Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

Engelane: Bana babo rena le dikgaetšedi ba amogela ka borutho baeng bao ba tlilego kopanong ya ditšhabatšhaba

 MODIRO WA BOBOLEDI LE WA GO RUTA LEFASENG KA BOPHARA

Yuropa

Yuropa
  • DINAGA 47

  • BAAGI 743 421 605

  • BAGOELEDI 1 614 244

  • DITHUTO TŠA BEIBELE 842 091

Go Swantšha Motho go Feleletša ka Thuto ya Beibele

Kopano ya ditšhabatšhaba yeo e bego e swaretšwe kua London, Engelane, e be e le tiragalo e kgahlišago kudu go baeng bao ba tlilego kopanong bao ba tšwago dinageng tše dingwe gotee le go Dihlatse tša moo. Andrew le Elizabeth ba ile ba etela hotele ya London, maikemišetšo a bona e le go yo dumediša ba bangwe ba baeng bao ba tšwago dinageng tše dingwe. Ge Elizabeth a bona mosadi yo a aperego gabotse  lefelong la go amogela baeng o ile a nagana gore le yena o tlile kopanong gomme a mo dumediša a myemyela e bile a mo gokarela ka borutho. Mosadi yoo o ile a makala ke moka Elizabeth a mo kgopela tshwarelo. O itše: “Ntshwarele hle. Ke be ke nagana gore o yo mongwe wa baeng ba rena!”

Mosadi yoo o ile a botšiša gore: “Moeng wa eng?”

Elizabeth o ile a mmontšha leswao la go amogela Dihlatse tša Jehofa leo le lego tesekeng ya lefelong la go amogela baeng gomme a makatšwa ke kamoo mosadi yo a ilego a arabela gabotse ka gona. O ile a re: “Ruri go a kgahliša! Na ke swanelwa ke go ba yo mongwe wa Dihlatse tša Jehofa?”

Ge ba dutše ba boledišana, Elizabeth o ile a hwetša gore leina la mosadi yoo ke Vivien, gore o tšwa Nigeria le gore go tloga mo a dulago gona go ka mo tšea metsotso e sego kae feela go ya moo Elizabeth a dulago gona. Vivien o ile a amogela thuto ya Beibele gomme a nyaka gore bana ba gagwe le bona ba ithute. Andrew le Elizabeth ba ile ba etela Vivien legaeng la gagwe, gomme e be e le nako ya gore e be bona ba dumedišwago ka borutho. Go kopana ga bona ka mahlatse kua bogareng bja London ruri go ile gwa kgoma Vivien ka tsela e botse kudu. Ge Andrew le Elizabeth ba be ba bontšha Vivien puku ya Seo Beibele e se Rutago, o ile a ba makatša ka go bolela gore o na le yona le gore o be a e bala le ba bane ba bana ba gagwe. Ka morago ga gore ba mmotše gore puku ye re swarela batho thuto ya mahala ya Beibele ka yona, Vivien o ile a araba a thabile kudu a re: “A re thomeng gona bjale!”

Lengwalo Leo le Tšwago go Ngwanabo Rena wa Moromani

Ka November 2014, go ile gwa thewa phuthego ya mathomo ya Seromani kua Slovakia. Kopanong yeo e sa tšwago go feta ya tikologo, go kolobeditšwe bagoeledi ba 21 bao ba bolelago Seromani. Ka moka ga bona ba be ba etšwa motseng o  tee. Phuthegong ya Seromani, go bile le batho ba 495 Segopotšong. Ngwanabo rena yo mongwe yo a sa tšwago go kolobetšwa o ngwadile gore:

Slovakia: Bagoeledi ba babedi ba botša mosadi wa Moromani ditaba tše dibotse ba thabile

