Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

Burundi: Nolla o bontšha banna bao ba ilego ba mo kgopela magala dikopi tša Morokami

 MODIRO WA BOBOLEDI LE WA GO RUTA LEFASENG KA BOPHARA

Afrika

Afrika
  • DINAGA 58

  • BAAGI 1 082 464 150

  • BAGOELEDI 1 453 694

  • DITHUTO TŠA BEIBELE 3 688 959

Go Nea Bohlatse go Dirišwa Dithuthuthu

Benin: Désiré o diriša sedirišwa sa go bapala mmino thekising ya gagwe gore banamedi ba kwe ditaba tše dibotse

Dithuthuthu tša dithekisi tšeo di bitšwago di-zem, ke dinamelwa tše di ratwago ditoropong tša kua borwa bja Benin. Désiré, e lego mmulamadibogo wa go thuša, o ile a tsenya sedirišwa sa go bapala mmino thekising ya gagwe gomme a tsenya dipikara tše pedi tšeo a ilego a di lebanya le setulo sa monamedi. O dula a bapala dikgatišo tšeo di rekhotilwego le diterama tša Beibele. Ge monamedi a namela thekising ya gagwe, gantši ga a tšee nako gore  a feleletše a theetša ka kelohloko. Batho ba bantši ba be ba theetša ka kelohloko kudu moo ba bego ba re ge ba fihlile mo ba yago gona, ba dikadika go fologa e bile ba ganela thekising yeo go fihlela ge selo seo se bapalwago se fedile. Désiré o re: “Ke therešo gore ke nyaka gore ba lefe gomme ba sepele gore ke hwetše monamedi yo mongwe, eupša ke a tseba gore go kwa ga bona ditaba tše dibotse go bohlokwa kudu go feta tšhelete. Go feta moo, ye ke tsela yeo ke sepedišago dikgatišo tše dintši ka yona.”

Ngwana yo a Ilego a Phegelela

Nolla ke ngwanenyana yo a nago le mengwaga e tshela yo a dulago le lapa la gabo dithabeng tša kua Burundi. Ka letšatši le lengwe ge lapa la gabo le dutše le apea le diriša setofo se senyenyane sa malahla, banna ba babedi bao ba bego ba šoma kgauswi le ga gabo ba ile ba kgopela magala gore ba yo gotša mollo wa bona. Nolla, yo a sa tšwago a tsena sekolo, e be e le yena a bešetšago mollo ge banna bao ba tsena. O ile a ba dumelela gore ba tšee magala ao. Nakwana ka morago, ge Nolla a sepelela thokong tša banna bao o ile a hwetša ba dirišitše magala ao go tšhuma disekerete. Seo se ile sa mo tshwenya kudu, gomme a re go bona: “Mola ke tsebe gore le be le tlo diriša magala a go tšhuma disekerete, ke be nka se le fe ona.” Ke moka o ile a gopola gore o bone makasine o mongwe Holong ya Mmušo woo o bego o na le seswantšho sa sekerete ka mo ntle. O ile a kitimela Holong ya Mmušo gomme a tšea dikopi tše pedi tša Morokami wa June 1, 2014, wo o bego o bolela ka go kgoga. Nolla o ile a boela go banna bao, a ba nea dimakasine tšeo gomme a ba phegelela gore ba di bale ka yona nako yeo. Ka morago, o ile a ba bona gape gomme a ba fa ditaletšo gore ba tle kopanong ya selete. Ba makaditšwe ke tsela yeo ngwanenyana yo a phegelelago ka yona, banna ba  ba ile ba tutueletšega go ba gona kopanong ka matšatši a mabedi. Nakong ya dijo tša matena, Nolla o ile a ba bona gomme a ba bitša gore ba tle ba je le lapa la gabo dijonyana tšeo ba bego ba di swere. Ba kgahlilwe ke seo ba se bonego le go se kwa kopanong, banna ba ba babedi ba ile ba thoma go ithuta Beibele.

