Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 18

Jesu o a Oketšega ge Johane a Fokotšega

Jesu o a Oketšega ge Johane a Fokotšega

MATEO 4:12 MAREKA 6:17-20 LUKA 3:19, 20 JOHANE 3:22–4:3

  • BARUTIWA BA JESU BA A KOLOBETŠA

  • JOHANE MOKOLOBETŠI O A GOLEGWA

Ka morago ga go keteka Paseka ka seruthwane sa 30 C.E., Jesu le barutiwa ba gagwe ba tloga Jerusalema. Lega go le bjalo, ga ba boele magaeng a bona kua Galilea. Ba ya nageng ya Judea, moo ba kolobetšago ba bantši. Johane Mokolobetši o be a dutše a dira modiro o swanago mo e ka bago lebaka la ngwaga, le gona ba bangwe ba barutiwa ba gagwe ba sa dutše ba na le yena, mohlomongwe ba moeding wa Noka ya Jorodane.

Jesu yena ga a kolobetše motho—barutiwa ba gagwe ke bona ba kolobetšago ka taelo ya gagwe. Nakong ye ya bodiredi bja Jesu, Jesu gotee le Johane ba ruta Bajuda bao ba itsholago dibeng tšeo di sa dumelelanego le kgwerano ya Molao wa Modimo.—Ditiro 19:4.

Eupša barutiwa ba Johane ba hufegela Jesu le go belaela ka yena go Johane, ba re: “Motho [Jesu] yo a bego a na le wena . . . o a kolobetša gomme bohle ba ya go yena.” (Johane 3:26) Lega go le bjalo, Johane ga a hufege. O thabela ge Jesu a atlega e bile o nyaka gore le barutiwa ba gagwe ba thabele seo. Johane o ba gopotša ka gore: “Lena ka noši le a ntlhatsela gore ke itše: Ga se nna Kriste, eupša ke romilwe pele ga yena yoo.” O nea seswantšho ka taba ye ka tsela yeo ka moka ga bona ba kgonago go kwešiša, o re: “Yo a nago le monyadiwa ke monyadi. Lega go le bjalo, mogwera wa monyadi ge a ema kgauswi le yena gomme a mo kwa, o thaba kudu ka baka la lentšu la monyadi. Ka gona, lethabo le la ka le phethegile.”—Johane 3:28, 29.

Johane, go swana le mogwera wa monyadi, o ile a thaba dikgweding tše fetilego ge a be a tsebiša barutiwa ba gagwe Jesu. Ba bangwe ba bona ba ile ba latela Jesu gomme ge nako e dutše e eya ba be ba tla tlotšwa ka moya o mokgethwa. Johane gape o nyaka gore bao e lego barutiwa ba gagwe ba latele Jesu. Ge e le gabotse, morero wa Johane ke go lokiša tsela bakeng sa bodiredi bja Kriste. Johane o a hlalosa o re: “Yena yoo o swanetše go tšwela pele a oketšega, eupša nna ke swanetše go tšwela pele ke fokotšega.”—Johane 3:30.

Johane yo mongwe, yo a thomilego go latela Jesu pejana, ka morago o ile a ngwala mabapi le moo Jesu a tšwago gona le tema e kgolo yeo a e kgathago phološong ya batho, a re: “Yo a tšwago godimo o okametše ba bangwe ka moka. . . . Tate o rata Morwa gomme o gafetše dilo ka moka diatleng tša gagwe. Yo a dumelago go Morwa o na le bophelo bjo bo sa felego; yo a sa kwego Morwa a ka se ke a bona bophelo, eupša kgalefo ya Modimo e dula e le go yena.” (Johane 3:31, 35, 36) A therešo e bohlokwa kudu yeo batho ba swanetšego gore ba e tsebe!

Ka moragonyana ga ge Johane Mokolobetši a ahlaahlile gore tema yeo a e kgathago gotee le modiro wa gagwe di swanetše go fokotšega, o golegwa ke Kgoši Heroda. Heroda o tšere Herodiase, mosadi wa Filipi yo e lego ngwanabo ka motswadi o tee, gomme a mo nyala. Ge Johane a pepentšha tiro ya gagwe ya bootswa phatlalatša, Heroda o mo lahlela kgolegong. Ge Jesu a ekwa ka go golegwa ga Johane, o tloga Judea le barutiwa ba gagwe “a ya Galilea.”—Mateo 4:12; Mareka 1:14.