Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 66

A le Jerusalema Bakeng sa Monyanya wa Ditaberenakele

A le Jerusalema Bakeng sa Monyanya wa Ditaberenakele

JOHANE 7:11-32

  • JESU O RUTA TEMPELENG

Jesu o thomile go tuma nywageng ya ka morago ga gore a kolobetšwe. Bajuda ba dikete ba bone mehlolo ya gagwe, gomme dipego tša mabapi le mediro ya gagwe di phatlaletše nageng ka moka. Bjale, ba bantši ba a mo nyaka Monyanyeng wa Ditaberenakele (goba, Mešaša) kua Jerusalema.

Dikgopolo tša batho mabapi le Jesu di fapane kudu. Ba bangwe ba re: “Ke motho yo a lokilego.” Ba bangwe gape ba re: “Ga se a loka eupša o aroša lešaba.” (Johane 7:12) Dipolelo tše bjalo tša go ngunanguna di dirwa matšatšing a mathomong a monyanya. Lega go le bjalo, ga go yo a nago le sebete sa go bolela phatlalatša a emelela Jesu ka gobane ba bantši ba boifa kamoo baetapele ba Bajuda ba tlago go arabela ka gona.

Ge monyanya o le gare, Jesu o ya tempeleng. Batho ba bantši ba makatšwa ke bokgoni bja gagwe bjo bo kgahlišago bja go ruta. Ga se a ka a tsena dikolong tša borabi, ka gona Bajuda ba a ipotšiša, ba re: “Motho yo o tseba bjang mangwalo, mola a se a ithuta dikolong?”—Johane 7:15.

Jesu o a hlalosa o re: “Seo ke se rutago ga se sa ka, eupša ke sa yo a nthomilego. Ge motho a rata go dira thato ya Gagwe, o tla tseba ge e ba thuto ye e etšwa go Modimo goba ke bolela ka la ka.” (Johane 7:16, 17) Thuto ya Jesu e dumelelana le Molao wa Modimo, ka gona go swanetše go ba molaleng gore o tsoma go nea Modimo letago, e sego go itagafatša ka noši.

Ke moka Jesu o re: “Na Moshe ga se a le nea Molao? Eupša ga go le o tee wa lena yo a kwago Molao. Ke ka baka la’ng le nyaka go mpolaya?” Ba bangwe lešabeng, mohlomongwe baeng bao ba tšwago ka ntle ga motse, ga ba lemoge maiteko a bjalo. Ba bonagala ba sa kwešiše gore go ka ba le yo a ka nyakago go bolaya morutiši wa go swana le yena. Ka baka leo, ba phetha ka gore go swanetše go ba go na le se sengwe se se fošagetšego ka Jesu gore a ka bolela seo. Ba re: “Wena o na le motemona. Ke mang yo a nyakago go go bolaya?”—Johane 7:19, 20.

Ge e le gabotse, ngwaga le seripa pejana, baetapele ba Bajuda ba be ba nyaka go bolaya Jesu ka morago ga ge a fodišitše monna ka Sabatha. Bjale Jesu o diriša tsela ya go nea mabaka yeo e šišinyago kgopolo gomme a utolla go hloka ga bona tlhaologanyo. O lebiša tlhokomelo ntlheng ya gore ka tlase ga Molao, ngwana wa mošemanyana o swanetše go bolotšwa ka letšatši la seswai, le ge e ba e le Sabatha. Ke moka o a botšiša o re: “Ge e ba motho a bolotšwa ka sabatha e le gore molao wa Moshe o se ke wa robja, na le nkgalefela o šoro gobane ke fodišitše motho fodifodi ka sabatha? Tlogelang go ahlola ka ponagalo ya ka ntle, eupša le ahlole ka kahlolo ya go loka.”—Johane 7:23, 24.

Badudi ba Jerusalema bao ba tsebago ka boemo bjo ba a bolela ba re: “Na motho yo ga se yo ba nyakago go mmolaya? O bolela phatlalatša, fela ga ba re selo go yena. Babuši ga ba ešo ba tseba e le ka kgonthe gore yo ke yena Kriste, na ba a tseba?” Ka gona, ke ka baka la’ng batho ba sa dumele gore Jesu ke Kriste? Ba re: “Rena re tseba moo motho yo a tšwago gona; eupša ge Kriste a etla, ga go motho yo a tlago go tseba mo a tšwago gona.”—Johane 7:25-27.

Gona moo tempeleng, Jesu o a araba o re: “Le a ntseba e bile le tseba moo ke tšwago gona. Le gona, ga se ka tla ka la ka, eupša yo a nthomilego ke wa kgonthe gomme ga le mo tsebe. Ke a mo tseba gobane ke nna moemedi yo a tšwago go yena gomme yena Yoo o nthomile.” (Johane 7:28, 29) E le go arabela mantšung ao a kwagalago, go dirwa maiteko a go swara Jesu e le gore a lahlelwe kgolegong goba a bolawe. Lega go le bjalo, maiteko ao a a folotša ka gobane ga se ya tšwa e eba nako ya Jesu ya go hwa.

Lega go le bjalo, ba bantši ba dumela go Jesu ka ge ba swanetše go dira bjalo. O sepetše godimo ga meetse, a homotša diphefo, a khoriša ba diketekete ka mohlolo ka dinkgwa le dihlapi tše sego kae, a fodiša balwetši, a dira gore digole di sepele, a budulla mahlo a difofu, a fodiša balephera a ba a tsoša le bahu. Ee, ba na le lebaka le le kwagalago la go botšiša gore: “Na ge Kriste a fihla o tla dira mehlolo e mentši go feta yeo motho yo a e dirilego?”—Johane 7:31.

Ge Bafarisei ba ekwa lešaba le bolela dilo tše, bona le baperisita ba bagolo ba roma bahlankedi gore ba yo swara Jesu.