Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 10

Lapa Labo Jesu le ya Jerusalema

Lapa Labo Jesu le ya Jerusalema

LUKA 2:40-52

  • JESU WA NYWAGA E 12 O BOTŠIŠA BARUTIŠI DIPOTŠIŠO

  • JESU O BITŠA JEHOFA “TATE”

Ke seruthwane. Ka go re’alo, ke nako ya gore lapa la Josefa gotee le bagwera le ba leloko ba tšee leeto la bona la ngwaga le ngwaga la go ya Jerusalema. Ba ya moo go yo keteka Paseka, go ya ka taelo ya Molao. (Doiteronomio 16:16) Go tloga Natsaretha go theogela Jerusalema ke leeto la dikhilomithara tše e ka bago tše 120. Ke nako ya leemaema le yeo bohle ba e thabelago. Ka ge bjale Jesu a na le nywaga e 12, o fagahletše monyanya ka kgahlego e kgethegilego gotee le sebaka sa go ba kgauswi le tempele gape.

Monyanya wa Paseka ga e fo ba tiragalo ya letšatši le letee go Jesu le ba lapa labo. Letšatši la ka morago ga Paseka, e lego “letšatšing la pele la dinkgwa tše di sa omelwago,” ke mathomo a Monyanya wa Dinkgwa tše di sa Omelwago wa matšatši a šupago. (Mareka 14:12) O tšewa e le karolo ya sehla sa monyanya wa Paseka. Leeto la bona go thoma ge ba tloga gae kua Natsaretha, nako yeo ba e dulago Jerusalema le ge ba boela gae, le tšea dibeke tše e ka bago tše pedi. Eupša lenyaga leeto le le tšea nako e teletšana ka baka la tiragalo yeo e kgomago Jesu. Ke bothata bjo bo bago gona ge go boelwa gae go tšwa Jerusalema.

Ge ba le leetong, Josefa le Maria ba nagana gore Jesu o gare ga sehlopha sa ba leloko le bagwera bao ba sepelago gotee ba lebile ka leboa. Lega go le bjalo, ga ba mo hwetše ge ba khutša bošego. Ka gona ba yo mo nyaka gare ga bao ba ba tlwaetšego, eupša ga ba mo hwetše. Mošemanyana wa bona ga a hwetšagale! Ke moka Josefa le Maria ba boela Jerusalema go yo mo nyaka.

Ba mo nyaka letšatši ka moka eupša ga ba mo hwetše. E bile ga ba mo hwetše le letšatšing la bobedi. Mafelelong, letšatšing la boraro ba hwetša morwa wa bona ka tempeleng yeo e nago le diholo tše dintši. Ba bona Jesu a dutše gare ga barutiši ba bangwe ba Bajuda. O theeditše, o botšiša dipotšišo e bile o ba makatša ka kwešišo ya gagwe.

Maria o mmotšiša ka gore: “Ngwanaka, ke ka baka la’ng o re dirile ka tsela ye? Nna le tatago re be re go nyaka re tshwenyegile kudu.”—Luka 2:48.

Jesu o bontšha a maketše gore ba be ba sa tsebe gore a ka ba a be a le kae. O ba botšiša ka gore: “Ke ka baka la’ng le be le nnyaka? Na le be le sa tsebe gore ke swanetše go ba ntlong ya Tate?”—Luka 2:49.

Ka ge bjale ba kopane, Jesu o boela gae Natsaretha le Josefa le Maria gomme o tšwela pele a ikokobeletša bona. O tšwela pele a gatela pele bohlaleng le go goleng mmeleng. Le ge e sa le yo monyenyane, o kgahla Modimo le batho. Ee, go tloga bjaneng bja gagwe go ya pele, Jesu ga a bee mohlala feela tabeng ya go tsoma dikgahlego tša moya eupša o o bea le tabeng ya go hlompha batswadi ba gagwe.

Ithute ka mo go oketšegilego

Jesu o Ithutile go kwa

Ka ge Jesu a be a phethagetše, ke ka baka la’ng a ile a swanelwa ke go ithuta go kwa?