Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 73

Mosamaria o Ipontšha e le Moagišani wa Kgonthe

Mosamaria o Ipontšha e le Moagišani wa Kgonthe

LUKA 10:25-37

  • KAMOO O KA HWETŠAGO BOPHELO BJO BO SA FELEGO

  • MOSAMARIA WA KGAUGELO

Ge Jesu a sa le kgauswi le Jerusalema, Bajuda ba fapafapanego ba tla go yena. Ba bangwe ba nyaka go ithuta go yena mola ba bangwe ba nyaka go mo leka. Yo mongwe wa bona yo e lego setsebi sa Molao, o botšiša potšišo e rego: “Morutiši, ke swanetše go dira’ng gore ke je bohwa bja bophelo bjo bo sa felego?”—Luka 10:25.

Jesu o lemoga gore monna yoo ga a fo botšiša potšišo e le ge a nyaka go tseba. A ka ba a leka go dira gore Jesu a arabe ka tsela yeo e tlago go kgopiša Bajuda. Jesu o lemoga gore monna yo o šetše a na le kgopolo e itšego. Ka gona o araba ka tsela e bohlale yeo e dirago gore monna yo a utolle seo yena a se naganago.

Jesu o a botšiša o re: “Go ngwadilwe’ng Molaong? O bala bjang?” Monna yo o ithutile Molao wa Modimo, ka gona karabo ya gagwe e theilwe go wona. O tsopola go tšwa go Doiteronomio 6:5 le Lefitiko 19:18, o re: “‘O rate Jehofa Modimo wa gago ka pelo ya gago ka moka, ka moya wa gago ka moka, ka matla a gago ka moka le ka monagano wa gago ka moka’ gomme o rate ‘moagišani wa gago ka mokgwa wo o ithatago ka wona.’” (Luka 10:26, 27) Na yeo ke yona karabo?

Jesu o botša monna yo o re: “O arabile gabotse; ‘tšwela pele o dira seo gomme o tla hwetša bophelo.’” Eupša na poledišano ye e felela mo? Monna yo ga a nyake karabo yeo e ithekgilego ka therešo feela; o nyaka “go itlhatsela a lokile,” go kgonthišetša gore kgopolo ya gagwe e nepagetše le gore ka go re’alo tsela yeo a swarago batho ba bangwe ka yona e lokile. Ka gona o a botšiša o re: “Ge e le gabotse, ke mang yo e lego moagišani wa ka?” (Luka 10:28, 29) Potšišo yeo ye e bonagalago e le bonolo e na le mo gontši mo e go bolelago. Bjang?

Bajuda ba dumela gore lentšu “moagišani” le šoma feela go bao ba bolokago metlwae ya Sejuda, gomme go ka bonagala eka Lefitiko 19:18 e thekga seo. Ge e le gabotse, Mojuda a ka bolela gore e bile ke mo “go sa dumelelwego ke molao” go gwerana le motho yoo e sego Mojuda. (Ditiro 10:28) Ka baka leo monna yo mohlomongwe le ba bangwe ba barutiwa ba Jesu ba ipona ba lokile ge ba swara Bajudagotee le bona ka botho. Eupša ba ka swara motho yo e sego Mojuda ka go hloka botho; ge e le gabotse ga ba tšee motho yoo e le “moagišani.”

Jesu a ka lokiša bjang kgopolo ye ntle le go kgopiša monna yo le Bajuda ba bangwe? O dira se ka go anega taba, o re: “Motho yo mongwe o be a fologa a etšwa Jerusalema a eya Jeriko, a wela gare ga bahlakodi bao ba ilego ba mo hlakola dilo tšohle, ba mo itia, ba ikela ba mo tlogela a le makgatheng a lehu le bophelo.” Jesu o tšwela pele ka gore: “Gwa direga gore moperisita yo mongwe a fologe ka tsela yeo, eupša ge a mmona, a phamogela ka thoko e nngwe ya tsela. Molefi le yena ge a fologela lefelong leo a mmona, fela a phamogela ka thoko e nngwe. Eupša Mosamaria yo mongwe yo a bego a sepela tseleng yeo a fihla go yena gomme ge a mmona, a mo hlomogela pelo.”—Luka 10:30-33.

Monna yoo Jesu a mmotšago taba ye o tloga a tseba gore baperisita ba bantši le bathuši ba tempeleng ba Balefi ba dula Jeriko. Ge ba boa tempeleng, ba swanetše go theoga tseleng e itšego ya monabo wa dikhilomithara tše e ka bago tše 23. Tsela yeo e ka ba e kotsi, ka ge e na le bahlakodi bao ba laletšego go yona. Ge moperisita le Molefi ba hwetša Mojudagotee le bona a le tlalelong, na ga se ba swanela go mo thuša? Kanegelong ya gagwe, Jesu o anega gore ga se ba mo thuša. Yo a ilego a mo thuša ke Mosamaria, e lego monna wa setšhaba seo Bajuda ba se nyatšago.—Johane 8:48.

Mosamaria o ile a thuša bjang Mojuda yo a gobetšego? Jesu o tšwela pele o re: “A mmatamela a mo tlema dintho tša gagwe a di tšhela ka makhura le beine. Bjale a mo nametša pokolo ya gagwe a mo iša ntlong ya baeti, a mo hlokomela. Ke moka letšatšing le le latelago a tšea ditenariase tše pedi a di nea mohlokomedi wa ntlo ya baeti, a re: ‘Hle mo oke, gomme tšohle tše o tlago go di diriša ka ntle le se, ke tla go bušetša tšona ge ke boa.’”—Luka 10:34, 35.

Ka morago ga go anega taba ye, Morutiši yo Mogolo e lego Jesu, o botšiša monna yo potšišo ye e šišinyago kgopolo o re: “Ke mang wa ba bararo ba yo go wena a bonagalago a itirile moagišani go monna yo a wetšego bahlakoding?” Mohlomongwe monna yo ga a phuthologe go araba ka gore ke “Mosamaria,” ka gona o araba ka gore: “Ke yo a gaugetšego monna yoo.” Ke moka Jesu o hlalosa gabotse thuto ya kanegelo ya gagwe, a mo kgothaletša ka gore: “Sepela gomme le wena o dire sona seo.”—Luka 10:36, 37.

A tsela e šomago ya go ruta! Ge nkabe Jesu a ile a fo botša monna yo gore bao e sego Bajuda le bona ke baagišani ba gagwe, na nkabe monna yo le Bajuda ba bangwe bao ba theeditšego ba ile ba amogela seo? Ba be ba ka no se se amogele. Lega go le bjalo, ka go anega taba ye e bonolo, a diriša dilo tšeo batheetši ba di tlwaetšego, karabo ya potšišo e rego, “Ge e le gabotse, ke mang yo e lego moagišani wa ka?” e ba molaleng. Motho yo a itlhatselago e le moagišani wa kgonthe ke yoo a bontšhago lerato le botho tšeo Mangwalo a re laelago go di bontšha.

Ithute ka mo go Oketšegilego

MOROKAMI—KGATIŠO E ITHUTWAGO

“O Rate Moagišani wa Gago ka Mokgwa wo o Ithatago ka Wona”

Jesu o be a e ra go re’ng ge a be a re re rate baagišani ba rena? Re ka dira seo bjang?