Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Batamela Kgaufsi le Jehofa

 KGAOLO 30

“Le Tšeê ka Tsela ya Leratô”

“Le Tšeê ka Tsela ya Leratô”

1-3. Ke mafelelo afe ao a tlišwago ke ge re ekiša mohlala wa Jehofa wa go bontšha lerato?

“LETHABO la go nea le feta la go newa.” (Ditiro 20:35, NW) Mantšu ao a Jesu a gatelela therešo ye e bohlokwa: Lerato le le se nago boithati ke leo le putsago ka bolona. Gaešita le ge go amogela lerato go tliša lethabo le legolo, go bile go na le lethabo le legolo kudu leo le tlišwago ke go nea goba go bontšha lerato go ba bangwe.

2 Ga go na yo a tsebago se gakaone go phala Tatago rena wa legodimong. Bjalo ka ge re bone dikgaolong tše di fetilego tša karolo ye, Jehofa ke mohlala o mogolo wa lerato. Ga go yo a kilego a bontšha lerato ka ditsela tše dikgolo goba ka nako e telele go feta kamoo a ilego a dira. Ka gona, na ke mo go makatšago gore Jehofa o bitšwa “Modimo yo a thabilego”?—1 Timotheo 1:11NW.

3 Modimo wa rena yo lerato o nyaka gore re leke go swana le yena, kudu-kudu ge go tliwa tabeng ya go bontšha lerato. Ba-Efeso 5:1, 2 e re botša gore: “Bang baetši ba Modimo byalo ka bana ba ba ratêxaxo. Le tšeê ka tsela ya leratô.” Ge re ekiša mohlala wa Jehofa wa go bontšha lerato, re hwetša lethabo le legolo le le tlišwago ke go nea. Le gona re ba le kgotsofalo ya go tseba gore re kgahliša Jehofa ka ge Lentšu la gagwe le re opeletša “xo ratana.” (Ba-Roma 13:8) Eupša go sa dutše go e-na le mabaka a mangwe ao ka ona re swanetšego gore re “tšeê ka tsela ya leratô.”

Lebaka Leo ka Lona Lerato e Lego la Bohlokwa

4, 5. Ke ka baka la’ng go le bohlokwa gore re bontšhe lerato la boikgafo go badumedi-gotee le rena?

4 Ke ka baka la’ng go le bohlokwa gore re bontšhe lerato go badumedi-gotee le rena? Ge go bolelwa ka tsela e bonolo, lerato ke moko wa Bokriste bja therešo. Ka ntle le lerato re ka se kgone go ba le tlemagano ya kgaufsi le Bakriste-gotee le rena,  gomme sa bohlokwa kudu, ga re selo mahlong a Jehofa. Ela hloko kamoo Lentšu la Modimo le gatelelago ditherešo tše.

5 Bošegong bja mafelelo bja bophelo bja gagwe bja lefaseng, Jesu o ile a botša balatedi ba gagwe gore: “Ké Le nea molaô o mofsa, wa xo re Le ratanê, wa xo re Le ratanê byalo ka Nna xe kè Le ratile. Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:34, 35) “Byalo ka Nna xe kè Le ratile”—ee, re laelwa gore re bontšhe mohuta wa lerato leo Jesu a ilego a le bontšha. Go Kgaolo 29, re bone gore Jesu o ile a bea mohlala o mobotse kudu wa go bontšha lerato la boikgafo, a etiša dinyakwa le dikgahlego tša ba bangwe pele ga tša gagwe. Le rena re swanetše go bontšha lerato le le se nago boithati, gomme re swanetše go dira bjalo phatlalatša moo e lego gore lerato la rena le bonwa le ke bao ba lego ka ntle ga phuthego ya Bokriste. Ka kgonthe lerato la boikgafo la borwarre ke leswao leo ka lona re tsebjago re le balatedi ba therešo ba Kriste.

6, 7. (a) Re tseba bjang gore Lentšu la Jehofa le gatelela kudu bohlokwa bja go bontšha lerato? (b) Mantšu a Paulo ao a begilwego go 1 Ba-Korinthe 13:4-8 a gatelela seka sefe sa lerato?

