Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 71

Bafarisei ba Lwantšhana le Motho yo e Bego e le Sefofu

Bafarisei ba Lwantšhana le Motho yo e Bego e le Sefofu

JOHANE 9:19-41

  • BAFARISEI BA LWANTŠHANA LE MOTHO YO E KILEGO YA BA SEFOFU

  • BAETAPELE BA BODUMEDI KE “DIFOFU”

Bafarisei ga ba amogele taba ya gore Jesu o budulotše mahlo a motho yo a belegwego e le sefofu, ka gona ba bitša batswadi ba motho yo. Batswadi bao ba a tseba gore go na le kgonagalo ya gore ba ‘lelekwe sinagogeng.’ (Johane 9:22) Go kgaolwa mo go bjalo gore ba se ke ba gwerana le Bajuda ba bangwe go ka bakela ba lapa ditlamorago tše šoro setšhabeng le go tša boiphedišo.

Bafarisei ba botšiša dipotšišo tše pedi, ba re: “Na yo ke morwa wa lena yo le rego o belegwe e le sefofu? Ka gona, go tla bjang gore bjale a bone?” Batswadi ba araba ba re: “Re tseba gore yo ke morwa wa rena le gore o belegwe e le sefofu. Eupša ga re tsebe gore go tlile bjang gore bjale a bone, e bile ga re tsebe yo a budulotšego mahlo a gagwe.” Gaešita le ge morwa wa bona a ba boditše seo se diregilego, batswadi ba šedi kudu mabapi le tsela yeo ba arabelago ka yona gomme ba re: “Botšišang yena. O godile. O tla ipolelela.”—Johane 9:19-21.

Ka gona, Bafarisei ba bitša motho yo gape gomme ba mo tšhošetša ka go bolela gore ba na le bohlatse bjo bo bontšhago gore Jesu o na le molato. Ba mo laela ka gore: “Nea Modimo letago; re tseba gore motho yo ke modiradibe.” Ge motho yo e bego e le sefofu a efoga tatofatšo ya bona, o re: “Ga ke tsebe ge e ba e le modiradibe.” Eupša o re: “Seo ke se tsebago ke gore le ge ke be ke le sefofu, bjale ke a bona.”—Johane 9:24, 25.

Ka ge Bafarisei ba sa nyake go tlogela taba e le ka tsela yeo, ba tšwela pele ka gore: “O go dirile’ng? O budulotše mahlo a gago bjang?” Motho yo o bontšha sebete ge a araba ka gore: “Ke šetše ke le boditše, eupša ga se la ka la theetša. Ke ka baka la’ng le nyaka go kwa gape? Na le lena le nyaka go ba barutiwa ba gagwe?” Bafarisei ba befetšwe, ba mo latofatša ka gore: “Wena o morutiwa wa motho yoo, eupša rena re barutiwa ba Moshe. Re tseba gore Modimo o boletše le Moshe; eupša ge e le motho yo ga re tsebe mo a tšwago gona.”—Johane 9:26-29.

Ge mokgopedi yo a bontšha go makala, o re: “Ka kgonthe go a makatša gore ga le tsebe moo a tšwago gona, lega go le bjalo o budulotše mahlo a ka.” Ke moka motho yo o nea mabaka a kwagalago ao a bontšhago motho yoo Modimo a mo kwago le go mo amogela, o re: “Re tseba gore Modimo ga a theetše badiradibe, eupša ge e ba motho a boifa Modimo gomme a dira thato ya gagwe, o a mo theetša. Go tloga kgale ga se gwa ka gwa kwewa gore motho le ge e le ofe o kile a budulla motho yo a belegwego e le sefofu mahlo.” Se se dira gore a phethe ka gore: “Ge nkabe motho yo a be a sa tšwe go Modimo, o be a ka se dire selo le gatee.”—Johane 9:30-33.

Bafarisei ba roga mokgopedi ka ge ba sa kgone go ganetša mabaka a gagwe a kwagalago, ba re: “Na wena o re o a re ruta mola e le gore o belegetšwe sebeng?” Ke moka ba mo lahlela ka ntle.—Johane 9:34.

Ge Jesu a ekwa seo se diregilego, o hwetša motho yoo gomme o mmotšiša gore: “Na o dumela go Morwa wa motho?” Motho yo a fodišitšwego o araba ka gore: “Morena, ke mang? Mpotše e le gore ke mo dumele.” Ka tsela e kgodišago, Jesu o re: “O mmone, gomme ge e le gabotse yo a bolelago le wena ke yena yoo.”—Johane 9:35-37.

Motho yo o araba ka gore: “Morena, ke dumela go yena.” A bontšha tumelo le tlhompho, motho yo o khunama pele ga Jesu, yo a bolelago mantšu a matla a rego: “Ke tlile lefaseng ka baka la kahlolo ye: gore bao ba sa bonego ba bone gomme bao ba bonago ba foufale.”—Johane 9:38, 39.

Bafarisei bao ba bego ba le moo ka nako yeo ga ba ipone e le difofu. Eupša go thwe’ng ka tema yeo ba naganago gore ba a e kgatha ya go ba bahlahli ba moya? Ka go ikemelela ba botšiša gore: “Na le rena re difofu?” Jesu o re: “Ge nkabe le le difofu, le be le ka se be le sebe. Eupša bjale le re: ‘Re a bona.’ Sebe sa lena se dula se le gona.” (Johane 9:40, 41) Ge nkabe e be e se barutiši ba molao kua Isiraele, gona go be go ka kwešišega ge ba gana Jesu e le Mesia. Eupša ka baka la go tseba ga bona Molao, ba dirile sebe se segolo ka go gana ga bona Jesu.