Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

Russia: Dihlatse di bolela ditaba tše dibotse kua Moscow

 DINTLHAKGOLO TŠA NGWAGOLA

Pego ya Dikgorong tša Tsheko

Pego ya Dikgorong tša Tsheko

Go Ngwadišwa Semmušo

Ga go hlokagale gore Dihlatse tša Jehofa di ngwadišwe semmušo gore di dire mediro ya tšona ya bodumedi. Lega go le bjalo, go ngwadišwa semmušo go re dumelela go ba le mafelo a rena a go swarela diboka goba go a hiriša le go hwetša dikgatišo tša rena tša bodumedi go tšwa dinageng tše dingwe.

  • Ka 2004, dikgoro tša tsheko tša Russia di ile tša fediša lekgotla la semolao leo le dirišwago ke Dihlatse tša Jehofa kua Moscow. Ka baka leo, bana babo rena kua Moscow ba ile ba lebeletšana le tlaišo e šoro. Maphodisa a ile a ba tlaiša, batho ba hlasela ba bangwe ba bona ge ba le bodireding gomme beng ba mafelo ao ba bego ba a hirišitše go swarela diboka ba se sa dumela go ba hirišetša ona, ba tlogela bana babo rena ba se na mafelo ao ba ka kopanago go ona bakeng sa borapedi. Kahlolo yeo e dirilwego ke Kgoro ya Yuropa ya Ditshwanelo tša Batho ka 2010 e ile ya kgonthišetša  gore Russia e gataketše ditshwanelo tša Dihlatse tša Jehofa kua Moscow gomme ya laela gore mokgatlo wa tšona wa semmušo o tsošološwe. Re thabela go le tsebiša gore ka May 27, 2015, Lefapha la Moscow la Russian Federation Ministry of Justice (Mokgatlo wa go ikarabela ka go thea le go kgonthišetša melao ya mmušo le ditekanyetšo tša molao) le ile la ngwadiša Mokgatlo o mofsa wa Bodumedi wa Dihlatse tša Jehofa kua Moscow.

Go Lefa Motšhelo

Gantši mekgatlo ya semmušo yeo e dirišwago ke Dihlatse tša Jehofa lefaseng ka moka ga e lefe motšhelo, go etša ge go le bjalo ka mekgatlo e mentši ya bodumedi le ya go thuša bahloki. Lega go le bjalo, ka dinako tše dingwe mebušo ga e nyake go amogela gore mekgatlo ya rena ga se ya swanela go lefišwa motšhelo.

  • Kua Sweden, balaodi ba mmušo ba ile ba bolela gore Bethele ke kgwebo yeo e hirilego batho bao ba hlankelago moo, le gore ga se lefelo la bodumedi leo go dulago badiredi bao ba lego tirelong e kgethegilego ya nako e tletšego. Mmušo o lekanyeditše tšhelete ya di-euro tše diketekete tša motšhelo wa mothwadi/mothwalwa tšeo di swanetšego go lefelelwa ke Bethele le batho bao ba hlankelago Bethele. E le gore di rarolle bothata bjo, Dihlatse tša kua Sweden di butše melato dikgorong tša nageng yeo le go romela dikgopelo tše tshela Kgorong ya Yuropa ya Ditshwanelo tša Batho.

Go se Tšee Karolo Dipolotiking le go se Tsenele Tirelo ya Bošole

Batho ba Jehofa ba hlompha kudu taelo yeo e lego ka Beibeleng ya gore ba ‘rule ditšhoša tša bona ba di dire megoma’ le gore ‘ba se sa hlwa ba ithuta ntwa.’ (Jes. 2:4) Ga ba tšee karolo dipolotiking le ge mebušo e mengwe e sa ba dumelele go dira mediro e mengwe yeo e sego ya bošole.

  • Molao wa gona bjale wa kua Korea Borwa ga o dumelele motho go gana go tsenela tirelo ya bošole ka baka la letswalo. Mengwageng e 60 e fetilego, banna bao e lego Dihlatse ba ka godimo ga ba 18 000 ba ile ba golegwa ka baka la go gana go tsenela tirelo ya bošole. Mo e ka bago Hlatse e nngwe le e nngwe nageng ye e bile le mogwera goba setho sa lapa seo se golegilwego. Ka 2004 le 2011, Kgoro ya Tsheko ya Molaotheo ya Korea Borwa e ile ya bolela  gore batho bao ba golegilwe ka go dumelelana le molaotheo. Lega go le bjalo, ka July 2015, Kgoro ya Tsheko e ile ya theetša molato woo gape. Dihlatse tša Jehofa lefaseng ka moka di rapelela gore molato wo e lego kgale o fegilwe o rarollwe e le gore bana babo rena bao e sa lego bafsa kua Korea Borwa ba se sa golegwa ka baka la tumelo ya bona.

