Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

Canada: Motse wa Inuit kua Kangirsuk ka leboa la Quebec

 DINTLHAKGOLO TŠA NGWAGOLA

Dipego—Ditaba tše di Tšwago Lefaseng ka Bophara

Dipego—Ditaba tše di Tšwago Lefaseng ka Bophara

Go Fihlelela Batho ka Moka ba Canada

E le gore go fihlelelwe dinyakwa tša tšhemo yeo e okametšwego ke lekala la Canada, ga bjale bidio ya Ke ka Baka la Eng o Swanetše go Ithuta Beibele? e fetoletšwe ka maleme a seswai ao batho ba gotšego ba a bolela moo. Ka October 2014, nakong ya lesolo la matšatši a lesome tikologong ya Nunavik Arctic, bidio yeo e ile ya bontšhwa batho bao ba bolelago Seinuktitut mo e ka bago ka lapeng le lengwe le le lengwe metseng e 14, e lego batho bao ba emelago badudi ba ka godimo ga ba 12 000.

Molaodi o be a Kgahlegile

Ka September 2014, kopano ya ditšhabatšhaba ya Seoul e ile  ya swarelwa Lepatlelong la Sangam World Cup kua Korea Borwa. Batho ba fetago ba 56 000 ba ile ba thabela lenaneo la kopano. Molaodi wa lepatlelo leo o ile a leboga Dihlatse ka mekgwa ya tšona e mebotse le go ba le tirišano nakong ya kopano. O itše: “Yo mongwe le yo mongwe o be a itshwere gabotse. Ke ile ka šala ke maketše ge ke bona ka tsela yeo di hlwekišitšego lepatlelo gabotse, go feta kamoo batho bao ba šomago mo ba le hlwekišago ka gona. Ke duma nkabe batho bao ba hlwekišago mo ba be ba na le moya o bjalo ge ba dira mošomo wa bona. Ge e ba re nyaka go phela ka tsela ya bodumedi bja therešo, re swanetše go swana le Dihlatse tša Jehofa.”

Korea Borwa: Kopano ya ditšhabatšhaba ya 2014 kua Seoul

Jehofa o Ile a Nea Bana Babo Rena Tlwaetšo e Hlokagalago

Ka May 2012, mmušo wa kua Sweden o ile wa gana kgopelo ya Dihlatse tša Jehofa ya go hwetša thušo ya ditšhelete yeo e bego e newa mekgatlo e mengwe ya bodumedi. Sehlopha se  Bušago se ile sa thekga phetho ya gore bana babo rena ba ipiletše Kgorongkgolo ya Tsheko ya tša Bolaodi.

Kgoro ya Tsheko e ile ya phetha ka gore e theetše molato wa bana babo rena pele e dira phetho. Ka gona, bana babo rena ba sego kae bao ba tšwago dinageng tše di sa swanego ba ile ba kopana gore ba tle ba boledišane ka dipotšišo tšeo di ka botšišwago ge ba le kgorong ya tsheko. Ba ile ba itokišeletša tsheko yeo Holong ya Mmušo kua Stockholm.

Ge ba dutše ba itokišeletša tsheko yeo, ba ile ba kwa motho a kokota mojakong wa holo. Ngwanabo rena yo mongwe o ile a bula mojako, gomme banenyana ba babedi bao yo mongwe a nago le mengwaga e 13 mola yo mongwe a na le e 14 ba itsebiša go yena. Ba ile ba bolela gore ba nyaka go botšiša dipotšišo tše itšego ka Dihlatse tša Jehofa. Ngwanabo rena yoo o gopola ka gore: “Ke be ke nyaka go ba botša gore ba boe letšatšing le lengwe ka gobane re be re swaregile e bile re se na nako ya go swaragana le ditšhitišo tše bjalo.”

Lega go le bjalo, ngwanabo rena yoo o ile a phetha ka gore a boledišane le bona. Banenyana bao ba be ba na le dipotšišo tše dintši, e bile tše dingwe tša tšona di be di bolela ka go lebanya ka ditaba tša go dirišana le setšhaba le tša go bouta. Ka morago ga moo, ngwanabo rena o ile a boela ka holong gomme a botša bana babo rena ba bangwe seo banenyana bao ba bego ba mmotšiša sona le kamoo a ba arabilego ka gona.

