Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 67

“Ga go Motho yo a Kilego a Bolela ka Mokgwa wo”

“Ga go Motho yo a Kilego a Bolela ka Mokgwa wo”

JOHANE 7:32-52

  • BAHLANKEDI BA RONGWA GO YO SWARA JESU

  • NIKODEMO O EMELELA JESU

Jesu o sa le Jerusalema bakeng sa Monyanya wa Ditaberenakele (goba, Mešaša). O kgahlilwe ke gore “ba bantši lešabeng ba ile ba dumela go yena.” Lega go le bjalo, seo ga se kgahle baetapele ba bodumedi. Ba roma bahlankedi, bao ba šomago e le maphodisa a bodumedi, go yo mo swara. (Johane 7:31, 32) Lega go le bjalo, Jesu ga a leke go ikuta.

Go e na le moo, Jesu o tšwela pele go ruta phatlalatša kua Jerusalema, a re: “Ke tla dula ke na le lena lebakanyana pele ke eya go yo a nthomilego. Le tla nnyaka eupša le ka se nkhwetše gomme moo ke lego gona le ka se ke la tla.” (Johane 7:33, 34) Bajuda ga ba kwešiše, ka gona ba botšana ba re: “Motho yo o ikemišeditše go ya kae moo re ka se kego ra mo hwetša? Na o ikemišeditše go ya go Bajuda bao ba gašanego gare ga Bagerika le go yo ruta Bagerika? O ra go re’ng ge a re: ‘Le tla nnyaka eupša le ka se nkhwetše, gomme moo ke lego gona le ka se ke la tla’?” (Johane 7:35, 36) Lega go le bjalo, Jesu o bolela ka lehu la gagwe le go tsogela ga gagwe legodimong, gomme manaba a gagwe a ka se kgone go mo latelela moo.

Letšatši la bošupa la monyanya le a fihla. Mesong e mengwe le e mengwe ya monyanya, moperisita o be a tšholla meetse ao a a gelego Bodibeng bja Siloama, e le gore a ka elela botlaseng bja aletare ya tempeleng. Mohlomongwe a gopotša batho ka mokgwa wo, Jesu o goeletša ka gore: “Ge e ba motho le ge e le ofe a nyorilwe, a a tle go nna gomme a nwe meetse. A go tle yo a dumelago go nna, go etša ge Lengwalo le boletše la re: ‘Ka teng ga gagwe go tla ela melapo ya meetse a phelago.’”—Johane 7:37, 38.

Jesu o bolela ka seo se tlago go direga ge barutiwa ba gagwe ba tlotšwa ka moya o mokgethwa gomme ba biletšwa bophelong bja legodimong. Go tlotšwa mo go direga ka morago ga lehu la Jesu. Go thoma ka letšatši la Pentekoste ngwageng o latelago, melapo ya meetse ao a neago bophelo e thoma go elela ge barutiwa bao ba tloditšwego ka moya ba botša batho ditherešo.

Ge ba bangwe ba arabela thutong ya Jesu, ba re: “Ka kgonthe yo ke moporofeta yo go itšwego o tla tla,” mohlomongwe ba bolela ka moporofeta yo mogolo go feta Moshe yo go boletšwego ka yena e sa le pele. Ba bangwe ba re: “Yo ke Kriste.” Eupša ba bangwe ba ganetša ba re: “Na ge e le gabotse Kriste ga a tšwe Galilea? Na Lengwalo ga se la bolela gore Kriste o tšwa peung ya Dafida le Betlelehema motsaneng woo Dafida a bego a dula go wona?”—Johane 7:40-42.

Ka gona lešaba le arogane. Le ge ba bangwe ba nyaka gore Jesu a swarwe, ga go na yo a mo išago seatla. Ge bahlankedi ba boela go baetapele ba bodumedi ba se ba swara Jesu, baperisita ba bagolo le Bafarisei ba a ba botšiša ba re: “Ke ka baka la’ng le sa tla le yena?” Bahlankedi ba araba ba re: “Ga go motho yo a kilego a bolela ka mokgwa wo.” Baetapele ba bodumedi ka bogale ba a ba kwera le go ba nyatša, ba re: “Na le lena le arošitšwe? Na go na le o tee wa babuši goba wa Bafarisei yo a dumelago go yena? Eupša lešaba le leo le sa tsebego Molao ke batho ba rogakilwego.”—Johane 7:45-49.

Bjale, Nikodemo, yo e lego Mofarisei le setho sa Sanhedrine, o leka go emelela Jesu. Mo e ka bago nywageng e mebedi le seripa pejana, Nikodemo o ile a tla go Jesu bošego gomme a bontšha tumelo go yena. Bjale Nikodemo o re: “Na molao wa rena o ahlola motho ka ntle le ge pele o kwele go tšwa go yena le go tseba seo a se dirago?” Karabo ya bona ya go itšhireletša ke efe? Ke e rego: “Na le wena ga o tšwe Galilea? Nyakišiša Mangwalong gomme o bone gore ga go moporofeta yo a tlago go tšwa Galilea.”—Johane 7:51, 52.

Mangwalo ga a bolele ka go lebanya gore moporofeta o be a tla tšwa Galilea. Eupša Lentšu la Modimo le ile la bolela ka Kriste a etšwa moo; le ile la porofeta gore “seetša se segolo” se be se tla bonwa kua “Galilea ya ditšhaba.” (Jesaya 9:1, 2; Mateo 4:13-17) Go oketša moo, bjalo ka ge go boletšwe e sa le pele, Jesu o ile a belegelwa Betlelehema gomme o tšwa peung ya Dafida. Le ge Bafarisei ba ka ba ba lemoga se, mohlomongwe ba ikarabela ka go phatlalatša maaka go batho mabapi le Jesu.

Ithute ka mo go oketšegilego

Jesu o Utolla “Bohlale bjo bo Tšwago go Modimo”

Thuto ya Jesu e dirile bjang gore bahlabani bao ba bego ba romilwe gore ba yo mo swara ba boe ba lekeleditše diatla?