Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

 INDONESIA

Mokgatlo wa Sehlopha sa Barutwana ba Beibele

Mokgatlo wa Sehlopha sa Barutwana ba Beibele

MAFELELONG a bo-1930, mokgatlo o mofsa wa bodumedi wo o bitšwago Bibelkring (e lego leina la Sedutch leo le bolelago gore “sehlopha sa barutwana ba Beibele”) o ile wa tšwelela kgauswi le Letsha la Toba ka Leboa la Sumatra. Mokgatlo wo o ile wa thoma ka morago ga gore barutiši ba mmalwa ba amogele dikgatišo go mmulamadibogo yo a itšego, mohlomongwe Eric Ewins, yo a ilego a etela Letsha le ka 1936 go tlo bolela ditaba tše dibotse. Dilo tšeo barutiši bao ba ilego ba di bala dikgatišong tšeo di ile tša ba tutueletša go tlogela Kereke ya Protestanta ya Batak gomme ba thoma dihlopha tša dithuto tša magae tša Beibele. Dihlopha tšeo di ile tša gola gomme tša phatlalala go fihlela ditho tša tšona e eba tše makgolo. *

Dame Simbolon yo e kilego ya ba setho sa mokgatlo wa sehlopha sa barutwana ba Beibele ga bjale ke Mokriste

Ditho tša pele tša Mokgatlo wo di ile tša hwetša ditherešo tše mmalwa tša Beibele ka go bala dikgatišo tšeo di ilego tša tlogelwa ke mmulamadibogo yoo. Dame Simbolon yo a hweditšego therešo ka 1972, yo e bego e le setho sa Mokgatlo woo o itše: “Sehlopha se se ile sa gana go dumediša folaga le go keteka Keresemose le matšatši a matswalo. Ba bangwe ba be ba bile ba bolela ditaba tše dibotse ka ntlo le ntlo.” Lega go le bjalo, ka ge mokgatlo wo wa bodumedi o be o sa thekgwe ke mokgatlo wa Modimo, gateetee o ile wa wela kotsing ya go ithekga ka dikgopolo tša batho. Kgaetšedi Limeria Nadapdap yoo le yena e kilego ya ba setho sa mokgatlo woo, o re: “Basadi ba be ba sa dumelelwa go diriša ditlolo, go apara mabenyabje, diaparo tša mehleng yeno goba gaešita le dieta. Le gona ditho tša ona di ile tša thibelwa go hwetša karata ya boitsebišo, e lego selo seo se ilego sa galefiša mmušo.”

Mafelelong Mokgatlo woo o ile wa tšwa diripa tše mmalwa gomme wa feleletša o phuhlame. Ge ka morago babulamadibogo ba boetše Letsheng la Toba, batho ba bantši bao e kilego ya ba ditho tša Mokgatlo woo ba ile ba amogela therešo.

^ ser. 1 Methopo e mengwe e akanyetša gore palo ya ditho tša Mokgatlo wo e ile ya fihla go dikete.