Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Batamela Kgaufsi le Jehofa

 KGAOLO 19

“Bohlale bja Modimo Sephiring se Sekgethwa”

“Bohlale bja Modimo Sephiring se Sekgethwa”

1, 2. Ke ‘sephiri sefe se sekgethwa’ seo se swanetšego go re kgahliša, gomme ka baka la’ng?

DIPHIRI! Ka ge e le tše di tsošago kgahlego, tše goketšago le tšeo di tlabago, batho gantši ba thatafalelwa ke go di boloka e le khupamarama. Lega go le bjalo, Beibele e re: “Modimo ó rêtwa xe a uta taba.” (Diema 25:2) Ee, Mmuši wa Legohle le Mmopi, Jehofa, o na le tshwanelo ya go boloka dilo tše dingwe e le sephiri bathong go fihlela ge e le nako ya gagwe e swanetšego ya go di utolla.

2 Lega go le bjalo, go na le sephiri se se kgahlišago le se se tlabago seo Jehofa a se utolotšego ka Lentšung la gagwe. Se bitšwa “sephiri se sekgethwa sa thato ya [Modimo].” (Ba-Efeso 1:9, NW) Go ithuta ka sona go ka dira mo gontši kudu go feta go kgotsofatša go fagahlela ga gago go nyaka go tseba. Go tseba sephiri se go ka lebiša phološong gomme go ka dira gore o hwetše temogo ka bohlale bja Jehofa bjo bo sa lekanywego.

Se Utolotšwe ka mo go Tšwelago Pele

3, 4. Boporofeta bjo bo ngwadilwego go Genesi 3:15 bo ile bja nea kholofelo bjang, gomme ke sephiri goba “sephiri se sekgethwa” sefe seo bo bego bo se akaretša?

3 Nakong ya ge Adama le Efa ba dira sebe, go ka ba go ile gwa bonala eka morero wa Jehofa wa go dira gore lefase e be paradeise yeo e dulwago ke batho ba phethagetšego o be o foloditše. Eupša Modimo o ile a swaragana le bothata gatee-tee. O itše: “Le xôna ke bea lehlôyô xare xa xaxo [noga] le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.”—Genesi 3:15.

4 A e be e le mantšu a tlabago le ao a sa kwešišegego. Mosadi yo e be e le mang? Ke mang yo e bego e le noga? “Peu” yeo e bego e tla pšhatla noga hlogo e be e le mang? Adama le Efa ba be ba ka akanyetša feela. Lega go le bjalo, mantšu a Modimo a ile a nea  kholofelo bakeng sa ditlogolwana le ge e le dife tše di botegago tša batho bao ba babedi ba go se botege. Toko e be e tla fenya. Morero wa Jehofa o be o tla phethagala. Eupša bjang? Seo e be e le sephiri se segolo gakaakang! Beibele e se bitša “bohlale bja Modimo sephiring se sekgethwa, bohlale bjo bo fihlilwego.”—1 Ba-Korinthe 2:7NW.

5. Bontšha lebaka leo ka lona Jehofa a ilego a utolla sephiri sa gagwe ka mo go tšwelago pele.

5 Jehofa e le“Moutolodi wa diphihlô” mafelelong o be a tla utolla ditaba ka botlalo tše di swanetšego mabapi le go phethagala ga sephiri se. (Daniele 2:28) Eupša o be a tla dira bjalo ganyenyane-ganyenyane le ka mo go tšwelago pele. Ka mohlala, re ka nagana ka tsela yeo ka yona tate yo lerato a arabelago ka gona ge mošemanyana wa gagwe yo monyenyane a botšiša gore, “Tate, ke tšwa kae?” Tate yo bohlale o nea feela tekanyo e itšego ya tsebišo yeo mošemanyana yoo yo monyenyane a ka kgonago go e kwešiša. Ge mošemanyana a dutše a gola, tatagwe o mmotša mo go oketšegilego. Ka tsela e swanago, Jehofa o lemoga gore ke neng moo batho ba gagwe ba loketšego go ka utollelwa thato ya gagwe gotee le morero.—Diema 4:18; Daniele 12:4.

