Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 2

Jesu o Hlompšha Pele a ka Belegwa

Jesu o Hlompšha Pele a ka Belegwa

LUKA 1:34-56

  • MARIA O ETELA MOTSWALO WA GAGWE E LEGO ELISABETHA

Ka morago ga gore morongwa Gabariele a botše mosadi yo mofsa e lego Maria gore o tla belega morwa yo leina la gagwe e lego Jesu le yoo a tla bušago e le Kgoši ka mo go sa felego, Maria o botšiša gore: “Se se tla direga bjang, gobane ga se ka ka ka robala le monna?”—Luka 1:34.

Gabariele o araba ka gore: “Moya o mokgethwa o tla theogela go wena gomme matla a Yo Godimodimo a tla go aparetša. Ka baka leo, le yo a tlago go belegwa o tla bitšwa yo mokgethwa, Morwa wa Modimo.”—Luka 1:35.

Mohlomongwe e le go thuša Maria gore a amogele molaetša wa gagwe, Gabariele o oketša ka gore: “Tseba gore Elisabetha motswalo wa gago le yena o imile morwa botšofading bja gagwe gomme ye ke kgwedi ya gagwe ya botshelela, yena yo go thwego ke moopa, gobane go Modimo ga go mantšu ao a ka se phethagatšwego.”—Luka 1:36, 37.

Maria o amogela seo Gabariele a se boletšego, ka ge re bona se tseleng yeo a arabelago ka yona. O goeletša ka go re: “Bona, nna lekgoba la Jehofa! A go ntiragalele go ya ka mantšu a gago.”—Luka 1:38.

Ge Gabariele a sepetše, Maria o itokišeletša go etela Elisabetha yoo a dulago le monna wa gagwe e lego Sakaria kgauswi le Jerusalema, mebotong ya Judea. Go tloga legaeng la Maria leo le lego ka leboa kua Natsaretha, leeto le le ka tšea matšatši a mararo goba a mane.

Maria o feleletša a fihlile ntlong ya Sakaria. Ge a tsena, o dumediša motswalo wa gagwe Elisabetha. Ge a mo dumediša, Elisabetha o tlala moya o mokgethwa, gomme o re go Maria: “O šegofaditšwe gare ga basadi, le seenywa sa popelo ya gago se šegofaditšwe! Ka gona, go tla bjang gore ke be le tokelo ye ya gore mmago Morena wa ka a tle go nna? Gobane tseba gore ge lentšu la tumedišo ya gago le kwala ditsebeng tša ka, lesea le le lego popelong ya ka le ile la tshela ka go hlalala kudu.”—Luka 1:42-44.

Ke moka Maria o arabela ka tebogo e tšwago pelong, o re: “Moya wa ka o godiša Jehofa, moya wa ka o ka se lese go hlalalela Modimo Mophološi wa ka, gobane o bone boemo bja tlase bja nna lekgoba la gagwe. Gobane go tloga bjale go ya pele meloko ka moka e tla re ke yo a thabilego, gobane Modimo yo matla o ntiretše ditiro tše kgolo.” Re ka ela hloko gore go sa šetšwe kgaugelo yeo a e bontšhitšwego, Maria o iša kgodišo ka moka go Modimo. O re: “Leina la gagwe ke le lekgethwa, kgaugelo ya gagwe e go bao ba mmoifago melokong le melokong.”—Luka 1:46-50.

A diriša mantšu a buduletšwego a boporofeta, Maria o tšwela pele a reta Modimo, a re: “O dirile mediro e matla ka letsogo la gagwe; o šwalalantše bao ba ikgogomošago boikemišetšong bja dipelo tša bona. O fološitše banna ba matla didulong tša bogoši gomme a godiša ba ikokobeditšego; o khorišitše ba swerwego ke tlala ka tše dibotse, a gomiša bao ba bego ba na le mahumo ba le feela. O thušitše Isiraele mohlanka wa gagwe, gore a gopole kgaugelo yeo e bontšhitšwego Aborahama le peu ya gagwe ka mo go sa felego.”—Luka 1:51-55.

Maria o tšea lebaka leo e ka bago dikgwedi tše tharo a dula le Elisabetha, mohlomongwe a mo thuša lebakeng le la dibeke tša mafelelo tša boimana bja gagwe. Ruri ke mo gobotse gore basadi ba ba babedi ba botegago, bao ka bobedi ba imilego bana ka thušo ya Modimo, ba kgona go ba gotee nakong ye bophelong bja bona!

Le gona ela hloko tlhompho yeo Jesu a ilego a e bontšhwa le pele a ka belegwa. Elisabetha o mmiditše “Morena wa ka,” ke moka lesea leo le bego le le ka popelong ya gagwe “la tshela ka go hlalala kudu” ge Maria a thoma go tšwelela. Seo se fapane kudu le tsela yeo ka yona ba bangwe ba swarago Maria gotee le lesea la gagwe leo le bego le sa tlo belegwa, ka ge re tla bona seo.

Ithute ka mo go Oketšegilego

EKIŠA TUMELO YA BONA

Maria—“Bona, Nna Lekgoba la Jehofa!”

Tsela yeo Maria a ilego a araba morongwa ka yona e re botša’ng ka tumelo ya gagwe? Ke dika dife tše dingwe tšeo a ilego a di bontšha?