Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Batamela Kgaufsi le Jehofa

 KGAOLO 24

Ga go na Seo se Kago re “Aroxanya le Leratô la Modimo”

Ga go na Seo se Kago re “Aroxanya le Leratô la Modimo”

1. Ke maikwelo afe a nyamišago ao a tlaišago batho ba bantši, go akaretša le Bakriste ba bangwe ba therešo?

NA Jehofa Modimo o a go rata? Ba bangwe ba dumela gore Modimo o rata batho ka kakaretšo, bjalo ka ge Johane 3:16 e bolela. Eupša ge e le gabotse ba nagana gore: ‘Modimo le ka mohla a ka se ke a nthata ke le motho.’ Gaešita le Bakriste ba therešo ka dinako tše dingwe ba ka ba le dipelaelo tabeng ye. A nyamile, monna yo mongwe o ile a bolela gore: “Ke hwetša go le thata kudu go dumela gore Modimo o na le taba le nna.” Na ka dinako tše dingwe o tlaišwa ke dipelaelo tše swanago?

2, 3. Ke mang yo a nyakago gore re dumele gore ga re na mohola goba bao ba sa rategego mahlong a Jehofa, gomme re ka lwantšha bjang kgopolo yeo?

2 Sathane o fišegela go re dira gore re dumele gore Jehofa Modimo ga a re rate e bile ga a re lebelele re le ba bohlokwa. Ke therešo gore Sathane gantši o aroša batho ka go ba gokeletša gore ba be le boikgantšho le boikgogomošo. (2 Ba-Korinthe 11:3) Eupša gape o thabela go šwalalanya boitlhompho bja bao ba hlaselegago gabonolo. (Johane 7:47-49; 8:13, 44) Go bjalo kudu-kudu mo “mehleng ya bofêlô” e hlobaetšago. Ba bantši lehono ba golela malapeng ao go se nago “maikwelo a borutho a tlhago.” Ba bangwe ba dula ba lebane le batho ba bogale, ba baithati le ba dinganga. (2 Timotheo 3:1-5, bapiša le NW.) Go tlaišwa ke kgethollo ya morafo goba lehloyo ka nako e telele go ka ba go kgodišitše ba bjalo gore ga ba na mohola goba gore ga ba ratege.

3 Ge e ba o ikwa o e-na le maikwelo a bjalo a fošagetšego, o se ke wa itlhoboga. Nako le nako ba bantši ba rena re ipea molato kudu ka mo go sa nyakegego. Eupša gopola gore Lentšu la Modimo le hlametšwe go “lokiša ditaba” le go “šwalalanya dibô.” (2 Timotheo 3:16, NW; 2 Ba-Korinthe 10:4) Beibele e re: “’Me re tlo rola pelo pele xa xaxwe, ra re, xe pelo e re bexa, ra re: E Moxolo ké Modimo, ó feta dipelo tša rena, ’me ó tseba tšohle.” (1 Johane  3:19, 20) Anke re hlahlobeng ditsela tše nne tšeo ka tšona Mangwalo a re thušago go “rola pelo” ka lerato la Jehofa.

Jehofa o go Lebelela o le wa Bohlokwa

4, 5. Seswantšho sa Jesu sa dithaga se bontšha bjang gore re ba bohlokwa mahlong a Jehofa?

4 Ya pele, Beibele e ruta ka go lebanya gore Modimo o lebelela yo mongwe le yo mongwe wa bahlanka ba gagwe e le yo bohlokwa. Ka mohlala, Jesu o itše: “A dithaxa tše pedi xa di rekwe ka peni? Xomme le e tee ya tšôna e ka se wêle fase xe Tata-weno à sa rate. Ešita le meriri ya dihlôxô tša lena e badilwe ka moka! Ké xôna, se boifeng; Le feta dithaxa è le tše ntši.” (Mateo 10:29-31) Nagana ka seo mantšu ao a bego a se bolela go batheetši ba Jesu ba lekgolong la pele la nywaga.

