Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

Phuthego ya Surabaya, ka 1954

 INDONESIA

Baromiwa Bao ba Tšwago Sekolong sa Gilead ba a Fihla

Baromiwa Bao ba Tšwago Sekolong sa Gilead ba a Fihla

Ka July 1951, phuthego e nyenyane ya kua Jakarta e ile ya bokana gotee go amogela Peter Vanderhaegen, e lego moromiwa wa mathomo yo a tšwago Gilead yo a ilego a romelwa Indonesia. Ge ngwaga woo o fela, baromiwa ba bangwe ba 13 ba be ba šetše ba fihlile moo ba etšwa Australia, Jeremane le Netherlands, gomme seo sa dira gore palo ya bagoeledi nageng yeo e oketšege gabedi.

Fredrika Renskers e lego moromiwa wa Modutch o gopola ka gore: “Ke be ke ipona ke eya ka ntlo le ntlo ke bolela le batho ke diriša matsogo. Eupša ka ge batho ba bantši kudu ba be ba bolela Sedutch, mathomong ke be ke fetša nako e ntši ke bolela ditaba tše dibotse ke diriša sona.” Ronald Jacka, yo a tšwago Australia, o itše: “Ba bangwe ba rena re be re diriša karata ya go nea bohlatse yeo e bego e na le molaetša o mokopana ka Seindonesia. Ke be ke lebelela karata yeo pele ke kokota mojakong o mongwe le o mongwe gomme ke leka go bolela mantšu ao ka hlogo.”

Ka ge baromiwa ba be ba eteletše pele modirong wa go bolela ditaba tše dibotse ka mafolofolo, palo ya bagoeledi e ile ya gola ka lebelo go tloga go ba 34 go ya go ba 91 ka ngwaga o tee feela. Ka September 1, 1951, go ile gwa hlongwa ofisi ya lekala ya Mokgatlo wa Watch Tower ntlong ya André Elias kua Bogareng bja Jakarta. Ronald Jacka o ile a kgethwa go ba mohlanka wa lekala.

Modiro wa go Bolela Ditaba tše Dibotse o Thongwa Ditikologong tše Dingwe

Ka November 1951, Peter Vanderhaegen o ile a abelwa Manado, ka Leboa la Sulawesi, moo Theo Ratu le mosadi wa gagwe ba bego ba šetše ba thomile sehlopha se senyenyane gona. Batho ba bantši ba moo ba be ba ipolela gore ke Bakriste gomme ba hlompha Lentšu la Modimo kudu. Batho ba bantši ba  ile ba amogela Dihlatse magaeng a bona gomme ba di kgopela gore di hlalose dithuto tša Beibele. Gantši di be di thoma poledišano le sehlopha sa batho ba lesome. Eupša ka morago ga metsotso e 15, o be o tla hwetša batho ba e ka bago ba 50 ba theeditše. Pele iri e ka fela, re be re tloga re yo dula ka pele ga ntlo gomme go etla batho ba go fihla go ba 200.

Mathomong a ngwaga wa 1952, Albert le Jean Maltby ba ile ba hloma legae la baromiwa kua Surabaya, ka Bohlabela bja Java, e lego toropo ya bobedi ka bogolo kua Indonesia. Ge ba le moo, dikgaetšedi tše dingwe tše tshelelago tša baromiwa di ile tša tla go tlo dula le bona, e lego Gertrud Ott, Fredrika Renskers, Susie le Marian Stoove, Eveline Platte le Mimi Harp.  Fredrika Renskers o re: “Badudi ba bantši ba moo e be e le Mamoseleme ao a sego a tsema medu ditumelong tša ona gomme a be a na le bogwera. Go be go bonagala eka batho ba bantši ba letetše therešo, ka gona go be go le bonolo go thoma dithuto tša Beibele. Pele mengwaga e meraro e ka fela, Phuthego ya Surabaya e be e na le bagoeledi ba 75.”