Letšatšing le le latelago, bana babo rena ba ile ba makala kudu ge Kgoro ya Tsheko e ba botšiša tše dintši tša dipotšišo tša go swana le tšeo banenyana bao ba ba botšišitšego tšona. Ngwanabo rena yo a emelago mokgatlo o re: “Ka ge ke be ke eme gare ga boramolao bao ba tumilego ba nageng yeo, ke be ke swanetše go tšhoga kudu eupša ke ile ka kwa ke se ka tšhoga. Ruri ke bone gore Jehofa o be a šetše a bontšhitše gore o ema le rena ka go re nea tlwaetšo yeo re bego re e hloka letšatši pele re ka ya tshekong.”

Kgoro e ile ya ema le rena, gomme molato woo wa romelwa go baemedi ba mmušo gore ba dire phetho e nngwe.

 Mokotla wa Ken wa Reise

Ken yo a nago le mengwaga e tshela o dula kua Haiti. O be a thabile kudu ge a ekwa gore kgauswinyane ba tlo agela phuthego ya gabo Holo e mpsha ya Mmušo. O ile a phetha ka gore a itirele lepokisi la moneelo gomme a le fihle ka phaphošing ya gagwe ya go robala. Go e na le gore a diriše tšhelete yeo batswadi ba gagwe ba bego ba mo nea yona ge a eya sekolong, o be a e lahlela ka lepokising la gagwe la moneelo. O dirile se a sa kgaotše go fihlela ge sehlopha sa go aga Holo ya Mmušo se fihla. Ke moka o ile a se nea lepokisi la gagwe la moneelo, leo le bego le swere tšhelete yeo e ka kgonago go reka mokotla o mogolo wa reise. Batho bao ba bego ba šoma moo ba ile ba fetša matšatši a mantši ba eja reise ya Ken dijong tša mosegare.

Ditaelo Tšeo di Tšwago go Molaodi wa Mašole

Dikgweding tše dintši ngwagola, motho o be a swanetše go hwetša tumelelo e kgethegilego ya gore a tsene ditikologong tše dingwe tša Sierra Leone tšeo di bego di šireleditšwe ka baka la bolwetši bja Ebola. Ka mohlala, balebeledi ba tikologo ba be ba swanetše go hwetša dipetšhe le mangwalo a dikoloi gore ba kgone go tsena mafelong a itšego nageng yeo, e bile seo se be se dirwa le ke batho bao ba išago dikgatišo le mangwalo nageng yeo. Ditho tša Komiti ya Tlhakodišo di be di swanetše go sepela le didirišwa tša go lekola phišo, bleach le dijo. Sa go makatša ke gore ka mehla ba be ba hwetša mangwalo ao a nyakegago.

Phihlelo e latelago e tloga e tiiša tumelo. Bana babo rena ba ile ba ngwala lengwalo ba kgopela dipetšhe tše 34 le mangwalo a dikoloi a 11, eupša ba be ba swanetše go kopana le molaodi wa mašole gore ba hwetše dilo tšeo ba di kgopelago. Bana babo rena ba babedi bao ba tšwago ofising ya lekala ba ile ba kopana le molaodi wa mašole letšatšing leo ba bego ba ipoditše gore ba tla hwetša dipetšhe le mangwalo ao. Lega go le bjalo, lengwalo la kgopelo le be le sa hwetšagale. Bana babo rena ba ile ba botšwa gore ba inyakele lengwalo leo ka gare ga mokgobo wa mangwalo ao a bego a le moo, eupša ba se hwetše selo. Ka nako yeo, molaodi wa mašole o be a boditše mongwaledi  wa gagwe gore o tswalela ofisi ya gagwe le gore ga go na motho yo a tlago go newa lengwalo go fihlela dibeke tše pedi di fela. Bana babo rena ba ile ba rapela Jehofa ka pelong gore a ba thuše tabeng ye. Molaodi wa mašole o ile a lebelela bana babo rena ke moka a ba botšiša gore: “Le nyaka dipetšhe le mangwalo a makae?” Ge bana babo rena ba mmotša palo ya dilo tšeo, o ile a emelela setulong sa gagwe gomme a goeletša ka gore: “Dilo tšeo ke tše dintši kudu!”

Bana babo rena ba ile ba hlalosa ka tsela yeo re dirago modiro wa rena le kamoo dithoto tša rena tša tlhakodišo di thušago ka gona bothateng bjo ba lebeletšanego le bjona bja bolwetši bja Ebola. Molaodi wa mašole o ile a ema go se nene, a lebelela mongwaledi wa gagwe ke moka a re: “Ba nee se sengwe le se sengwe seo ba se nyakago.”

Guinea le Sierra Leone: Mokgwa wo wa go hlapa matsogo o be o dirišwa Diholong ka moka tša Mmušo