“Le feta dithaxa è le tše ntši”

5 Re ka ipotšiša gore motho o be a ka reka thaga ka lebaka lefe. Go ba gona, mehleng ya Jesu thaga e be e le nonyana e bitšago tšhelete ya tlase kudu go dinonyana ka moka tšeo di bego di rekišwa e le dijo. Ela hloko gore ka tšheletyana e nyenyane ya tlase, moreki o be a hwetša dithaga tše pedi. Eupša Jesu ka morago o ile a bolela gore ge motho a be a itokišeditše go diriša ditšheletyana tše pedi, o be a sa hwetše dithaga tše nne, eupša tše hlano. Nonyana ya bohlano e be e okeletšwa bjalo ka ge eka ga se ya bohlokwa le gatee. Mohlomongwe dibopiwa tše bjalo e be e se tša bohlokwa mahlong a batho, eupša Mmopi o be a di lebelela bjang? Jesu o itše: “Xa xo le e tee ya tšôna [gaešita le yeo e okeletšwago] e lebalwaxo ke Modimo.” (Luka 12:6, 7) Bjale re ka thoma go bona ntlha ya Jesu. Ge e ba Jehofa a lebelela thaga e tee e le ya bohlokwa gakaalo, gona motho ke yo bohlokwa kudu gakaakang! Go etša ge Jesu a hlalositše, Jehofa o tseba se sengwe le se sengwe ka rena. Ee, meriri ya dihlogo tša rena e badilwe!

6. Ke ka baka la’ng re kgonthišega gore Jesu o be a rereša ge a be a bolela ka taba ya gore meriri ya dihlogo tša rena e badilwe?

6 Na meriri ya rena e badilwe? Ba bangwe ba ka nagana gore Jesu o be a sa bolele therešo tabeng ye. Lega go le bjalo, nagana feela ka kholofelo ya tsogo. Jehofa o swanetše go ba a re tseba ka mo go tseneletšego gakaakang e le gore a ka re bopa gape! O re lebelela re le ba bohlokwa kudu moo e lego gore o gopola se  sengwe le se sengwe, go akaretša le thulaganyo ya rena ya dikarolwana tša leabela le nywaga ya rena ka moka ya dilo tšeo di lego dikgopong le diphihlelo. * Go tseba palo ya meriri ya rena—yeo hlogo e tlwaelegilego e nago le e ka bago e 100 000—e be e tla ba tiro e nyenyane ge e bapišwa.

Ke Eng Seo Jehofa a se Bonago ka go Rena?

7, 8. (a) Tše dingwe tša dika tšeo Jehofa a thabelago go di hwetša ge a dutše a fenyeka dipelo tša batho ke dife? (b) E mengwe ya mediro yeo re e dirago ye Jehofa a e tšeelago godimo ke efe?

7 Ya bobedi, Beibele e re ruta ka seo Jehofa a se lebelelago e le sa bohlokwa go bahlanka ba gagwe. Go bolela therešo, o thabela dika tša rena tše dibotse le maiteko ao re a dirago. Kgoši Dafida o ile a botša morwa wa gagwe Salomo gore: “Morêna ó fenyêka dipelo ka moka, ó hlaoloxanya thopa tšohle tša dikêlêlô.” (1 Koronika 28:9) Ge Modimo a fenyeka dipelo tše dimilione tše dikete tša batho lefaseng le le šoro le leo le tletšego lehloyo, o swanetše go ba a thaba gakaakang ge a lemoga pelo yeo e ratago khutšo, therešo le go loka! Go direga’ng ge Modimo a hwetša pelo yeo e tletšego lerato la go mo rata, yeo e tsomago go ithuta ka yena le go abelana tsebo e bjalo le ba bangwe? Jehofa o re botša gore o šetša bao ba botšago ba bangwe ka yena. O bile o na le “puku ya kxopotšô” bakeng sa bohle “ba ba mmoifaxo . . . ba sa lebalexo ’ina l’axwe.” (Maleaki 3:16) Dika tše bjalo ke tša bohlokwa go yena.

8 Ke mediro efe e mengwe e mebotse yeo Jehofa a e tšeelago godimo? Ka kgonthe ke maiteko a rena a go ekiša Morwa wa gagwe, Jesu Kriste. (1 Petro 2:21) Modiro o mongwe wa bohlokwa woo Modimo a o tšeelago godimo ke go phatlalatšwa ga ditaba tše dibotse tša Mmušo wa gagwe. Go Ba-Roma 10:15 re bala gore: “A ratêxa bya’ng maoto a motseta wa ditaba tše botse!” Mohlomongwe  ka tlwaelo re ka no se nagane ka maoto a rena a nyatšegago e le a ‘rategago’ goba a mabotse. Eupša mo a emela maiteko ao bahlanka ba Jehofa ba a dirago boboleding bja ditaba tše dibotse. Maiteko a bjalo ka moka ke a mabotse le a rategago mahlong a gagwe.—Mateo 24:14; 28:19, 20.