6 Go thwe’ng ge e ba re hlaelelwa ke lerato? Moapostola Paulo o itše: ‘Ge ke se na lerato, ke swana le tšhipi e llago goba moropa wo o dumago.’ (1 Ba-Korinthe 13:1) Moropa o dumago o tšweletša lešata leo le thibago ditsebe. Go thwe’ng ka tšhipi e llago? Diphetolelo tše dingwe di re “tšhipi ya lešata” goba “tšhipi e llago leboelela.” A mehlala e swanetšego gakaakang! Motho yo a se nago lerato o swana le seletšo sa mmino seo se dirago lešata le legolo leo le thibago ditsebe le le rakago batho ba bangwe go e na le go ba goketša. Motho yo bjalo a ka thabela bjang tswalano ya kgaufsi le ba bangwe? Paulo gape o itše: “Le xe nka ba le . . . tumêlô wa xo šuthiša dithaba, ka upya ka hlôka leratô, xôna xa ke selô.” (1 Ba-Korinthe 13:2) Akanya feela, motho yo a se nago lerato ke “motho yo a se nago mohola,” go sa šetšwe mediro le ge e le efe yeo a ka e dirago! (The Amplified Bible) Na ga go molaleng gore Lentšu la Jehofa le gatelela kudu bohlokwa bja go bontšha lerato?

7 Ka gona, re ka bontšha bjang seka se ditirišanong tša rena le  ba bangwe? Go araba se, anke re hlahlobeng mantšu a Paulo ao a hwetšwago go 1 Ba-Korinthe 13:4-8. Ditemaneng tše ga go gatelelwe lerato la Modimo bakeng sa rena goba lerato la rena bakeng sa Modimo. Go e na le moo, Paulo o be a gatelela tsela yeo ka yona re swanetšego go bontšhana lerato ka gona. O ile a hlalosa dilo tše dingwe tšeo lerato le lego tšona le dilo tše dingwe tšeo lerato le sego tšona.

Seo Lerato le Lego Sona

8. Go se fele pelo go ka re thuša bjang ditirišanong tša rena le ba bangwe?

8 “Leratô xa le fêle pelo.” Go se fele pelo go bolela go kgotlelela ba bangwe ka go se ba felele pelo. (Ba-Kolose 3:13) Na ga re nyake go se fele pelo mo go bjalo? Ka ge re le dibopiwa tšeo di sa phethagalago tšeo di hlankelago magetla a bapelane, e fo ba mo go kwagalago go letela gore nako le nako bana babo rena ba Bakriste ba ka re galefiša gomme le rena re ka dira se se swanago go bona. Go se fele pelo mo go bjalo le go itshwara go  ka re thuša gore re lebeletšane le go kgoboga mo re ba go le gona ditirišanong tša rena le ba bangwe—ka ntle le go senya khutšo ya phuthego.

9. Ke ka ditsela dife re ka bontšhago botho go ba bangwe?

9 “Leratô ké le botho.” Botho bo bontšhwa ka ditiro tša go thuša le mantšu a go bontšha go naganela. Lerato le re tutueletša gore re tsome ditsela tša go bontšha botho, kudu-kudu go bao ba hlokago kudu. Ka mohlala, modumedi-gotee yo a godilego a ka ba a lewa ke bodutu gomme a nyaka ketelo e kgothatšago. Mma yo a se nago molekane yo a dulago lapeng leo le aroganego bodumeding a ka nyaka thušo e itšego. Motho yo a babjago goba yo a lebeletšanego le bonaba a ka nyaka go kwa mantšu a botho ao a tšwago go mogwera wa potego. (Diema 12:25; 17:17) Ge re gata mogato wa pele go bontšha botho ka ditsela tše bjalo, re bontšha go ba ga kgonthe ga lerato la rena.—2 Ba-Korinthe 8:8.

