Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Jesu—Tsela, Therešo le Bophelo

 KGAOLO 64

Go Nyakega ga go Lebalela

Go Nyakega ga go Lebalela

MATEO 18:21-35

  • NA GO NYAKEGA GO LEBALELA GAŠUPA?

  • SESWANTŠHO SA MABAPI LE MOHLANKA YO A SE NAGO KGAUGELO

Petro o kwele keletšo ya Jesu ya mabapi le kamoo bothata bo ka rarollwago ka gona magareng ga barwarre ka gore ba leke go boledišana. Lega go le bjalo, go bonagala Petro a nyaka go tseba ka go lebanya gore o swanetše go leka go lebalela gakae.

Petro o a botšiša o re: “Morena, ngwanešo o swanetše go ntshenyetša gakae gomme nna ke mo lebalele gakae? Go fihla gašupa?” Baetapele ba bangwe ba bodumedi ba ruta gore motho o swanetše go lebalela go fihla gararo. Ka gona Petro a ka nagana gore o tla be a lebaletše ngwanabo kudu ge e ba a ka mo lebalela “go fihla gašupa.”—Mateo 18:21.

Lega go le bjalo, kgopolo ya go boloka pego e bjalo ya diphošo ga e sepedišane le thuto ya Jesu. Ka gona o phošolla Petro o re: “Ke re go wena, e sego go fihla gašupa, eupša go fihla ga masomešupa-šupa.” (Mateo 18:22) Seo ka mantšu a mangwe se bolela go lebalela ka mo go feletšego. Petro ga se a swanela go lekanyetša makga ao a lebalelago ngwanabo ka ona.

Ke moka Jesu o botša Petro le ba bangwe seswantšho go ba bontšha boikarabelo bja bona bja gore e be bao ba lebalelago. Se bolela ka mohlanka yo a palelwago ke go ekiša mong wa gagwe yo a nago le kgaugelo. Kgoši e nyaka go lokiša melato ya tša ditšhelete le bahlanka ba yona. Mohlanka yo mongwe yo a nago le sekoloto se segolo kudu sa ditalente tše 10 000 [ditenariase tše 60 000 000] o tlišwa go yena. Ga go na kamoo a ka lefago sekoloto seo. Ka gona kgoši e laela gore mohlanka yoo, mosadi wa gagwe le bana ba gagwe ba rekišwe gomme sekoloto se lefše. Ka baka leo, mohlanka o wela fase dinaong tša mong wa gagwe gomme a mo lopa a re: “Se mphelele pelo ke tla go lefa se sengwe le se sengwe.”—Mateo 18:26.

Kgoši e kwela mohlanka wa yona bohloko gomme e phumola molato wa gagwe o mogolo kudu. Gateetee ge kgoši e dirile seo, mohlanka a tšwa a hwetša mohlankagotee le yena yo a mo kolotago ditenariase tše 100. O swara mohlanka yoo yo mongwe gomme a thoma go mo kgama, a re: “Ntefe seo o nkolotago.” Eupša mohlankagotee yoo a wela fase dinaong tša mohlanka yo a mo kolotago a mo lopa a re: “Se mphelele pelo ke tla go lefa.” (Mateo 18:28, 29) Lega go le bjalo, mohlanka yo kgoši e mo lebaletšego molato wa gagwe ga a ekiše mong wa gagwe. O dira gore mohlankagotee le yena, yo a kolotago tšhelete e nyenyane, a lahlelwe kgolegong go fihla a ka lefa seo a se kolotago.

Ke moka Jesu o tšwela pele go bolela gore bahlanka ba bangwe bao ba bonego tshwaro yeo e se nago kgaugelo ba ya go botša mong wa bona, yoo ka pefelo a laelago gore mohlanka yoo a bitšwe, gomme a re: “Mohlanka yo kgopo, ke go phumoletše molato wola ka moka ge o be o ntopa. Na le wena o be o sa swanela go gaugela mohlankagotee le wena bjalo ka ge le nna ke go gaugetše?” Kgoši e befetšwego e gafela mohlanka yo a sa gaugelego go balebeledi ba kgolego go fihla a lefa sohle seo a se kolotago. Jesu o phetha ka gore: “Tate wa legodimong le yena o tla le swara bjalo, ge e ba yo mongwe le yo mongwe wa lena a sa lebalele ngwanabo go tšwa pelong.”—Mateo 18:32-35.

A thuto e botse yeo e swanetšego go re ruta ka go lebalela! Modimo o re lebaletše molato o mogolo wa sebe. Phošo le ge e le efe yeo ngwanabo rena wa Mokriste a ka re direlago yona ke e nyenyane ge e bapišwa le molato o mogolo wa rena wa sebe. Le gona Jehofa ga a re lebalele gatee feela eupša o re lebalela ga dikete. Na re ka se lebalele ngwanabo rena ka makga a sego kae gaešita le ge re na le lebaka la go belaela? Bjalo ka ge Jesu a rutile Thutong ya Thabeng, Modimo o tla “re [lebalela] melato ya rena, bjalo ka ge le rena re lebaletše bao ba nago le melato go rena.”—Mateo 6:12.

Ithute ka mo go oketšegilego

Lebalelanang ka Bolokologi

Naganang kamoo re ka ekišago mohlala wa Jehofa wa go ikemišetša go lebalela.