9, 10. (a) Ke ka baka la’ng re ka kgodišega gore Jehofa o lebelela go kgotlelela ga rena ge re lebeletšane le mathata a fapa-fapanego e le ga bohlokwa? (b) Ke dipono dife tše di fošagetšego tšeo Jehofa le ka mohla a sa bego le tšona ka bahlanka ba gagwe ba botegago?

9 Jehofa gape o tšeela godimo kgotlelelo ya rena. (Mateo 24:13) Gopola gore Sathane o nyaka gore o furalele Jehofa. Letšatši le lengwe le le lengwe leo o dulago o botegela Jehofa ka go se kwanantšhe ke letšatši le lengwe leo ka lona o thušitšego ka go nea karabo dikgobošong tša Sathane. (Diema 27:11) Ka dinako tše dingwe go kgotlelela ga go bonolo. Mathata a tša maphelo, mathata a tša ditšhelete, kgateletšego ya maikwelo le mapheko a mangwe a ka dira gore letšatši le lengwe le le lengwe e be teko. Ditebelelo tšeo di diegišwago le tšona di ka ipontšha e le tšeo di nyamišago. (Diema 13:12) Go kgotlelela ge re lebeletšane le ditlhohlo tše bjalo ke gabohlokwa ka kudu-kudu go Jehofa. Ke ka baka leo Kgoši Dafida a ilego a kgopela Jehofa gore a boloke  megokgo ya gagwe ka “sebyaneng,” a oketša ka kholofelo gore: “A xa ke re: Di pukung ya xaxo?” (Psalme 56:8) Ee, Jehofa o lebelela le go gopola megokgo ka moka le tlaišego tšeo re di kgotlelelago e le tša bohlokwa ge re kgomarela potego ya rena go yena. Le tšona di bohlokwa kudu mahlong a gagwe.

Jehofa o lebelela kgotlelelo ya rena e le ya bohlokwa ge re lebeletšane le diteko

10 Lega go le bjalo, pelo yeo e ipeago molato e ka gana bohlatse bjo bo bjalo bja go ba ga rena ba bohlokwa mahlong a Modimo. E ka phegelela go re seba-sebela ka gore: ‘Eupša go na le ba bangwe ba bantši kudu bao e lego mehlala kudu dikeng tšeo go mpheta. Jehofa o swanetše go ba a nyama gakaakang ge a mpapetša le bona!’ Jehofa ga a bapiše batho, le gona ga se yo a gwagwaletšego le yo šoro kgopolong. (Ba-Galatia 6:4) O bala dipelo ka tsela e sa lemogegego, gomme o lebelela dika tše dibotse—gaešita le ditekanyo tša tšona tše dinyenyane.

Jehofa o Lekola Botse Bobeng

11. Ke’ng seo re ka ithutago sona ka Jehofa go tšwa tseleng yeo a ilego a swaragana le taba ya Abia ka gona?

11 Ya boraro, ge Jehofa a re fenyeka, o lekola ka kelohloko, a tsoma botse. Ka mohlala, ge Jehofa a be a laela gore leloko ka moka la bohlanogi la Kgoši Jerobeama le be le swanetše go fedišwa, O ile a laela gore o tee feela wa barwa ba kgoši, e lego Abia a bolokwe ka mo go swanetšego. Ka baka la’ng? “Ké yêna fela a hweditšwexo à na le tše di kxahlaxo Morêna Modimo wa Isiraele.” (1 Dikxoši 14:1, 10-13) Ge e le gabotse, Jehofa o ile a lekola pelong ya lesogana leo gomme a hwetša ‘tše di mo kgahlago’ moo. Go sa šetšwe gore tše di mo kgahlago tšeo e be e le tše nyenyane gakaakang, Jehofa o ile a hwetša e le tše bohlokwa gore di ngwalwe ka Lentšung la gagwe. O ile a ba a di putsa, a bontšha tekanyo e swanetšego ya kgaugelo go setho seo sa lapa la bohlanogi.

12, 13. (a) Taba ya Kgoši Josafate e bontšha bjang gore Jehofa o tsoma go loka ka go rena gaešita le ge re dira sebe? (b) Ge e le mabapi le mediro ya rena e mebotse le dika tša rena, Jehofa o itshwara bjang e le Motswadi yo lerato?

