Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 79

Lebaka la go tla ga Phedišo

Lebaka la go tla ga Phedišo

LUKA 13:1-21

  • JESU O NEA THUTO KA DITIRAGALO TŠE PEDI TŠA MASETLAPELO

  • MOSADI YO A GOLOFETŠEGO O FODIŠWA KA SABATHA

Jesu o lekile ka ditsela tše dintši go kgothaletša batho gore ba nagane ka tswalano ya bona le Modimo. Go tšwelela sebaka se sengwe ka morago ga poledišano ya gagwe le batho bao ba lego ka ntle ga ntlo ya Mofarisei.

Ba bangwe ba bona ba bolela ka tiragalo ya masetlapelo. Ba bolela ka “Bagalilea bao [Mmuši wa Roma e lego Pontio] Pilato a ilego a tswakanya madi a bona le dihlabelo tša bona.” (Luka 13:1) Ba ra go re’ng?

Mohlomongwe Bagalilea ba ke bao ba ilego ba bolawa ge Bajuda ba dikete ba be ba ipelaetša ka go diriša ga Pilato tšhelete e tšwago bobolokelong bja tšhelete bja tempeleng go aga mokero wo o išago meetse Jerusalema. Pilato a ka ba a ile a hwetša tšhelete yeo ka go dirišana le balaodi ba tempele. Bao ba anegago masetlapelo a ba ka ba ba nagana gore Bagalilea ba wetšwe ke bošula ka gobane ba be ba na le molato wa ditiro tše kgopo. Jesu o ganana le seo.

O a botšiša o re: “Na le nagana gore Bagalilea bao e be e le badiradibe ba babe kudu go feta Bagalilea ba bangwe ka moka gobane ba tlaišitšwe ke dilo tše?” Karabo ya gagwe ke aowa. Eupša Jesu o diriša tiragalo ye go lemoša Bajuda, o re: “Ka ntle le gore le itshole, le lena ka moka le tla fedišwa ka mo go swanago.” (Luka 13:2, 3) Ke moka Jesu o bolela ka tiragalo e nngwe ya masetlapelo yeo e ka bago e be e se kgale e diregile le gona e ka ba e be e tswalana le go agwa ga mokero wa meetse. O a botšiša o re:

“Ba lesomeseswai bao tora ya Siloama e ilego ya ba wela gomme ya ba bolaya, na le nagana gore e be e le ba nago le molato o mogolo go feta batho ka moka ba bangwe ba ba dulago Jerusalema?” (Luka 13:4) Lešaba le ka ba le nagana gore batho bao ba hlokofetše ka baka la bokgopo bjo itšego bja bona. Jesu o ganana le taba yeo gape. Jesu o a tseba gore “nako le ditiragalo tšeo di sa letelwago” di a diragala le gore mohlomongwe ke tšona di bakilego le masetlapelo a. (Mmoledi 9:11) Lega go le bjalo, batho ba swanetše go ithuta se sengwe tiragalong ye. Jesu o re: “Ka ntle le gore le itshole, le tla fedišwa ka moka ka tsela e swanago.” (Luka 13:5) Eupša ke ka baka la’ng Jesu bjale a gatelela thuto ye?

Se se tswalana le nako yeo a lego go yona bodireding bja gagwe, gomme o swantšha taba ye ka tsela ye: “Monna yo mongwe o be a na le mogo o bjetšwego serapeng sa gagwe sa morara, a tla a nyaka dienywa go ona, eupša a se hwetše selo. Ke moka a re go molemi wa morara: ‘Ke nywaga e meraro ke etla go nyaka dienywa mogong wo eupša ke sa hwetše selo. O reme! Ke ka baka la’ng o swanetše go diba mmu?’ Ge a fetola a re go yena: ‘Morena, anke o o lese le wona ngwaga wo go fihlela ke epa go o dikologa ke tšhela morole, ge e ba o enywa nakong e tlago, gona go lokile, eupša ge e ba o sa enywe, gona o tla o rema.’”—Luka 13:6-9.

Jesu o tšere nywaga e fetago e meraro a dutše a leka go hlagolela tumelo gare ga Bajuda. Lega go le bjalo, ke ba sego kae bao e bilego barutiwa gomme ba ka lebelelwa e le dienywa tša modiro wa gagwe. Bjale, ngwageng wa bone wa bodiredi bja gagwe, o šoma ka thata kudu maitekong a gagwe. Go bjalo ka ge eka o be a epa le go tšhela morole go dikologa mogo wa Bajuda ka go dira boboledi le ka go ruta kua Judea le Perea. Mafelelo ke afe? Go arabela Bajuda ba sego kae. Setšhaba ka moka se gana go itshola gomme bjale se kgauswi le go fedišwa.

Go se arabele moo ga ba bantši go bonagala gape ka moragonyana ka Sabatha. Jesu o ruta sinagogeng. O bona mosadi yoo a tšerego nywaga e 18 a hunagane ka baka la go tlaišwa ke motemona. Jesu ka kwelobohloko o botša mosadi yo o re: “Wena mosadi, o lokolotšwe bofokoding bja gago.” (Luka 13:12) Jesu o mmea diatla, gomme gateetee o a otlologa ke moka a thoma go tumiša Modimo.

Seo se galefiša molaodi yo a okamelago wa sinagoge, yo a rego: “Go na le matšatši a tshelelago ao modiro o swanetšego go dirwa ka ona; ka gona etlang go fodišwa ka ona, e sego ka letšatši la Sabatha.” (Luka 13:14) Molaodi yoo ga a gane gore Jesu o na le matla a go fodiša; go e na le moo, o sola batho ge ba etla go fodišwa ka Sabatha! Jesu o arabela ka tsela e kwagalago o re: “Lena baikaketši, na yo mongwe le yo mongwe wa lena ga a tlemolle poo ya gagwe goba pokolo ya gagwe setaleng ka Sabatha a e iša go yo nwa meetse? Ka gona, na go be go sa swanela gore mosadi yo yo e lego morwedi wa Aborahama le yo Sathane a mo tlemilego nywaga e lesomeseswai, a lokollwe tlemong ye ka letšatši la Sabatha?”—Luka 13:15, 16.

Baganetši ba na le dihlong, eupša mašaba a thabela dilo tše dibotse ka moka tšeo a bonago Jesu a di dira. Ke moka a le gona Judea, Jesu o boeletša diswantšho tše pedi tša boporofeta tša mabapi le Mmušo tšeo a di boletšego pejana a le ka sekepeng Lewatleng la Galilea.—Mateo 13:31-33; Luka 13:18-21.