“Ke tšwa setšhabeng sa Maromani kua Žehra, Slovakia. Moo ke dulago gona, makgowa a mantši a re tšea re le batho ba go ralala le naga gomme a bona re na le ditšhila, re bolela maaka le go utswa. Ge ke be ke nyaka go ya kerekeng, mohlokomedi wa moo o ile a mpotša gore ga ke swanelege go ba moo gomme ke sepele. Ka morago ga go diragalelwa ke dilo tšeo, o ka nagana kamoo ke bego ke ikwa ka gona ka makgowa. Ke moka Dihlatse tša Jehofa di ile tša ntaletša Holong ya Mmušo. Ke ile ka no ya ke belaela, ke letetše go nyamišwa gape. Ke ile ka makatšwa ke gore le pele nka tsena ka Holong ya Mmušo, monna yo a itšego wa lekgowa o ile a ntumediša ka letsogo gomme a nkamogela ka borutho. Ke be ke sa kgone le go theetša nakong ya polelo ya phatlalatša. Ke be ke no ipotšiša gore: ‘Go tla bjang gore batho ba ka moka ba nthabele ka tsela ye?’

“Bošegong bjoo, ke ile ka se kgone go robala ka gobane ke be ke duletše go nagana ka seo se ntiragaletšego Holong ya Mmušo. Ka gona ke ile ka phetha ka go boela gape gore ke yo bona ge e ba botho bjo ke bego ke bo bontšhitšwe e be e se bja letšatši leo feela. Ge ke boelela, batho ba moo ba ile ba ntshwara gabotse kudu go swana le mogwera wa bona wa kgale. Ga sa nka ka tlogela go ya dibokeng, gomme mafelelong ke ile ka kolobetšwa. Ka morago ga gore ke kolobetšwe, bana babo rena ga se ba ka ba fetoga e bile ba tšwela pele ba mpontšha gore ba a nthata. Ka dinako tše dingwe, ba nnea dijo tše kaone go feta tšeo bona ba di jago! Ka mehla ke nyaka go ba karolo ya mokgatlo wo, le gona Jehofa ke Modimo yo ke nyakago go mo hlankela ka mo go sa felego.”

Thapelo ya go Botša ba Bangwe Ditaba tše Dibotse e a Arabja

Kgaetšedi yo a bitšwago Aysel o be a sepela ka pese go tloga toropong ya Ganja go ya Baku kua Azerbaijan. O ile a  rapela Jehofa, a mmotša gore o nyaka go boledišana le motho yo a itšego ka Beibele ge a le tseleng. Gaešita le ge Aysel a be a šetše a na le mo a dulago gona ka peseng, mosadi yo a itšego o ile a gapeletša gore Aysel a dule kgauswi le yena. Aysel o ile a thoma go bolela le mosadi yoo gomme mafelelong a kgona go dira gore ba boledišane ka Beibele. Mosadi yoo o ile a hlalosa gore o rata Jesu le gore o nyaka go tseba mo go oketšegilego ka yena. Aysel le mosadi yoo ba ile ba fana dinomoro tša founo gomme ba dumelelana gore ba kopane gape. Mosadi yoo o ile a kgopela Aysel gore a mo tlišetše Beibele ge e ba go kgonega.

Ka morago ga gore Aysel a boele Ganja, o ile a etela mosadi yoo a thabelago mošomong wa gagwe. Mosadi yoo o ile a mmotša gore o na le puku yeo a e bitšago puku ya dithapelo yeo a e balago letšatši le lengwe le le lengwe. Kgaetšedi yo o ile a makala ge a hwetša gore puku ye a bego a e bitša ya dithapelo ge e le gabotse e be e le pukwana ya Go Hlahloba Mangwalo ka Mehla ya 2013! Aysel o ile a thoma thuto ya Beibele le mosadi yoo. O ile a thaba kudu gore Jehofa o mo neile sebete sa go nea bohlatse bjo bo sa rulaganyetšwago.

Lengwalo la Ditebogo Leo le Tšwago go Mogolegwa

Lengwalo le le latelago le tšwa Sepania:

“Sa pele, ke rata go le leboga ka maiteko ao le a dirago a go fihlelela batho ba mehuta ka moka ka molaetša wa Beibele.

