Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 30

Tswalano ya Jesu le Tatagwe

Tswalano ya Jesu le Tatagwe

JOHANE 5:17-47

  • MODIMO KE TATAGO JESU

  • TSOGO E A HOLOFETŠWA

Ge Bajuda ba bangwe ba latofatša Jesu ka go tshela Sabatha ka go fodiša monna, Jesu o a fetola o re: “Tate o tšwetše pele a šoma go fihla mo nakong ye, le nna ke tšwela pele ke šoma.”—Johane 5:17.

Ga go na seo Jesu a se dirago seo se thibelwago ke molao wa Modimo mabapi le Sabatha. O ekiša mediro e mebotse ya Modimo ka go dira modiro wa gagwe wa go bolela le wa go fodiša. Ka gona Jesu o tšwela pele a dira botse letšatši le letšatši. Lega go le bjalo, karabo ya gagwe go balatofatši ba gagwe e ba galefiša le go feta peleng, gomme ba nyaka le go bolaya Jesu. Ke ka baka la’ng ba arabela ka tsela ye?

Go oketša tabeng ya go ba ga bona le pono e fošagetšego ya gore Jesu o tshela Sabatha ka go fodiša batho, ba kgopišwa kudu ke ge a bolela gore ke yena Morwa wa Modimo. Ba re ke thogako ge Jesu a tšea Modimo e le Tatagwe, go le bjalo ka ge eka ge Jesu a re Jehofa ke Tatagwe go swana le ge a itekanya le Modimo. Lega go le bjalo, Jesu ga a tšhoge gomme o tšwela pele a ba araba mabapi le tswalano e kgethegilego yeo a nago le yona le Modimo. O re: “Tate o rata Morwa gomme o mmontšha dilo ka moka tšeo yena ka noši a di dirago.”—Johane 5:20.

Tate ke Monei wa Bophelo, le gona o bontšhitše se nakong e fetilego ka go nea batho matla a go tsoša batho. Jesu o tšwela pele ka gore: “Go etša ge Tate a tsoša bahu gomme a ba phediša, Morwa le yena o phediša bao a ratago go ba phediša.” (Johane 5:21) Ruri a ke mantšu a bohlokwa ao a neago kholofelo ka bokamoso! Gaešita le gona bjale, Morwa o tsoša bahu ka kgopolo ya moya. Ka baka leo, Jesu o re: “Yo a kwago lentšu la ka e bile a dumela yo a nthomilego o na le bophelo bjo bo sa felego, le gona ga a ahlolwe eupša o tlogile lehung a fetela bophelong.”—Johane 5:24.

Ga go na pego e bontšhago gore Jesu o be a šetše a tsošitše motho le ge e le ofe yo a bego a hwile e le ka kgonthe, eupša o botša bao ba mmeago molato gore batho bao ba hwilego ba tla tsošwa e le ka kgonthe. O re: “Nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa.”—Johane 5:28, 29.

Ka ge tema yeo Jesu a e kgathago e le e sa tlwaelegago, o bontšha gabotse gore o ka tlase ga Modimo, ge a re: “Nka se dire selo le setee ka la ka . . . eupša ke nyaka gore go dirwe thato ya yo a nthomilego.” (Johane 5:30) Lega go le bjalo, Jesu o hlalosa tema e bohlokwa yeo a e kgathago morerong wa Modimo, yeo ka nako ye a bego a se a tšwa a e dira phatlalatša. Eupša bao ba beago Jesu molato ba na le bohlatse bjo bo fetišago bja gagwe ka dilo tše. Jesu o ba gopotša ka gore: “Le romile batho go Johane [Mokolobetši] gomme yena o hlatsetše therešo.”—Johane 5:33.

Balatofatši ba Jesu le bona ba ka ba ba kwele gore mo e ka bago nywaga e mebedi pejana, Johane o ile a botša baetapele ba bodumedi ba Bajuda mabapi le Yo a tlago ka morago ga gagwe—yo a bego a bitšwa “Moporofeta” le “Kriste.” (Johane 1:20-25) Ge a gopotša balatofatši ba gagwe ka tsela yeo ba kilego ba tšeela godimo Johane yoo mo nakong ye a golegilwego, Jesu o re: “Ka lebakanyana le ile la ikemišetša go thabela seetša sa gagwe kudu.” (Johane 5:35) Lega go le bjalo, o nea bohlatse bjo bogolo go feta Johane Mokolobetši.

Jesu o re: “Mediro yeo ke e dirago [go akaretša le phodišo yeo a sa tšwago go e dira] e hlatsela gore Tate o nthomile.” Ka ntle le seo, o tšwela pele ka gore: “Tate yo a nthomilego yena ka noši o ntlhatsetše.” (Johane 5:36, 37) Ka mohlala, Modimo o neile bohlatse ka Jesu kolobetšong ya gagwe.—Mateo 3:17.

Ge e le gabotse, bao ba latofatšago Jesu ga ba na lebaka la go mo gana. Mangwalo ona ao ba ipolelago gore ba a nyakišiša a a mo hlatsela. Jesu o phetha ka gore: “Ge le ka be le dumetše Moshe le be le tla ntumela, gobane yena yoo o ngwadile ka nna. Eupša ge e ba le sa dumele mangwalo a yena yoo, le tla dumela bjang seo ke se bolelago?”—Johane 5:46, 47.