Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 8

Ba Tšhabela Mmuši yo Kgopo

Ba Tšhabela Mmuši yo Kgopo

MATEO 2:13-23

  • LAPA LABO JESU LE TŠHABELA EGIPITA

  • JOSEFA O IŠA LAPA LA GAGWE NATSARETHA

Josefa o tsoša Maria gore a mmotše ditaba tše di akgofilego. Morongwa wa Jehofa o sa tšwa go tšwelela go yena torong, a mmotša a re: “Tsoga, tšea lesea le mmago lona o tšhabele Egipita gomme o dule moo go fihla ke go ntšhetša lentšu; gobane Heroda e se kgale o tla nyaka lesea leo gore a le bolaye.”—Mateo 2:13.

Ka yona nako yeo, Josefa, Maria le morwa wa bona ba tšhaba e le bošego. Ba tšhaba ka nako, ka gobane Heroda o lemogile gore balepi ba dinaledi ba mo forile. O be a ba boditše gore ba boe ba tlo mmegela. Go e na le moo, ba tlogile nageng ntle le go dira seo. Heroda o tuka bogale. A sa dutše a nyaka go bolaya Jesu, o laela gore go bolawe bašemanyana ka moka ba Betlelehema le ba dileteng tša yona bao ba nago le nywaga e mebedi le ba ka tlase ga moo. O lekanyetša nywaga ye go ya ka seo a se kwelego pejana go balepi ba dinaledi bao ba tlilego ba etšwa Bohlabela.

Go bolawa ga bašemanyana ka moka ruri ke selo se boifišago! Re ka se tsebe gore go bolailwe bašemanyana ba bakae, eupša go lla gabohloko le go golola ga bommago bana bao ba hwetšwego go phethagatša boporofeta bjo bo neilwego ke Jeremia yo e lego moporofeta wa Modimo.—Jeremia 31:15.

Mo nakong ye, Josefa le lapa la gagwe ba tšhabetše Egipita gomme ba dula moo. Ke moka bošegong bjo bongwe morongwa wa Jehofa a tšwelela go Josefa gape torong. Morongwa o re: “Tsoga, tšea lesea le mmago lona o ye nageng ya Isiraele, gobane bao ba bego ba tsoma moya wa lesea leo ba hwile.” (Mateo 2:20) Ka gona Josefa bjale o phetha ka gore lapa le ka boela nageng ya gabo lona. Ka tsela ye, go phethagala boporofeta bjo bongwe bja Beibele bja gore Morwa wa Modimo o bitšwa kua Egipita.—Hosea 11:1.

Go bonagala Josefa a rera gore lapa la gagwe le dule kua Judea, mohlomongwe kgauswi le motse wa Betlelehema, mo le bego le dula gona pele ga ge le tšhabela Egipita. Eupša o lemoga gore morwa yo kgopo wa Heroda e lego Arakelose ke yena kgoši ya Judea. Torong e nngwe gape, Modimo o lemoša Josefa ka kotsi ye. Ka gona Josefa le lapa la gagwe ba ya ka leboaboa gomme ba dula motseng wa Natsaretha tikologong ya Galilea, kgole le lefelo la borapedi bja bodumedi bja Sejuda. Jesu o golela setšhabeng se, e lego seo se phethagatšago boporofeta bjo bongwe bjo bo rego: “O tla bitšwa Monatsaretha.”—Mateo 2:23.

Ithute ka mo go oketšegilego

Dipotšišo tše Tšwago go Babadi—December 2014

Ke’ng seo Jeremia a bego a se bolela ge a be a re Ragele o llela bana ba gagwe?

Josefa o Ile a Šireletša, a Fepa le go Kgotlelela

Josefa o ile a šireletša lapa la gagwe ka ditsela dife? Ke ka baka la’ng a ile a ya Egipita le Maria le Jesu?