6. (a) Kgwerano goba konteraka e phetha morero ofe? (b) Ke ka baka la’ng e le mo go makatšago gore Jehofa o be a tla hloma dikgwerano le batho?

6 Jehofa o ile a dira bjang dikutollo tše bjalo? O ile a diriša lelokelelo la dikgwerano goba dikonteraka bakeng sa go utolla mo gontši. Mohlomongwe le wena ka nako e nngwe o ile wa tsenela konteraka e itšego—mohlomongwe ya go reka legae goba go adima goba go adimiša tšhelete. Konteraka yeo e ile ya nea kgonthišetšo ya molao yeo dilo tšeo go dumelelanwego ka tšona di bego di tla phethagatšwa. Eupša ke ka baka la’ng go be go nyakega gore Jehofa a dire dikgwerano tša molao goba dikonteraka le batho? Ka kgonthe, lentšu la gagwe ke kgonthišetšo e lekanego ya dikholofetšo tša gagwe. Seo ke sa therešo, le gona mabakeng a mantši, Modimo ka botho o ile a thekga lentšu la gagwe ka go dira dikonteraka tša molao. Ditumelelano tše tše tlamago di nea rena  batho bao ba sa phethagalago motheo o tiilego kudu wa go bota dikholofetšo tša Jehofa.—Ba-Hebere 6:16-18.

Kgwerano le Aborahama

7, 8. (a) Ke kgwerano efe yeo Jehofa a ilego a e dira le Aborahama, gomme e nea tshedimošo efe ka sephiri se sekgethwa? (b) Jehofa o ile a lekanyetša bjang ka mo go tšwelago pele leloko la lešika la Peu e holofeditšwego?

7 Nywageng e fetago e dikete tše pedi ka morago ga go rakwa ga motho Paradeiseng, Jehofa o ile a botša mohlanka wa gagwe yo a botegago Aborahama gore: “Bana ba xaxo ke tlo ba atiša xaxolo byalo ka dinaledi tša lexodimong, . . . xomme dithšaba ka moka tša lefase di tlo šexofala ka peu ya xaxo, ka ’baka la xobane o kwele lentšu la-ka.” (Genesi 22:17, 18) Se e be e le se se fetago go fo ba kholofetšo feela; Jehofa o ile a e bea ka tsela ya kgwerano ya molao gomme a e thekga ka keno ya gagwe yeo e sa robjego. (Genesi 17:1, 2; Ba-Hebere 6:13-15) Ke mo go kgahlišago gakaakang gore Morena wa Legohle ge e le gabotse o ile a itlama gore o tla šegofatša batho!

“Bana ba xaxo ke tlo ba atiša xaxolo byalo ka dinaledi tša lexodimong”

8 Kgwerano ya Aborahama e ile ya utolla gore Peu e holofeditšwego e be e tla tla e le ka sebopego sa motho, ka gobane e be e tla ba setlogolwana sa Aborahama. Eupša e be e tla ba mang? Ge nako e dutše e tšwela pele, Jehofa o ile a utolla gore morwa wa Aborahama, Isaka, e be e tla ba rakgolokhukhu wa Peu. Go barwa ba Isaka ba babedi, go ile gwa kgethwa Jakobo. (Genesi 21:12; 28:13, 14) Ka morago, Jakobo o ile a bolela mantšu a a boporofeta a a lebišitše go yo mongwe wa barwa ba gagwe ba 12: “Molamó wa boxoši ó ka se tloxé xo Juda; lepara la mmuši xa le tloxe mo ’naong tša xaxwe, xo bê xo tlê [Silo, PK] [“Yo e Lego sa Gagwe”]. Xomme Yêna-eo dithšaba di tlo mo kwa.” (Genesi 49:10) Bjale go be go tsebja gore Peu e be e tla ba kgoši yeo e lego ya leloko la Juda!