  • Dihlatse tša Jehofa tše tharo kua Eritrea di thomile ngwaga wa tšona wa bo-22 di le kgolegong ka ge di ganne go tsenela tirelo ya bošole ka baka la letswalo. Paulos Eyassu, Negede Teklemariam le Isaac Mogos ga se ba ka ba bonwa molato semmušo goba ba hwetša sebaka sa go itwela kgorong ya tsheko. Bona gotee le bana babo rena le dikgaetšedi ba ka godimo ga ba 50, ba tšwela pele ba kgomaretše potego ya bona le ge ba swarwa ka sehlogo le go phela maemong a sa kgahlišego a kgolegong. Re kgodišegile gore Jehofa ‘o kwa go fegelwa’ ga bao ba golegilwego ka baka la tumelo ya bona gomme o tla ba lwela.—Ps. 79:11.

  • Kua Ukraine, Vitaliy Shalaiko o ile a bitšwa ka August 2014 gore a tlo tsenela tirelo ya bošole nakong ya ge mašole a be a itokišeletša ntwa. O ile a gana go tsenela bošole ka baka la letswalo eupša a hlalosa gore ga a na bothata bja go dira mediro e mengwe yeo e sego ya bošole. Moahlodi o ile a bea Ngwanabo rena Shalaiko molato wa go gana go ya bošoleng nakong ya ntwa, eupša kgoro ya go theetša melato le ya go ipiletša di ile tša hwetša a se na  molato. Kgoro ya go ipiletša e ile ya bolela gore tšhireletšego ya Naga ga se ya swanela go ba lebaka le legolo la go lekanyetša gore motho a newe ditshwanelo tša gagwe, le gore “tshwanelo ya go gana ka baka la letswalo e ka se thibelwe ka baka la tšhireletšego ya setšhaba.” Moahlodi yoo o ile a ipiletša gape. Ka June 23, 2015, Kgorokgolo ya Tsheko ya Melato e Kgethegilego ya Setšhaba le ya Bosenyi ya Ukraine e ile ya thekga diphetho tša dikgoro tše dinyenyane. Seo sa kgonthišetša gore tshwanelo ya go gana ka baka la letswalo le go dira mešomo yeo e sego ya bošole e a šoma le dinakong tša ge setšhaba se na le mathata.

Ukraine: Vitaliy Shalaiko o thabela go tšea karolo bodireding

Ngwanabo rena Shalaiko o boletše mabapi le mafelelo a mabotse a molato woo gore: “Ke ile ka matlafatšwa ke mantšu a Jeremia 1:19. Ke be ke itokišeleditše phetho le ge e le efe—selo sa bohlokwa kudu e be e le go botegela Jehofa. Ke kgodišegile gore a ka se tsoge a ntahlile eupša o tla nnea matla a go dula ke botega. Lega go le bjalo, seo se diragetšego ke be ke sa se nagane le gatee. Ke ile ka hwetšwa ke se na molato dikgorong ka moka tše tharo. Le gona nakong ka moka ya go theetšwa ga molato woo, ke ile ka bona gore bana babo rena ba be ba nthekga. Ga se ka ka ka ikwa ke lahlilwe.”

Go se Tšee Karolo Dipolotiking le Meletlong ya Boratanaga

Meletlo ya boratanaga e tliša teko e nngwe go Bakriste tabeng ya go se tšee karolo dipolotiking. Bana ka mo go kgethegilego ba ka gatelelwa gore ba se sa botegela Jehofa, ka ge barutiši sekolong ba ka leka go gapeletša barutwana go opela koša ya setšhaba goba go dumediša folaga.

  • Tikologong ya Karongi kua Rwanda, balaodi ba sekolo ba ile ba bea barutwana ba mmalwa ba Dihlatse molato wa gore ga ba hlomphe koša ya setšhaba ka gobane ba gana go e opela. Barutwana bao ba ile ba rakwa sekolong le go golegwa. Ka November 28, 2014, Kgoro ya Tsheko ya Boipiletšo ya Karongi e ile ya se bone barutwana bao molato gomme ya dira phetho ya gore go gana ga barutwana bao go opela koša ya setšhaba ga go re gore ga ba na tlhompho. Dinageng tše dingwe tša Afrika, tše bjalo ka Cameroon, Democratic Republic of Congo, Equatorial Guinea le Malawi, bana ba Dihlatse ba ile ba lebeletšana le bothata bjo bo swanago gomme ka dinako tše dingwe ba ba ba rakwa sekolong. Bana babo  rena ba dinageng tše ba dira boiteko bja go botša balaodi ba mmušo le ba sekolo taba ya gore Dihlatse tša Jehofa ga di tšee karolo dipolotiking.

