Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 78

Dula o Itokišitše, Molaki yo a Botegago!

Dula o Itokišitše, Molaki yo a Botegago!

LUKA 12:35-59

  • MOLAKI YO A BOTEGAGO O SWANETŠE GO DULA A ITOKIŠITŠE

  • JESU O TLELA GO BAKA KAROGANO

Jesu o hlalošitše gore ke “mohlatswana” feela woo o tlago go hwetša sebaka Mmušong wa legodimong. (Luka 12:32) Eupša go hwetša moputso woo o kgahlišago ga se selo seo se ka tšewago gabohwefo. Ge e le gabotse, o tšwela pele go gatelela kamoo go tlago go ba bohlokwa ka gona gore motho a be le kgopolo e nepagetšego gore a tle a be karolo ya Mmušo.

Ka gona, Jesu o eletša barutiwa ba gagwe gore ba dule ba itokišeleditše go boa ga gagwe. O re: “Itokišeng gomme mabone a lena a tuke, le swane le banna ba ba letetšego mong wa bona gore a boe lenyalong, e le gore ge a fihla a kokota, ba mmulele gateetee. Go thaba bahlanka bao ge mong wa bona a fihla a ba hwetšago ba phakgame!”—Luka 12:35-37.

Barutiwa ba ka kwešiša gabonolo kgopolo yeo Jesu a e swantšhago. Bahlanka bao a bolelago ka bona ba letile gomme ba itokišeleditše go boa ga mong wa bona. Jesu o a hlalosa o re: “Ge [mong wa bona] a fihla ka tlhapetšo ya bobedi [go tloga mo e ka bago ka iri ya senyane bošego go fihla bošegogare] gaešita le ka ya boraro [go tloga bošegogare go fihla mo e ka bago ka iri ya boraro ka masa] gomme a ba hwetša ba le bjalo, gona ke bao ba thabilego!”—Luka 12:38.

Se ga e fo ba keletšo ya mabapi le go ba bahlanka ba ntlo bao ba fišegago, goba bašomi. Seo se bonagala gabotse tseleng yeo Jesu, e lego Morwa wa motho, a itlhalosago ka yona seswantšhong seo. O botša barutiwa ba gagwe o re: “Le lena le duleng le itokišitše, gobane Morwa wa motho o tla ka nako yeo le sa naganego gore e ka ba yona.” (Luka 12:40) Ka gona nakong e tlago, Jesu o tla tla. O nyaka gore barutiwa ba gagwe—kudukudu bao e lego ba “mohlatswana”—ba dule ba itokišitše.

Petro o nyaka go kwešiša seo Jesu a se bolelago, ka gona o a botšiša o re: “Morena, na seswantšho se o se botša rena goba o se botša le bohle?” Go e na le go araba Petro ka go lebanya, Jesu o bolela seswantšho sa go tswalana le taba yeo o re: “Ke mang yo ruri e lego molaki yo a botegago, yo a nago le temogo, yo Mong wa gagwe a tlago go mmea gore a hlokomele sehlopha sa gagwe sa bahlanka gore a tšwele pele a ba nea tekanyo ya dijo tša bona ka nako e swanetšego? Go thaba mohlanka yoo, ge e ba ge Mong wa gagwe a fihla a mo hwetša a dira bjalo! Ruri ke a le botša ke re: O tla mmea gore a hlokomele dilo tša gagwe ka moka.”—Luka 12:41-44.

Seswantšhong sa pejana, go molaleng gore “mong” ke Jesu, yena Morwa wa motho. Go a kwagala gore “molaki yo a botegago” o akaretša batho bao e lego karolo ya “mohlatswana” e bile e le bao ba tlago go newa Mmušo. (Luka 12:32) Mo Jesu o bolela gore ditho tše itšego tša sehlopha se di tla ba di nea “sehlopha sa gagwe sa bahlanka” dilo tša go ba phediša, e lego “tekanyo ya dijo tša bona ka nako e swanetšego.” Ka gona Petro le barutiwa ba bangwe bao Jesu a ba rutago le go ba fepa moyeng ba ka phetha ka gore nakong e tlago go tla ba le nako yeo Morwa wa motho a tlago go tla ka yona. Le gona nakong yeo, go tla ba le tokišetšo yeo e šomago bakeng sa go fepa balatedi ba Jesu moyeng, e lego ‘sehlopha sa bahlanka’ sa Mong wa sona.

Jesu o gatelela ka tsela e nngwe lebaka leo ka lona barutiwa ba gagwe ba swanetšego go dula ba phafogile le go šetša pono ya bona. Ke ka gobane motho a ka no se be šedi gomme a ba a fihla le bokgoleng bja gore a ganetše bana babo le dikgaetšedi tša gagwe. Lebaka ke le: “Eupša ge e ba mohlanka yoo pelong ya gagwe a ka re: ‘Mong wa ka o diega go tla.’ Ke moka a thoma go itia bahlanka ba banna le ba basadi gomme a ja, a nwa a ba a tagwa, gona Mong wa mohlanka yoo o tla tla ka letšatši leo a sa mo letelago ka lona le ka iri yeo a sa e tsebego, le gona o tla mo otla o šoro kudu le go mo lahlela mo go lego ba go se botege.”—Luka 12:45, 46.

Jesu o bolela gore o tletše “go gotša mollo lefaseng.” Le gona o dirile bjalo, a tsoša dikgang tšeo di bakago ngangišano e šoro gomme gwa feleletša ka go fedišwa ga dithuto tša maaka gotee le metlwae. Se se bile se aroganya batho bao go ka letelwago gore e be batee, “tate a tsogela morwa matla gomme morwa a tsogela tate matla, mma a tsogela morwedi matla gomme morwedi a tsogela mmagwe matla, mmatswale a tsogela ngwetši matla gomme ngwetši ya tsogela mmatswale matla.”—Luka 12:49, 53.

Ditlhaloso tše di be di lebišitšwe kudukudu go barutiwa ba gagwe. Ke moka Jesu o bolela le mašaba. Batho ba bantši ka bonganga ba ganne go amogela bohlatse bja gore ke yena Mesia, ka gona o ba botša a re: “Ge le bona leru le rotoga ka bodikela, gateetee le re: ‘Ledimo le a tla,’ gomme go be bjalo. Ke moka ge le bona gore phefo ya borwa e a foka, le re: ‘Go tla fiša o šoro,’ gomme go be bjalo. Baikaketši ke lena, le tseba go hlahloba ponagalo ya lefase le leratadima, eupša go tla bjang gore le se ke la tseba go hlahloba nako yona ye?” (Luka 12:54-56) Go molaleng gore ga se ba itokiša.

Ithute ka mo go oketšegilego

Morero wa go Boa ga Kriste ke Ofe?

Morero wa go boa ga Kriste ke ofe? O tla boa ka tsela efe, gomme o tla dira’ng?