Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

Isiraele: Dihlatse di diriša thabolete go bolela ka Mmušo wa Modimo

 MODIRO WA BOBOLEDI LE WA GO RUTA LEFASENG KA BOPHARA

Asia le Middle East

Asia le Middle East
  • DINAGA 49

  • BAAGI 4 409 131 383

  • BAGOELEDI 718 716

  • DITHUTO TŠA BEIBELE 766 364

Diiri tše Lekgolo Bakeng sa Mengwaga e Lekgolo

Nageng e nngwe ya Asia, mosadi yo mongwe yo a tumilego yo a bapalago difilimi e bile e le motlelara o ile a amogela thuto ya Beibele. Gateetee o ile a thoma go diriša seo a bego a ithuta sona gomme a lahla dipuku tša gagwe tšeo di bego di na le botemona le medingwana ya Bobuddha.

Yo mongwe wa bagwera ba mosadi yoo o ile a mo kgopela gore: “Go  re’ng o sa emiše go ithuta Beibele mengwaga e meraro feela gomme o šetše mošomo wa gago? Ka morago ga moo, o ka thoma go ithuta gape.”

Mosadi yoo o ile a araba ka gore: “Ke letile mengwaga e 24 gore ke hwetše Jehofa. Ke ka baka la’ng nka emiša go ithuta ka yena mengwaga e mengwe e meraro?”

Bekeng yeo a bego a tlo ingwadiša Sekolong sa Bodiredi sa Pušo ya Modimo, khamphani ya go tšweletša difilimi e ile ya ikgokaganya le yena. E ile ya mo holofetša mošomo wa maemo a godimo wa mengwaga e mene ge feela a be a ka dumela go bapala karolo le ge e le efe difiliming. O ile a gana go amogela mošomo woo. Ka May 2014, o ile a swanelega go ba mogoeledi yo a sa kolobetšwago, gomme ge kgwedi ya August e batamela, a ipeela pakane ya go bolela ditaba tše dibotse diiri tše 100 kgweding yeo. Ge a be a botšišwa lebaka la phetho yeo ya gagwe o itše: “Ke nyaka go keteka mengwaga e 100 ya ge Jesu a buša ka go bolela ditaba tše dibotse iri e tee bakeng sa ngwaga o mongwe le o mongwe wa pušo ya gagwe!” O ile a fihlelela pakane yeo ya gagwe. Ka January 2015, o ile a kolobetšwa gomme gona bjale ke mmulamadibogo wa go thuša.

Dikgaetšedi di Diriša Gabotse Bošego bjo di bo Feditšego di le Kgolegong

Kua Sri Lanka, dikgaetšedi tše nne di ile tša ya go bolela ditaba tše dibotse tšhemong e sa abjago tikologong yeo e bego e tletše ka Mabuddha. Letšatšing la bobedi la ge dikgaetšedi tšeo di be di bolela ditaba tše dibotse moo, moitlami wa monna le mootledi wa thekisi ba ile ba ya go tšona gomme ba di tšhošetša. Go se go ye kae lešaba leo le galefilego la batho ba e ka bago ba 30 le be le ba dikologile. Maphodisa a ile a fihla, a iša dikgaetšedi tšeo maphodiseng gomme a di tswalela bošego ka moka ka diseleng tša kgolego le ge go be go se na molato woo di latofatšwago ka wona. Di be di beilwe ka seleng le  disenyi tše šoro gomme di rogwa le go kwa polelo e sa hlwekago, eupša go ba ga tšona moo go ile gwa di nea sebaka sa go nea bohlatse. Yo mongwe wa dikgaetšedi tšeo o itše: “Ke be ke tswaleletšwe le babolai, eupša ke ile ka kgona go bolela le bona ka Beibele. Ba be ba makaditšwe ke gore ke be ke le moo gomme ba be ba na le dipotšišo tše dintši ka ditumelo tša ka. Motho yo mongwe o ile a ba a mpotšiša gore: ‘Ke ka baka la’ng o thabile gakaakaa?’”

