Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

 INDONESIA

Go Bolela ka Leina la Modimo ka Sebete

Go Bolela ka Leina la Modimo ka Sebete

Mengwageng e mentši ya ge modiro wa rena o be o thibetšwe, bana babo rena ba Indonesia ka bohlale ba ile ba kwa keletšo ya Jesu ya gore ba be “šedi bjalo ka dinoga, fela [e be] ba se nago molato bjalo ka maeba.” (Mat. 10:16) Eupša ge thibelo e be e fela, ba bantši ba ile ba swanelwa ke go ithuta go bolela ditaba tše dibotse “ka sebete.”—Dit. 4:31.

Ka mohlala, bana babo rena ba bangwe ba be ba dikadika go bolela ditaba tše dibotse ka ntlo le ntlo gomme ba eya feela maetong a go boela le dithutong tša Beibele. Ba bangwe ba be ba tšhaba go boledišana le Mamoseleme. Ba bantši ba be ba itsebiša ka gore ke Bakriste go e na le gore ba re ke Dihlatse tša Jehofa gomme ba diriša diphetolelo tša Beibele tša Bojakane go e na le go diriša Phetolelo ya Lefase le Lefsa ya Seindonesia. * Ba bangwe ba be ba tšhaba go sepediša dikgatišo tšeo di theilwego Beibeleng.

E mengwe ya mekgwa ye ba be ba e diriša nakong ya ge modiro wa rena o sa thibetšwe. E mengwe e tšwa setšong sa moo, ka ge batho ba moo ba phema go se kwane gomme gantši ba bona go le kaone go ba šedi kudu go e na le go ngangišana. Bana babo rena ba be ba ka thušwa bjang?

Jehofa o ile a diriša bana babo rena bao ba godilego moyeng go ba nea keletšo e botho. (Baef. 4:11, 12) Ka mohlala, ka 2010, setho sa Sehlopha se Bušago e lego Ngwanabo rena Stephen Lett, ka borutho o ile a kgothaletša bana babo rena go emela leina la Modimo ka gore ba diriše ka bolokologi Phetolelo ya Lefase le Lefsa bodireding. Moromiwa yo a bitšwago Misja Beerens o re: “Polelo ya Ngwanabo rena Lett e ile ya kgoma kudu bagoeledi ba bantši. Ba ile ba bona bohlokwa bja gore ba tsebje e le Dihlatse tša Jehofa le go thabela go lwela Lentšu la Modimo.”

 Ka ge Mamoseleme a Indonesia gantši a tswalanya Dihlatse tša Jehofa le Bojakane, Tirelo ya Mmušo ya Indonesia e ile ya nea tlhahlo e holago. E itše: “Go ipolela gore o yo mongwe wa Dihlatse tša Jehofa di tloga fase feela gantši ke mokgwa o mokaone kudu wa go thoma poledišano. . . . Re emela Jehofa ka sebete, le gona re nyaka go tsebatša leina la gagwe le merero ya gagwe tšhemong ya gabo rena!” Shinsuke Kawamoto, yo a hlankelago ofising ya lekala Indonesia, o re: “Mokgwa wo o lebanyago le wa go ba šedi o na le mafelelo a mabotse. Mamoseleme a mantši a nyaka go tseba ka Dihlatse tša Jehofa. A nyaka go tseba gore ke eng seo se dirago gore re se ke ra swana le batho ba bangwe. Go nyaka go tseba ga ona go re bulela sebaka sa go nea bohlatse ka tsela e botse.”

Le gona bagoeledi ba ile ba kgothaletšwa gore ba se ke ba tšhaba go sepediša Morokami le Phafoga! Lothar Mihank, e lego molomaganyi wa Komiti ya Lekala o hlalosa gore: “E le gore batho ba re tsebe, ba swanetše go bala dimakasine tša rena. Dimakasine di letefatša seo re ka rego ke mmu gomme di kgothaletša batho go amogela therešo. Ge re di sepediša kgole le kgauswi, re nea batho ba oketšegilego sebaka sa go ithuta ka Jehofa.”

Go Nea Bohlatse Mafelong a Batho Bohle go ba le Mafelelo a Mabotse

Ka 2013, lekala la Indonesia le ile la thoma go diriša mekgwa e mebedi ya go bolela ditaba tše dibotse yeo e bego e dumeletšwe ke Sehlopha se Bušago, e lego mokgwa o kgethegilego wa go nea bohlatse metseng ya ditoropong le mokgwa wo o dirišwago ke phuthego wa go nea bohlatse mafelong a batho bohle. Mekgwa ye e kgahlišago e dira gore batho ba bantši ba Indonesia ba kgone go hwetša sebaka sa go kwa ditaba tše dibotse.

E nngwe ya ditafola tše mmalwa tša mathomo tša go nea bohlatse mafelong a batho bohle ditoropong tše dikgolo e ile ya bewa lefelong la mabenkele a magolo a didirišwa tša elektroniki ka Bodikela bja Jakarta. Bagoeledi ba diphuthego tša lefelong leo ba ile ba thoma go bea diteroli le ditafola tša go nea bohlatse ditšhemong tša gabo bona. Pele ga ge ngwaga o ka fela,  ditafola le diteroli tša ka godimo ga tše 400 di be di šetše di dirišwa ditoropong tša Indonesia. Se se bile le mafelelo afe?

