Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 9

O Golela Natsaretha

O Golela Natsaretha

MATEO 13:55, 56 MAREKA 6:3

  • LAPA LA JOSEFA LE MARIA LE A GOLA

  • JESU O ITHUTA MOŠOMO

Jesu o golela Natsaretha, e lego motsana o sego bohlokwa. Motsana wo o ka leboa la Judea, nageng ya dithaba ya tikologo yeo e bitšwago Galilea, go yela ka bodikela bja letsha le legolo leo le tsebjago e le Lewatle la Galilea.

Ge Jesu mohlomongwe a na le nywaga e mebedi, Josefa le Maria ba mo tliša mo ba etšwa Egipita. Go bonala eka nakong ye Jesu ke yena ngwana a nnoši wa bona. Lega go le bjalo, ka morago barwarragwe ba ile ba belegwa—e lego Jakobo, Josefa, Simone le Judase. Le gona Josefa le Maria ba ile ba belega banenyana, bao e lego dikgaetšedi tša Jesu. Ee, Jesu o na le bonyenyane barwarragwe le dikgaetšedi ba tshelelago.

Ke therešo gore Jesu o na le ba bangwe ba leloko. Re šetše re tseba ka Elisabetha le morwa wa gagwe e lego Johane. Johane o dula bokgole bja dikhilomithara tše dintši go ya ka borwa kua Judea. Yo a dulago kgauswi kua Galilea ke Salome, yoo go bonagalago e le ngwanabo Maria, ka gona e le mmane wa Jesu. Monna wa Salome ke Tsebedeo. Barwa ba bona ba babedi e lego Jakobo le Johane go bonala e be e tla ba batswala ba Jesu. Ga re tsebe ge e ba Jesu a fetša nako le bašemane ba ge ba sa gola, eupša ba feleletša e le bagwera ba Jesu ba kgauswi e bile ba hlankela e le baapostola ba gagwe ba babedi.

Josefa o swanetše go šoma ka thata gore a fepe lapa la gagwe leo le golago. Yena ke mmetli. Josefa o godiša Jesu bjalo ka morwa wa gagwe, ka gona Jesu o bitšwa “morwa wa mmetli.” (Mateo 13:55) Josefa o ruta Jesu gore le yena e be mmetli gomme Jesu o ithuta gabotse. Ke ka baka leo ka morago batho ba bolelago ka Jesu ba re: ‘Yo ke mmetli.’—Mareka 6:3.

Bophelo bja lapa labo Josefa bo ithekgile ka borapedi bja Jehofa. Ka go dumelelana le Molao wa Modimo, Josefa le Maria ba ruta bana ba bona dilo tša moya ‘ge ba dutše ntlong ya bona, ge ba sepela tseleng, ge ba robala le ge ba tsoga.’ (Doiteronomio 6:6-9) Go na le sinagoge kua Natsaretha. Re ka kgonthišega gore Josefa o dula a eya le lapa la gagwe go yo rapela moo. Go ile gwa bolelwa ka morago gore Jesu o be a eya sinagogeng “go ya ka tlwaelo ya gagwe ka letšatši la Sabatha.” (Luka 4:16) Le gona lapa le le thaba kudu ge le tšea maeto a ka mehla a go ya tempeleng ya Jehofa kua Jerusalema.