Sri Lanka: Dikgaetšedi tše nne di ile tša sepela ka pese go yo bolela ditaba tše dibotse tšhemong e sa abjago

Kgorokgolo ya Tsheko ya Sri Lanka e amogetše molato wa go gatakelwa ga ditshwanelo tša batho wa gore maphodisa a golega batho go se na seo ba latofatšwago ka sona. Molato woo o sa fegilwe.

Mosadi yo a sa Kgonego go Tloga Malaong o Hwetša Thušo

Michiko, e lego kgaetšedi wa mmulamadibogo kua Japane, o be a swara thuto ya Beibele a diriša polelo ya diatla le mokgekolo yo a itšego sepetlele. Kgaetšedi yoo o ile a botšiša batho bao ba šomago moo ge e ba go be go na le balwetši ba bangwe bao a ka boledišanago le bona. Ke moka Michiko o ile a kopana le Kazumi, yoo a bego a kgona go kwa eupša a sa kgone go bolela. Kazumi e sa le a eba malaong ka morago ga gore a hwetše kotsi ya koloi ge a be a na le mengwaga e 23 e bile o be a sa kgone go metša dijo le go nwa meetse. O be a na le dipotšišo tše dintši, ka gona o ile a amogela thuto ya Beibele ntle le go senya nako.

Japane: Kazumi o thabela go ngwala mangwalo a borutho le ao a agago

Michiko o be a botšiša dipotšišo, gomme Kazumi a diriša matsogo go šupa dikarabo dirapeng goba a di ngwala fase. Ka morago ga gore Kazumi a be le founo, Michiko o ile a kgona go ahlaahla temana ya letšatši le yena mesong e mengwe le e mengwe. Gaešita le ge Kazumi a ile a thoma go fokola mmeleng go ya pele, o ile a tšwela pele a gola moyeng go fihlela a bolela gore o kganyoga go ba yo mongwe wa Dihlatse tša  Jehofa. Ka morago ga go ithuta mengwaga e 13, mafelelong Kazumi o ile a ba mogoeledi yo a sa kolobetšwago ge a be a na le mengwaga e 61.

Ka ge Kazumi a sa kgone go tloga malaong, phuthego e ile ya rulaganya gore a kgone go theetša diboka ka moka le mananeo a dikopano. Dikgaetšedi tše di fapafapanego ka phuthegong di bala dikarabo tšeo Kazumi a di lokišeleditšego dibokeng.

Kazumi o ngwalela morutwana yo mongwe le yo mongwe wa Beibele yo a tlago dibokeng lengwalo le borutho le leo le agago. O botša batho bao ba šomago sepetlele le bao ba mo etelago ditaba tše dibotse. Kazumi o ba botša gore: “Ge le ka ithuta Beibele, le tla thaba.”

Moitlami wa Monna o Ithuta Therešo

Nageng e nngwe ya ka Borwabohlabela bja Asia, kgaetšedi yo mongwe o ile a ya ngakeng ya mahlo sepetlele, moo a  ilego a kopana le moitlami wa monna. Kgaetšedi yoo o ile a mmotšiša gore: “Na o ka thabela go phela gabotse mmeleng le go phela ka mo go sa felego lefelong le lebotse?” Ba ile ba swara poledišano e botse gomme a mo nea poroutšha ya Listen to God. Moitlami yoo o ile a mo nea dinomoro tša gagwe tša founo tšeo a ilego a di nea ngwanabo rena yo mongwe ka phuthegong. Gateetee ka morago ga moo, ngwanabo rena yoo o ile a ikgokaganya le moitlami yoo gomme a mo laletša gore a be gona polelong e kgethegilego. Moitlami yoo o ile a thabela diboka kudu, kudukudu go opelwa ga dikopelo tša Mmušo, gomme a kgahlwa kudu le ke gore yo mongwe le yo mongwe o mo amogetše ka borutho.

