Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

 INDONESIA

Tšhemo ya ka Bodikela bja Java e Tšweletša Dienywa

Theodorus Ratu

Tšhemo ya ka Bodikela bja Java e Tšweletša Dienywa

Ka 1933, Frank Rice o ile a kgopela Theodorus (Theo) Ratu, yo a tšwago ka Leboa la Sulawesi, gore a mo thuše go hlokomela lefelo leo dikgatišo di bego di gorogela go lona kua Jakarta. Theo o gopola ka gore: “Ke ile ka kgahlegela kudu modiro o bohlokwa wa Mmušo gomme ka thoma go bolela ditaba tše dibotse le Ngwanabo rena Rice. Ka morago ke ile ka sepela le Bill Hunter leetong la go yo bolela ditaba tše dibotse kua Java, ke moka ka tla ka sepela le babulamadibogo bao ba bego ba sepela ka sekepe sa Lightbearer leetong la bona la go ya Sumatra.” Theo e bile Moindonesia wa mathomo wa go amogela therešo, le gona o ile a bulamadibogo ka mengwaga e masome kua Java, ka Leboa la Sulawesi le Sumatra.

Ngwageng o latetšego, Bill Hunter o ile a sepedišetša Felix Tan pukwana ya Where Are the Dead? e lego morutwana yo a bego a dula Jakarta. Felix o ile a boela go ba lapa la gabo kua Bandung, ka Bodikela bja Java, ke moka a bontšha Dodo, e lego ngwanabo, pukwana yeo. Bobedi bja bona ba be ba makaditšwe ke taba yeo ba ithutilego yona ka pukwaneng yeo gore motho wa pele, e lego Adama, o be a se na moya wo o sa hwego. Adama e be e le moya. (Gen. 2:7) Felix le Dodo ba ile ba nyaka go tseba ka mo go oketšegilego. Ka gona ba ile ba ya kua Bandung, makgobapukung a  dipuku tšeo di dirišitšwego ba nyakana le dikgatišo tše di oketšegilego tša Watch Tower. Le gona ba ile ba botša ba gabo bona seo ba bego ba ithuta sona. Ka morago ga gore ba bale ka kelohloko dipuku le dipukwana ka moka tšeo ba ilego ba di hwetša, ba ile ba ngwalela lefelo leo dikgatišo di bego di fihlela go lona kua Jakarta. Ba ile ba makatšwa ke gore Frank Rice o ile a ba etela, a ba kgothatša gomme a ba tlela le dikgatišo tše difsa.

Lapa la ga Tan

Kapejana ka morago ga gore Ngwanabo rena Rice a boele Jakarta, Clem le Jean Deschamp bao ba bego ba sa tšwa go nyalana ba ile ba etela toropong ya Bandung ka matšatši a 15. Felix o itše: “Ngwanabo rena Deschamp o ile a botšiša lapa la gešo ge e ba le nyaka go kolobetšwa? Ditho tše nne tša lapa la gešo, e lego Dodo, kgaetšedi’aka yo monyenyane e lego Josephine (Pin Nio), mma (Kang Nio) le nna, re ile ra ineela go Jehofa gomme ra kolobetšwa.” * Ka morago ga gore ba lapa la ga Tan ba kolobetšwe, ba ile  ba sepela le Clem le Jean leetong leo le kgethegilego la matšatši a senyane la go bolela ditaba tše dibotse. Clem o ile a ba bontšha mokgwa wa go bolela ditaba tše dibotse a diriša karata ya go nea bohlatse yeo e bego e na le molaetša o mokopana wa Beibele ka maleme a mararo. Go se go ye kae sehlopha se senyenyane sa kua Bandung se ile sa fetoga phuthego ya bobedi kua Indonesia.

