Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2016

Basepedi ba bodumedi bao ba šomago ka thata ba be ba le gare ga badirišani ba Ngwanabo rena Russell

Mengwaga e Lekgolo e Fetilego—1916

Mengwaga e Lekgolo e Fetilego—1916

GE NGWAGA wa 1916 o thoma, Ntwa e Kgolo, yeo ka morago e ilego ya tsebja e le Ntwa ya Pele ya Lefase e be e na le lebaka la ka godimo ga ngwaga e kgatlampana. Go ile gwa hwa batho ba bantši kudu ka mahlakoreng ka bobedi a ntwa.

Sehlogo se sengwe ka go Morokami wa Seisemane wa January 1, 1916, se itše: “Ntwa ya Pele ya Lefase e dirile gore batho ba bantši e be badumedi gomme ba tshwenyege ka bokamoso bja bona.” Sehlogo seo se tšwetše pele ka gore: “Anke re thabele ditokelo tše re nago le tšona le go diriša dibaka tšeo di re bulegetšego e le gore re se ke ra nolega moko eupša re fišegele Modimo le Molaetša wa Gagwe.”

Temana ya ngwaga ya 1916 yeo e bego e theilwe go Baroma 4:20 go ya ka phetolelo ya King James Version, e ile ya kgothaletša bana babo rena go “tia tumelong.” Ba bantši ba Barutwana ba Beibele ba ile ba dira bjalo gomme Jehofa a ba šegofatša kudu.

Basepedi ba Bodumedi ba Ile ba Kgothatša Barutwana ba Beibele

Baemedi ba basepedi ba Watch Tower Society, bao ba tsebjago e le basepedi ba bodumedi, ba ile ba sepela go tloga toropong e nngwe go ya go e nngwe, ba tšama ba kgothatša Barutwana ba Beibele  le go ba nea tlhahlo. Ka 1916, bonyenyane basepedi ba bodumedi ba 69 ba ile ba sepela dikhilomithara tše e ka bago tše milione ba dira modiro wo.

Ge mosepedi yo mongwe wa bodumedi e lego Walter Thorn, a be a nea polelo kopanong kua Norfolk, Virginia, o ile a swantšha ntwa ya Bakriste le Ntwa ya Pele ya Lefase gomme a re: “Go akanyetšwa gore go na le banna ba dimilione tša go tloga go tše masomepedi go ya go tše masometharo bao gona bjale ba lego ntweng. . . . Lefase ga le tsebe gore go na le sehlopha se sengwe [sa mašole]. Ke mašole a Morena, gomme ka go swana le madira a Gideone le ona a a lwa, eupša ga a lwe ka dibetša tša kgonthe. A lwela therešo le toka e bile a lwa ntwa e botse ya tumelo.”

Go Hlankela Modimo go sa Šetšwe Dinako tše Thata tša Ntwa

Kua Fora, banna ba ka godimo ga milione ba ile ba gobala goba ba bolawa Ntweng ya Mathomo ya Somme, yeo e lwelwego mafelelong a 1916. Mafelong a mangwe kua Fora, bana babo rena bao ba šomago ka thata ba ile ba thekga diklase goba diphuthego, gaešita le ge maemo a nakong ya ntwa a be a dira gore go dira seo go be thata. Morokami wa Seisemane wa January 15, 1916, o ile  wa gatiša lengwalo leo le tšwago go Joseph Lefèvre, e lego Morutwana wa Beibele yo a ilego a gapeletšega go tšhaba toropong ya gabo ya Denain, Fora, ge e be e šwahlelwa ke madira a Jeremane ka 1914. O ile a leba ka borwa a ya Paris gomme a thoma go kopanela le sehlopha se nnoši seo se bego se le motseng woo sa Barutwana ba Beibele. Gaešita le ge a be a babja, go se go ye kae o be a swara diboka ka moka.

Ka morago, Joseph o ile a tlatšwa ke Théophile Lequime, yoo le yena a bego a tšhabile Denain. Mathomong, Ngwanabo rena Lequime o ile a ya Auchel, Fora, moo a ilego a thoma go fetolela dihlogo tša Morokami gomme a di romela bana babo rena dikarolong tše dingwe tša Fora tšeo di sego tša hlaselwa ke ntwa. Balaodi ba madira ba ile ba mo gapeletša go tloga Auchel ka ge ba be ba belaela mediro ya gagwe. Ngwanabo rena Lefèvre o ile a bona go tla ga Ngwanabo rena Lequime kua Paris e be e le karabo ya dithapelo tša gagwe.