12 Mohlala o mongwe o mogolo o ka hwetšwa go Kgoši Josafate wa go loka. Ge kgoši e be e dirile tiro ya bošilo, moporofeta wa Jehofa o ile a e botša gore: “Byale O tlo tlêlwa ke kxalefô  ya Morêna.” A kgopolo e dirago gore motho a naganišiše gakaakang! Eupša molaetša wa Jehofa ga wa ka wa felela moo. O tšwetše pele ka gore: “Fêla, xo sa hweditšwe bothakxa xo wene.” (2 Koronika 19:1-3) Ka gona kgalefo ya Jehofa ya go loka ga se ya mo šira gore a se ke a bona go loka go Josafate. Ke yo a sa swanego gakaakang le batho ba sa phethagalago! Ge re selekilwe ke ba bangwe, re ka ba le tshekamelo ya go se bone botse go bona. Gomme ge re dira sebe, go nyama, go lewa ke dihlong le go ikwa re le molato tšeo re di kwago di ka re dira gore re se bone botse go rena. Lega go le bjalo, gopola gore ge e ba re itsholela dibe tša rena gomme re katana ka matla gore re se ke ra di bušeletša, Jehofa o a re lebalela.

13 Ge Jehofa a le gare a go lekola, o lahla dibe tše bjalo, go no swana kudu le ka mokgwa woo motho yo a tsomago gauta a lahlago mabu ao a se nago mohola. Go thwe’ng ka dika tša gago tše dibotse gotee le mediro e mebotse? Ee, tše ke “mafsikana a bohlokwa” ao a a bolokago! Na o kile wa hlokomela tsela yeo ka yona batswadi ba lerato ba tšeelago godimo diswantšho tšeo bana ba bona ba di thadilego goba mešomo ya sekolong, ka dinako tše dingwe lebaka la nywaga-some ka morago ga ge bana ba di lebetše? Jehofa ke Motswadi yo lerato go feta bohle. Ge feela re dula re mmotegela, le ka mohla ga a lebale mediro ya rena e mebotse le dika tša  rena. Ge e le ga botse, o be a tla tšea go lebala dilo tšeo e le go se loke, gomme le ka mohla ga a ke a e-ba yo a sa lokago. (Ba-Hebere 6:10) O bile o re lekola ka tsela e nngwe.

14, 15. (a) Ke ka baka la’ng go se phethagale ga rena le ka mohla go sa šire Jehofa gore a bone botse ka go rena? Bontšha. (b) Jehofa o tla dira’ng ka dilo tše dibotse tšeo a di hwetšago ka go rena, gomme o lebelela bjang bahlanka ba gagwe ba botegago?

14 Jehofa o lebelela ka kua ga go se phethagale ga rena gomme o bona bokgoni bja rena. Ka mohlala: Batho bao ba ratago dilo tša bokgabo ba tla dira sohle seo ba ka se kgonago go lokiša diswantšho tše di thadilwego tšeo di sentšwego o šoro goba mediro e mengwe. Ka mohlala, ge motho yo mongwe a be a senya seswantšho sa Leonardo da Vinci seo se bego se lekana ditolara tše dimilione tše 30 sa National Gallery ya kua London, Engelane ka go se thunya, ga go motho yo a ilego a šišinya gore ka ge bjale seswantšho se be se senyegile, se be se swanetšwe ke go lahlwa. Modiro wa go lokiša seswantšho seo sa bokgabo seo se nago le nywaga e nyakilego go ba e 500 o ile wa thoma ka bjako. Ka baka la’ng? Ka gobane se be se le bohlokwa mahlong a barati ba dilo tša bokgabo. Na ga o bohlokwa go feta seswantšho seo se thadilwego ka tšhoko le ka phentshele e ntsho? O tloga o le bjalo mahlong a Modimo—go sa šetšwe gore sebe sa leabela se go sentše gakaakang. (Psalme 72:12-14) Jehofa Modimo yo e lego Mmopi yo a nago le bokgoni wa lapa la motho, o tla dira se se nyakegago bakeng sa go bušetša phethegong bohle bao ba arabelago tlhokomelong ya gagwe e lerato.—Ditiro 3:21; Ba-Roma 8:20-22.

15 Ee, Jehofa o bona botse bjoo rena re ka bago re sa bo bone ka go rena. Le gona ge re dutše re mo hlankela, o tla dira gore botse bo gole go fihlela ge re e-ba bao ba phethagetšego mafelelong. Go sa šetšwe gore lefase la Sathane le ile la re swara bjang, Jehofa o lebelela bahlanka ba gagwe ba botegago e le ba rategago goba ba bohlokwa.—Hagai 2:7; mongwalo wa ka tlase wa NW.