10. Lerato le re thuša bjang go kgomarela le go bolela therešo, gaešita le ge go se bonolo go dira bjalo?

10 “Lerato . . . le thaba le therešô.” Phetolelo e nngwe e re: “Lerato . . . le thabela go ema le therešo.” Lerato le re tutueletša go kgomarela therešo le go ‘botšana therešo.’ (Sakaria 8:16) Ka mohlala, ge e ba yo re mo ratago a akareditšwe sebeng se segolo, lerato la go rata Jehofa—le la go rata mofoši—le tla re thuša go kgomarela ditekanyetšo tša Modimo go e na le go leka go uta, go fahlelela goba le gona go bolela maaka ka phošo. Go ba gona, go ka ba thata go amogela taba. Eupša ge e ba re kgahlegela yo re mo ratago go tšwa pelong, re tla nyaka gore a amogele le go arabela tayong e lerato ya Modimo. (Diema 3:11, 12) Bjalo ka Bakriste ba nago le lerato, e bile re kganyoga go “itshwara ka go botega dilong ka moka.”—Ba-Hebere 13:18NW.

11. Ka ge lerato le “rwala tšohle,” ke’ng seo re swanetšego go katanela go se dira ge e le mabapi le diphošo tša badumedi-gotee le rena?

11 “Lerato . . . le rwala tšohle.” (NW) Polelwana yeo ge e le gabotse e bolela gore “le bipa tšohle.” (Kingdom Interlinear) Petro wa Pele 4:8 e re: “Leratô le bipa dikaroxô tšohle.” Ee, Mokriste yo a bušwago ke lerato ga a fišegele go utolla mafokodi ka moka  gotee le diphošo tša bana babo ba Bakriste. Mabakeng a mantši, diphošo tša badumedi-gotee ke tše dinyenyane gomme di ka apešwa ka lerato.—Diema 10:12; 17:9.

Lerato le re tutueletša go bontšha go bota bana babo rena

12. Moapostola Paulo o ile a bontšha bjang gore o be a dumela tše botse ka Filemone, gomme ke eng seo re ka ithutago sona mohlaleng wa Paulo?

12 “Lerato . . . le dumêla tšohle.” Phetolelo ya Moffatt e bolela gore lerato “ka mehla le fišegela go dumela tše botse.” Ga re naganele badumedi-gotee le rena ka mo go feteletšego, re belaela maikemišetšo a bona ka moka. Lerato le re thuša “go dumela tše botse” ka bana babo rena le go ba bota. * Hlokomela mohlala o lego lengwalong leo Paulo a le ngwaletšego Filemone. Paulo o be a ngwalela go kgothatša Filemone gore a amogele ka botho lekgoba leo le bego le tšhabile e lego Onesimo, yo a bego a fetogile Mokriste. Go e na le go leka go gapeletša Filemone, Paulo o ile a dira boipiletšo bjo bo bego bo theilwe leratong. O ile a bontšha kgodišego ya gore Filemone o be a tla dira selo se se nepagetšego, a bolela gore: “Ke Xo ngwalêla kè holofetše xore O tlo kwa wa dira se ke se bolêlaxo, wa tlo bá wa fetiša fao.” (Temana 21) Ge lerato le re tutueletša go bontšha go bota bana babo rena ka tsela e bjalo, re tla bona dika tše dibotse go bona.

13. Re ka bontšha bjang gore re holofela tše kaone-kaone bakeng sa bana babo rena?

13 “Lerato . . . le holofêla tšohle.” Go etša ge lerato le botega, gape le na le kholofelo. Ka go tutuetšwa ke lerato, re holofela tše kaone-kaone bakeng sa bana babo rena. Ka mohlala, ge e ba ngwanabo rena a “thšoxa à wetše molatong,” re holofela gore o tla arabela maitekong a lerato a go leka go mo lokiša. (Ba-Galatia 6:1) Gape re na le kholofelo ya gore bao ba fokolago tumelong ba tla tsogologa. Ga re felele ba bjalo pelo, re dira seo re ka se kgonago bakeng sa go ba thuša gore ba matlafale tumelong. (Ba-Roma 15:1; 1 Ba-Thesalonika 5:14) Gaešita le ge yo re mo ratago a aroga tseleng, ga re lahlegelwe ke kholofelo ya gore ka letšatši le lengwe o tla boelwa ke kgopolo gomme a boela go  Jehofa, go swana le morwa wa lehlaswa wa seswantšhong sa Jesu.—Luka 15:17, 18.

