Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

 DINTLHAKGOLO TŠA NGWAGOLA

Go Neelwa ga Makala

Go Neelwa ga Makala

LENANEONG la go neelwa ga lekala la Madagascar, leo le bilego ka Mokibelo, January 24, 2015, kgaetšedi yo mongwe o itše: “Pelo ya ka e falala ka lethabo.” Yena le baeng ba bangwe ba 583 ba be ba thabile kudu go bona diphapoši tše difsa tša bodulo tše 19 gotee le phapoši yeo e okeditšwego ya go jela le khitšhi yeo e mpshafaditšwego. Go ile gwa dirwa sekgoba se segolwanyana bakeng sa diofisi tša Lefapha la Tirelo, la Diakhaonto le Lefapha la Bohlami le la go Aga la Tikologo. Go oketša moo, Lefapha la go Rekhota le ile la hwetša setudio sa lona se sefsa gomme le la Polelo ya Diatla le lona la hwetša setudio sa lona se sefsa. Le gona go ile gwa hlongwa Lefapha la go Tšweletša Dikgatišo tša Mongwalo wa Difofu. Ka morago ga gore ba kwe histori ya modiro wa boboledi ya Madagascar, baeng ba ile ba ipshina ka polelo ya go neelwa ga lekala yeo e filwego ke Mark Sanderson wa Sehlopha se Bušago.

Lefelo le lefsa la bodulo la diphapoši tše 19 lekaleng la Madagascar

 Batho ba Jehofa kua Jakarta Indonesia, ba ile ba imologa ge ba bona meetse a mafula a nwelela ka nako ya maleba pele lekala le lefsa le ka neelwa ka February 14, 2015. Ga bjale lekala le lebatong letee la moago o motelele wa diofisi wa mabato a 42 le mabatong a 12 a moagong wo o lego kgauswi le diofisi tšeo. Mafapha a mangwe a Bethele a mmalwa a hwetšagala meagong e menyenyane ya kgauswi le diofisi. Anthony Morris wa Sehlopha se Bušago o ile a nea polelo ya go neela meago yeo, gomme letšatšing le le latelago batho ba 15 257 ba kopana lepatlelong la kgwele ya maoto go tla go kwa ge a nea polelo ya sehlogo se se rego: “Tšwelang Pele le Swareletše Modirong o Mobotse.” Batho ba 11 189 ba ile ba lebelela lenaneo leo ba le mafelong a sa swanego a 41 ba diriša Inthanete. Seboka seo e bile se segolo kudu go feta diboka ka moka tšeo di kilego tša swarwa ke batho ba Jehofa kua Indonesia. Yo mongwe wa baromiwa ba mathomo ba go fihla Indonesia e lego Ronald Jacka o itše: “Ge ke be ke fihla ka 1951, go be go na le bagoeledi ba 26 feela nageng ka moka. Eupša lehono, batho ba fetago ba 26 000 ba bile gona lenaneong le la moswananoši. Ruri Jehofa o šegofaditše batho ba gagwe Indonesia!”