  • Honduras: Mirna Paz le Bessy Serrano mafelelong ba ile ba newa di-diploma tša bona

    Ka December 2013, sekolo sa mmušo kua Lepaera, Honduras, se ile sa gana go nea barutwana ba babedi ba Dihlatse di-diploma tša bona ka gobane ba ile ba gana go opela koša ya setšhaba le go hlompha folaga. E le gore ba rarolle bothata bjo, boramolao ba babedi bao e lego Dihlatse tša Jehofa ba ile ba kopana le moemedi wa Lefapha la Thuto gomme ba mmotša tše dingwe tša diphetho tša dinageng tše dingwe tšeo di thekgago seo se dirilwego ke barutwana ba Dihlatse. Moemedi yoo o be a le botho gomme o ile a dumela gore barutwana bao le batswadi ba bona ba ngwalele moemedi wa molao wa Lefapha la Thuto kua Honduras ba mmotše ditaba ka botlalo tša molato woo. Ka morago ga go hlahloba sello sa bona, o ile a ntšha kahlolo ka July 29, 2014, a bolela gore thuto “e swanetše go hwetšagala go [bohle] setšhabeng go se na kgethollo ya mohuta le ge e le ofe” gomme a laela gore barutwana bao ba Dihlatse ba newe di-diploma tša bona.

Kgethollo ya Mmušo

Re le Dihlatse tša Jehofa, setšhabeng se sengwe le se sengwe re kwa taelo ya Jesu ya gore re botše baagišani ba rena ditaba tše dibotse tša Mmušo, re bokane le badumedigotee le rena bakeng sa  borapedi le go ithuta Lentšu la Modimo ka mehla. Le gona re tšeela godimo taelo ya Beibele ya gore re nweletše melao ya Jehofa ka dipelong tša bana ba rena le ya gore re ‘ile madi.’ (Dit. 15:20; Doit. 6:5-7) Ka dinako tše dingwe, go kwa ditaelo tše go dira gore re thulane le balaodi ba mmušo bao ba sa kwešišego boemo bja rena.

  • Kua Florida, U.S.A., moahlodi o ile a nea mma yo e sego Hlatse tshwanelo ya gore e be yena feela a rutago bana ba gagwe ba bararo ditaba tša bodumedi. Tatago bana bao yo e lego Hlatse o ile a laelwa gore a se ke a ba ruta selo le ge e le sefe sa bodumedi seo se thulanago le tumelo ya Katholika. Tate yoo o ile a kgopela gore phetho yeo e lebelelwe gape, gomme ka August 18, 2014, kgoro ya go ipiletša e ile ya tloša dithibelo tšeo di bego di beilwe ke kgoro ya tsheko. E theile phetho ya yona go molato wo o ahlotšwego gabotse, kgoro ya tsheko e ile ya ngwala gore: “Dithibelo tša gore motswadi a se hwetše tshwanelo ya go ruta ngwana wa gagwe ditumelo tša bodumedi ka mehla ga di dumelelwe ge e ba go se na bohlatse bjo bo kwagalago bja gore mediro ya bodumedi yeo ngwana yoo a e rutwago e tla mo gobatša.”

    Phetho yeo e nea bana ba tshwanelo ya gore ba holwe ke thuto le tlhahlo ya Jehofa Modimo go se na dithibelo. Ka moka ga bona ba dira tšwelopele e botse moyeng ge ba dutše ba kopanela le phuthego ya moo. Tatago bona o itše: “Go kgotlelela boemo bjo ruri go a nkhola. Moragobjale ke ile ka lebana le diteko tše itšego tša tumelo, eupša Jehofa o nthušitše gore ke eme ke tiile! Ke a tseba gore go tlaišwa ke karolo ya seo re se kgethago ge re dira phetho ya go hlankela Jehofa.”

  • Namibia: Efigenia Semente a na le bana ba gagwe ba bararo

    Potego ya Kgaetšedi Efigenia Semente e ile ya lekwa ka tsela e kgolo kudu. Kgaetšedi yo ke mmago bana ba bararo yo a dulago kua Namibia. Ge a be a le sepetlele go yo belega ngwana wa gagwe wa boraro, o ile a ba le mathata gomme dingaka le baoki gotee le ba lapa la gagwe bao e sego Dihlatse ba ile ba hwetša tumelelo ya kgorong ya tsheko ya gore a gapeletšwe go tšhelwa madi. Kgaetšedi Semente o ile a gana a tiišitše gore a ka se tšhelwe madi gomme a gata megato ya semolao go lwela tshwanelo ya gagwe ya go ikgethela kalafo. Ka June 24, 2015, Kgorokgolo ya Tsheko ya Namibia e ile ya dumelelana le Kgaetšedi Semente, ya bolela gore “tshwanelo ya go kgetha seo se ka dirwago ka mmele wa motho  goba se sa swanelago go dirwa, ke tshwanelo ya motho yo mongwe le yo mongwe, go sa šetšwe gore motho ke motswadi goba go se bjalo.” Kgaetšedi Semente o itše: “Re bone kamoo Jehofa a ilego a re thuša ka gona go feta le ge e le neng pele. Ke mo go kgahlišago kudu go ba karolo ya mokgatlo wo. Ruri Jehofa o na le taba le rena.”