Go Nea Bohlatse Dikgolegong

Bagolo ba kua Liberia ba bolela molaetša wa Mmušo dikgolegong tše di fapafapanego tša mmušo. Yves, e lego mmulamadibogo yo a kgethegilego motsengmošate wa moo e lego Monrovia, o hlalosa ka gore: “Ka March, bagolegwa ba bararo ba ile ba swanelega go ba bagoeledi ba sa kolobetšwago. Se se dira gore go be le bagoeledi ba tshela Kgolegong ya Bogareng bja Monrovia.” Ba dira bjang boboledi? Yves o hlalosa ka gore: “Ba kopana gore ba ye tirelong ya tšhemo ka Laboraro le lengwe le le lengwe le Mokibelo o mongwe le o mongwe. Ke moka ba dumelelwa go ya ka seleng e nngwe le e nngwe go yo boledišana le bagolegwagotee le bona ka molaetša wa Beibele woo o nago le kholofelo.” Bagolegwa ba bantši ga bjale ba thabela go ithuta Beibele le go ba gona dibokeng tšeo di swarwago kgolegong. Moemedi wa ofisi ya lekala o ile a tlišetša bagolegwa ba 79 polelo ya phatlalatša kgolegong yeo. Dikgolegong tše dingwe tše tshela go swarwa diklase tša thuto ya Beibele ka mehla gomme go na le diphetogo go bagolegwa.

“Re Tloga re Hloka Thušo”

Go ile gwa dirwa maiteko a magolo gore go thušwe batho bao ba thabelago mafelong ao a lego kgole le metse gore ba tle ba be gona Segopotšong. Ka mohlala, Masan, bao gape ba bitšwago Barwana, ke badudi ba mathomo ba ka borwa bja Afrika. Ba thomile ba phela bophelo bjo bonolo, bja go huduga, e le  batsomi e bile ba kgoboketša dilo. Ka segopotšo sa 2015, Glenn, e lego mmulamadibogo yo a kgethegilego yo a hlankelago ka leboa la Namibia, o ile a rulaganya gore go swarwe Segopotšo motsaneng wa Masan wo o lego kgole le metse e mengwe woo o lego dikhilomithara tše 270 ka bohlabela bja Rundu. E be e le ka lekga la bobedi Segopotšo se swarelwa moo. Makgeng a ka bobedi, balaodi ba motseng woo ba ile ba nea Dihlatse tša Jehofa tumelelo ya gore di diriše kgoro ya tsheko ya maseterata mahala. Batho ba 232 ba ile ba ba gona Segopotšong go sa šetšwe dipula tša matlorotloro tšeo di ilego tša na pele Segopotšo se thoma le ge se šetše se thomile. Barwana ba tikologong yeo ba bolela leleme la Sekhwe, leo le tsebjago ka go ba le medumo e mentši. Polelo e be e newa ka Seisemane gomme e fetolelwa ka Sekhwe. Ka ge go se na Beibele ka leleme la Sekhwe, go ile gwa bontšhwa diselaete tša mebalabala lebotong go hlalosa ditemana tše bjalo ka Jesaya 35:5, 6. Glenn, yo a swarago dithuto tše mmalwa tšeo di tšwelago pele tikologong yeo, o bega gore: “Ke be ke dutše ke etela mo gatee ka kgwedi mengwageng e mebedi e fetilego. Ke dula moo ka matšatši a sego kae. Tšwelopele ga e direge ka lebelo ka baka la leleme leo le bolelwago le gore ke kgole. Re tloga re hloka thušo. Ge ke be ke eya go balaodi ba mmušo go dira ditokišetšo tša Segopotšo ngwageng wo, setho sa komiti yeo e laolago motse se ile sa mpotšiša ge e ba re tla aga lefelo la borapedi tikologong yeo. Se itše komiti e tla re fa lefelo la go aga gomme ya lefelela go agwa ga lefelo leo! Selo seo re bego re swanetše go se dira e be e le gore re tliše moruti goba bonyenyane re tlwaetše yo mongwe wa bona gore e be moruti!”

Namibia: Bagoeledi ba babedi ba thabela go botša mosadi wa Mohimba ditaba tše dibotse