Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 75

Jesu o Utolla Mothopo wa Lethabo

Jesu o Utolla Mothopo wa Lethabo

LUKA 11:14-36

  • GO LELEKA BATEMONA KA “MONWANA WA MODIMO”

  • MOTHOPO WA LETHABO LA KGONTHE

Jesu o sa tšwa go boeletša ditaelo tša gagwe mabapi le thapelo, eupša ga se yona taba e nnoši yeo e tšwelelago ka makga a fetago letee nakong ya bodiredi bja gagwe. Ge a be a dira mehlolo kua Galilea, Jesu o ile a lebeletšana le tatofatšo ya maaka ya gore o be a dira mehlolo ka matla a mmuši wa batemona. Bjale tatofatšo ye e tšwelela gape ge a le Judea.

Ge Jesu a leleka motemona go motho yo motemona a mo paledišago go bolela, mašaba a a makala. Lega go le bjalo, baswayadiphošo ba gagwe ga ba makale. Ba bolela tatofatšo yona yeo ya maaka, ba re: “O leleka batemona ka matla a Beletsebubu, mmuši wa batemona.” (Luka 11:15) Ba bangwe, bao ba nyakago bohlatse bjo bo oketšegilego bja mabapi le gore Jesu ke mang, ba mo kgopela pontšho e tšwago legodimong.

Ka ge a lemoga gore ba nyaka go mo leka, Jesu o ba araba ka tsela yeo a ilego a araba baswayadiphošo ba bjalo bao a kopanego le bona kua Galilea. O bolela gore mmušo o mongwe le o mongwe wo o aroganego o tla šwalalana, ge a re: “Ge e ba Sathane le yena a ikaroganya, gona mmušo wa gagwe o ka ema bjang?” Ke moka Jesu o ba botša ka go lebanya, o re: “Ge e ba ke leleka batemona ka monwana wa Modimo, gona Mmušo wa Modimo ruri o le fihletše.”—Luka 11:18-20.

Go bolela ga Jesu ka “monwana wa Modimo” go swanetše go gopotša batheetši ba gagwe seo se diregilego pejana historing ya Baisiraele. Bao ba bego ba le lapeng la Farao ba ba bonego Moshe a dira mohlolo, ba ile ba goeletša ka gore: “Se se dirilwe ka matla [goba, monwana] a Modimo!” Le gona “monwana wa Modimo” ke wona o ngwadilego Melao e Lesome diphaphathing tše pedi tša maswika. (Ekisodo 8:19; 31:18) Ka mo go swanago, “monwana wa Modimo”—moya wa gagwe o mokgethwa, goba matla a šomago—ke wona wo bjale o dirago gore Jesu a kgone go leleka batemona le go fodiša balwetši. Lega go le bjalo, ruri Mmušo wa Modimo o fihletše baganetši ba, ka gobane Kgoši e kgethilwego ya Mmušo e lego Jesu, e gona moo e dira mehlolo ye.

Bokgoni bja Jesu bja go leleka batemona ke bohlatse bja gore o feta Sathane ka matla, go fo swana le ge monna yo matla a ka hlasela monna yo a itlhamilego gabotse yo a letilego ntlo ya gagwe gomme a mo fenya. Jesu gape o boeletša seswantšho sa gagwe sa mabapi le moya o sa hlwekago wo o tšwago mothong. Ge e ba motho a sa tlatše sekgoba seo ka dilo tše dibotse, moya woo o tla boa le meoya e mengwe e šupago, wa dira gore boemo bja mafelelo bjoo motho yoo a bego a le go bjona bo mpefale le go feta peleng. (Mateo 12:22, 25-29, 43-45) Ka gona go bjalo le ka setšhaba sa Isiraele.

Mosadi yo a theeditšego Jesu o tutueletšega gore a hlaboše lentšu, a re: “Go thaba popelo yeo e ilego ya go rwala, le matswele ao o a antšego!” Basadi ba Bajuda ba be ba na le kholofelo ya go ba mmago moporofeta, kudukudu Mesia. Ka gona mosadi yo a ka ba a nagana gore Maria a ka ba a thabišitšwe ka mo go kgethegilego ke go ba mmago morutiši yo bjalo. Lega go le bjalo, Jesu o phošolla mosadi ka taba ya mothopo wa kgonthe wa lethabo, o re: “Aowa, go e na le moo, go thaba bao ba kwago lentšu la Modimo gomme ba le boloka!” (Luka 11:27, 28) Le ka mohla Jesu ga se a ka a šišinya gore Maria a fiwe tlhompho e kgethegilego. Go e na le moo, lethabo la kgonthe la monna goba mosadi le ge e le ofe ga le tlišwe ke gore motho o tswalane le motho yo a itšego goba go tlišwa ke dilo tšeo a di fihleletšego, eupša le tlišwa ke go ba mohlanka yo a botegago wa Modimo.

Bjalo ka ge Jesu a ile a dira kua Galilea, o kgalemelela batho go nyaka pontšho e tšwago legodimong. O re ga go pontšho yeo ba tlago go e newa ge e se “pontšho ya Jona.” Jona e bile pontšho ka go ba ga gagwe ka mpeng ya hlapi ka matšatši a mararo le ka go dira ga gagwe boboledi ka sebete, e lego seo se ilego sa dira gore Baninife ba itshole. Jesu o re: “Eupša ke re yo a fetago Jona ka bogolo o gona mo.” (Luka 11:29-32) Jesu gape o feta Solomone, yoo kgošigadi ya kua Sheba e ilego ya yo kwa ka bohlale bja gagwe.

Jesu o oketša ka gore: “Motho ka morago ga go tšhuma lebone ga a le bee mo go utegilego goba ka tlase ga seroto, eupša o le bea godimo ga sehlomapone.” (Luka 11:33) A ka ba a bolela gore go ruta le go dira mehlolo pele ga batho ba go swana le go uta seetša sa lebone. Ka ge mahlo a bona a sa tsepama, ga ba bone morero wa mediro ya gagwe.

Jesu o sa tšwa go leleka motemona gomme o dirile gore semumu se kgone go bolela. Seo se swanetše go tutueletša batho go tagafatša Modimo le go botša ba bangwe ka seo Jehofa a se fihlelelago. Ka gona Jesu o lemoša baswayadiphošo ba gagwe ka mantšu a a rego: “Ka gona, phakgamelang gore seetša se se lego go lena e se be leswiswi. Ka gona, ge e ba mmele wa gago ka moka o tagile go se na karolo yeo e swifetšego, gona o tla taga ka moka ga wona go etša ge lebone le go edišetša ka mahlasedi a lona.”—Luka 11:35, 36.

Ithute ka mo go oketšegilego

Maria—“Bona, Nna Lekgoba la Jehofa!”

Tsela yeo Maria a ilego a araba morongwa ka yona e re botša’ng ka tumelo ya gagwe? Ke dika dife tše dingwe tšeo a ilego a di bontšha?