14. Kgotlelelo ya rena e ka lekwa ka ditsela dife ka phuthegong, gomme lerato le tla re thuša gore re arabele bjang?

14 “Lerato . . . le kxôtlêlêla tšohle.” Kgotlelelo e re dira gore re kgone go ema re tiile ge re lebeletšane le go nyamišwa goba mathata. Diteko tša kgotlelelo ga di tšwe feela ka ntle ga phuthego. Ka dinako tše dingwe re ka lekwa ka gare ga phuthego. Ka baka la go se phethagale, ka dinako tše dingwe bana babo rena ba ka re nyamiša. Dipolelo tša go se naganele di ka re kweša bohloko maikwelong. (Diema 12:18) Mohlomongwe taba e nngwe ya phuthego ga se ya swarwa ka tsela yeo re bego re nagana gore e swanetše go swarwa ka gona. Boitshwaro bja ngwanabo rena yo a hlompšhago e ka ba bjo bo kgopišago, bja dira gore re ipotšiše gore, ‘Go tla bjang gore Mokriste a itshware ka tsela yeo?’ Ge re lebeletšane le maemo a bjalo, na re tla katoga phuthego gomme ra kgaotša go hlankela Jehofa? E sego ge re e-na le lerato! Ee, lerato le re thibela gore re se ke ra foufatšwa kudu ke diphošo tša ngwanabo rena moo e lego gore ga re sa bona botse le ge e le bofe go yena goba phuthegong ka kakaretšo. Lerato le dira gore re dule re botegela Modimo le go thekga phuthego go sa šetšwe seo motho yo mongwe yo a sa phethagalago a ka se bolelago goba go se dira.—Psalme 119:165.

Seo Lerato le Sego Sona

15. Lehufa leo le sa swanelago ke eng, gomme le re thuša bjang go phema maikwelo a ao a gobatšago?

15 “Leratô xa le tsebe moná.” Lehufa le le sa swanelago le ka re dira gore re thome go tsebafela dilo tšeo ba bangwe ba nago le tšona—dithoto tša bona, ditokelo goba bokgoni. Lehufa le bjalo ke maikwelo a boithati le a gobatšago ao ge e ba a sa laolwe, a ka šitišago khutšo ya phuthego. Ke’ng seo se tlago go re thuša go ganetša “môya . . . wa lehufa”? (Jakobo 4:5) Ka lentšu le tee, ke lerato. Seka se sa bohlokwa se ka dira gore re thabe le bao ba bonagalago ba thabela mehola e itšego bophelong yeo rena ka borena re sa e thabelego. (Ba-Roma 12:15) Lerato le re thuša gore re se ke ra lebelela go retwa ga ba bangwe bakeng sa  bokgoni bjo itšego bjo bo kgethegilego goba selo se segolo seo ba se fihleletšego e le go rumolwa.

16. Ge e ba re rata bana babo rena e le ka kgonthe, ke ka baka la’ng re swanetše go phema go ikgantšha ka seo re se dirago tirelong ya Jehofa?

16 “Lerato . . . xa le na xo ikxanthša, xa le ikxoxomoše.” Lerato le re thibela go ikgantšha ka bokgoni bja rena goba dilo tšeo re di fihleletšego. Ge e ba re rata bana babo rena e le ka kgonthe, go tla bjang gore re dule re ikgantšha ka go atlega ga rena bodireding goba ka ditokelo tša ka phuthegong? Boikgantšho bjo bo bjalo bo ka nyamiša ba bangwe gomme bja ba dira gore ba inyatše ge ba bapišwa. Lerato ga le re dumelele go ikgantšha ka seo Modimo a re dumelelago go se dira tirelong ya gagwe. (1 Ba-Korinthe 3:5-9) Go feta moo, lerato “xa le ikxoxomoše” goba go etša ge The New Testament in Modern English e bolela, ga le “godiše dikgopolo tša boikgantšho tša go itšeela godimo.” Lerato le re thibela go itšeela godimo.—Ba-Roma 12:3.

17. Ke go naganela gofe mo lerato le re tutueletšago go go bontšha go ba bangwe, gomme ka go rialo re tla phema boitshwaro bja mohuta ofe?