Ge moitlami yoo a be a botšiša ge e ba Dihlatse di na le diyunibesithi goba diseminari, ngwanabo rena yoo o ile a mo hlalosetša gore re swarela batho dithuto tša Beibele gomme a ithaopela go ithuta le yena. Bekeng e latelago, moitlami yoo o be a feditše go bala kgaolo ya pele ya puku ya Ke Eng Seo ge e le Gabotse Beibele e se Rutago? O ile a tšwela pele a ithuta, a thoma go ba gona dibokeng le go araba Thutong ya Morokami.

Ge moitlami yoo a be a le kopanong ya tikologo, moemedi wa lekala o ile a mo laletša gore a tlo etela Bethele. Bekeng e latelago moitlami yoo o ile a sepela diiri tše e ka bago tše lesome go ya Bethele, moo a ilego a amogelwa ka borutho. Mafelelong a February 2015, o ile a tlogela go ba moitlami gomme o tšwela pele go thabela go ithuta Beibele le go tšea karolo dibokeng tša Bokriste.

O be a Lahlegile, Eupša o Hweditšwe

Morago bjale, babulamadibogo ba ile ba romelwa ka leboabohlabela bja India, moo ditaba tše dibotse di bego di sa ka tša bolelwa ka mengwaga e mentši. Babulamadibogo bao ba ile ba hwetša batho ba bantši bao ba thabelago gomme ba be ba nyaka lefelo la maleba la go swara diboka. Ge ba be ba eya go swara thuto ya Beibele, ba ile ba bona moago wo o bego o agiwa gomme ba nagana ka go yo botšiša ka wona. Ge ba  dutše ba theoga le tsela, ba ile ba phetha ka gore ba boele morago ba yo botšiša. Ka morago ga moago woo, ba ile ba kopana le mokgekolo yo a itšego gomme ba mmotša gore ke bona Dihlatse tša Jehofa. Sefahlego sa gagwe se be se edile. O ile a re: “Le nna ke yo mongwe wa Dihlatse tša Jehofa,” ke moka a ba amogela ka borutho ka ntlong ya gagwe. O ile a ba bontšha dikgatišo tšeo a di hweditšego ka bo-1970 le bo-1980. O be a kile a ithuta le babulamadibogo mengwaga e 30 pele ga moo gomme a fela a eya dibokeng gaešita le ge monna wa gagwe a be a mo ganetša. O be a kgodišegile gore o hweditše therešo eupša ka morago a se sa kgona go ikgokaganya le mokgatlo ge babulamadibogo ba be ba tloga tikologong yeo. Bana ba gagwe ka moka e ile ya ba ditho tša dikereke tše di  fapafapanego, eupša yena o ile a gana go ya kerekeng le ge e le efe.

India: Mosadi yo a thabelago o bontšha Dihlatse dikgatišo tšeo a di hweditšego ka bo-1970 le bo-1980

Morago bjale, bana ba mosadi yo ba be ba thomile go mo gapeletša gore a ingwadiše go ba setho sa Kereke ya Katholika e le gore a tle a bolokwe ke Makatholika mohlang a hwago. Ngwanabo o ile a ba a gapeletša go mo iša kerekeng ya Katholika gore a yo ingwadiša, eupša ge ba le tseleng ya go ya moo, ba ile ba thibelwa ke go pitlagana ga dikoloi gomme ba swanelwa ke go boela gae. Ngwanabo o be a boletše gore ba tla ya gape letšatšing le le latelago eupša a babja. Yona thapameng yeo babulamadibogo bao ba ile ba etela mosadi yo a thabelago! Gona bjale o ithuta Beibele gape, o ba gona dibokeng e bile o kgothaletša bana ba gagwe le ditlogolo go ithuta Beibele.