Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 12

Jesu o a Kolobetšwa

Jesu o a Kolobetšwa

MATEO 3:13-17 MAREKA 1:9-11 LUKA 3:21, 22 JOHANE 1:32-34

  • JESU O A KOLOBETŠWA LE GO TLOTŠWA

  • JEHOFA O TSEBATŠA JESU E LE MORWA WA GAGWE

Mo e ka bago dikgwedi tše tshelelago ka morago ga ge Johane Mokolobetši a thomile go bolela, Jesu yoo bjale a nago le nywaga e ka bago e 30 o tla go yena Nokeng ya Jorodane. Ka baka la’ng? Ga se gore o mo etela ka tsela ya bogwera. Le gona ga se gore Jesu o fo nyaka go bona kamoo modiro wa Johane o tšwelago pele ka gona. Aowa, Jesu o tlile go kgopela Johane gore a mo kolobetše.

Ke mo go kwagalago ge Johane a gana a re: “Ke nna ke swanetšego go kolobetšwa ke wena, gomme na wena o tla go nna?” (Mateo 3:14) Johane o tseba gore Jesu ke Morwa yo a kgethegilego wa Modimo. O tla gopola gore ge Johane a be a sa le ka mpeng ya mmagwe, o ile a tshela ka lethabo ge Maria yo a bego a imile Jesu a etela mmago Johane, e lego Elisabetha. Ga go pelaelo gore mmago Johane o ile a mmotša ka taba ye ka morago. Le gona a ka be a ile a tseba ka tsebišo ya morongwa ya go belegwa ga Jesu le ya mabapi le barongwa bao ba ilego ba tšwelela go badiši bošegong bjoo Jesu a belegwego ka bjona.

Johane o kwešiša gore kolobetšo yeo a e dirago ke ya go kolobetša bao ba sokologago dibeng tša bona. Lega go le bjalo, Jesu ga a na sebe. Go sa šetšwe go gana ga Johane, Jesu o phegelela ka gore: “A go be bjalo mo nakong ye, gobane ka tsela yeo go re swanetše gore re phethe toko ka moka.”—Mateo 3:15.

Ke ka baka la’ng go swanela gore Jesu a kolobetšwe? Jesu ga a kolobetšwe e le pontšho ya go sokologa dibeng. Kolobetšo ya gagwe e bontšha gore o tlile go dira thato ya Tatagwe. (Baheberu 10:5-7) Jesu e be e le mmetli, eupša bjale ke nako ya gore a thome bodiredi bjo Tatagwe wa legodimong a mo romilego lefaseng gore a tlo bo dira. Na o nagana gore Johane o letetše gore go direge selo se sengwe seo se sa tlwaelegago ge a kolobetša Jesu?

Ge e le gabotse, Johane ka morago o bega gore: “Yena Yo a nthomilego gore ke kolobetše ka meetse o itše go nna: ‘Motho yo o bonago moya o theogela godimo ga gagwe wa dula go yena, ke yena yo a kolobetšago ka moya o mokgethwa.’” (Johane 1:33) Ka gona, Johane o letetše gore moya wa Modimo o theogele godimo ga yo a mo kolobetšago. Ka tsela yeo, gateetee ge Jesu a etšwa meetseng, Johane a ka no se makale ge a bona “moya wa Modimo o theoga bjalo ka leeba o etla godimo ga [Jesu].”—Mateo 3:16.

Eupša go direga se se fetago seo ge Jesu a kolobetšwa. ‘Magodimo a a mmulegela.’ Se se bolela’ng? Go ka direga gore se bolela gore nakong ya ge Jesu a kolobetšwa, o ile a gopola bophelo bja gagwe bja pele e eba motho. Ka gona, Jesu bjale o gopola bophelo bja gagwe bja ge e be e le morwa wa Jehofa wa moya, go akaretša le ditherešo tšeo Modimo a mo rutilego tšona legodimong pele ga ge a ka tla lefaseng.

Go oketša moo, ge Jesu a kolobetšwa lentšu le le tšwago legodimong le re: “Yo ke Morwa wa ka, morategi, yo ke mo amogetšego.” (Mateo 3:17) Lentšu leo ke la mang? E ka se be lentšu la Jesu; yena o na le Johane gona moo. Lentšu leo ke la Modimo. Go molaleng gore Jesu ke Morwa wa Modimo. Ga se yena Modimo.

Go a bonala gore Jesu ke morwa wa Modimo wa motho, go etša ge motho wa pele, e lego Adama, e be e le morwa wa Modimo. Morutiwa Luka ka morago ga go hlalosa kolobetšo ya Jesu, o ngwala gore: “Jesu yena o be a na le nywaga e ka bago e masometharo ge a be a thoma modiro wa gagwe. Go be go bolelwa gore e be e le morwa wa Josefa, morwa wa Heli, . . . morwa wa Dafida, . . . morwa wa Aborahama, . . . morwa wa Noa, . . . morwa wa Adama, morwa wa Modimo.”—Luka 3:23-38.

Bjalo ka ge Adama e be e le “morwa wa Modimo” wa motho, go bjalo le ka Jesu. Ge a kolobetšwa, Jesu o tsena tswalanong e mpsha le Modimo, e bile e ba Morwa wa Modimo wa moya. Ka gona, Jesu o boemong bja go ruta therešo ka Modimo le go bontšha tsela ya go phela. Jesu o thoma tseleng yeo ka yona ge nako e dutše e eya a tlago go neela bophelo bja gagwe bja motho e le sehlabelo bakeng sa batho ba sebe.