17 “Lerato . . . xa le dire tša dihlong.” Motho yo a itshwarago ka tsela e lešago dihlong ke yo a dirago dilo ka tsela e tlogago e sa kgahliše goba e kgopišago. Tsela e bjalo ke ya go hloka lerato, ka gobane e bontšha go hlokomologa ka mo go feletšego maikwelo le boiketlo tša ba bangwe. Ka mo go fapanego, go na le botho leratong leo le re tutueletšago go bontšha go naganela ba bangwe. Lerato le kgothaletša mekgwa e mebotse, boitshwaro bja go boifa Modimo le go hlompha badumedi-gotee le rena. Ka gona lerato le ka se ke la re dumelela go dira “tša dihlong”—ge e le gabotse, boitshwaro le ge e le bofe bjo bo ka tšhošago goba go kgopiša bana babo rena ba Bakriste.—Ba-Efeso 5:3, 4.

18. Ke ka baka la’ng motho yo a nago le lerato a sa gapeletše gore selo se sengwe le se sengwe se dirwe ka tsela ya gagwe?

18 “Lerato . . . xa le tsome xo ikhola.” Mo Revised Standard Version e re: “Lerato ga le phegelele tseleng ya lona.” Motho yo a nago le lerato ga a gapeletše gore selo se sengwe le se sengwe se dirwe ka tsela ya gagwe, bjalo ka ge eka dikgopolo tša gagwe ke tšeo di dulago di nepagetše ka mehla. Ga a laole ba bangwe ka  go diriša matla a gagwe a go kgodiša bakeng sa go fekeetša bao ba nago le pono e fapanego. Go ba le manganga mo go bjalo go ka utolla go ba le boikgogomošo ka tekanyo e itšego, gomme Beibele e re: “Boikgogomošo bo eta thobego pele.” (Diema 16:18, PK) Ge e ba re rata bana babo rena e le ka kgonthe, re tla hlompha dipono tša bona gomme moo go kgonegago, re tla bontšha go ikemišetša go ineela. Moya wa go ineela o dumelelana le mantšu a Paulo a rego: “A motho a se kê a inyakêla tša xaxwe; a a nyakê sa xo hola ba bangwê.”—1 Ba-Korinthe 10:24.

19. Lerato le re thuša go arabela bjang ge ba bangwe ba re kgopiša?

19 “Lerato . . . xa le hlohloletšexe, [ga le boloke sekgopi, NW].” Lerato ga le galefišwe gabonolo ke seo ba bangwe ba se bolelago goba ba se dirago. Ke therešo gore ke ga tlhago go galefa ge ba bangwe ba re kgopiša. Eupša gaešita le ge re e-na le lebaka le le kwagalago la go galefa, lerato ga le re dumelele go dula re galefile. (Ba-Efeso 4:26, 27) Re ka se ke ra boloka pego ya mantšu goba ditiro tše kgopišago bjalo ka ge eka re di ngwala pukung ya melato e le gore di se lebalwe. Go e na le moo lerato le re tutueletša go ekiša Modimo wa rena yo lerato. Go etša ge re bone go Kgaolo 26, Jehofa o a lebalela ge go e-na le lebaka le le kwagalago bakeng sa go dira bjalo. Ge a re lebalela, o a lebala, ke gore, ga a re otle ka baka la dibe tšeo ka nako e itšego e latelago. Na ga re leboge gore Jehofa ga a boloke sekgopi?

20. Re swanetše go arabela bjang ge modumedi-gotee le rena a tanywa ke go dira phošo gomme a tlaišega o šoro ka baka la seo?

20 “Lerato . . . xa le thabêle bobe.” The New English Bible mo e balega ka gore: “Lerato . . . ga le thabele dibe tša batho ba bangwe.” Phetolelo ya Moffatt e re: “Lerato le ka mohla ga le thabe ge ba bangwe ba foša.” Lerato ga le thabele go se loke, ka gona ga re nyenyefatše boitshwaro bjo bo gobogilego bja mohuta le ge e le ofe. Re arabela bjang ge modumedi-gotee le rena a tanywa ke sebe gomme a tlaišega o šoro ka baka la seo? Lerato le ka se ke la re dumelela gore re thabe, bjalo ka ge eka re re, ‘O laegile! O be a kgonwa ke sona seo!’ (Diema 17:5) Lega go le bjalo, re thaba ge ngwanabo rena yo a bego a fošitše a gata megato e nepagetšego ya go tsogologa go weng ga gagwe moyeng.

