Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 1

Melaetša e Mebedi e Tšwago go Modimo

Melaetša e Mebedi e Tšwago go Modimo

LUKA 1:5-33

  • MORONGWA GABARIELE O BOLELA E SA LE PELE KA GO BELEGWA GA JOHANE MOKOLOBETŠI

  • GABARIELE O BOTŠA MARIA KA GA GO BELEGWA GA JESU MO GO SA TLAGO

Ge e le gabotse, re ka tšea Beibele ka moka e le molaetša o tšwago go Modimo. Tatago rena wa legodimong o re neile yona bakeng sa go re ruta. Lega go le bjalo, ela hloko melaetša e mebedi e kgethegilego yeo e ilego ya rolwa nywageng e ka godimo ga e 2 000 e fetilego. E ile ya rolwa ke morongwa yo a bitšwago Gabariele, yoo “a lego pele ga Modimo.” (Luka 1:19) Melaetša yeo e mebedi e bohlokwa ya morongwa e neilwe ka tlase ga maemo afe?

Ke mo e ka bago ka ngwaga wa 3 B.C.E. Gabariele o iša kae molaetša wa pele? Mebotong ya Judea, yeo mohlomongwe e sego kgole kudu le Jerusalema, ke moo go dulago moperisita wa Jehofa yo leina la gagwe e lego Sakaria. Yena le mosadi wa gagwe Elisabetha ga e sa le ba bafsa, gomme ga ba na bana. Ke sebaka sa gore Sakaria a hlankele e le moperisita tempeleng ya Modimo kua Jerusalema. Ge Sakaria a sa le tempeleng, Gabariele o tšwelela gateetee kgauswi le aletare ya diorelo.

Go a kwagala gore seo se ile sa tšhoša Sakaria. Eupša morongwa o homotša Sakaria, a re go yena: “Se boife Sakaria, gobane topo ya gago e kwelwe, mosadi wa gago Elisabetha o tla go belegela morwa gomme leina la gagwe o mmitše Johane.” Gabariele o oketša ka gore Johane “e tla ba yo mogolo pele ga Jehofa” gomme o tla “lokišetša Jehofa batho ba itokišitšego.”—Luka 1:13-17.

Sakaria o bonagala a sa dumele seo. Ka baka la’ng? Ka baka la gore yena le Elisabetha ba godile. Ka gona Gabariele o re go yena: “O tla ba semumu wa se kgone go bolela go ba go fihla letšatšing leo dilo tše di diregago ka lona, gobane ga se wa dumela mantšu a ka.”—Luka 1:20.

Lebakeng le, batho bao ba lego ka ntle ba ipotšiša lebaka leo ka lona Sakaria a tšeago nako e telele gakaakaa a sa tšwe. Mafelelong o a tšwa, eupša ga a kgone go bolela. Sakaria o kgona feela go bolela ka diatla. Go molaleng gore o bone pono ge a le ka tempeleng.

Ge Sakaria a feditše tirelo ya gagwe tempeleng, o boela gae. Ka moragonyana ga moo, Elisabetha o a ima! Elisabetha o ikuta ka gae lebaka la dikgwedi tše hlano ge a sa letile gore ngwana wa gagwe a belegwe.

Ke moka Gabariele o iponagatša ka lekga la bobedi. O tšwelela go mang? Go mosadi yo mofsa yo a sa nyalwago yo leina la gagwe e lego Maria, yo a dulago ka leboa tikologong yeo e bitšwago Galilea, motseng wa Natsaretha. Morongwa o mmotša’ng? O re: “Modimo o go ratile.” Gabariele o tšwela pele go botša Maria gore: “Tseba gore o tla ima wa belega morwa, leina la gagwe o mmitše Jesu.” Gabariele o oketša ka gore: “Yena yoo e tla ba yo mogolo gomme o tla bitšwa Morwa wa Yo Godimodimo; . . . o tla buša e le Kgoši ntlong ya Jakobo ka mo go sa felego gomme Mmušo wa gagwe o ka se fele.”—Luka 1:30-33.

O ka nagana kamoo Gabariele a ikwago a na le tokelo ka gona go rola melaetša ye e mebedi. Ge re bala mo go oketšegilego ka ga Johane le Jesu, lebaka la gore melaetša ye e mebedi yeo e tšwago legodimong e be bohlokwa gakaakaa le tla bonagala gabotse.