Jehofa o Bonagatša Lerato la Gagwe ka Mafolofolo

16. Pontšho e kgolo ya lerato la Jehofa go rena ke efe, gomme re tseba bjang gore mpho ye e diretšwe rena ka noši?

16 Ya bone, Jehofa o dira mo gontši go bontšha lerato la gagwe go rena. Ka kgonthe, sehlabelo sa topollo sa Kriste ke karabo e  bohloka kudu maakeng a Sathane a gore re bao ba se nago mohola goba bao ba sa rategego. Le ka mohla ga se ra swanela go lebala gore lehu le bohloko leo Jesu a ilego a le hwa koteng ya tlhokofatšo gotee le bohloko bjo bogolo kudu bjo Jehofa a ilego a bo kgotlelela ka go bogela ge Morwa wa gagwe yo a rategago a e-hwa e be e le bohlatse bja lerato la bona go rena. Ka manyami, batho ba bantši ba hwetša go le thata go dumela gore mpho ye e be e direlwa bona ka noši. Ba ikwa ba sa swanelege. Lega go le bjalo, gopola gore moapostola Paulo o be a kile a ba motlaiši wa balatedi ba Kriste. Lega go le bjalo, o ngwadile gore: ‘Morwa wa Modimo o nthatile gomme a ikgafa bakeng sa-ka.’Ba-Galatia 1:13; 2:20NW.

17. Ke ka tsela efe Jehofa a re gogelago go yena le go Morwa wa gagwe?

17 Jehofa o bontšha lerato la gagwe la go re rata ka go re thuša re le batho ka o tee ka o tee gore re diriše ka mo go holago mehola ya sehlabelo sa Kriste. Jesu o itše: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo.” (Johane 6:44) Ee, Jehofa ka boyena o re gogela go Morwa wa gagwe le kholofelong ya bophelo bjo bo sa felego. Bjang? Ka modiro wa boboledi woo o re fihlelelago re le motho ka o tee ka o tee, le ka moya wa gagwe o mokgethwa woo Jehofa a o dirišago go re thuša go kwešiša le go diriša ditherešo tša moya go sa šetšwe mafokodi a rena le go se phethagale ga rena. Ka gona Jehofa a ka bolela ka rena go etša ge a ile a bolela ka Isiraele gore: “Ke Xo ratile ka leratô le le sa felexo; ké ka ’baka leo ke Xo xôxêlaxo xo Nna ka botho.”—Jeremia 31:3.

18, 19. (a) Tsela e tseneletšego kudu yeo ka yona Jehofa a bonagatšago lerato la gagwe go rena ke efe, gomme ke’ng seo se bontšhago gore o tshwenyega ka se ka noši? (b) Lentšu la Modimo le re kgonthišetša bjang gore Jehofa ke motheetši yo a nago le kwelobohloko?

18 Mohlomongwe ke ka tokelo ya thapelo moo re kwago lerato la Jehofa ka tsela e tseneletšego kudu. Beibele e laletša yo mongwe le yo mongwe wa rena gore a ‘se kgaotše go rapela’ Modimo. (1 Ba-Thesalonika 5:17) O a theetša. O bile o bitšwa “Mokwi wa dithapêlô.” (Psalme 65:2) Ga se a abela motho le ge e le ofe boemo bjo, gaešita le Morwa wa gagwe ka noši. Anke o nagane feela: Mmopi wa legohle o re kgothaletša go mmatamela ka thapelo ka bolokologi bja polelo. Ke mokwi wa mohuta  mang? Na ke yo a sa bontšhego kgahlego, yo a se nago maikwelo le yo a se nago taba? Le gatee.

19 Jehofa o na le kwelobohloko. Kwelobohloko ke’ng? Mokriste yo mongwe yo a botegago yo a tšofetšego o itše: “Kwelobohloko ke go kwa bohloko bja gago ka pelong ya-ka.” Na Jehofa ruri o kgongwa ke bohloko bja rena? Re bala mabapi le ditlaišego tša batho ba gagwe ba Isiraele gore: “Mehlakong ya bôná yohle, ó be a hlaka le Yêna.” (Jesaya 63:9) Jehofa o be a sa bone mathata a bona feela; o be a kwela batho bohloko. Kamoo a ikwago ka gona ka mo go tseneletšego go bontšhwa ke mantšu a Jehofa ka noši go bahlanka ba gagwe: “E a kgwathago lena o kgwatha thaka ya leihlo la-ka.” * (Sakaria 2:8, NW) Seo e be e tla ba se bohloko gakaakang! Ee, Jehofa o re kwela bohloko. Ge re e-kwa bohloko, o kwa bohloko.

