Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 36

Tona ya Madira e Bontšha Tumelo e Kgolo

Tona ya Madira e Bontšha Tumelo e Kgolo

MATEO 8:5-13 LUKA 7:1-10

  • MOHLANKA WA TONA YA MADIRA O A FODIŠWA

  • BAO BA NAGO LE TUMELO BA TLA ŠEGOFATŠWA

Ka morago ga go nea Thuto ya gagwe ya Thabeng, Jesu o ya motseng wa Kaperenaume. Ge a le moo bagolo ba bangwe ba Bajuda ba tla go yena. Ba romilwe ke monna wa setlogo se se fapanego—tona ya madira a Baroma.

Mohlanka yo a rategago wa tona ya madira o babja o šoro gomme o kgauswi le go hwa. Le ge tona ya madira e le yo mongwe wa Bantle, e tsoma thušo ya Jesu. Bajuda ba botša Jesu gore mohlanka wa monna yo o “laditšwe ka ntlong ke go repha ditho, o kwa bohloko kudu,” mohlomongwe a le bohlokong bjo šoro. (Mateo 8:6) Bagolo ba Bajuda ba kgonthišetša Jesu gore tona ye ya madira e swanelwa ke go direlwa se, ba hlalosa gore: “O rata setšhaba sa rena gomme o re agetše sinagoge.”—Luka 7:4, 5.

Go se go ye kae, Jesu o sepela le bagolo bao ba ya ntlong ya tona ya madira. Ge ba batamela ntlong, tona e romela bagwera ba yona gore ba yo re: “Mohlomphegi, o se ke wa tshwenyega gobane ga go a ntshwanela gore o tsene ka tlase ga tlhaka ya ntlo ya ka. Ka baka leo, ga se ka ipona ke swanelwa ke go tla go wena.” (Luka 7:6, 7) A mantšu a bontšhago boikokobetšo gakaakang go tšwa go motho yo a tlwaetšego go nea ditaelo! Le gona a bontšha kamoo monna yo a fapanego le Baroma bao ba swarago bahlanka gampe.—Mateo 8:9.

Ga go pelaelo gore tona ya madira e tseba gore Bajuda ga ba gwerane le bao e sego Bajuda. (Ditiro 10:28) Mohlomongwe tona ya madira e naganne se, e botša bagwera ba yona gore ba kgopele Jesu ba re: “Ntšha lentšu gomme mohlanka wa ka a fole.”—Luka 7:7.

Jesu o makatšwa ke go kwa se gomme o re: “Ruri ke a le botša: Gaešita le Isiraeleng ga se ka ka ka hwetša tumelo e kgolo gakaakaa.” (Luka 7:9) Ge bagwera ba gagwe ba boela ntlong ya tona ya madira, ba lemoga gore mohlanka yo a bego a babja bjale o phetše gabotse.

Ge Jesu a fodišitše motho yoo, o diriša sebaka se go kgonthišetša gore bao e sego Bajuda bao ba nago le tumelo ba tla newa ditšhegofatšo, o re: “Ba bantši ba ba tšwago ka bohlabela le ka bodikela ba tla tla ba dula tafoleng le Aborahama le Isaka le Jakobo Mmušong wa magodimo.” Go thwe’ng ka Bajuda ba go hloka tumelo? Jesu o re ba “tla lahlelwa leswiswing ka ntle. Moo ke mo go tlago go ba le dillo le ditsikitlano tša meno.”—Mateo 8:11, 12.

Ka gona, Bajuda ba tlhago bao ba sa amogelego sebaka seo se neilwego bona pele gore e be karolo ya Mmušo le Kriste ba ka se amogelwe. Eupša go ka thwe Bantle ba tla amogelwa gore ba dule tafoleng ya gagwe, e lego “Mmušong wa magodimo.”