Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 14

Jesu o Thoma go Dira Barutiwa

Jesu o Thoma go Dira Barutiwa

JOHANE 1:29-51

  • BARUTIWA BA JESU BA PELE BA SEPELA LE YENA

Ka morago ga matšatši a 40 a le lešokeng le pele ga ge a ka boela Galilea, Jesu o boela go Johane yo a mo kolobeditšego. Ge Jesu a batamela, Johane o a mo šupa gomme a goeletša go bao ba lego moo a re: “Bonang Kwana ya Modimo yeo e tlošago sebe sa lefase! Yo ke yena ke boletšego ka yena ka re: Ka morago ga ka go tla monna yo a nketilego pele, gobane o bile gona pele ga ka.” (Johane 1:29, 30) Gaešita le ge Johane a feta Jesu ganyenyane, o lemoga gore Jesu o bile gona pele ga gagwe e le motho wa moya legodimong.

Dibeke tše sego kae pejana, ge Jesu a be a etla go tlo kolobetšwa, go bonala Johane a be a sa tsebe ge e ba Jesu e be e tla ba Mesia. Johane o dumela ka gore: “Gaešita le nna ke be ke sa mo tsebe, eupša lebaka leo ka lona ke tlilego ka kolobetša ka meetse e be e le gore a bonagatšwe go Isiraele.”—Johane 1:31.

Johane o tšwela pele a anegela batheetši ba gagwe seo se diragetšego ge a be a kolobetša Jesu gomme o re: “Ke bone moya o mokgethwa o theoga legodimong go etša leeba, wa dula godimo ga gagwe. Gaešita le nna ke be ke sa mo tsebe, eupša yena Yo a nthomilego gore ke kolobetše ka meetse o itše go nna: ‘Motho yo o bonago moya o theogela godimo ga gagwe wa dula go yena, ke yena yo a kolobetšago ka moya o mokgethwa.’ Ke bone seo, ka hlatsela gore yo ke yena Morwa wa Modimo.”—Johane 1:32-34.

Letšatšing le le latelago Johane o na le barutiwa ba gagwe ba babedi ge Jesu a etla go yena gape. Johane o re: “Bonang, Kwana ya Modimo!” (Johane 1:36) Ge a re’alo, barutiwa ba ba babedi ba Johane Mokolobetši ba latela Jesu. Yo mongwe go bona o bitšwa Andrea. Go ka direga gore yo mongwe ke yena motho yo a begilego tiragalo ye, yo le yena a bitšwago Johane. Go bonagala Johane yo e le motswala wa Jesu, e lego morwa wa Salome. E ka ba e le ngwanabo Maria gomme monna wa gagwe ke Tsebedeo.

Jesu ge a retologa ke moka a bona Andrea le Johane ba mo latela, o a ba botšiša o re: “Le nyaka’ng?”

Bona ba mmotšiša gore: “Rabi, o dula kae?”

Jesu o araba ka gore: “Tlang gomme le tla bona.”—Johane 1:37-39.

Ke mo e ka bago ka iri ya bone thapama gomme Andrea le Johane ba hlwa le Jesu letšatši ka moka. Andrea o thabile kudu moo lebakeng le lengwe a hwetšago ngwanabo e lego Simone, yo gape a bitšwago Petro, gomme o re go yena: “Re hweditše Mesia.” (Johane 1:41) Andrea o iša Petro go Jesu. Ka morago ditiragalo di bontšha gore Johane le yena o hwetša ngwanabo e lego Jakobo gomme a mo tliša go Jesu; lega go le bjalo, Johane ga a ngwale tsebišo ye ya mabapi le yena ka pegong ya gagwe ya ditiragalo.

Letšatšing le le latelago, Jesu o hwetša Filipi yo a tšwago Betsaida. Motse wo o kgauswi le lebopo la ka leboa la Lewatle la Galilea, le gona ke motse woo Andrea le Petro ba tšwago go wona. Jesu o laletša Filipi o re: “Eba molatedi wa ka.”—Johane 1:43.

Ke moka Filipi o hwetša Nathaniele, yoo gape a bitšwago Baratholomeo, gomme o re: “Re hweditše yo Moshe a ngwadilego ka yena Molaong le yoo Baporofeta ba ngwadilego ka yena, e lego Jesu morwa wa Josefa yo a tšwago Natsaretha.” Nathaniele o a belaela gomme o re go Filipi: “Na go na le selo se sebotse se se ka tšwago Natsaretha?”

Filipi o a mo phegelela o re: “Tlaa o bone.” Jesu o lemoga Nathaniele a sa tla gomme o re: “Bonang Moisiraele yoo ge e le gabotse go se nago bofora go yena.”

Nathaniele o a botšiša o re: “Go tla bjang gore o ntsebe?”

Jesu o a araba o re: “Ke go bone pele Filipi a go bitša ge o be o le ka tlase ga mogo.”

Nathaniele o araba a maketše o re: “Rabi, o Morwa wa Modimo, o Kgoši ya Isiraele.”

Jesu o a botšiša o re: “Na o dumela gobane ke go boditše gore ke go bone ka tlase ga mogo? O tla bona tše dikgolo go feta tše.” Ke moka Jesu o a mo holofetša o re: “Ruriruri ke re go lena, le tla bona legodimo le bulega gomme barongwa ba Modimo ba hlatloga e bile ba theogela go Morwa wa motho.”—Johane 1:45-51.

Kapejana ka morago ga se, Jesu o tloga Moeding wa Jorodane gomme a ya Galilea a na le barutiwa ba gagwe bao a sa tšwago go ba hwetša.