 “Tsela e Kaone ka go Fetišiša”

21-23. (a) Ke’ng seo Paulo a bego a se bolela ge a be a re “leratô xa le fele neng le neng”? (b) Ke’ng seo se tlago go ahla-ahlwa kgaolong ya mafelelo?

21 “Leratô xa le fele neng le neng.” Ke’ng seo Paulo a bego a se bolela ka mantšu ao? Bjalo ka ge go ka bonwa tabeng e dikologilego, o be a ahla-ahla dimpho tša moya tšeo di bego di le gona gare ga Bakriste ba pele. Dimpho tšeo di be di dira e le maswao a go amogela ga Modimo phuthego e sa tšwago go thewa. Eupša ga se Bakriste ka moka bao ba bego ba kgona go fodiša, go porofeta goba go bolela ka maleme. Lega go le bjalo, seo se be se sa tshwenye; dimpho tša mohlolo di be di tla kgaotša mafelelong. Lega go le bjalo, go na le seo se bego se tla šala se le gona, selo seo Bakriste ka moka ba ka kgonago go se hlagolela. E be e le selo se segolo kudu le seo se swarelelago kudu go feta  mpho le ge e le efe ya mohlolo. Ge e le gabotse, Paulo o ile a se bitša “tsela e kaone ka go fetišiša.” (1 Ba-Korinthe 12:31) ‘Tsela ye e kaone ka go fetišiša’ e be e le efe? E be e le tsela ya lerato.

Batho ba Jehofa ba hlaolwa ka go ratana ga bona

22 Ka kgonthe lerato la Bokriste leo Paulo a le hlalositšego “xa le fele neng le neng,” ke gore, le ka se tsoge la fela. Go fihlela lehono, lerato la boikgafo la borwarre le hlaola balatedi ba therešo ba Jesu. Na ga re bone bohlatse bja lerato le bjalo ka diphuthegong tša barapedi ba Jehofa lefaseng ka bophara? Lerato leo le tla ba gona ka mo go sa felego, ka gobane Jehofa o holofetša bahlanka ba gagwe ba botegago bophelo bjo bo sa felego. (Psalme 37:9-11, 29) Anke re tšweleng pele re dira sohle seo re ka se kgonago gore re “tšeê ka tsela ya leratô.” Ka go dira bjalo, re ka hwetša lethabo le legolo leo le tlišwago ke go nea. Go feta moo, re ka tšwela pele re phela—ee, go tšwela pele re bontšha lerato—go iša ka mo go sa felego, re ekiša Modimo wa rena yo lerato, Jehofa.

23 Kgaolong ye yeo e phethago karolo yeo e bolelago ka lerato, re ahla-ahlile mabapi le kamoo re ka bontšhanago lerato ka gona. Eupša ka baka la ditsela tše dintši tšeo ka tšona re holwago ke lerato la Jehofa—gotee le matla, toka le bohlale tša gagwe—re dira gabotse go ipotšiša gore, ‘Nka bontšha Jehofa bjang gore ke mo rata e le ka kgonthe?’ Potšišo yeo e tla ahla-ahlwa kgaolong ya rena ya mafelelo.

^ ser. 12 Ee, lerato la Bokriste ga se leo le fora-foretšegago gabonolo. Beibele e re eletša gore: “Le phafoxêlê ba ba diraxo dikxaoxanô le dikxopišô . . . Le ba široxêlê.”—Ba-Roma 16:17.

Ithute ka mo go oketšegilego

Bodumedi Bjo bo Lokilego bo Kgothaletša Lerato la Borwarre

Ke bodumedi bofe bjo bo kgothaletšago ditho tša bjona go phema dipolotiki, kgethollo le mapheko a tša ikonomi ao a aroganyago batho?