Kgwerano le Isiraele

9, 10. (a) Ke kgwerano efe yeo Jehofa a ilego a e dira le setšhaba sa Isiraele, gomme ke tšhireletšo efe ye e ilego ya newa ke kgwerano yeo? (b) Molao o ile wa bonagatša bjang go nyaka ga batho topollo?

9 Ka 1513 B.C.E., Jehofa o ile a dira tokišetšo yeo e ilego ya bula tsela bakeng sa dikutollo tše di oketšegilego ka sephiri se sekgethwa. O ile a dira kgwerano le ditlogolwana tša Aborahama e lego  setšhaba sa Isiraele. Gaešita le ge ga bjale o se sa šoma, Molao wo wa Moše e be e le karolo ya motheo ya morero wa Jehofa wa go tliša Peu e holofeditšwego. Go bjalo bjang? Ela hloko ditsela tše tharo. Ya pele, Molao o be o swana le leboto leo le šireletšago. (Ba-Efeso 2:14) Ditaelo tša wona tše di lokilego di be di dira e le lepheko magareng ga ba-Juda le ba-Ntle. Ka go rialo Molao o ile wa thuša go boloka lešika la Peu e holofeditšwego. Kudu-kudu ka baka la tšhireletšo e bjalo, setšhaba se be se sa dutše se le gona ge nako e beilwego ya Modimo e be e fihla bakeng sa gore Mesia a belegelwe molokong wa Juda.

10 Ya bobedi, Molao o be o bonagatša gabotse go nyaka ga batho topollo. Ka ge e be e le Molao o phethagetšego, o ile wa pepentšha go palelwa ga batho ba sa phethagalago ke go o kgomarela ka botlalo. Ka go rialo o ile wa šoma “[bakeng sa go bonagatša, NW] dikaroxô, xore xo bê xo fihlê Peu ye e bolêlwaxo ke kholofedišô.” (Ba-Galatia 3:19) Ka dihlabelo tša diphoofolo, Molao o be o nea tebalelo ya nakwana ya dibe. Eupša bjalo ka ge Paulo a ngwadile, “ka xe madi a dipôô le a diphôkô à sa kxone xo tloša dibe,” dihlabelo tše di be di swantšhetša feela sehlabelo sa topollo sa Kriste. (Ba-Hebere 10:1-4) Ka gona, bakeng sa ba-Juda bao ba botegago, kgwerano yeo e ile ya fetoga “moetetši wa xo [ba] iša xo Kriste.”—Ba-Galatia 3:24.

11. Ke tebelelo efe e kgahlišago yeo kgwerano ya Molao e ilego ya e nea Isiraele, eupša ke ka baka la’ng setšhaba ka moka ga sona se ile sa lahlegelwa?

11 Ya boraro, kgwerano yeo e be e nea setšhaba sa Isiraele tebelelo e kgahlišago. Jehofa o ile a ba botša gore ge ba be ba ka ipontšha ba botegela kgwerano ya gagwe, ba be ba tla ba “setšhaba sa baperisita le setšhaba se sekgethwa.” (Ekisodo 19:5, 6, NW) Isiraele ya nama mafelelong e ile ya nea ditho tša mathomo tša mmušo wa legodimong wa baperisita. Lega go le bjalo, Isiraele ka moka ga yona e ile ya rabela malebana le kgwerano ya Molao, ya gana Peu yeo e lego Mesia gomme ya lahlegelwa ke tebelelo yeo. Ka gona, ke bomang bao ba bego ba tla tlaleletša palo ye ya mmušo wa baperisita? Le gona ke bjang setšhaba seo se se šegofaditšwego se bego se tla tswalana le Peu yeo e holofeditšwego? Dikarolo tšeo tša sephiri se sekgethwa di be di tla utollwa ka nako ya Modimo e swanetšego.