Kuane ya Mopapa

Ge modiro wa go bolela ditaba tše dibotse o dutše o gola, baruti ba Bojakane ba ile ba phafoga borokong. Bona le batho bao ba bego ba ba šomela ba ile ba ngwala dihlogo dikuranteng ba hlasela ditumelo tša Dihlatse le modiro wa tšona. Dihlogo tšeo di ile tša hlohleletša Lefapha la Ditaba tša Bodumedi mmušong gore le bitše Frank Rice gore a tlo botšološišwa. Ge balaodi ba mmušo ba kgotsofaditšwe ke dikarabo tša gagwe, ba ile ba dumela gore modiro wa rena o tšwele pele o sa šitišwe ke selo. *

Mathomong a bo-1930, balaodi ba bantši ba nageng yeo ba ile ba hlokomologa goba ba se be le taba le modiro wa go bolela ditaba tše dibotse. Eupša ge mmušo wa Nazi kua Jeremane o be o thoma go buša Yuropa, balaodi ba bangwe ba mmušo ba ile ba thoma go ganetša Dihlatse, kudukudu bao e bego e le Makatholika a fišegago. Clem Deschamp o gopola ka gore: “Molaodi yo mongwe wa Mokatholika yo a hlokomelago dithoto tše di tšwago le go tsena ka nageng o ile a re amoga dikgatišo tša rena ka ge a be a re di bolela gampe ka mmušo wa Nazi. Ke ile ka ya Lefapheng la Dithoto go yo ipelaetša, gomme ka hwetša molaodi yoo wa pelo e mpe a ile maikhutšong. Legatong la gagwe go be go šoma monna yo a nago le bogwera yo e sego Mokatholika, yoo a ilego a nnea dipuku tšeo kapejana gomme a re: ‘Di tšee ka moka monna yola a šomago mo a sa ile!’”

Jean Deschamp o itše: “Lebakeng le lengwe, balaodi ba mmušo ba ile ba gapeletša gore re ntšhe diswantšho tše pedi ka pukung ya Enemies. Ba be ba sa rate seswantšho sa noga ya go menagana (Sathane) le mogweba-ka-mmele yo a tagilwego (bodumedi  bja maaka). Bobedi bja tšona di be di rwele kuane ya mopapa (miter). * Re be re ikemišeditše go sepediša dipuku tšeo. Ka gona re le ba bararo re ile ra dula moo dikepe di emago gona lebopong letšatši le fiša tšhiritšhiri, re phetla dipuku tše dikete gore re khupetše diswantšho tša kuane ya mopapa ka mmala o moso!”

Diswantšho tše pedi tša ka pukung ya Enemies tšeo balaodi ba mmušo ba ilego ba re laela gore re di ntšhe

Ge Yuropa e be e le kgauswi le go tsena ntweng, dikgatišo tša rena di ile tša tšwela pele di pepentšha ka sebete boikaketši bja Bojakane le go tsenatsena ga bjona dipolotiking. Ka baka la seo, baruti le bona ba ile ba gatelela mmušo le go feta gore o thibele modiro wa rena, gomme dikgatišo tša rena tše mmalwa tša thibelwa.

Lega go le bjalo, bana babo rena ba be ba ikemišeditše go tšwela pele ka modiro, gomme ba ile ba diriša gabotse motšhene wa go gatiša wo o bego o etšwa Australia. (Dit. 4:20) Ge Jean Deschamp a hlalosa e mengwe ya mekgwa yeo ba bego ba e diriša o itše: “Nako le nako ge re gatišitše pukwana e mpsha goba  makasine, re be re swanetše go iša kopi go balaodi ba mmušo gore ba bolele ge e ba e amogelegile. Re be re gatiša dikgatišo tše itšego le go di iša diphuthegong mathomong a beke. Ke moka, mafelelong a beke, re be re iša kopi e tee ofising ya moahlodi. Ge e ba kgatišo yeo e sa amogelege, re be re šišinya dihlogo re nyamile ke moka ka lebelo re boele morago go yo gatiša kgatišo e latelago.”

Bana babo rena le dikgaetšedi bao ba bego ba sepediša dikgatišo tše di thibetšwego gantši ba be ba bapala papadi ya katse-swara-legotlo le maphodisa. Ka mohlala, ge Charles Harris a be a bolela ditaba tše dibotse kua Kediri, ka Bohlabela bja Java, o ile a boledišana le mohlahlobi wa maphodisa ka Beibele a sa tsebe.

