Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 3

Motho yo a Tlago go Lokiša Tsela o a Belegwa

Motho yo a Tlago go Lokiša Tsela o a Belegwa

LUKA 1:57-79

  • JOHANE MOKOLOBETŠI O A BELEGWA LE GO FIWA LEINA

  • SAKARIA O BOLELA E SA LE PELE KA TEMA YEO JOHANE A TLAGO GO E KGATHA

Elisabetha o kgauswi le go belega ngwana wa gagwe. Motswalo wa gagwe e lego Maria o dutše le yena lebaka la dikgwedi tše tharo. Bjale ke nako ya gore Maria a laele gomme a tšee leeto le letelele a lebile legaeng la gagwe ka leboa kua Natsaretha. Lebakeng la mo e ka bago dikgwedi tše tshela, Maria le yena o tla belega morwa.

Ka moragonyana ga ge Maria a sepetše, Elisabetha o a belega. Ruri go a thabiša gore pelego e sepetše gabotse le gore Elisabetha le ngwana wa gagwe ba phetše gabotse mmeleng! Ge Elisabetha a bontšha baagišani le ba leloko ngwana, ba thaba le yena.

Molao wo Modimo a o neilego Baisiraele o be o re letšatšing la seswai ka morago ga ngwana wa mošemanyana a belegwe, o swanetše go bolotšwa gomme o be a bile a rewa leina letšatšing lona leo. (Lefitiko 12:2, 3) Ba bangwe ba nagana gore morwa wa Sakaria o swanetše go reelelwa ka yena. Lega go le bjalo, Elisabetha o gana leina leo, a re: “Aowaowaa! O tla bitšwa Johane.” (Luka 1:60) Gopola gore morongwa Gabariele o be a itše ngwana yo o swanetše go bitšwa Johane.

Baagišani le metswalo ba a gana ba re: “Ga go yo a bitšwago ka leina le gare ga metswalo ya gago.” (Luka 1:61) Ba bolela ka diatla, ba botšiša Sakaria gore o nyaka go reela ngwana wa gagwe leina lefe. Sakaria o kgopela letlapa gomme o ngwala karabo e rego: “Leina la gagwe ke Johane.”—Luka 1:63.

Ka go re’alo, Sakaria o kgona go bolela gape ka mohlolo. O tla gopola gore o ile a se sa kgona go bolela ge a be a sa dumele seo morongwa a se boletšego—e lego gore Elisabetha o be a tla ba le morwa. Bjale ge Sakaria a bolela, baagišani ba gagwe ba a makala gomme ba ipotšiša ka gore: “Ngwana yo gabotse e tlo ba’ng?” (Luka 1:66) Ba bona tutuetšo ya Modimo tseleng yeo Johane a ilego a reelwa leina la gagwe.

Ke moka, Sakaria a tletše moya o mokgethwa, o tsebatša gore: “A go tumišwe Jehofa, yena Modimo wa Isiraele, gobane o etše hloko batho ba gagwe gomme a ba hlakodiša. O re tsošeditše mophološi yo matla ntlong ya Dafida mohlanka wa gagwe.” (Luka 1:68, 69) Ge a re “mophološi yo matla,” o bolela ka Morena Jesu, yo a sa tlago go belegwa. Sakaria o re ka Yena yoo, Modimo “ka morago ga ge re hlakodišitšwe diatleng tša manaba, [o tla re nea] tokelo ya go mo direla tirelo e kgethwa ka ntle le poifo, re dira bjalo ka potego le toko pele ga gagwe mehleng ya rena yohle.”—Luka 1:74, 75.

Sakaria ge a bolela e sa le pele ka morwa wa gagwe o re: “Eupša ge e le wena ngwana yo monyenyane, o tla bitšwa moporofeta wa Yo Godimodimo, gobane o tla sepela pele ga Jehofa bakeng sa go lokiša ditsela tša gagwe, go nea batho ba gagwe tsebo ya phološo ka go ba lebalela dibe, ka baka la lešoko le legolo la Modimo wa rena. Lešoko le le le tšwago godimo le tla ba bjalo ka seetša se se phadimago ka mahube, go bonegela bao ba dutšego leswiswing le moriting wa lehu le go hlahla dinao tša rena ka katlego tseleng ya khutšo.” (Luka 1:76-79) Ruri boporofeta bjoo bo a kgothatša!

Mo nakong ye Maria, yoo go bonagalago a se a tšwa a nyalwa, o fihlile gae kua Natsaretha. Go tla direga’ng ka yena ge a thoma go bonala gore o imile?