Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

 INDONESIA

Mekgwa Yeo e Ilego ya Dirišwa Mathomong ya go Nea Bohlatse

Mekgwa Yeo e Ilego ya Dirišwa Mathomong ya go Nea Bohlatse

Mananeo a Radio

KA 1933, bana babo rena ba ile ba rulaganya gore seteišene sa radio kua Jakarta se gaše dipolelo tše di rekhotilwego tša Seisemane tša Ngwanabo rena Rutherford. Dipolelo tše dingwe tša Sedutch di be di balwa radiong ke monna yo mongwe yo a bego a thabela. Mananeo ao a ile a dira gore batho ba bantši ba thabele gomme a thuša bana babo rena go sepediša dikgatišo tše di oketšegilego tšhemong.

Ge seteišene sa radio se be se gaša polelo e matla ya Ngwanabo rena Rutherford yeo e nago le sehlogo se se rego: “Mafelelo a Ngwaga o Mokgethwa Khutšong le Katlegong,” baruti ba kereke ya Katholika ba be ba se sa nyaka go kwa selo. * Ba diriša balatedi ba bona, ba ile ba dira gore Ngwanabo rena De Schumaker yo a bego a tlišitše direkhoto tšeo, a bewe molato wa “go thomeletša, go kwera le lehloyo.” Ngwanabo rena De Schumaker o ile a lwela ditatofatšo tšeo ka matla eupša a lefišwa tšhelete ya di-guilder * tše 25 le tšhelete e nngwe ya go lefelela kgoro ya tsheko. Dikuranta tše tharo tšeo di balwago kudu di ile tša bega molato woo, gomme seo sa dira gore go newe bohlatse bjo bogolo kudu.

 Sekepe se se Bitšwago Lightbearer

Ka July 15, 1935, sekepe sa Mokgatlo wa Watch Tower sa dimithara tše 16 seo se bitšwago Lightbearer se ile sa goroga kua Jakarta ka morago ga leeto la dikgwedi tše tshela go tšwa Sydney, Australia. Ka sekepeng seo go be go na le babulamadibogo ba šupago ba mafolofolo bao ba bego ba ikemišeditše go phatlalatša ditaba tše dibotse nageng ka moka ya Indonesia, Singapore le Malaysia.

 Babulamadibogo bao ba bego ba sepela ka sekepe seo ba ile ba fetša mengwaga ya ka godimo ga e mebedi ba etela maemakepe a magolo le a manyenyane nageng ka moka ya Indonesia, gomme ba sepediša dikgatišo tše dintši tše di theilwego Beibeleng. Jean Deschamp o itše ge sekepe seo se tsena boemakepeng bjo bongwe le bjo bongwe bjo bonyenyane, “re be re bulela motšhene wa go bapala direkhoto ke moka ra bapala e nngwe ya dipolelo tša J. F. Rutherford, yoo ka nako yeo e bego e le mopresidente wa Mokgatlo wa Watch Tower. Nagana kamoo badudi ba motseng wa Malay bao ba bego ba dula kgole le toropo ba ilego ba makala ka gona ge ba bona sekepe se segolo se fihla boemakepeng bja bona gomme ba ekwa modumo o mogolo le o matla o kwagala moyeng. Ba be ba thabile kudu moo e bego eka ba bone sefofane seo se tšwago polaneteng e nngwe.”

Ka ge baruti ba be ba galefišitšwe ke gore bana babo rena ba nea bohlatse ka sebete, mafelelong ba ile ba gapeletša mmušo gore o thibele sekepe sa Lightbearer gore se se tsene maemakepeng a mantši a Indonesia. Ka December 1937, sekepe seo se ile sa boela Australia, sa tlogela pego e botse kudu ya modiro wa boromiwa kua Indonesia.

Babulamadibogo bao ba bego ba sepela ka sekepe sa Lightbearer

^ ser. 2 Polelo ya Ngwanabo rena Rutherford e ile ya pepentšha dithuto tša maaka tša Kereke ya Roma Katholika le ditirišano tša yona tša dipolotiki le tša kgwebo.

^ ser. 2 Lehono e lekana le diranta tše e ka bago tše 4 000.