Legae la baromiwa kua Jakarta

Mo e ka bago ka yona nako yeo, Azis e lego monna wa Momoseleme yo a tšwago Padang, ka Bodikela bja Sumatra, o ile a ngwalela ofising ya lekala a kgopela gore a thušwe moyeng. Azis o be a kile a ithuta Beibele le babulamadibogo bao ba tšwago Australia ka bo-1930 eupša ba timelelana nakong ya ge naga e be e bušwa ke Majapane. Ke moka o ile a hwetša pukwana yeo e bego e gatišitšwe ke Dihlatse tša Jehofa. O ile a ngwala gore: “Ge ke be ke bona aterese ya Jakarta pukwaneng yeo, ke ile ka thabela gore ke tlo ithuta Beibele gape!” Kapejana ofisi ya lekala e ile ya romela molebeledi wa tikologo e lego Frans van Vliet gore a ye Padang. O ile a hwetša gore Azis o be a boletše le moagišani wa gagwe, e lego Nazar Ris, yo a bego a nyoretšwe go kwa therešo gomme a šoma mmušong. Banna ba ka bobedi le malapa a bona ba ile ba amogela therešo. Ngwanabo rena Azis o ile a ba mogolo yo a botegago. Nazar Ris o ile a ba mmulamadibogo yo a kgethegilego, gomme lehono ba bantši ba bana ba gagwe ke Dihlatse tše mafolofolo.

Frans van Vliet le kgaetšedi ya gagwe Nel

Gateetee ka morago ga moo, Frans van Vliet o ile a etela ngwanabo rena yo a bego a fodile moyeng wa Modutch yo a bego a aga lefsa lefelo la go hlwekiša oli leo le bego le senyegile nakong ya ntwa kua Balikpapan, ka Bohlabela bja Kalimantan. Frans o ile a ya le ngwanabo rena yoo tšhemong gomme a mo kgothaletša gore a ithute le batho ba mmalwa bao ba thabelago. Pele ga ge ngwanabo rena yoo a ka boela Netherlands, o be a šetše a thomile sehlopha se senyenyane kua Balikpapan.

Ka morago, kgaetšedi yo a bego a sa tšwa go kolobetšwa e lego Titi Koetin, o ile a hudugela Banjarmasin, ka Borwa bja Kalimantan. Titi o ile a botša ba leloko la gabo ba morafo wa Madayak ditaba tše dibotse, gomme a thuša ba bantši ba bona go ithuta therešo. Ba bangwe ba batho bao ba bego ba sa tšwa  go thoma go kopanela ba ile ba boela metseng ya gabo bona ka garegare ga Kalimantan gomme ba thoma dihlopha tšeo di ilego tša gola ya ba diphuthego tše di tiilego.

Go Tšweletša Dikgatišo tša Seindonesia

Ge modiro wa go bolela ditaba tše dibotse o dutše o phatlalala ka lebelo, bana babo rena ba be ba hloka dikgatišo tše oketšegilego tša Seindonesia. Ka 1951, puku ya “Let God Be True” e ile ya fetolelwa ka Seindonesia, eupša mmušo o ile wa fetoša mongwalelo wa Seindonesia, gomme gwa nyakega gore ofisi ya lekala e kaonefatše puku yeo. * Ge mafelelong puku yeo e lokolotšwe, e ile ya dira gore batho ba bantši bao ba balago Seindonesia ba thabele go ithuta Beibele.

Ka 1953, ofisi ya lekala e ile ya gatiša dikopi tše 250 tša Morokami ka Seindonesia—e lego kgatišo ya mathomo ya Seindonesia yeo e ilego ya gatišwa ka morago ga mengwaga e 12. Makasine wo wa matlakala a 12 wo o bego o gatišitšwe ka motšhene wa mimeograph, mathomong o be o na le dihlogo tše ithutwago feela. Ka morago ga mengwaga e meraro, o ile wa oketšwa gore o be le matlakala a 16, gomme feme ya batho ba lefase e be e gatiša dikopi tše 10 000 ka kgwedi.

 Tokollo ya kgwedi le kgwedi ya Phafoga! e ile ya thoma go gatišwa ka 1957 ka Seindonesia. Kapejana go ile gwa gatišwa dikopi tše 10 000. Ka ge nageng ka moka go ile gwa ba le bothata bja go hlokega ga pampiri, bana babo rena ba ile ba swanelwa ke go dira kgopelo ya laesense ya pampiri. Mohlankedi wa mmušo yo a ilego a swaragana le kgopelo ya bona o ile a ba botša gore: “Ke bona makasine wa Menara Pengawal (Morokami) e le o mongwe wa dimakasine tša maemo a godimo kudu mo Indonesia gomme ke thabela go le thuša ka laesense ya pampiri bakeng sa makasine wa lena o mofsa.”

^ ser. 1 Mongwalelo wa Seindonesia o ile wa fetošwa gabedi ga e sa le go tloga ka 1945, kudukudu e le go tloša mongwalelo wo o bego o dirišwa kgale wa Sedutch.