“Lekga la mathomo ge ke be ke kopana le Dihlatse tša Jehofa e be e le mengwaga e 15 e fetilego kua Tiranë, Albania. Ke be ke makaditšwe ke gore Hlatse e itšego e bile le sebete sa go tla go rena, ka gobane re be re le sehlopha sa bafsa ba lesome ba dikebekwa. Go be go se na motho yo a re boledišago, eupša ngwanabo rena yoo o ile a re bolediša le ge re be re swere dibetša. O ile a bolela le rena ka Beibele a sa boife selo. Go ba le sebete ga gagwe go ile gwa nkgahla kudu.

“Mengwaga e mene e fetilego gona mo Sepania, Hlatse e nngwe e ile ya nketela mo kgolegong gomme ya ithaopela go ntshwarela thuto ya Beibele. Ke ile ka dumela gomme ga  e sa le go tloga ka nako yeo ke fetogile motho yo mokaone kudu. Ga ke sa le monna yo šoro le yo bogale. Ke na le mengwaga ke sa tsene mathateng. Ke tseba Jehofa gomme seo se dirile gore bophelo bja ka bo be le morero. Ke leka go phela ka khutšo le batho, le gona ke na le lebaka la ka godimo ga ngwaga ke le mogoeledi yo a sa kolobetšwago.

“Gaešita le ge gona bjale ke na le mengwaga e 12 ke le kgolegong, mengwageng e 4 e fetilego ke ile ka ikwa ke thabile e bile ke na le khutšo ya monagano yeo ke sa kago ka ba le yona. Ke leboga Jehofa bakeng sa se letšatši le letšatši.

“Dibekeng tše mmalwa tše di fetilego ke ile ka bogela dibidio tše itšego wepesaeteng ya jw.org. Bidio yeo e bolelago ka ngwanabo rena yo a bego a le kgolegong kua United States ile ya nkgoma kudu. Ga ke motho wa go fo lla, eupša ge ke bona diphetogo tšeo a di dirilego bophelong bja gagwe, ke ile ka se kgone go itshwara.

“Eka Jehofa a ka tšwela pele a šegofatša maiteko ao le a dirago a go fihlelela batho ba mehuta ka moka ka go fetolela ditaba tše dibotse ka maleme a mantši kudu le ka go etela rena bao re lego dikgolegong.

“Ke leboga go menagane.”

 “Mafelelong ke Hweditše Khutšo ya Monagano”

Felicity wa mengwaga e 68 yo a dulago kua Sweden o re: “Ka mehla ke be ke ikwa ke se na morero bophelong gomme ke no ikgoga, ke dula ke nyaka khutšo ya monagano yeo go bego go bonagala ke sa e hwetše. Ka ge a be a sa kgotsofatšwe ke ditumelo tša gagwe tša Katholika, o ile a thoma go nyakišiša madumedi a fapafapanego gomme a feleletša a tseneletše boloing le go dirišaneng le meoya e mebe.

Ka ge a be a sa hwetše morero wa bophelo, o ile a nolega moko kudu moo a ilego a nagana ka go ipolaya. O re: “Ke elela megokgo sefahlegong, ke ile ka goeletša Modimo ke mo kgopela gore a mpotše seo a nyakago ke se dira. Ka morago ga dibeke tše pedi, motho yo a itšego o ile a kokota mojako. Lesogana leo le myemyelago le ile la mpotšiša ge e ba ke nyaka go kwa Lentšu la Modimo. Ke ile ka bolela ka pelong ka re, ‘Aowa Modimo, ke be ke sa re gore go tle batho ba—ga ke nyake Dihlatse tša Jehofa!’”

Gaešita le ge mathomong a be a nyaka go tswalela mojako, o ile a phetha ka go theetša ke moka a amogela thuto ya Beibele go dirišwa puku ya Seo Beibele e se Rutago. O re: “Dihlatse di ile tša mpontšha seo ke bego ke sa se tsebe ka Beibele.” Felicity o kolobeditšwe kopanong ya selete kua Sweden ka 2014. Gona bjale o re: “Se ke seo ke bego ke se nyaka bophelong bja ka ka moka. Mafelelong ke hweditše khutšo ya monagano.”