Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 68

“Seetša sa Lefase”—Morwa wa Modimo

“Seetša sa Lefase”—Morwa wa Modimo

JOHANE 8:12-36

  • JESU O HLALOSA GORE MORWA KE MANG

  • BAJUDA KE BAHLANKA BJANG?

Letšatšing la mafelelo la Monyanya wa Ditaberenakele, e lego letšatši la bošupa, Jesu o ruta karolong ya tempele yeo e bitšwago ‘bobolokelo bja tšhelete.’ (Johane 8:20; Luka 21:1) Go bonagala bobolokelo bjo bo le ka Lapeng la Basadi, moo batho ba tlago go tsenya meneelo ya bona.

Bošego nakong ya monyanya, lefelo le la tempele le direlwa seetša se se kgethegilego. Dihlomapone tše nne tše dikgolo di moo, se sengwe le se sengwe se na le dibjana tše nne tše dikgolo tšeo di tletšego makhura. Seetša seo se tšwago maboneng a se bogale kudu moo se bonegago go fihla tikologong ya kgole kudu. Seo bjale Jesu a se bolelago se ka gopotša batheetši ba gagwe mabone a, ge a re: “Ke nna seetša sa lefase. Yo a ntatelago a ka se sepele leswiswing le gatee, eupša o tla ba le seetša sa bophelo.”—Johane 8:12.

Bafarisei ba ganetša mantšu a Jesu ba re: “O itlhatsela ka noši; bohlatse bja gago ga se bja therešo.” Jesu a araba a re: “Gaešita le ge ke itlhatsela, bohlatse bja ka ke bja therešo, gobane ke tseba mo ke tšwago le mo ke yago. Eupša lena ga le tsebe mo ke tšwago le mo ke yago.” O oketša ka gore: “Molaong wa lena go ngwadilwe gwa thwe: ‘Bohlatse bja batho ba babedi ke bja therešo.’ Ke nna yo a itlhatselago le Tate yo a nthomilego o a ntlhatsela.”—Johane 8:13-18.

Ka ge ba sa amogele tsela ya gagwe ya go nea mabaka, Bafarisei ba botšiša ba re: “Tatago o kae?” Jesu o nea karabo e lebanyago o re: “Ga le ntsebe le Tate ga le mo tsebe. Ge nkabe le be le ntseba, le Tate le be le tla mo tseba.” (Johane 8:19) Le ge Bafarisei ba sa dutše ba nyaka gore Jesu a swarwe, ga go yo a mo kgwathago.

Jesu o boeletša mantšu ao a šetšego a a boletše, o re: “Ke a tloga gomme le tla nnyaka, eupša le tla hwela sebeng sa lena. Moo ke yago le ka se kgone go tla.” Bajuda, e le ge ba sa kwešiše mantšu a Jesu ka mo go feletšego, ba thoma go ipotšiša ba re: “Na o tla ipolaya? Gobane o re: ‘Moo ke yago le ka se kgone go tla.’” Ga ba kwešiše seo Jesu a se bolelago, ka gobane ga ba tsebe moo a tšwago gona. O a hlalosa o re: “Le tšwa mo tlase; nna ke tšwa godimo. Le tšwa lefaseng le; nna ga ke tšwe mo lefaseng.”—Johane 8:21-23.

Jesu o bolela ka go ba gona ga gagwe legodimong pele a etla mo lefaseng le go ba ga gagwe Mesia yo a holofeditšwego goba Kriste, yoo baetapele ba bodumedi ba swanetšego go ba ba mo letile. Lega go le bjalo, ba botšiša ka lenyatšo le legolo ba re: “O mang?”—Johane 8:25.

Le ge ba mo ganetša, Jesu o a araba o re: “Ke sa bolelela’ng le lena?” O sa dutše a lebišitše tlhokomelo go Tatagwe gomme o hlalosa lebaka leo ka lona Bajuda ba swanetšego go theetša Morwa, o re: “Yo a nthomilego ke wa therešo gomme dilo tšeo ke di kwelego go yena ke di botša lefase.”—Johane 8:25, 26.

Ke moka Jesu o bontšha go bota Tatagwe, moo Bajuda ba ba sa go bontšhego, o re: “Ge le šetše le fegile Morwa wa motho, ke gona le tlago go tseba gore ke nna yena yoo le gore ga ke dire selo ka la ka; eupša ke bolela dilo tše go etša ge Tate a nthutile. Le gona yo a nthomilego o na le nna; ga se a ntlogela ke nnoši, gobane ka mehla ke dira dilo tše di mo kgahlago.”—Johane 8:28, 29.

Lega go le bjalo, Bajuda ba bangwe ba dumela go Jesu, gomme o re go bona: “Ge e ba le dula lentšung la ka, gona le barutiwa ba ka e le ka kgonthe, le tla tseba therešo gomme therešo e tla le lokolla.”—Johane 8:31, 32.

Go ba bangwe, polelwana ye ya go lokologa e kwagala e sa tlwaelega. Ba ganetša ba re: “Re bana ba Aborahama gomme ga se ra ka ra ba bahlanka ba motho. Go tla bjang gore o re: ‘Le tla lokologa’?” Bajuda ba a tseba gore ka dinako tše dingwe ba ile ba ba ka tlase ga pušo ya bašele, fela ba gana go bitšwa bahlanka. Lega go le bjalo, Jesu o bolela gore e sa le bahlanka, ge a re: “Ruriruri ke re go lena: Mang le mang yo a dirago sebe ke mohlanka wa sebe.”—Johane 8:33, 34.

Go gana ga Bajuda gore ke bahlanka ba sebe go ba bea boemong bjo kotsi. Jesu o a hlalosa o re: “Mohlanka ga a dule ntlong ya mong wa gagwe ka mo go sa felego; ke morwa yo a dulago ka mo go sa felego.” (Johane 8:35) Mohlanka ga a na ditshwanelo tša go hwetša bohwa, gomme a ka rakwa ka nako e nngwe le nngwe. Ke feela morwa yoo ge e le gabotse a belegetšwego goba yo a godišeditšwego lapeng yo a dulago “ka mo go sa felego,” ke gore, ge feela a sa dutše a phela.

Ka gona, therešo ka Morwa ke therešo yeo e lokollago batho sa ruri sebeng seo se bolayago. Jesu o re: “Ge e ba Morwa a le lokolla, gona le tla lokologa e le ka kgonthe.”—Johane 8:36.