Yusak Uniplaita, e lego mogolo wa kua Jakarta, o re: “Pele re ka thoma go nea bohlatse mafelong a batho bohle, phuthego ya gabo rena e be e kgopela dimakasine tše 1 200 ka kgwedi. Ka morago ga dikgwedi tše tshela, re be re kgopela dimakasine tše 6 000 ka kgwedi. Gona bjale re kgopela dimakasine tše 8 000 ka kgwedi. Le gona re sepediša dipuku tše dintši le diporoutšha.” Kua Medan, ka Leboa la Sumatra, sehlopha se senyenyane sa babulamadibogo se ile sa bea diteroli tša go nea bohlatse mafelong a mararo. Kgweding ya mathomo, ba ile ba sepediša dipuku tše 115 le dimakasine tše e ka bago tše 1 800. Ka morago ga dikgwedi tše pedi, babulamadibogo ba e ka bago ba 60 mafelong a šupago ba ile ba sepediša dipuku tša ka godimo ga tše 1 200 le dimakasine tše 12 400. Moromiwa yo a bitšwago Jesse Clark o re: “Bana babo rena ba thabela mekgwa ye e mefsa ya go bolela ditaba tše dibotse e bile e bontšha gore go sa na le batho bao ba ka amogelago therešo Indonesia. Re ka se tsoge ra tlogela go diriša mokgwa wo wa go nea bohlatse mafelong a batho bohle!”

Go Diriša Leleme Leo Batho ba le Antšego Letsweleng

Indonesia ke e nngwe ya dinaga tšeo go bolelwago maleme a mantši kudu lefaseng. * Gaešita le ge batho ba bantši ba bolela Seindonesia, e lego leleme leo le kwešišwago ke batho ba moo, e bile ba bantši ba bolela maleme a moo ao ba a antšego letsweleng.

Sehlopha sa bafetoledi sa Sebatak-Toba ka Leboa la Sumatra

Ka 2012, ofisi ya lekala e ile ya dira phetho ya go dira nyakišišo go bona gore go na le tlhokagalo e kgolo gakaakang tšhemong ye ya maleme a mantši. Tom Van Leemputten o re: “Re ile ra thoma ka go fetolela dikgatišo ka maleme a 12 a moo ao a bolelwago ke batho ba e ka bago ba dimilione tše 120. Ge bafetoledi ba Sejava ba be ba bona pampišana ya mathomo ya Sejava, ba ile ba rothiša megokgo ya lethabo. Mafelelong, ba be ba na le dijo tša moya ka segagabo bona!”

 Lega go le bjalo, diphuthego tše dintši di ile tša tšwela pele go swara diboka ka Seindonesia, gaešita le ditikologong tšeo batho ba bantši ba bego ba bolela maleme a moo. Lothar Mihank o gopola ka gore: “Ka 2013, nna le mosadi wa ka Carmen re ile ra ya kopanong ya matšatši a mabedi Sehlakahlakeng sa Nias ka Leboa la Sumatra. Ba bantši ba batho ba 400 bao ba bego ba le kopanong yeo ba be ba bolela Senias, eupša dipolelo ka moka di be di newa ka Seindonesia. Ka morago ga gore ke boledišane le diboledi, re ile ra botša batheetši gore lenaneo la letšatšing le le latelago le tla ba ka Senias. Letšatšing le le latelago, batho ba ka godimo ga ba 600 ba ile ba tla kopanong.” Carmen o oketša ka gore: “Go be go le molaleng gore bao ba bego ba le gona ba be ba theeditše lenaneo la Senias ka kelohloko go feta letšatšing le le fetilego ge dipolelo di be di newa ka Seindonesia. Ba ile ba thabela go kwa le go kwešiša gabotse molaetša wa Beibele ka segagabo bona.”

Motho wa sefoa o thušwa go kwešiša Beibele

 Gaešita le batho bao e lego difoa kua Indonesia gona bjale re ka re ba kgona go kwa therešo ka segagabo bona. Ga e sa le go tloga ka 2010, sehlopha sa bafetoledi sa Polelo ya Diatla ya Indonesia se fetoletše diporoutšha tše šupago le dipampišana tše seswai ka Polelo ya Diatla ya Indonesia. Go oketša moo, ofisi ya lekala e ile ya rulaganya diklase tše 24 tša polelo ya diatla tšeo di ilego tša tlwaetša batho ba ka godimo ga ba 750 bao ba dirišago polelo ya diatla. Lehono, diphuthego le dihlopha tše 23 tša polelo ya diatla di nea thušo ya moya le go kgothatša batho ba difoa ba e ka bago ba dimilione tše tharo bao ba dulago Indonesia.

Gona bjale, Lefapha la Bofetoledi le na le dihlopha tše 37 tša bafetoledi. Go na le bafetoledi ba 117 le batho ba 50 bao ba šomago mafelong a bofetoledi a 19 nageng ka moka ya Indonesia.

^ ser. 2 Phetolelo ya Lefase le Lefsa e feletšego ka Seindonesia e lokolotšwe ka 1999. Bafetoledi ba ile ba tšea mengwaga e šupago ba šoma ka thata nakong ya ge modiro wa rena o be o thibetšwe gore ba fetše modiro wo. Mengwaga e mmalwa ka morago, puku ya go dira nyakišišo ka Beibele ya Insight on the Scriptures ya dibolumo tše pedi le Watchtower Library yeo e lego go CD-ROM di ile tša lokollwa ka Seindonesia, e lego modiro o mogolo kudu wa bofetoledi!

^ ser. 2 Indonesia go na le maleme a 707, mola Papua New Guinea e lego baagišani ba yona ba ka bohlabela, go na le maleme a 838.