 Kgwerano ya Mmušo ya Dafida

12. Ke kgwerano efe yeo Jehofa a ilego a e dira le Dafida, gomme ke seetša sefe seo e ilego ya se hlabiša ka sephiri se sekgethwa?

12 Lekgolong la bo-11 la nywaga B.C.E., Jehofa o ile a hlabiša seetša se se oketšegilego ka sephiri se sekgethwa ge a be a dira kgwerano e nngwe. O ile a holofetša Kgoši Dafida yo a botegago gore: “Ké mo ke tl’o xo tsoša wa peu ya xaxo, a tla moraxo xa xaxo, . . . ka tiiša boxoši bya xaxwe. . . . ’Me sedulô sa mmušô wa xaxwe ke tlo se thêkxa ka xo sa felexo.” (2 Samuele 7:12, 13; Psalme 89:3) Bjale lešika la Peu yeo e holofeditšwego le be le lekanyeditšwe feela go ba ngwako wa Dafida. Eupša na motho feela yo a tlwaelegilego o be a ka buša “neng le neng”? (Psalme 89:20, 29, 34-36) Le gona na kgoši e bjalo ya motho e be e ka lokolla batho sebeng le lehung?

13, 14. (a) Go ya ka Psalme 110, ke kholofetšo efe yeo Jehofa a e dirago go Kgoši ya gagwe yeo e tloditšwego? (b) Ke dikutollo dife tše di oketšegilego mabapi le Peu e tlago tšeo di ilego tša dirwa ka baporofeta ba Jehofa?

13 A le ka tlase ga pudulelo, Dafida o ile a ngwala gore: “Morêna ó boditše Mong wa-ka a re: Dula ka letsoxong la-ka le letona, ke bê ke dirê manaba a xaxo boxatô bya ’naô tša xaxo. Morêna ó enne, a ka se šexame; Moperisita wa neng le neng ké Wêna ka mokxwa wa Melekitsedeke.” (Psalme 110:1, 4) Mantšu a Dafida a ile a šoma ka go lebanya go Peu e holofeditšwego goba Mesia. (Ditiro 2:35, 36) Kgoši ye e be e tla buša, e sego e le Jerusalema, eupša e le legodimong e dutše ka ‘letsogong le letona’ la Jehofa. Seo se be se tla mo nea matla e sego feela godimo ga naga ya Isiraele eupša godimo ga lefase ka moka. (Psalme 2:6-8) Mo go ile gwa utollwa selo se sengwe se se oketšegilego. Hlokomela gore Jehofa o ile a bolela keno e tiilego ya gore Mesia e be e tla ba “Moperisita . . . ka mokxwa wa Melekitsedeke.” Ka go swana le Melekitsedeke yo a bego a hlankela e le kgoši e bile e le moperisita mehleng ya Aborahama, Peu e tlago e be e tla ba yeo e kgethilwego ke Modimo ka go lebanya gore e hlankele e le Kgoši le Moperisita!—Genesi 14:17-20.

14 Go theoša le nywaga, Jehofa o ile a diriša baporofeta ba gagwe go dira dikutollo tše di oketšegilego ka sephiri sa gagwe se sekgethwa. Ka mohlala, Jesaya o ile a utolla gore Peu e be e tla hwa lehu la sehlabelo. (Jesaya 53:3-12) Mika o ile a bolela e sa le pele  ka lefelo leo Mesia a bego a tla belegelwa go lona. (Mika 5:1) Daniele o ile a ba a bolela ka nako e lebanyago ya go tšwelela ga Peu le ya go hwa.—Daniele 9:24-27.

Sephiri se Sekgethwa se a Utollwa!

