Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 17

O Ruta Nikodemo Bošego

O Ruta Nikodemo Bošego

JOHANE 2:23–3:21

  • JESU O BOLELA LE NIKODEMO

  • SEO SE BOLELWAGO KE GO “TSWALWA GAPE”

Ge a le kua Jerusalema Pasekeng ya 30 C.E., Jesu o dira dipontšho tše dikgolo goba mehlolo. Ka baka leo, batho ba bantši ba dumela go yena. Nikodemo, yo e lego Mofarisei le setho sa kgorokgolo ya tsheko ya Bajuda yeo e bitšwago Sanhedrine, o kgahlilwe ke se. A nyaka go ithuta mo go oketšegilego, o etela Jesu e šetše e le leswiswi mo gongwe o dira se ka gobane a boifa gore botumo bja gagwe bo ka senyega go baetapele ba bangwe ba Bajuda ge e ba a ka bonwa.

Nikodemo o re: “Rabi re tseba gore wena bjalo ka morutiši o tšwa go Modimo; gobane ga go motho yo a ka dirago dipontšho tše tše o di dirago ka ntle le ge Modimo a na le yena.” Ge Jesu a araba Nikodemo o mmotša gore, gore motho a tsene Mmušong wa Modimo, o swanetše gore a “tswalwe gape.”—Johane 3:2, 3.

Lega go le bjalo, motho a ka tswalwa gape bjang? Nikodemo o a botšiša o re: “Na a ka tsena popelong ya mmagwe gomme a tswalwa gape?”—Johane 3:4.

Aowa, go tswalwa gape ga go bolele seo. Jesu o a hlalosa o re: “Ka ntle le gore motho a tswalwe ka meetse le ka moya, a ka se ke a tsena mmušong wa Modimo.” (Johane 3:5) Nakong ya ge Jesu a kolobetšwa gomme moya o mokgethwa o theogela go yena, ke ge a be a tswalwa “ka meetse le ka moya.” Ka nako yeo, go bile le tsebišo e tšwago legodimong e rego: “Yo ke Morwa wa ka, morategi, yo ke mo amogetšego.” (Mateo 3:16, 17) Ka tsela ye, Modimo o ile a tsebiša gore o be a tšweleditše Jesu e le morwa wa moya yo a nago le tebelelo ya go tsena Mmušong wa legodimong. Ka morago, ka Pentekoste ya 33 C.E., moya o mokgethwa o be o tla tšhollelwa go ba bangwe bao ba kolobeditšwego gomme ka go re’alo ba be ba tla tswalwa gape e le barwa ba Modimo ba moya.—Ditiro 2:1-4.

Go thata gore Nikodemo a kwešiše seo Jesu a mo rutago sona ka Mmušo. Ka gona Jesu o mo nea tsebišo e oketšegilego ka tema e kgethegilego yeo a e kgathago e le Morwa wa Modimo wa motho. Jesu o re: “Bjalo ka ge Moshe a ile a fega noga lešokeng, le Morwa wa motho o tla fegwa ka yona tsela yeo, gore yo mongwe le yo mongwe yo a dumelago go yena a be le bophelo bjo bo sa felego.”—Johane 3:14, 15.

Bogologolo Baisiraele bao ba bego ba lomilwe ke dinoga tšeo di nago le mpholo ba be ba swanetše go lebelela noga ya koporo gore ba phologe. (Numeri 21:9) Ka mo go swanago, batho ka moka ba swanetše go dumela go Morwa wa Modimo e le gore ba phologe boemong bja bona bja go hwa gomme ba hwetše bophelo bjo sa felego. A gatelela tema e lerato yeo Jehofa a e kgathago tabeng ye, ka morago Jesu o botša Nikodemo gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Ka gona, gona mo Jerusalema dikgweding tše tshelelago feela ka morago ga ge a thomile bodiredi bja gagwe, Jesu o hlalosa ka mo go kwagalago gore ke yena tsela ya go iša batho phološong.

Jesu o botša Nikodemo gore: “Modimo o romile Morwa wa gagwe lefaseng, e sego gore a le ahlole.” Se se bolela gore ga se a romelwa go tlo le ahlola o šoro, ka go lahlela batho ka moka tshenyegong. Go e na le mo, bjalo ka ge Jesu a bolela, o rometšwe “gore lefase le phološwe ka yena.”—Johane 3:17.

Nikodemo o tlile go Jesu e le bošego ka baka la poifo. Ka gona ke mo go kgahlišago gore Jesu o ruma poledišano ya gagwe le yena ka gore: “Bjale wo ke motheo wa kahlolo, gore seetša se tlile lefaseng; eupša batho ba ratile leswiswi go e na le seetša gobane mediro ya bona e le e kgopo. Gobane yo a tlwaetšego go dira dilo tše mpe o hloile seetša gomme ga a tle go sona, e le gore mediro ya gagwe e se ke ya solwa. Eupša yo a dirago sa therešo o tla seetšeng, e le gore mediro ya gagwe e bonagatšwe e le yeo e dirilwego ka go dumelelana le Modimo.”—Johane 3:19-21.

Bjale go tšwa go Mofarisei yo yo e lego morutiši wa Isiraele, yena Nikodemo, gore a naganišiše ka seo a sa tšwago go se kwa ka tema yeo Jesu a e kgathago morerong wa Modimo.

Ithute ka mo go oketšegilego

MOROKAMI

Seo Modimo a go Diretšego Sona

Molao wa motheo wa Modimo wa gore “bophelo bo lefše ka bophelo” o thuša go hlalosa lebaka leo ka lona Modimo a ilego a “gafa Morwa wa gagwe yo a tswetšwego a nnoši.”

MOROKAMI

Lehu la Jesu le Tsogo ya Gagwe—Seo di ka se Bolelago go Wena

Ditherešo tše tshelelago tša motheo tša Beibele di hlalosa kamoo lehu la motho o tee le ka tlišetšago ba bantši bophelo.