Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 80

Modiši yo Boleta le Mašaka a Dinku

Modiši yo Boleta le Mašaka a Dinku

JOHANE 10:1-21

  • JESU O BOLELA KA MODIŠI YO BOLETA LE KA MAŠAKA A DINKU

Ge Jesu a le gare a ruta kua Judea, bjale o diriša seswantšho sa dilo tšeo batheetši ba gagwe ba kgonago go di bona, e lego dinku le mašaka a dinku. Eupša o bolela a diriša seswantšho. Bajuda ba ka ba ba gopola mantšu a Dafida a rego: “Jehofa ke Modiši wa ka. Nka se hloke selo. O nkhutamiša mafulong a matala.” (Psalme 23:1, 2) Ka go psalme e nngwe, Dafide o ile a laletša setšhaba a re: “A re khunameng pele ga Jehofa Modiri wa rena. Gobane ke yena Modimo wa rena, gomme rena re batho ba mafulo a gagwe.” (Psalme 95:6, 7) Ee, Baisiraele ka tlase ga Molao e be e le kgale ba swantšhwa le mohlape wa dinku.

“Dinku” tše di be di le “lešakeng la dinku” ka kgopolo ya gore di be di belegetšwe ka tlase ga kgwerano ya Molao wa Moshe. Molao o be o šoma e le legora, o arola batho mekgweng e šilafatšago ya batho bao ba bego ba se ka tlase ga thulaganyo ye. Lega go le bjalo, Baisiraele ba bangwe ba be ba swara mohlape wa Modimo gampe. Jesu o re: “Ruriruri ke re go lena: Yo a sa tsenego ka lešakeng la dinku ka mojako eupša a namelela lefelong le lengwe, yoo ke lehodu le mohudi. Eupša yo a tsenago ka mojako ke modiši wa dinku.”—Johane 10:1, 2.

Batho ba ka nagana ka batho bao ba bego ba ipolela e le bona Mesia, goba Kriste. Bona ba swana le mahodu le bahudi. Batho ga se ba swanela go latela baikgakanyi ba bjalo. Go e na le moo, ba swanetše go latela “modiši wa dinku” yoo Jesu a bolelago ka yena, ge a re:

“Moletamojako o a mmulela gomme dinku di theetša lentšu la gagwe e bile o bitša dinku tša gagwe ka maina le go di eta pele ge di etšwa. Ge a ntšhitše tša gagwe ka moka, o di eta pele gomme dinku tša mo latela gobane di tseba lentšu la gagwe. Motho o šele di ka se mo latele le gatee eupša di tla mo tšhaba, gobane di sa tsebe lentšu la bašele.”—Johane 10:3-5.

Pejana, Johane Mokolobetši, go swana le moletamojako, o ile a hlaola Jesu e le yena yoo dinku tša seswantšhetšo tšeo di lego ka tlase ga Molao di swanetšego go mo latela. Dinku tše dingwe, kua Galilea le gona moo Judea, di tsebile lentšu la Jesu. O be a tla “di eta pele ge di etšwa” di eya kae? Le gona go mo latela go be go tla feleletša ka eng? Ba bangwe bao ba kwago seswantšho se ba ka ipotšiša, ka gobane ‘ga ba tsebe seo se bolelwago ke dilo tšeo a bego a ba botša tšona.’—Johane 10:6.

Jesu o a hlalosa o re: “Ruriruri ke re go lena, ke nna mojako wa dinku. Bohle bao ba tlilego ke sa ba tsebe ke mahodu le bahudi; eupša dinku ga se tša ba theetša. Ke nna mojako; mang le mang yo a tsenago ka nna o tla phološwa gomme o tla tsena le go tšwa, a ba a hwetša mafulo.”—Johane 10:7-9.

Go molaleng gore Jesu o bolela selo se itšego se sefsa. Batheetši ba gagwe ba a tseba gore ga se yena mojako wa go tsena kgweranong ya Molao, woo o tšerego nywaga e makgolo o le gona. Ka gona o swanetše go ba a bolela gore dinku tšeo a di ‘etago pele ge di etšwa’ di tla tsena lešakeng le lengwe la dinku. Seo se tla feleletša ka eng?

Ge Jesu a tšwela pele a hlalosa tema yeo a e kgathago, o re: “Ke tlile gore dinku di be le bophelo le gore di be le bjona ka boati. Ke nna modiši yo boleta; modiši yo boleta o gafa moya wa gagwe ka baka la dinku.” (Johane 10:10, 11) Pejana Jesu o be a ile a kgothatša barutiwa ba gagwe ka gore: “Se boife, wena mohlatswana, gobane Tatago lena o kgahlilwe ke go le nea Mmušo.” (Luka 12:32) Ruri, ba ba bopago “mohlatswana” ke bao Jesu a tlago go ba eta pele go tsena lešakeng le lefsa la dinku, e le gore ‘ba be le bophelo le gore ba be le bjona ka boati.’ E tloga e le tšhegofatšo go ba karolo ya mohlape woo!

Lega go le bjalo, taba ya Jesu ga e felele moo. O re: “Ke na le dinku tše dingwe tšeo e sego tša lešaka le; le tšona ke swanetše go di tliša gomme di tla theetša lentšu la ka, ya ba mohlape o tee wa modiši o tee.” (Johane 10:16) ‘Dinku tše tše dingwe’ ke “tšeo e sego tša lešaka le.” Ka baka leo, e swanetše go ba e le tša lešaka le lengwe gape, leo le sa swanego le la “mohlatswana” wo o tlago go ja bohwa bja Mmušo. Mašaka a a mabedi, goba mašaka a dinku, a na le dipheletšo tše di sa swanego. Lega go le bjalo, dinku tša mašakeng ka bobedi di tla holwa ke tema yeo Jesu a e kgathago. O re: “Ke ka baka leo Tate a nthatago gobane ke gafa moya wa ka.”—Johane 10:17.

Ba bantši lešabeng ba arabela ka gore: “O na le motemona e bile o a gafa.” Lega go le bjalo, ba bangwe ba bontšha gore ba theeditše ka kgahlego gomme ba ikemišeditše go latela Modiši yo Boleta. Ba re: “Ao ga se mantšu a motho yo a nago le motemona. Na motemona a ka kgona go budulla mahlo a batho bao ba foufetšego?” (Johane 10:20, 21) Go bonagala ba bolela ka taba ya ge Jesu pejana a ile a fodiša motho yo a bego a belegwe e le sefofu.

Ithute ka mo go oketšegilego

Bophelo bja Mehleng ya Beibele—Modiši

Ke diphoofolo tša mohuta mang tšeo modiši a bego a di hlokomela? Modiro wa gagwe o be o akaretša’ng?