15, 16. (a) Ke bjang Morwa wa Jehofa a ilego a ‘belegwa ke mosadi’? (b) Ke bohwa bofe bjoo Jesu a ilego a bo hwetša go batswadi ba gagwe bao e lego batho, gomme o ile a tšwelela neng e le Peu e holofeditšwego?

15 Ge e le mabapi le kamoo diporofeto tše di bego di tla phethagala ka gona go ile gwa dula e le sephiri go fihlela ge Peu e tšwelela e le ka kgonthe. Ba-Galatia 4:4 e re: “Xe xo tlile phêthêxô ya mabaka a na a roma Morwa wa xaxwe e a belexwexo ke mosadi.” Ka ngwaga wa 2 B.C.E., morongwa o ile a botša kgarebe ya mo-Juda e bitšwago Maria gore: “Tseba; O tlo ima mmeleng wa xaxo, wa tlo bêlêxa morwa wa tlo mo rêa leina la Jesu. Yêna-eo e tlo ba e moxolo, ó tlo bitšwa Morwa wa Yo-xodimo-dimo; ’me Morêna ó tlo mo nea sedulô sa Dafida tat’axwe. . . . Môya-mokxêthwa ó tlo theoxêla xo wene ’me matla a Yo-xodimo-dimo a tlo Xo okamêla wa moriti, ké ka ’baka leo e a tl’o xo bêlêxwa ke wene à tl’o xo bitšwa Morwa-Modimo.”—Luka 1:31, 32, 35.

16 Ka morago, Jehofa o ile a fetišetša bophelo bja Morwa wa gagwe yo a tšwago legodimong ka popelong ya Maria, e le gore a belegwe ke mosadi. Maria e be e le mosadi yo a sa phethagalago. Lega go le bjalo, Jesu ga se a abela go se phethagale go yena, ka gobane e be e le “Morwa-Modimo.” Ka nako e swanago, batswadi ba Jesu bao e lego batho, e le ditlogolwana tša Dafida ba ile ba Mo dira gore a kgone go ba le ditshwanelo tša tlhago le tša molao tša go ba moja-bohwa wa Dafida. (Ditiro 13:22, 23) Ge Jesu a be a kolobetšwa ka 29 C.E., Jehofa o ile a mo tlotša ka moya o mokgethwa gomme a re: “Yêna-yó ké Yêna Morwa-moratwa wa-ka.” (Mateo 3:16, 17) Mafelelong, Peu e ile ya fihla! (Ba-Galatia 3:16) E be e le nako ya go utolla mo go oketšegilego ka sephiri se sekgethwa.—2 Timotheo 1:10.

17. Go ile gwa hlabišwa seetša bjang mabapi le seo se bolelwago ke Genesi 3:15?

17 Nakong ya bodiredi bja gagwe, Jesu o ile a hlaola noga yeo go bolelwago ka yona go Genesi 3:15 e le Sathane gomme peu ya noga e le balatedi ba Sathane. (Mateo 23:33; Johane 8:44) Ka  morago, go ile gwa utollwa kamoo ba ka moka ba bego ba tla pšhatlaganyetšwa sa ruri. (Kutollo 20:1-3, 10, 15) Le gona mosadi o ile a hlaolwa e le “Jerusalêma wa maxodimong,” mokgatlo wa Jehofa wa legodimong wa dibopiwa tša moya wo o swanago le mosadi. *Ba-Galatia 4:26; Kutollo 12:1-6.

Kgwerano e Mpsha

18. Morero wa “kxwêranô e mphsa” ke ofe?

18 Mohlomongwe kutollo e makatšago kudu go di feta tšohle e bile gona bošegong bja pele ga lehu la Jesu ge a be a botša barutiwa ba gagwe ba botegago mabapi le ‘kgwerano e mpsha.’ (Luka 22:20) Ka go swana le kgwerano ya ka pele ga yona e lego kgwerano ya Molao wa Moše, kgwerano ye e mpsha e be e tla tšweletša “boperisita bya boxoši.” (Ekisodo 19:6; 1 Petro 2:9) Lega go le bjalo, kgwerano ye e be e tla tšweletša setšhaba sa moya e sego setšhaba sa nama, “Ba-Isiraele ba Modimo,” bao ba bopšago ka mo go feletšego ke balatedi ba tloditšwego ba botegago ba Kriste. (Ba-Galatia 6:16) Ditho tše tša kgwerano e mpsha di be di tla tšea karolo gotee le Jesu go šegofatšeng moloko wa batho!