Mohlahlobi yoo o ile a re: “Ke feditše mosegare ka moka ke nyakana le lena. Emanyana mo ke sa yo tšea pampiri yeo e ngwadilwego dipuku tša lena tše di thibetšwego.”

Charles o re: “Eitše ge mohlahlobi yoo a sa ile go tsoma pampiri yeo ka ntlong, ka tsenya dikgatišo tše di thibetšwego ka dipotleng tša ka gare tša jase ya ka. Ge a boa, ke ile ka mo nea dipukwana tše 15 tšeo di bego di se tša thibelwa. O ile a nnea moneelo ka go kgokgona, ke moka ka sepediša dikgatišo tše di thibetšwego kua tlasenyana sona setarateng seo.”

Go Gatiša re le ka Tlase ga Kgateletšego

Ge Ntwa ya Bobedi ya Lefase e be e hlasela Yuropa, go ile gwa se sa romelwa dikgatišo go tšwa Netherlands di tlišwa Indonesia. Lega go le bjalo, bana babo rena ba ile ba bona mathata a sa le kgole gomme ka bohlale ba rulaganya gore dimakasine di gatišwe ke khamphani ya batho ba lefase kua Jakarta. Tokollo ya mathomo ya Consolation (ga bjale ke Phafoga!) ka Seindonesia e tšweletše ka January 1939, gomme Morokami wa Seindonesia wa lokollwa kapejana ka morago ga moo. Ke moka bana babo rena ba ile ba reka motšhene o monyenyane wa go gatiša gomme ba thoma go ikgatišetša dimakasine. Ka 1940, ba ile ba hwetša motšhene o mogolo wa go gatiša go tšwa Australia woo ba ilego ba o diriša go gatiša dipukwana le dimakasine ka Seindonesia le Sedutch, ba lefelela ditshenyagalelo ka moka ka tšhelete ya bona.

Ditlabakelo tša mathomo tša go gatiša di goroga Jakarta

 Mafelelong, ka July 28, 1941, balaodi ba mmušo ba ile ba thibela dikgatišo ka moka tša Mokgatlo wa Watch Tower. Jean Deschamp o gopola ka gore: “Mesong e mengwe ke be ke thaepa ka ofising ge mejako e bulega ka lebelo ke moka go tsena maphodisa a mararo le mohlankedi yo mogolo wa Modutch a feletše ka yunifomo ya gagwe—a rwele dimentlele, a apere di-glove tše ditšhweu, a swere sabola gomme a apere kuane ya yunifomo. Re be re se ra makala ka gobane matšatši a mararo pele ga moo, re be re kwele gore go se go ye kae dikgatišo tša rena di be di tla thibelwa. Mohlankedi yoo wa go ikgantšha o ile a bala lengwalo le letelele ke moka a re laela gore re mo iše moo re gatišetšago gona re yo tswalela motšhene wa rena wa go gatiša. Eupša monna wa ka o ile a mmotša gore o latetšwe. Motšhene wa go gatiša o be o šetše o rekišitšwe letšatši pele a ka tla!”

Lega go le bjalo, Beibele e be e se ya thibelwa. Ka gona bana babo rena ba ile ba tšwela pele ba bolela ditaba tše dibotse ka ntlo le ntlo, ba diriša Beibele feela. Le gona ba ile ba swara dithuto tša Beibele. Eupša ka ge go be go bonagala go tlo ba le ntwa kua Asia, babulamadibogo bao ba bego ba etšwa dinageng dišele ba ile ba laelwa gore ba boele Australia.

^ ser. 1 Ka morago, tatago Felix le bana babo ba bararo le bona e ile ya ba Dihlatse. Kgaetšedi ya gagwe e lego Josephine o ile a nyalana le André Elias gomme ba ya Sekolong sa Beibele sa Watchtower sa Gilead. Phihlelo ya Josephine e hwetšagala ka go Phafoga! ya October 2009.

^ ser. 1 Ka morago ga Ntwa ya Bobedi ya Lefase, Frank o ile a boela Australia gomme a godiša bana. Ngwanabo rena Rice o feditše bophelo bja gagwe bja mo lefaseng ka 1986.

^ ser. 3 Diswantšho tšeo di be di theilwe go Kutollo 12:9 le 17:3-6.