Jesu a ilego a fodiša molephera yo mongwe ka gona. A tutueditšwe ke kwelo-bohloko, Jesu o ile a kgwatha monna yoo gomme a re: “Ke rata fao; fôla!” (Mareka 1:40-42) Ka dipego tše di swanago le ye, ge e le gabotse Jehofa o re, ‘Ke kamoo ke dirišago matla a-ka ka gona!’ Na ga o tutueletšege go tumiša Modimo wa rena yo matla ohle le go mo lebogela gore o diriša matla a gagwe ka tsela e bjalo e lerato?

^ ser. 1 Madimo ao a sa letelwago ke ao a tlwaelegilego Lewatleng la Galilea. Ka baka la go ba tlase ga lewatle (mo e ka bago dimithara tše 200 ka tlase ga tekanyo ya lewatle), moya o borutho kutšwanyana moo go feta nageng e dikologilego, gomme se se baka tšharakano ya lefau-fau. Diphefo tše matla di theogela Moeding wa Jorodane go tšwa Thabeng ya Herimone yeo e lego ka leboa. Go homola ga nakwana go ka fetogela ledimong le le tšubutlago kudu.

^ ser. 12 Go oketša moo, ka dinako tše dingwe Diebangedi di bea mehlolo e mentši ka tlase ga tlhaloso e tee yeo e akaretšago. Ka mohlala, lebakeng le lengwe “motse ka moka” o ile wa tla go mmona, gomme a fodiša balwetši “ba bantši.”—Mareka 1:32-34.

^ ser. 19 Go tshwela mare e be e le mokgwa goba tšhupetšo ya go fodiša yeo e bego e amogelwa ke ba-Juda le ba-Ntle, gomme go dirišwa ga mare diphodišong go begwa ka mengwalong ya bo-rabi. Mohlomongwe Jesu o ile a tshwela mare feela bakeng sa go bontšha monna gore o be a le kgaufsi le go fodišwa. Go sa šetšwe gore boemo e be e le bofe, Jesu o be a sa diriše mare a gagwe e le sedirišwa sa tlhago sa go fodiša.

Ithute ka mo go oketšegilego

“Mmušo wa Gago a o tle”—Eupša Neng?

Ke ka baka la’ng re ka kgodišega gore kgauswinyane Kgoši e tloditšwego ya Modimo e tla gata megato e mengwe gore thato ya Modimo e direge ka botlalo mo lefaseng?