19. (a) Ke ka baka la’ng kgwerano e mpsha e atlega go tšweletšeng “boperisita bya boxoši”? (b) Ke ka baka la’ng Bakriste ba tloditšwego ba bitšwa “mmopya e mofsa,” gomme ke ba bakae bao ba tlago go hlankela legodimong gotee le Kriste?

19 Eupša ke ka baka la’ng kgwerano e mpsha e be e tla atlega go tšweletšeng “boperisita bya boxoši” bakeng sa go šegofatša batho? Ka gobane go e na le go ahlola barutiwa ba Kriste e le badiradibe, e dira gore go lebalelwa ga bona dibe go kgonege ka sehlabelo sa gagwe. (Jeremia 31:31-34) Gatee-tee ge ba amogela boemo bjo bo hlwekilego pele ga Jehofa, o ba amogela lapeng la gagwe la legodimong gomme o ba tlotša ka moya o mokgethwa. (Ba-Roma 8:15-17; 2 Ba-Korinthe 1:21) Ka go rialo ba ‘tswalwa lefsa ka kgaugelo e kgolo yeo ba e boloketšwego legodimong.’ (1 Petro 1:3, 4) Ka ge boemo bjo bo bjalo bjo bo phagamego e le bjo bofsa  ka mo go feletšego go batho, Bakriste ba tloditšwego ka moya ba bitšwa “mmopya e mofsa.” (2 Ba-Korinthe 5:17) Beibele e utolla gore ba 144 000 mafelelong ba tla tšea karolo ba le legodimong ya go buša batho bao ba lopolotšwego.—Kutollo 5:9, 10; 14:1-4.

20. (a) Ke kutollo efe mabapi le sephiri se sekgethwa yeo e ilego ya dirwa ka 36 C.E.? (b) Ke bomang bao ba tlago go thabela ditšhegofatšo tšeo di holofeditšwego Aborahama?

20 Ba le gotee le Jesu, batlotšwa ba ba fetoga “peu ya Aborahama.” * (Ba-Galatia 3:29) Ba pele bao ba ilego ba kgethwa e be e le ba-Juda ba nama. Eupša ka 36 C.E., karolo e nngwe ya sephiri se sekgethwa e ile ya utologa: Ba-Ntle goba bao e sego ba-Juda, le bona ba be ba tla ba le kabelo kholofelong ya legodimong. (Ba-Roma 9:6-8; 11:25, 26; Ba-Efeso 3:5, 6) Na Bakriste ba tloditšwego e be e tla ba bona feela bao ba bego ba tla thabela ditšhegofatšo tšeo di holofeditšwego Aborahama? Aowa, ka gobane sehlabelo sa Jesu se hola lefase ka moka. (1 Johane 2:2) Ge nako e dutše e e-ya, Jehofa o ile a utolla gore “lešaba le lexolo” leo le sa balegego le be le tla phologa bofelo bja tshepedišo ya Sathane ya dilo. (Kutollo 7:9, 14) Ba bangwe ba bantši kudu ba be ba tla tsošwa ba e-na le kholofelo ya go phela ka mo go sa felego Paradeiseng!—Luka 23:43; Johane 5:28, 29; Kutollo 20:11-15; 21:3, 4.

Bohlale bja Modimo le Sephiri se Sekgethwa

21, 22. Ke ka ditsela dife sephiri sa Jehofa se sekgethwa se bonagatšago bohlale bja gagwe?