  • Dihlatse tša kua Switzerland di be di dutše di thabela go nea bohlatse mafelong a batho bohle diterateng tša ditoropong tše dikgolo. Lega go le bjalo, toropo ya Geneva e ile ya ntšha taelo ya go thibela go dirišwa ga “diteroli tšeo ka go lebanya goba ka go se lebanye di phatlalatšago molaetša wa bodumedi mafelong a batho bohle.” Dihlatse di ile tša yo bula molato kgorong ya tsheko, di gatelela gore go thibela modiro ka moka wa go phatlalatša ditaba tša bodumedi go dirišwa diteroli “go thibela kudu tokologo ya bodumedi le ya go tšweletša pono ya motho.” Kgoro ya tsheko e ile ya dumelelana le seo, gomme Dihlatse tša atlega go šomeng le balaodi ba lefelong leo go kwana ka lefelo la maleba le dinako tša go nea bohlatse mafelong a batho bohle go dirišwa diteroli.

  • Bahlankedi ba mmušo kua Azerbaijan ba okeditše maiteko a bona a go gatelela modiro wa bodumedi wa Dihlatse tša Jehofa.  Lefapha la Tšhireletšo ya Setšhaba le fela le bitša Dihlatse tše itšego go tlo di botšološiša. Le gona lefapha le le phuruphutša magae a Dihlatse le nyakana le dikgatišo tša bodumedi tšeo Mmušo o sa dumelego di romelwa nageng ye. Dinaga tše dingwe di ile tša makala kudu ge ka February 2015, bahlankedi ba Lefapha la Tšhireletšo ya Setšhaba ba be ba golega Dihlatse tše pedi e lego Irina Zakharchenko le Valida Jabrayilova, ka gobane ba be ba boledišana le baagišani ba bona ka Beibele. Gaešita le ge re nyamišwa ke tsela e šoro yeo Dihlatse di swarwago ka yona, re thabela gore bagoeledi ba Azerbaijan ba tšwela pele ba le mafolofolo e bile ba na le sebete ge ba boledišana le baagišani ba bona ka ‘ditaba tše dibotse tša Mmušo.’—Mat. 24:14.

  • Mmušo o tshwenya Dihlatse tša Jehofa kudu kua Russia ka go dula o šitiša mediro ya tšona ya bodumedi. Go fihla ga bjale, Mmušo wa Russia o boletše gore dikgatišo tše 80 tša Dihlatse tša Jehofa di kotsi kudu. Se se ra gore go di nea batho goba go ba le ge e le efe ya dikgatišo tšeo go thwego di kotsi, tše bjalo ka Puku ya ka ya Ditaba tša Beibele, ga go molaong. Go oketša moo, ka December 2014, Kgorokgolo ya Tsheko ya Russian Federation e ile ya bolela gore wepesaete ya rena ya jw.org, e kotsi kudu. Dikhamphani tšeo di abago Inthanete nageng ka moka ya Russia di tswaletše wepesaete ye ya jw.org, gomme go botša ba bangwe ka yona ga go molaong. Ga e sa le go tloga ka March 2015, bahlankedi bao ba hlokomelago dithoto ga se ba dumelela gore go romelwe dikgatišo tša Dihlatse nageng ye, gaešita le Dibeibele le dikgatišo tšeo dikgoro tša tsheko tša Russia nakong e fetilego di ilego tša di hlahloba gomme tša bona di se na maswao a gore di kotsi kudu.

Megato ya semolao e tšwela pele toropong ya Taganrog, moo balaodi ba mmušo ba latofaditšego bagoeledi ba 16 ka gore ba rulaganya diboka tša bodumedi le go ba go tšona. Toropong ya Samara, balaodi ba mmušo ba ile ba hwetša taelo ya kgorong ya tsheko ya gore ba fediše mokgatlo wa rena wa semolao ba nea mabaka a gore o kotsi kudu. Go sa šetšwe mathata a a mantši, bana babo rena le dikgaetšedi kua Russia ba ikemišeditše go nea ‘Modimo tša Modimo,’ ba sa dumelele selo se ba šitiša.—Mat. 22:21.