20. Ke kgopolo efe yeo e sa leka-lekanago yeo re swanetšego go e phema ge e ba re nyaka go kwa keletšo yeo e hwetšwago go Ba-Roma 12:3?

20 Ga go Mokriste yo a nago le teka-tekano yo a bego a ka diriša bohlatse bjo bo bjalo bja lerato le kamogelo tša Modimo e le lebaka la go iphahlelela bakeng sa boikgogomošo goba boikgantšho. Moapostola Paulo o ngwadile gore: “Xobane, xe ke bôna kxauxêlô ye e ntirexetšexo, ke botša lena bohle ke re: Xo se kê xwa ba le e a ithsemaxo a fetiša moo xo mo swanetšexo. Ithsemeng ka xo ya ka kêlêlô; mang le mang a yê ka mo Modimo a mo lekanyeditšexo tumêlô.” (Ba-Roma 12:3) Phetolelo e nngwe e bolela mo gore: “Ke botša yo mongwe le yo mongwe wa lena gore a se ke a itšeela godimo go feta kamoo a lego ka gona, eupša a ikale gabotse.” (A Translation in the Language of the People, ka Charles B. Williams) Ka gona ge re dutše re thabela ka botlalo borutho bja lerato la Tatago rena wa legodimong, anke re beng bao ba hlaphogetšwego monaganong gomme re gopole gore lerato la Modimo ga se leo le re swanelago.—Luka 17:10.

21. Ke maaka afe a Sathane ao re swanetšego go tšwela pele re a ganetša, gomme re ka tšwela pele re kgodiša dipelo tša rena ka therešo efe ya Beibele?

 21 Anke yo mongwe le yo mongwe wa rena a dire boiteko bjohle bakeng sa go gana maaka ka moka a Sathane, go akaretša maaka a gore re bao ba se nago mohola goba bao ba sa rategego. Ge e ba diphihlelo tšeo o bilego le tšona bophelong di go rutile gore o ipone o le bothata bjo bo boifišago moo gaešita le lerato le legolo la Modimo le ka se bo fenyego, goba o lebelela mediro ya gago e mebotse e le yeo e hlokago mohola kudu mo e lego gore le mahlo a gagwe ao a bonago tšohle a ka e hlokomela, goba o bona dibe tša gago e le tše dikgolo kudu moo le lehu la Morwa wa gagwe yo bohlokwa le ka se kego la di pipa, o rutilwe maaka. Gana maaka a bjalo ka pelo ka moka! Anke re tšweleng pele go kgodiša dipelo tša rena ka therešo yeo e boletšwego mantšung a Paulo ao a buduletšwego a rego: “Nna ke kxodilwe ruri: Xa xo se se kxônaxo xo re aroxanya le leratô la Modimo, e ka ba lehu xoba bophelô, e ka ba barongwa xoba maxoši, le xe e ka ba tša mehleng ya byale, xoba tše di sa tl’o xo tla, le xe e le matla-mang. Le xe e ka ba tša kwa xodimong, xoba tša kwa tlase, le sebopya-mang, xa xo se se kxônaxo xo re aroxanya le leratô la Modimo le lexo mo xo Jesu Kriste Mong ’a rena.”—Ba-Roma 8:38, 39.

^ par. 6 Gantši Beibele e kgokaganya kholofelo ya tsogo le mogopolo wa Jehofa. Monna yo a botegago Jobo o boditše Jehofa gore: “A mola O kabe . . . Ò mpeetše ’baka sa xo tlo nkxopola!” (Jobo 14:13, mongwalo o sekamego ke wa rena.) Jesu o be a bolela ka tsogo ya “bohle ba lexo mabitleng [a kgopotšo, NW].” Se e be e le se se swanetšego ka gobane Jehofa o gopola ka mo go phethagetšego bahu bao a rerago go ba tsoša.—Johane 5:28, 29.

^ par. 19 Diphetolelo tše dingwe mo di bolela gore yo a kgwathago batho ba Modimo o kgwatha leihlo la gagwe ka noši goba leihlo la Isiraele, e sego leihlo la Modimo. Phošo ye e tšwa go bangwalolodi ba bangwe bao ba bego ba lebelela temana ye e le e sa swanelago gomme ka baka leo ba e fetoša. Maiteko a bona a fošagetšego a ile a uta go ba ga kwelobohloko ya Jehofa e tseneletšego.