21 Sephiri se sekgethwa ke ponagatšo e makatšago ya “bohlale bya Modimo bya mehuta-huta.” (Ba-Efeso 3:8-10) A bohlale bjo bogolo gakaakang bjo Jehofa a bo bontšhitšego ka go hlama sephiri se, gomme ka morago a bo bonagatša ka go se utolla ganyenyane-ganyenyane! Ka bohlale o ile a naganela mafokodi a batho, a ba nea sebaka sa gore ba bonagatše boemo bja bona bja kgonthe bja pelo.—Psalme 103:14.

22 Jehofa gape o ile a bonagatša bohlale bjo bo sa bapišwego ge a kgetha Jesu e le Kgoši. Morwa wa Jehofa ke yo a botegago kudu  go feta sebopiwa le ge e le sefe legohleng. Ge a be a phela e le motho wa nama le madi, Jesu o ile a lebeletšana le mathata a mehuta-huta. O kwešiša mathata a batho ka mo go feletšego. (Ba-Hebere 5:7-9) Go thwe’ng ka babuši-gotee le Jesu? Go theoša le nywaga-kgolo, bobedi banna le basadi—bao ba kgethilwego go tšwa melokong ka moka, malemeng ka moka le ditšong ka moka—ba ile ba tlotšwa ka moya. Go tloga go se na bothata le ge e le bofe bjoo batho ka o tee ka o tee gare ga bona ba sa kago ba lebeletšana le bjona gomme ba bo fenya. (Ba-Efeso 4:22-24) Go phela ka tlase ga pušo ya dikgoši tše tšeo e lego baperisita ba nago le kgaugelo e tla ba mo go kgahlišago!

23. Ke tokelo efe yeo Bakriste ba nago le yona mabapi le sephiri se sekgethwa sa Jehofa?

23 Moapostola Paulo o ngwadile gore: “Phihlo e bego e utilwe go tloga mehleng le mehla, le melokong ka moka . . . e bonagaleditšwe bakgethwa ba gagwe.” (Ba-Kolose 1:26, PK) Ee, bakgethwa ba Jehofa ba tloditšwego ba thomile go kwešiša mo gontši ka sephiri se sekgethwa, gomme ba ile ba abelana tsebo yeo le ba dimilione. Ke tokelo e kgolo gakaakang yeo ka moka ga rena re nago le yona! Jehofa o “re tsebišitše sephiri se sekgethwa sa thato ya gagwe.” (Ba-Efeso 1:9, NW) Anke re abelaneng le ba bangwe sephiri se se se kgahlišago, le bona re ba thušeng ka mo go swanago gore ba lebelele bohlaleng bjo bo sa lekanywego bja Jehofa Modimo!

^ ser. 17 “Sephiri se sekgethwa sa boineelo go Modimo” se ile sa utollwa gape ka Jesu. (1 Timotheo 3:16, NW) Taba ya ge e ba motho le ge e le ofe a ka kgomarela potego e phethagetšego go Jehofa e bile sephiri ka nako e telele. Jesu o ile a utolla karabo. O ile a kgomarela potego ka tlase ga teko e nngwe le e nngwe yeo Sathane a bego a e tliša godimo ga gagwe.—Mateo 4:1-11; 27:26-50.

^ ser. 20 Jesu gape o ile a dira “kgwerano . . . bakeng sa mmušo” le sehlopha sona seo. (Luka 22:29, 30, NW) Ge e le gabotse, Jesu o ile a dira kgwerano le “mohlatswana o monyenyane” wo gore o buše le yena legodimong e le karolo ya bobedi ya peu ya Aborahama.—Luka 12:32.

Ithute ka mo go oketšegilego

Ekwa Modimo Gomme o Holwe ke Dikeno tša Gagwe

Ke eng se re ithutago sona dikholofetšong tša Modimo, dikenong tša gagwe, le dikgweranong tša gagwe?