Modiro wa bona Paris o ile wa putswa. Ngwanabo rena Lefèvre o begile gore: “Gona bjale re na le klase ya batho ba e ka bago ba masomenne-hlano . . . Ba bantši ba be ba tseba gore ke mo gobotse e bile ke tokelo go šegofatšwa ke Modimo, ka gona ba dira sohle seo ba ka se kgonago go tšwela pele moyeng. Mo e ka bago ditho ka moka tša sehlopha seo di ba gona sebokeng sa beke le beke seo go bolelwago diphihlelo.”

Ba Ile ba Dula ba sa Tšee Karolo Dintweng

Ge ntwa e dutše e tšwela pele, bana babo rena ba bantši le dikgaetšedi ba ile ba lebeletšana le taba ya go se tšee karolo ntweng. Kua Great Britain, go ile gwa hlangwa Molao wa Tirelo ya Bohlabani, woo mafelelong o ilego wa gapeletša gore banna ka moka ba mengwaga ya go tloga ka e 18 go fihla ka e 40 ba tsenele ntwa. Lega go le bjalo, Barutwana ba Beibele ba bantši ba ile ba ema ba tiile gore ba ka se tsenele ntwa.

Ka mohlala, Morokami wa Seisemane wa April 15, 1916, o ile wa gatiša lengwalo leo le tšwago go W. O. Warden wa Scotland. O itše: “Ga bjale yo mongwe wa barwa ba ka o na le mengwaga e 19. Go fihla ga bjale o neile bohlatse bjo bobotse go Morena ka go gana go tsenela ntwa, le gona ge go ka direga gore a thuntšhwe ka ge a gana go tsenela ntwa, ke holofela gore Jehofa o tla mo thuša gore a dule a kgomaretše melao ya motheo ya therešo le toka.”

 James Frederick Scott, e lego mmapatši wa dipuku tša bodumedi wa mofsa yo a tšwago Edinburgh, Scotland, o ile a sekišwa ka ge a ile a se tšwelele go tlo tsenela ntwa. Lega go le bjalo, ka morago ga go kwa bohlatse ka moka, kgoro e ile ya phetha ka gore Ngwanabo rena Scott “o be a šireletšwa ke Molao” gomme go hweditšwe a se na molato.

Lega go le bjalo, ba bangwe ba bantši ga se ba ka ba šireletšwa ke molao woo. Ka September, go bana babo rena ba 264 bao ba ilego ba kgopela go se tsenele ntwa, ba 23 ba ile ba newa mediro yeo e sa akaretšego ntwa. Pego yeo e ilego ya tšwelela ka go Morokami wa Seisemane wa October 15, 1916 e hlalositše gore ba ba šetšego, bao ba bangwe ba bona “ba ilego ba tlaišwa ka ditsela tše di fapafapanego,” ba ile ba swanelwa ke go šoma “mešomo e Bohlokwa ya Setšhaba, e bjalo ka go dira ditsela, go epa maswika le mešomo e mengwe.” Ke bana babo rena ba bahlano feela bao ba ilego ba dumelelwa go se tsenele tirelo ya bošole.

Lehu la Charles Taze Russell

Ka October 16, 1916, Charles Taze Russell, yoo a bego a eteletše pele Barutwana ba Beibele ka nako yeo, o ile a tšea leeto la go yo nea dipolelo tša Beibele ka bodikela bja United States. Ga se a ka a boa gae. Mantšiboeng a Labobedi, October 31, Ngwanabo rena Russell o ile a hwa a na le mengwaga e 64 ge a be a le ka tereneng kua Pampa, Texas.

Ba bantši ba bana babo rena ba be ba sa nagane gore go ka ba le yo a ka tšeago legato la Ngwanabo rena Russell. Lengwalo la gagwe la go aba bohwa, leo le gatišitšwego ka go Morokami wa Seisemane wa December 1, 1916, le ile la bolela seo a bego a kganyoga gore se dirwe ka modiro woo a bego a o eteletše pele ka nako e telele kudu. Lega go le bjalo, go ile gwa šala potšišo e rego: Ke mang yo a tlago go mo hlatlama modirong wo?

Potšišo yeo e be e tla arabja sebokeng sa ngwaga le ngwaga sa Watch Tower Bible and Tract Society of Pennsylvania, seo se bego se tlo swarwa mathomong a 1917. Bao ba bego ba le gona ba ile ba bouta, gomme gwa hwetšagala gore go boutetšwe motho o tee. Eupša dikgwedi tše di latetšego di ile tša bontšha gore go kwana moo e be e le ga nakwana, bana babo rena ba be ba letetšwe ke diteko tše šoro kudu.